《聖經故事三字詩》

 | | | 轉寄

19. Lîng-kó (2) .... 靈果 (二)

作者 Tân Tshing-tsùn 2009.06.28

Un tsû pi, tsiong sim pí,
恩慈悲，將心比，
Lô͘-uí tsi̍h, bô tû-khì,
蘆葦折，無除去，
Sió hé-tsi̍h, iú kng-khì,
小火舌，有光氣，
Suè hua-hí, tuā buán-ì.
細歡喜，大滿意。

Siān-liông siān, ná sîn-sian,
善良善，若神仙，
Tsun ló sian, hū-iù liân,
尊老先，婦幼連，
Ji̍p sìng-tiān, sim hōng-hiàn,
入聖殿，心奉獻，
Tshuì-phé siàn, bīn bô piàn,
嘴[面比]搧，面無變，

Tiong-sìn si̍t, sìn-iōng it,
忠信實，信用一，
Nā kóng tsi̍t, tsiū-sī tsi̍t,
若講一，就是一，
M̄-sī tshit, bián īng pit,
不是七，免用筆，
Kiâⁿ tsìng-ti̍t, kiat hó si̍t.
行正直，結好實。

Lūn un-jiû, bû só͘-kiû,
論溫柔，無所求，
Tuì ló-iù, uē tsun-siú,
對老幼，話遵守，
Khik-khui siū, un-luán siū,
克虧受，溫暖巢，
Tsú pó-iū, siōng tsū-iû.
主保佑，上自由。

Tio̍h tsún-tsat, tseh-tsè-la̍t,
著撙節，節制力，
Sim bô kat, tsū-jiân ta̍t,
心無結，自然達，
Bô kháu-kak, bô khioh-kak,
無口角，無拾覺*，
Khuàⁿ khang-khak, si̍t tsa̍t-pak.
看空殼，實實腹。


Jîn-ài it, sim sîng-si̍t,
仁愛一，心誠實，
Huaⁿ-hí jī, kiâⁿ kong-gī,
歡喜二，行公義，
Hô-pîng saⁿ, thiⁿ-sài saⁿ,
和平三，天使裳，
Thun-lún sì, piān hui-sī.
吞忍四，辨非是。
Tsû-pi gō͘, si sià hō͘,
慈悲五，施捨雨，
Siān-liông la̍k, phiàn sì-kak,
善良六，遍四角，
Tiong-sìn tshit, tsîng-āu it,
忠信七，前後一，
Un-jiû pueh, gâu kái-sueh,
溫柔八，gâu解說，
Tsún-Tsat káu, hó tshuì-táu,
撙節九，好嘴斗**，
Kuí tsióng tsí, sio̍k-tī lí?
幾種子，屬於你？

* khioh-kak, buē-hiáu siōng-tsìn, 未曉上進; ** uī-káu, 胃口