《雙文開講》

 | | | 轉寄

好朋友ê好消息

作者 Ông Tsiau-bûn 2005.09.11

接tio̍h tsit種ê通知：

「多謝雙方家人ê認同、牧師ê配合，hō͘阮有一場無穿婚紗kap hip婚紗相、無請客、免收禮金、免收禮物ê結婚禮拜。除了長輩有用書面ê邀請函稟告外，朋友kap平輩僅以E-MAIL通知大家。敬請見諒。」

婚禮m̄免帖á通知，只用e-mail，真夠意思！無hip婚紗、無請客，節省為婚禮ê忙亂時間kap費用，tsit對新人真會曉tia̍k算盤！但是，我實在恰(kah)意tsit種ê婚禮，對心底為tsit對新人歡喜。這實在是今年siōng好ê消息了！

新娘是多年好友，伊實在無sîng(像)活tī tsit-ê時代ê女性。伊有真現代ê一面：嘴真利、世面真闊、人情世事看bē少。伊看周圍真tsē人變心、劈腿、婚變，家己iáu遭遇tio̍h hō͘交往近十年ê男朋友放sak ê慘劇，伊iáu是帶tio̍h童話般ê愛情觀，相信真愛ê存在。

伊kap新郎認識也超過十年阿pah，一開始因為年歲ê距離，對方又koh有到國外求學、就業計畫，彼此m̄敢有什麼承諾。伊其實真有機會選擇別人眼中bē-bái ê婚姻，新郎應該也有交往別ê女孩ê經驗，但是經過多年分隔兩地、m̄-bat間斷ê連絡，以及種種考驗，in jú來jú知影tsit世人大概真oh tú-tio̍h別人ē-tàng取代對方，而且種種社會眼光或世俗價值ê阻擋，lóng是ē-tàng hāⁿ(跨)過去ê。

婚姻tī今á日tsē-tsē人ê眼中kah-ná只是一種取得法律保障ê形式。不過，tsit兩位虔誠ê基督徒，iáu是kā tī上帝面前ê公開誓約看做展開人生另一階段ê重要儀式，表達共同組成家庭ê決心，這真是美好ê事情。

我想，in tī處理婚禮ê態度上，已經表明in siòng看重ê是什麼，á無看重ê是什麼。這真正是一個美好ê童話！雖然m̄是王子kap公主，in tī通過種種考驗了後，應該ē-tàng tuì taⁿ起過tio̍h幸福快樂ê生活。

祝福in有一個快樂ê新家庭！我相信一定會lah。