《宋澤萊ê台文蕃薯園》

 | | | 轉寄

K對少年人談tio̍h林秉樞tsit一派ê tsapo͘人！

作者 宋澤萊, 台譯：Lîm TsùnIo̍k/林俊育 2021.12.19

●新聊齋誌異●

今á日K tī某大學對一陣研究生講解台灣文學史，當伊講tio̍h法國小仲馬ê小說《茶花女》ê時，講tio̍h世界siōng偉大ê愛情小說，並m̄是tsit本青年愛tio̍h酒家女ê小說，卻是美國小說家霍桑所寫ê《紅字》。了後竟然亂講到林秉樞ê家暴事件，伊有表示一kóa感想：

K講：「《紅字》tsiah是siōng偉大ê愛情文學作品，甚至超過《羅密歐kah茱麗葉》。Tī《紅字》裡，女主角海絲特為tio̍h保護她ê男友丁梅斯代牧師ê光明前途，被法庭判kui年thàng天一定tio̍h穿一件繡有A字（注：Adulltery，通姦ê意思）ê衫，差不多hō͘她含冤一生。Á男友丁梅斯代牧師一直m̄肯棄sak海絲特，tī自責kah別人ê陷害下，身軀快速轉pháiⁿ，總算付出性命，快速衰弱來死。In頭尾體貼對方，疼惜對方，m̄ hō͘對方食一點á虧。Tsit種愛情非常偉大，是一个咱應該看齊ê愛情標竿。」

K koh對tsiah个少年人講： 「我其實並無同意大家使用『愛』tsit字來講男女感情，m̄管是結婚ê á是未婚ê。因為咱ē誤會『愛』tsit字，kā它講成 “ài” ê意思。親像講ài對方做tsit个á是做hit个，來表示tùi對方ê『愛』，特別是欠缺感情教育ê台灣人，koh khah容易ánne誤會。我想講林秉樞一再 “ài”女方跪落來，伊一定想講這是對女方ê『愛』，甚至phah她、罵她、強迫她、限制她、囚禁她lóng是『愛』，因為ánne tsiah歡喜ánne做bē siān，這to̍h是對『愛』ê無知。若是ē tàng，我ǹg望kā『愛』tsit字，改做台灣民間所講ê『疼惜』兩个字tsiah好！」

Koh講： 「Lín在場ê人tiāⁿtio̍h有真tsē人iáu未結婚，iáu m̄ bat男女應該án怎互相對待之道。我想講lín應該kā『溫、良、恭、儉、讓』五字好好á記tî心內，當做準則來實踐。我顛倒無贊成一國之民lóng ē tàng『溫、良、恭、儉、讓』，因為ánne，對國家無一定有利益，無害。我mā m̄是講女方對男方tio̍h『溫、良、恭、儉、讓』，因為女性本來to̍h比較khah軟tsiáⁿ；卻是講男方對女方tio̍h『溫、良、恭、儉、讓』！特別是『讓』tsit字，男方一定ài ânân實踐，tio̍h『讓』到啥物程度？He就是『phah無回手，罵無應嘴』，mā無過份！」

Koh講： 「我為啥物beh提出tsit个準則？因為我出身tī一个暴力家庭，受害非常深。當男方動手phah女方ê時，受害ê往往m̄ nā女方一人，iáu包括所有ê gíná lóng ē被phah。殘暴ê老父甚至ē gia̍h刀thâi死kui个家庭ê人，包括所有gíná。Tsit種驚人ê後果是因為自細漢無約束做一个男性ê伊，一定tio̍h遵守『溫、良、恭、儉、讓』ê準則，特別是『讓』tsit字！」

Koh講： 「因為我是暴力家庭ê gíná，自細漢我mā ē努力觀察hiah个幸福和諧ê真tsē家庭，而且暗中欣羨in。是án怎有kóa家庭竟然ē hiahni̍h幸福和諧？講破原因無其它，因為阿爸遵守『溫、良、恭、儉、讓』ê準則，特別是『讓』tsit字而已！」

Koh講： 「像林秉樞tsit一派人ê行為是teh自掘墳墓，kā kakī ê一生徹底毀掉。一个hō͘家庭充滿兇暴氣氛ê男性，不如去死khah好。伊kā家庭tshòng kah ná流沙，hō͘ kakī無人生穩固ê基盤，khiā立lóng有問題，講beh án怎去成大功立大業？Tio̍h算成大功立大業koh是án怎！Hō͘ kakī ê家庭充滿仇恨，kahná地獄，kah死亡koh有啥物無仝？Tio̍h算做財經總管，做總統koh有啥物意義？人是會死，幾10年後，人死去，啥人iáu 致意你做過啥物？M̄ koh你kui世人lóng一定tio̍h生活tī地獄裡，無任何物件ē tàng彌補你一生ê虧損！」

Koh講： 「青年tsapo͘人kantaⁿ有『溫、良、恭、儉、讓』，tsiah ē tàng成就你ê家庭，tsiah ē tàng有和樂健康ê家庭，tī tsit个了不起ê基礎頂面，永遠無後顧之憂；假使bē tàng快速功名大發展，ánne，koh有啥物關係？因為你已經tī基礎頂面勝利à，未來iáu ē有koh khah tsē ê勝利！」