《押韻啟應詩篇》

 | | | 轉寄

台語押韻啟應詩篇 60

作者 Tīⁿ Jî-gio̍k 2007.03.04

60　　Tāi-pi̍t tī nn̄g-tiâu khue ê A-lân, í-ki̍p Só-pa ê A-lân, kau-tsiàn ê sî, 　　　　　Iok-ap tò-lâi tī Iâm-kok, thâi-sí Í-tong-lâng tsi̍t-bān nn̄g-tshing,
　　　　　Hit-sî Tāi-pi̍t tsuè tsit-ê kim ê si, hō͘ lâng ha̍k-si̍p;
　　　　　Kau hō͘ Ga̍k-kuaⁿ; tiāu, īng “Tsuè kan-tsìng ê pik-ha̍p-hue.”

1a　Siōng-tè ah , Lí bat khì-sak guán, phò-huāi guán;
　　上 帝 啊，你 曾 棄 拺 阮， 破 壞 阮；
　　Lí bat siū-khì guán;
　　你 曾 受 氣 阮；

1b　　　Kiû Lí koh hing-khí guán.
　　　　求 你 復 興 起 阮 。

2a　Lí hō͘ tuē tín-tāng, ia̍h hō͘ i pang-li̍h kui-phāng,
　　你 使 地 振 動， 亦 使 它 崩 裂 歸 縫 ，

2b　　　Guān Lí i -hó i ê li̍h-hûn, in-uī tuē iô-tāng.
　　　　願 你 醫好 它的 裂 痕， 因 為 地 搖 動。

3a　Lí hō͘ Lí ê peh-sìⁿ tú-tio̍h kan-lân huah kiù.
　　你 使 你 的 百 姓 遇 著 艱 難 喝 救，

3b　　　Lí hō͘ guán lim hit-ê hō͘ lâng tian-lâi tó-khì ê tsiú.
　　　　你 使 阮 飲 彼 個 使 人 顛 來 倒 去 的 酒。

4a　Lí īng kî -á siúⁿ-sù kìng-uì Lí ê lâng,
　　你 用 旗 仔 賞 賜 敬 畏 你 的 人，

4b　　　Thang uī tsin-lí kia̍h--khí-lâi ia̍t tsuè ǹg-bāng.
　　　　通 為 真 理 舉 起 來 搧 作 盼 望。

5a　Kiû Lí thiaⁿ guán, īng tsiàⁿ-tshiú khan-kiù guán,
　　求 你 聽 阮， 用 右 手 牽 救 阮，

5b　　　Thang hō͘ Lí só͘ thiàⁿ ê lâng tit-tio̍h kiù, tsiàu in sim-guān.
　　　　通 使 你 所 愛 的 人 得 著 救，照 伊 心 願。

6a　Siōng-tè í -king kí I ê sìng-kiat lâi kóng,
　　上 帝 已 經 指 祂 的 聖 潔 來 講，
　　” Guá beh tuā huaⁿ-hí ,
　　「我 要 大 歡 喜，

6b　　　Guá beh pun-khui Sī-kiàm, niû So͘-kat ê suaⁿ-kok tsuè the-í .”
　　　　我 要 分 開 示 劍， 量 疏 割 的 山 谷 做 躺 椅。」

7a　Ki-lia̍t sī Guá--ê ,
　　基 列 是 我 的，

7b　　　Má-ná-se ia̍h sī Guá--ê ;
　　　　瑪 拿 西 亦 是 我 的；

7c　　Í- huat-liân sī Guá ê thâu-khue;
　　以 法 蓮 是 我 的 頭 盔；

7d　　　　Iû-tāi sī Guá ê kuân-sè .
　　　　猶 大 是 我 的 權 勢。

8a　Mô͘-ap beh tsuè Guá ê i̍k-phûn;
　　摩 押 必 做 我 的 浴 盆；
　　Guá beh hiat Guá ê uê tī Í-tong, hō͘ siâⁿ pìⁿ thô͘-hún,
　　我 必 擲 我 的 鞋 在 以東， 使 城 變 土 粉，

8b　　　Hui-lī-sū-tuē ah, lí in-uī Guá tuā-siaⁿ huah ná tsông, tsuí ná kún.
　　　　非 利 士 地 啊,你 因為 我 大 聲 喝 若 蹌， 水 愈 滾。

9a　Tsú ah , siáⁿ-lâng uē tshuā guá ji̍p kian-kò͘ ê siâⁿ?
　　主 啊，啥 人 會 導 我 入 堅 固 的 城？

9b　　　Siáⁿ-lâng uē tshuā guá ji̍p Í -tong ê tuē bô kiaⁿ? 　　
　　啥 人 會 導 我 入 以 東 的 地 無 驚？

10a　Siōng-tè ah , Lí kiám m̄-sī khì-sak guán mah?
　　　上 帝 啊，你 豈 不 是 棄 拺 阮 嗎？

10b　　　Siōng-tè ah , Lí bô kap guán ê kun-ping saⁿ-kap tshut mah?
　　　　　上 帝 啊，你 無 與 阮 的 軍 兵 相 及 出 嗎？

11a　Kiû Lí pang-tsān guán kong-kik tuì-ti̍k;
　　　求 你 幫 助 阮 攻 擊 對 敵；

11b　　　In-uī lâng ê tsín-kiù sī khang-khang bô lī-ik .
　　　　　因 為 人 的 拯 救 是 空 空 無 利 益。

12a　Guán uá-khò Siōng-tè , tsuè-tsiâⁿ tuā tāi-tsì;
　　　阮 倚 靠 上 帝，做 成 大 事 情；

12b　　　In-uī thún-ta̍h guán ê tuì-ti̍k--ê , tsiū-sī I .
　　　　　因 為 踐 踏 阮 的 對 敵 的，就 是 祂。