《押韻啟應詩篇》

 | | | 轉寄

台語押韻啟應詩篇 50

作者 Tīⁿ Jî-gio̍k 2006.12.24

50　　A-sat ê si.

1a　Tsuân-lîng ê Siōng-tè Iâ-hô-hua ū kóng--ê ,
　　全 能 的 上 帝 耶 和 華 有 講 的，

1b　　　Lâi tiàu phó͘-thiⁿ-ē ;
　　　　來 召 普 天 下；

　　　　Tuì ji̍t-tshut kàu ji̍t-lo̍h ê só͘-tsāi tsuân-tē .
　　　　從 日 出 到 日 落 的 所 在 全 地。

2a　Tuì tsiâu-tsn̂g suí ê Sik-an ,
　　從 齊 全 美 的 錫 安，

2b　　　Siōng-tè ū huat-tshut kng pò pîng-an .
　　　　上 帝 有 發 出 光 報 平 安。

3a　Guán ê Siōng-tè beh lâi,
　　阮 的 上 帝 要 來，

3b　　　Kuat-tuàn bô tsīng-tsīng lâi;
　　　　決 斷 無 靜 靜 來；

3c　Ū hé tī I ê bīn-tsîng teh sio,
　　有 火 在 祂 的 面 前 在 燒，

3d　　　Ū hong tī I ê sì -uî teh thàu teh iô .
　　　　有 風 在 祂 的 四 圍 在 透 在 搖。

4a　I beh tuì tíng-bīn kiò tuē kap thiⁿ,
　　祂要 從 頂 面 叫 地 與 天，

4b　　　Uī -tio̍h beh sím-phuàⁿ I ê peh-sìⁿ;
　　　　為 著 要 審 判 祂 的 百 姓；

5a　Kóng, tio̍h tsio-tsi̍p Guá sìng--ê peh-sìⁿ lâi Guá tsia,
　　講， 著 召 集 我 聖 的 百 姓 來 我 此，

5b　　　Tsiū-sī hiah-ê īng tsè-sū kap Guá li̍p-iok ê lâng lâi tsia.
　　　　就 是 那 些 用 祭 祀 與 我 立 約 的 人 來 此。

6a　Tsiah-ê thiⁿ beh hián-bîng I ê kong-gī íng-sè ;
　　諸 些 天 要 顯 明 祂 的 公 義 永 世；

6b　　　In -uī Siōng-tè pún-sin sī tsuè sím-phuàⁿ--ê .
　　　　因 為 上 帝 本 身 是 作 審 判 者。

7a　Guá ê peh-sìⁿ ah, lín tio̍h thiaⁿ, Guá beh kóng kàu sì-kè ,
　　我 的 百 姓 啊，恁 著 聽， 我 要 講 到 四 界，

7b　　　Guá sī Siōng-tè , lí ê Siōng-tè .
　　　　我 是 上 帝，你 的 上 帝。

8a　Guá bô in -uī lí ê tsè-sū tsik-pī lí bô khiân-sîng,
　　我 無 因 為 你 的 祭 祀 責 備 你 無 虔 誠，

8b　　　Lí ê sio-tsè siông-siông tī Guá ê bīn-tsîng.
　　　　你 的 燒 祭 常 常 在 我 的 面 前。

9a　Guá bô tuì lí ê tshù tshú kang ê gû ,
　　我 無 對 你 的 厝 取 公 的 牛，

9b　　　Lí ê tiâⁿ ê kang ê suaⁿ-iûⁿ, Guá ia̍h bô tshú.
　　　　你 的 庭 的 公 的 山 羊，我 亦 無 取。

10a　In-uī tshiū-nâ-lāi ê pah-siù,
　　　因 為 樹 林 內 的 百 獸，

10b　　　Tshing-suaⁿ ê tsing-siⁿ, lóng sī Guá teh kò͘-siú .
　　　　　千 山 的 畜 牲， 攏 是 我 在 顧 守。

11a　Suaⁿ-tiong ê pe-tsiáu, Guá lóng tsai;
　　　山 中 的 飛 鳥， 我 攏 知；

11b　　　Khòng-iá ê tsáu-siù ia̍h lóng sio̍k tī Guá tiâu-lāi .
　　　　　曠 野 的 走 獸 亦 攏 屬 在 我 廄 內。

12a　Guá nā iau, bô beh kā lí kóng siông-sè ,
　　　我 若 餓， 無 欲 與 你 講 詳 細，

12b　　　In-uī sè-kài kap kî-tiong só͘ tshiong-muá--ê , lóng sī Guá--ê .
　　　　　因 為 世 界 與 其 中 所 充 滿 的，攏 是 我 的。

13a　Guá kiám beh tsia̍h gû-káng ê bah,
　　　我 豈 欲 吃 牛 牡 的 肉，

13b　　　Á -sī lim suaⁿ-iûⁿ-káng ê huih mah?
　　　　　或 是 喝 山 羊 牡 的 血 嗎？

14a　Lí tio̍h īng kám-siā tsuè tsè, hiàn hō͘ Siōng-tè ;
　　　你 著 用 感 謝 作 祭， 獻 給 上 帝；

14b　　　Koh tio̍h tuì Tsì-kuân--ê , siā lí ê guān lâi kuī--teh.
　　　　　又 著 從 至 高 者，謝 你 的 願 來 跪 在。


15a　Tī huān-lān ê ji̍t tio̍h kiû-kiò Guá;
　　　在 患 難 的 日 著 求 叫 我；

15b　　　Guá beh kiù lí , lí ia̍h beh îng-kng Guá.
　　　　　我 要 救 你，你 亦 要 榮 光 我。

16a　Nā-sī Siōng-tè tuì pháiⁿ-lâng kóng--lah,
　　　若 是 上 帝 對 壞 人 講 啦，

16b　　　Lí thái-thó káⁿ thuân Guá ê lu̍t-lē lâi khi-tsà,
　　　　　你 豈 可 敢 傳 我 的 律 例 來 欺 詐，

　　　　tshuì kóng-khí Guá ê iok ah ?
　　　　　嘴 講 起 我 的 約 啊？

17a　Kî-si̍t lí iàm-tsiān kà-sī iáu bô kàu,
　　　其 實 你 厭 賤 教 示 尚 不 夠，

17b　　　Tsiong Guá ê uē hiat tī lí ê ka-tsiah-āu.
　　　　　將 我 的 話 棄 在 你的 ka 脊 後。

18a　Lí khuàⁿ-kìⁿ tsha̍t, tsiū kap i tâng-sim tâm-lūn;
　　　你 看 見 賊， 就 與 他 同 心 談 論；

18b　　　Koh kap kiâⁿ kan-îm ê lâng saⁿ-kap ū hūn.
　　　　　又 與 行 姦 淫 的 人 相 與 有 份。

19a　Lí hō͘ lí ê tshuì siông-siông kóng pháiⁿ-uē ,
　　　你 使 你 的 嘴 常 常 講 歹 話，

19b　　　Lí ê tsi̍h tsō-tsok kan-tsà ké-uē .
　　　　　你 的 舌 造 作 奸 詐 假 話。

20a　Lí tsē-teh huí-pòng lí ê hiaⁿ-tī ;
　　　你 坐 著 毀 謗 你 的 兄 弟；

20b　　　Bû-luā lí ê tông-pau beh hāi -sí .
　　　　　誣 賴 你的 同 胞 要 害 死。

21a　Lí kiâⁿ tsiah-ê sū , Guá tsīng-tsīng bô kóng;
　　　你 行 這 些 事， 我 靜 靜 無 講 ；

21b　　　Lí phah-sǹg Guá tú-tú kap lí tsi̍t-iūⁿ teh kau-thong.
　　　　　你 打 算 我 抵抵 與 你 一 樣 在 交 通。

21c　Kî-si̍t Guá beh tsik-pī lí bô thîng;
　　　其 實 我 要 責 備 你 無 停 ；

21d　　　Tsiong tsiah-ê sū pâi tī lí ê ba̍k-tsiu-tsîng.
　　　　　將 這 些 事 排 在 你 的 目 珠 前。

22a　Lín buē-kì-tit Siōng-tè ê lâng, tio̍h siūⁿ tsit- ê in-iû ,
　　　恁 不 記 得 上 帝 的 人， 著 想 這 個 因 由，

22b　　　Bián-tì Guá tsiong lín thiah-tshuì, bô lâng tsín-kiù.
　　　　　免 致 我 將 恁 撕 碎， 無 人 拯 救。

23a　Kìⁿ-nā īng kám-siā hiàn tsuè tsè--ê ,
　　　凡 若 用 感 謝 獻 作 祭 的，

23b　　　Tsiū-sī îng-kng Guá--ê ;
　　　　　就 是 榮 光 我 的；

23c　Kín-sīn kiâⁿ ê lâng,
　　　謹 慎 行 的 人，

23d　　　Guá beh hō͘ i khuàⁿ-kìⁿ Siōng-tè ê kiù-un bô làng.
　　　　　我 要 使 他 看 見 上 帝 的 救 恩 無 閬。