《押韻啟應詩篇》

 | | | 轉寄

台語押韻啟應詩篇 91

作者 Tīⁿ Jî-gio̍k 2007.11.11

91

1a　Tiàm-tī Tsì-kuân--ê ê ún-ba̍t só͘-tsāi--ê ,
　　站 在 至 高 者 的 隱 密 所 在 者，

1b　　　Hit-ê lâng beh khiā-khí tī Tsuân-lîng--ê ê ìm-ńg -ē .
　　　　彼 個 人 要 khiā 起 在 全 能 者 的 蔭 影 下。

2a　Lūn-kàu Iâ-hô-hua guá beh kóng--ê ,
　　論 到 耶 和 華 我 要 講 的，

2b　　　I sī guá tô-siám ê thó͘-tē , sī guá ê suaⁿ-tsē;
　　　　祂是 我 逃 閃 的 土 地，是 我 的 山 寨；

2c　Sī guá ê Siōng-tè ,
　　是 我 的 上 帝，

2d　　　Guá só͘ uá-khò--ê .
　　　　我 所 倚 靠 者。

3a　In -uī I beh kiù lí thuat-lī tng tsiáu-á ê lô-bāng,
　　因 為 祂 要 救 你 脫 離 抓 鳥 仔 的 羅 網，

3b　　　Kap to̍k-hāi ê un-i̍k hāi-thâng.
　　　　及 毒 害 的 瘟 疫 害 蟲。

4a　I beh īng I ê si̍t-kó͘ âⁿ lí ,
　　祂 要 用 祂 的 翅 股 攔 你，

4b　　　Lí beh bih tī I ê si̍t -ē buē sí ,
　　　　你 要 匿 在 祂 的 翅 下 不 死，

　　　　I ê sîng-si̍t sī tuā suè tîn-pâi ê pó-pì . 　　　　
　　　　祂的誠 實 是 大 小 盾 牌 的 保 庇。

5a　Lí m̄-bián kiaⁿ mî-kan ê kiaⁿ-hiâⁿ,
　　你 不免 驚 暝 間 的 驚 惶，

5b　　　Á sī ji̍t--sî teh pe ê tsìⁿ-iáⁿ.
　　　　抑 是 日 時 在 飛 的 箭 影。

6a　Ia̍h bián kiaⁿ o͘-àm-tiong liû-hîng ê un-i̍k tsua̍t-tsìng,
　　亦 免 驚 黑 暗 中 流 行 的 瘟 疫 絕 症，

6b　　　Á -sī ji̍t tiong-tàu bia̍t-bô lâng ê to̍k-tsìng.
　　　　抑 是 日 中 晝 滅 無 人 的 毒 症。

7a　Ū tshing-lâng lik-lo̍h-khì tī lí ê sin-piⁿ,
　　有 千 人 慄 落 去 在 你的 身 邊，
　　ū bān-lâng lik-lo̍h-khì tī lí ê tsiàⁿ-pîng-piⁿ,
　　有萬 人 慄 落 去 在 你的 右 傍 邊，

7b　　　Tse ia̍h buē uá-kūn lí .
　　　　這 亦 不 倚 近 你。

8a　Put-kò lí uē tshin-ba̍k khuàⁿ--kìⁿ,
　　不 過 你 會 親 目 看 見，

8b　　　Ia̍h khuàⁿ-kìⁿ pháiⁿ-lâng siū pò-ìng ê sî .
　　　　亦 看 見 歹 人 受 報 應 的時。

9a　In-uī Iâ-hô-hua Lí sī guá tô-siám ê só͘-tsāi;
　　因 為 耶 和 華 你 是 我 逃 閃 的 所 在；

9b　　　Lí bat īng Tsì-kuân-uī tsuè lí khiā-khí ê só͘-tsāi;
　　　　你 曾 用 至 高 位 做 你 居 起 的 所 在；

10a　Tsiū tsai-hāi buē kàu tī lí ,
　　　就 災 害 不 到 在 你，

10b　　　Un-i̍k ia̍h buē uá-kūn lí ê pò͘-pîⁿ.
　　　　　瘟 疫 亦 不 倚 近 你的 布 棚。

11a　In -uī I beh uī-tio̍h lí huan-hù I ê sù-tsiá,
　　　因 為 祂 要 為 著 你 吩 咐 祂 的 使 者，

11b　　　Tī lí it-tshè ê lō͘ pó-hō͘ lí ê sìⁿ-miā.
　　　　　在 你 一 切 的路 保 護 你的 性 命。

12a　I beh īng tshiú hû lí ê io ,
　　　祂 要 用 手 扶 你的 腰，

12b　　　Bián-tit lí ê kha tak-tio̍h tsio̍h.
　　　　　免 得 你 的 腳 觸 著 石。

13a　Lí beh ta̍h sai kap to̍k-tsuâ,
　　　你 要 踏 獅 及 毒 蛇，

13b　　　Lap sai-á -thûn í -ki̍p tuā-bé tsuâ.
　　　　　蹋 獅 仔 屯 以 及 大 尾 蛇。

14a　In -uī i tsin thiàⁿ Guá,
　　　因 為 他 真 愛 我，

14b　　　Guá tsiū beh kiù i bô suah.
　　　　　我 就 要 救 他 無 息。

14c　In -uī i bat Guá ê miâ,
　　　因 為 他 識 我 的 名，

14d　　　Guá tsiū beh an-tì i tī kuân ê só͘-tsāi, hō͘ i hó miâ-siaⁿ.
　　　　　我 就 要 安 置 他 在 高 的 所 在，使 他 好 名 聲。

15a　I kiû-kiò Guá, Guá tsiū beh ìn--i ;
　　　他求 叫 我， 我 就 要 應 他；

15b　　　I tī guî-kip ê sî , Guá beh kap i khiā-khí ;
　　　　　他在 危 急 的 時，我 要 與 他 khiā 起；
　　 　　Guá beh kiù i , hō͘ i tsun-kuì siū kú-khí.
　　　　　我 要 救 他，給 他尊 貴 受 舉 起。

16a　Guá beh īng tn̂g huè-siū hō͘ i muá-tsiok,
　　　我 要 用 長 歲 壽 給 他 滿 足，

16b　　　Hō͘ i khuàⁿ-kìⁿ Guá ê kiù-un teh kè-sio̍k.
　　　　　給 他 看 見 我 的 救 恩 在 繼 續。