《押韻啟應詩篇》

 | | | 轉寄

台語押韻啟應詩篇 17

作者 Tīⁿ Jî-gio̍k 2006.04.23

Tāi-pi̍t ê si.

1a　Iâ-hô-hua ah, kiû Lí thiaⁿ tsin-tsiàⁿ ê sin-sò͘ ,
　　耶　和　華　啊， 求Lí　聽　真　正　的申　訴，
1b　　　Liû-sim thiaⁿ guá ê kiò-khó͘.
　　　　留　心　聽　我　的叫　苦。

1c　Guá ê kî -tó m̄ -sī tuì kan-tsà ê tshuì-tûn tshut-siaⁿ,
　　我　的祈禱　不是　從　奸　詐　的嘴　唇　出　聲，
1d　　　Kiû Lí àⁿ hī-khang lâi thiaⁿ.
　　　　求　Lí　俯耳　孔　來　聽。

2a　Guān Lí tuì guá ê phuàⁿ-sû, tuì Lí ê bīn-tsîng huat-tshut,
　　願 Lí 對 我 的 判 詞，從Lí的 面 前 發 出，
2b　　　Guān Lí ê tshiú īng tsìng-ti̍t lâi kàm-tshat, bô óng-khut.
　　　　願Lí的 手 用 正 直 來 鑑 察， 無 枉 屈。

3a　Lí í -king tshì-giām guá ê sim,
　　Lí已 經 試 驗 我 的 心，
3b　　　Lí tī mî--sî in-uī kàm-tshat guá, só͘ -í ba̍k-tsiu kim-kim.
　　　　Lí在 暝 時 因 為 鑑 察 我，所以 目 珠 金 金。

3c　Lí thuàn-liān guá,
　　Lí　鍛　鍊　我，
3d　　　Bô tshē-tio̍h sím-mi̍h tsuē-kuà.
　　　　無 找 到 甚 麼 罪 過。

3e　Guá li̍p-tsì sîng-si̍t,
　　我 立 志 誠 實，
3f　　　Hō͘ guá ê tshuì bô ū kè-sit .
　　　　讓 我 的 嘴 無 有 過 失。

4a　Lūn-kàu lâng ê kiâⁿ-tsuè,
　　論 到 人 的 行 做，
4b　　　Guá thàn Lí só͘ kóng ê uē ,
　　　　我 趁Lí所 講 的 話，

4c　Ka-kī kín-siú Lí tshuì-tûn ê uē ,
　　自 己 謹 守Lí嘴 唇 的 話，
4d　　　Bô tsiàu kiông-ok-lâng ê lō͘ lâi tsuè.
　　　　無 照 強 惡 人 的 路 來 做。

5a　Guá ê kha tiāⁿ-tiāⁿ kiâⁿ Lí ê lō͘ ,
　　我 的 腳 定 定 行Lí的 路，
5b　　　Guá ê kha bē-bat ta̍h-tshū tsi̍t-pō͘ .
　　　　我 的 腳 不 曾 踏 斜 一 步。

6a　Siōng-tè ah , guá beh kiû-kiò Lí bô suah,
　　上 帝 啊， 我 要 求 叫Lí 無 息，
　　kiû Lí lâi ìn-tap guá;
　　求 Lí 來 應 答 我；
6b　　　Kiû Lí àⁿ hī-khang thiaⁿ guá khún-kiû ê uē , bô koh thua.
　　　　求Lí 俯 耳 孔 聽 我 懇 求 的 話，無 又 拖。

7a　Kiû Lí hián-bîng Lí kî-biāu ê jîn-tsû tsi̍t--ē ,
　　求Lí 顯 明 Ｌí奇 妙 的 仁 慈 一 下，
7b　　　Kiû Lí īng tsiàⁿ-tshiú kiù uá-khò Lí--ê ,
　　　　求 Lí 用 右 手 救 倚 靠 Lí 的，
　　　　thuat-lī hiah-ê khí-lâi kong-kik in--ê .
　　　　脫 離 彼 個 起 來 攻 擊 伊 的。

8a　Kiû Lí pó-hō͘ guá tshin-tshiūⁿ pó-hō͘ ba̍k-tsiu-jîn,
　　求 Ｌí 保 護 我 親 像 保 護 目 珠 仁，
8b　　　Tsiong guá khàm-ba̍t tī Lí ê si̍t ê lāi-bīn.
　　　　將 我 蓋 密 在Lí 的 翅 的 內 面。

9a　Hō͘ guá thuat-lī hiah-ê tshiúⁿ-kiap guá ê pháiⁿ-lâng,
　　讓 我 脫 離 彼 個 搶 劫 我 的 歹 人，
9b　　　Tsiū-sī uî-khùn guá, beh hāi guá sìⁿ-miā ê tuì-ti̍k ê lô-bāng.
　　　　就 是 圍 困 我，要 害 我 性 命 的 對 敵 之 羅 網。

10a　In ê sim hō͘ ka-kī ê iû pau-ba̍t teh pháiⁿ--kuè,
　　伊 的 心 讓 自 己 的 油 包 密 在 歹 過，
10b　　　In ê tshuì kóng kiau-ngō͘ ê uē .
　　　　伊 的 嘴 講 驕 傲 的 話。

11a　In ê kha-pō͘ hiān-tsāi teh uî-khùn guán,
　　伊 的 腳 步 現 在 在 圍 困 阮，
11b　　　In tsù-ba̍k beh tshia-tó guán tī tuē--ni̍h tsiah kam-guān.
　　　　伊 注 目 要 翻 倒 阮 在 地 裡 即 甘 願。

12a　In tshin-tshiūⁿ sai siàu-siūⁿ beh kā mi̍h;
　　伊 親 像 獅 數 想 要 咬 物；
12b　　　Koh tshin-tshiūⁿ bíng ê sai-á-thûn tī am-ba̍t ê só͘-tsāi teh bih.
　　　　又 親 像 猛 的 獅 子 屯 在 掩 密 的 所 在 在 匿。

13a　Iâ-hô-hua ah , kiû Lí khiā-khí-lâi tí-tng tuì-ti̍k,
　　耶 和 華 啊， 求 Ｌí 站 起 來 抵 擋 對 敵，
13b　　　Tsiong in táⁿ-tó bô koh ū khí-sik.
　　　　將 伊 打 倒 無 再 有 起 色。

13c　Īng Lí ê to kiù guá ê sìⁿ-miā,
　　用 Ｌí的 刀 救 我 的 性 命，
13d　　　Thuat-lī pháiⁿ-lâng ê hāi-miā.
　　　　脫 離 歹 人 的 害 命。

14a　Iâ-hô-hua ah , īng Lí ê tshiú tuì sè-kan
　　耶 和 華 啊，用 Ｌí的 手 從 世 間
　　tuān-tsua̍t hiah-ê pháiⁿ-lâng,
　　斷 絕 那 些 壞 人，

14b　　　Tsiū-sī tuān-tsua̍t hiah-ê tī ua̍h-lâng ê tiong-kan,
　　　　就 是 斷 絕 那 些 在 活 人 的 中 間，
　　　　m̄ ing-kai siū hok-hūn ê sè-kan-lâng.
　　　　不 應 該 受 福 份 的 世 間 人。

14c　Kiû Lí tsiong Lí ê bí-niû tshiong-muá hō͘ bih tī Lí hia ê lâng,
　　求 Ｌí 將 Ｌí 的 米 糧 充 滿 讓 匿 在Ｌí 彼 的 人，
14d　　　In ê kiáⁿ-jî iā kàu sim-muá ì-tsiok kuè-tang,
　　　　伊 的 子 兒 也 到 心 滿 意 足 過 冬，
　　　　tsiong kì -ū ê tsâi-bu̍t lâu hō͘ in ê kiáⁿ-sun tshin-lâng.
　　　　將 既 有的 財 物 留 給 伊 的 子 孫 親 人。

15a　Lūn kàu guá, guá beh siū Lí khíng-tīng guá ê gī ,
　　論 到 我， 我 要 受 Ｌí 肯 定 我 的 義，
15b　　　Lâi khuàⁿ-kìⁿ Lí ê bīn ê tsû-pi ,
　　　　來 看 見 Ｌí 的 面 的 慈 悲，

15c　Guá khùn-tshíⁿ ê sî , khuàⁿ-kìⁿ Lí ê bīn-iông ê siù-khì,
　　我 睡 醒 的 時，看 見 Ｌí 的 面 容 的 秀 氣，
15d　　　Tsiū sim-muá lâi huaⁿ-hí.
　　　　　就　心　滿　來　歡　喜。