《押韻啟應詩篇》

 | | | 轉寄

台語押韻啟應詩篇 96

作者 Tīⁿ Jî-gio̍k 2007.12.17

96

1a　Lín tio̍h ǹg Iâ-hô-hua tshiùⁿ sin ê kua,
　　恁 著 向 耶 和 華 唱 新 的 歌，

1b　　　Tsuân-tuē lóng tio̍h ǹg Iâ-hô-hua tshiùⁿ-kua.
　　　　全 地 攏 著 向 耶 和 華 唱 歌。

2a　Tio̍h ǹg Iâ-hô-hua tshiùⁿ-kua, tsiok-siā I ê miâ bô suah,
　　著 向 耶 和 華 唱 歌， 祝 謝 祂 的 名 無 息，

2b　　　Ji̍t-ji̍t thuân-pò I ê kiù-un khui-khuah.
　　　　日 日 傳 報 祂 的 救 恩 開 闊 。

3a　Tī lia̍t-pang ê tiong-kan kóng-khí I ê îng-kng;
　　在 列 邦 的 中 間 講 起 祂 的 榮 光；

3b　　　Tī bān peh-sìⁿ ê tiong-kan
　　　　在 萬 百 姓 的 中 間
　　　　kóng-khí I kî-biāu ê só͘-tsuè tsiâu-tsn̂g.
　　　　講 起 祂 奇 妙 的 所 做 齊 全。

4a　In-uī Iâ-hô-hua tsuè tuā, ing-kai siū ki̍k-tuā ê o-ló tsun-kuì,
　　因為 耶 和 華 做 大，應 該 受 極 大 的讚美 尊 貴，

4b　　 I tī tsìng sîn-bîng ê tíng-bīn ing-kai siū kìng-uì .
　　　　祂 在 眾 神 明 的 頂 面 應 該 受 敬 畏。

5a　In-uī lia̍t-pang ê sîn-bîng lóng sī hu-ké ;
　　因為 列 邦 的 神 明 攏 是 虛 假；

5b　　　To̍k-to̍k Iâ-hô-hua tshòng-tsō tsiah-ê thiⁿ kap tē .
　　　　獨 獨 耶 和 華 創 造 諸 些 天 與 地。

6a　Tī I ê bīn-tsîng ū tsun-kuì kap ui-giâm pho͘-tsng,
　　在 祂 的 面 前 有 尊 貴 與 威 嚴 鋪 妝，

6b　　　Tī I ê sìng-só͘ ū kuân-lîng kap îng-kng.
　　　　在 祂 的 聖 所 有 權 能 與 榮 光。

7a　Peh-sìⁿ-tiong ê ta̍k-tso̍k ah ,
　　百 姓 中 的 各 族 啊，
　　lín tio̍h tsiong kuân-lîng îng-kng bô ún-muâ,
　　恁 著 將 權 能 榮 光 無 隱 瞞，

7b　　　Kui hō͘ Iâ-hô-hua; kui hō͘ Iâ-hô-hua.
　　　　歸 給 耶 和 華； 歸 給 耶 和 華。

8a　Īng I ê miâ só͘ ing-kai tit-tio̍h ê îng-kng, kui hō͘ Iâ-hô-hua:
　　用 祂的 名 所 應 該 得 著 的 榮 光， 歸 給 耶 和 華：

8b　　　Tuà lé-mi̍h lâi ji̍p I ê īⁿ kám-siā bô suah.
　　　　帶 禮 物 來 入 祂 的 院 感 謝 無 息。

9a　Tio̍h īng sìng-kiat ê tsng-thāⁿ kìng-pài Iâ-hô-hua;
　　著 用 聖 潔 的 妝 飾 敬 拜 耶 和 華；

9b　　　Tsuân-tuē tī I ê bīn-tsîng ngia̍uh-ngia̍uh-tshuah.
　　　　全 地 在 祂的 面 前 蠕 蠕 惙。

10a　Tī lia̍t-pang-tiong tio̍h kóng,
　　　在 列 邦 中 著 講，

10b　　　Iâ-hô-hua tsuè ông,
　　　　　耶 和 華 做 王，

10c　Sè-kài kian-kò͘, buē iô-tāng kàu thiⁿ-piⁿ;
　　　世 界 堅 固，不 搖 動 到 天 邊；

10d　　　I beh tsiàu kong-pîng sím-phuàⁿ bān peh-sìⁿ.
　　　　　祂 要 照 公 平 審 判 萬 百 姓。

11a　Guān thiⁿ huaⁿ-hí, tuē khuài-lo̍k muá siâⁿ;
　　　願 天 歡 喜，地 快 樂 滿 城；

11b　　　Guān hái kap kî-tiong só͘ tshiong-muá--ê lóng tshut tuā-siaⁿ;
　　　　　願 海 與 其 中 所 充　　滿 的 攏 出 大 聲；

12a　Guān tshân-hn̂g kap kî-tiong só͘-ū--ê , lóng khuài-lo̍k o-ló I ê miâ;
　　　願 田 園 及 其 中 所有 的, 攏 快 樂 讚美 祂的名；

12b　　　Hit-sî tshiū-nâ-lāi ê tshiū-ba̍k,
　　　　　彼 時 樹 林 內 的 樹 木，
　　　　lóng beh tī Iâ-hô-hua ê bīn-tsîng tshut huaⁿ-hí ê siaⁿ; 　　
　　　　　攏 要 在 耶 和 華 的 面 前 出 歡 喜 的 聲；

13a　In -uī I lâi lah,
　　　因 為 祂 來 啦，

13b　　　I lâi beh sím-phuàⁿ tsuân-tuē lah,
　　　　　祂 來 要 審 判 全 地 啦，

13c　I beh tsiàu kong-gī sím-phuàⁿ sè-kài,
　　　祂 要 照 公 義 審 判 世 界，

13d　　　Tsiàu I ê sìn-si̍t sím-phuàⁿ bān peh-sìⁿ bô hun kok-kài.
　　　　　照 祂 的 信 實 審 判 萬 百 姓 無 分 國 界。