《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十三章（更新版）
作者 庄司總一 著 楊東傑 指導 林俊育 台譯 2017.06.11
陳家ê門前圍一大陣人。
Tsit家ê二房景文tī安平ê魚塭á，有一隻大龜迷路行入來，tsit工有兩個貧民kā龜扛來。厝裡有人好脚手，the̍h卷尺kah秤á過來量，長三尺五寸，重量約172公斤。
這是極好ê兆頭，陳家感覺hiah tsē人tī厝前真有光采。Kan-taⁿ當事人景文表面上真歡喜，內心卻照常冷靜。Tsit隻龜bē-sái講是tùi伊ê魚塭á掠tio̍h ê，其實是tùi真遠ê海邊偶然掠tio̍h ê，á是去ho͘大魚網網tio̍h ê khah合理。可能是tsit兩人想beh得tio̍h賞金，tsiah講白賊。M̄-koh，無論án怎lóng好，只是ài開錢有khah費氣。無論是吉兆á m̄是，tio̍h開kóa錢大家鬧熱一下來滿足家己kah別人，這是台灣人ê pháiⁿ習慣。
Hit兩個人要求一百兩銀來買tsit隻龜，景文真大方就答應。伊完全無出價，原因m̄是ài tī眾人面前顯示體面，是因為一開始伊to̍h無phah算beh家己來付tsit條錢。
景文趕緊叫hit兩個人kā龜扛去街裡ê刻印á店，刻印ê人真技巧用鑽á kah鎚á tī龜殼頂面雕刻，雕刻ê所在微微á出血，就tī頂面抹(bua̍h)紅漆。
雕刻字是 「甲子(1924年)上元(正月十五日)。放生。陳氏阿嬌。」 景文刻老母ê名，無kā福氣歸家己，來歸hō͘ 老母，所以厝裡ê人kah看鬧熱ê人lóng真感心。景文叫人扛tńg去hō͘ in老母看。
「鶴千年龜萬年，真恭喜ê記號，恭祝老母食百歲！」
阿嬌愛聽扶tháⁿ ê話，當然真歡喜。
「總是，景文ah，你ná會無kā你ê名mā刻入去？Tàu陣刻做伙真好，kám m̄是？」
「我iáu少年，老母ê幸福就是我ê幸福。M̄-koh，tsit-ê福神並無俗，in討價一百兩銀。」
「Án-ne ná會貴leh？一百兩銀買tio̍h一百歲，無比這khah俗ê lah。好lah，好lah，全部我出lah！另外包一個紅包賞in。今á日是上元ê好日，大家真恭喜，kám m̄是？陳家也會koh khah繁榮起來。長男照常m̄知thàn錢，koh hō͘ 人召去警察局審問，有損tio̍h家風。瑞文是閒閒無tāi-tsì做，罕得想beh kah一般人仝款去做khang-khòe，suah去hō͘ 蛇咬tio̍h，是漏屎馬lah。厝裡會靠tit ê kan-taⁿ你一人。大家tio̍h聽hō͘ 好，平時lín lóng批評伊凍霜愛錢，m̄-koh，siáng ē-tàng比伊khah有孝？Eh，kám m̄是？」
到taⁿ m̄-bat有人看過阿嬌hiah-ni̍h歡喜一直講話。In koh再beh kā大龜放生去大海，teh beh扛起行。
「Ueh，大龜ah！請你做阮陳家ê守護神。下一pái koh來俗世ê時，一定m̄-thang bē記得來阮tau。我tsit-ê年紀無一定ē-tàng koh再見tio̍h你，m̄-koh，我有真tsē kiáⁿ孫，拜託你kā in照顧。Án-ne，大龜ah！祝你好好活落去！」
阿嬌to̍h beh摸tio̍h大龜ê頭，m̄甘放，連目屎都流出來。以後這成做一個笑談，m̄-koh，hit時阿嬌ê態度真誠懇，所以大家lóng kā它當做真實ê故事來聽，來感動。
Hit工，tú好是舊曆正月十五上元節，而且瑞文也救tio̍h一命tú出院，長男ê事件mā結局無事，所以陳家設宴慶祝。
筵席tùi下晡三點開始，排tī大廳ê桌頂，tùi料理店tshiàⁿ來總舖，料理一出一出teh出菜，大廳ê前埕mā有樂師teh演奏北管，非常鬧熱。
家族ê長輩lóng來赴宴，tsit兩年來一直無踏出房間門ê家長阿山mā有在場。雖然tòa tī仝一個厝頂下腳，mā有人一年半冬無見tio̍h家長ê面。阿山顯然真老ā，看起來kah-ná春天無ǹg望會koh發芽ê枯木。伊經常悠哉悠哉微微á笑ê面，tsit-má完全枯焦(ko͘-tâ)，有刻tiâu痛苦深深ê皺紋。「Tsit-ê老爺koh活無gōa久loh！」大家私底下án-ne teh想。
阿山對今á日ê慶祝筵席真歡喜，當然會比平常時khah厚話一點á，m̄-koh，因為sau聲，加上本來講話速度to̍h慢，koh常常ài嗽，講話中間ê斷話時間koh長，致使話句ê前後意思hō͘ 人聽bē清楚，也會聽kah無趣味。所以大家無致意阿山ê講話，ta̍k人講家己ê話題；大家ê話題特別傾向三男瑞文。瑞文雖然已經出院，m̄-koh，面色iáu未回復，看起來iáu未回復到原來ê元氣，hō͘ 大家問一kóa hō͘ 蛇咬tio̍h ê經過，隨時to̍h疲勞起來。
一個阿叔問講：「Tú-tio̍h hiah-ni̍h恐怖ê tāi-tsì，你kám iáu-koh敢去庄腳？」
「我想講最近無koh去一tsōa bē-sái。」
「你實在會hō͘ 人tio̍h驚，真正有夠勇感。我一直掠準你是軟弱koh無膽ê gín-á，taⁿ我tio̍h改變對你ê看法。你kám有影beh koh去？瑞文。」 坐tī隔壁桌ê春鸞聽tio̍h，趕緊插話提出異議。
「無lah！阿叔，瑞文絕對bē koh去hit款恐怖ê所在lah！」
「Beh去lah！」瑞文倔強án-ne講。
「Mài去lah！若koh去hō͘ 蛇咬tio̍h，你to̍h會無命，bē-sái去！」
「Kám講會去hō͘ 蛇咬第二pái、第三pái？」
「而且聽講tī真深山內底，kám是iáu有tòa生番？」
「生番已經變成順服ê熟番，in mā穿kah咱仝款ê衫。」
「Mài去lah！Hiah-ni̍h恐怖ê所在。」
「我ê土地tī hia，無辦法lah！」
「派人替你去to̍h好ā！Eh，請大家幫我勸伊mài去。」
春鸞真認真，她擔心丈夫安全ê心tsiâⁿ hō͘ 大家感動。M̄-koh，若講瑞文明á載to̍h beh去，he to̍h是另外一回事。瑞文身軀都iáu khiā bē tsāi，到底tang時tsiah ē-tàng去庄腳mā iáu m̄知，春鸞tsit-má to̍h hiah-ni̍h緊張，實在有夠好笑。
景文微微á笑，半khau洗án-ne講：
「你若是hiah擔心，去pua̍h-pue好lah！求神明指示。」
「是ah！Án-ne mā好。」
春鸞真正tìm頭同意，邊á ê玉簾看她ê戇直bē爽快，用冷笑kah受氣ê目tsiu來睨(gîn)景文ê面。
「Eh，taⁿ mā好ah！瑞文財產ê土地決定tī hiah-ni̍h深山內底，mā是神ê旨意。所以瑞文hō͘ 蛇咬tio̍h險險á死，kám mā有hiah pháiⁿ心ê神oh？」
分財產ê結果，三男分tio̍h ê土地雖然真闊，m̄-koh，路途遙遠koh交通無方便，而且土壤真瘦，厝裡ê人lóng知這是景文設計ê狡怪策略，而且是伊親身tshōa瑞文到hit-ê所在，結果hō͘ 瑞文tú-tio̍h hiah恐怖ê災禍。所以大家聽tio̍h玉簾對景文ê批評，感覺真爽快，mā teh等待當事人反應ê面色。M̄-koh，景文ê表情一屑á 都無變，kah-ná無hit件tāi-tsì ê款。伊講。
「玉簾最近變成一個無神論者，城隍爺、媽祖lóng是假ê，koh講tio̍h ài破壞寺廟hit款驚人ê話。」
暫且mài講玉簾講過tsit種話是真ê á是假ê，kan-taⁿ tsit-má聽tio̍h tsit種褻瀆神明ê話，tsiah-ê老輩ê人，尤其是年紀大ê tsa-bó͘人lóng會驚kah phi̍h-phi̍h-tshuah。特別是信神虔誠ê老母阿嬌，聽tio̍h tsiah-ê話，ná會恬恬無講話leh？
「玉簾真好大膽，lóng無teh驚會hō͘ 神責罰。若有hit種心，pháiⁿ事一定會臨到她。準講現世無事，來世mā無有好ê投胎。」
「會生做啥物？」
「無路用ê tsing-siⁿ lah！總講bē koh做人lah！」
「轉世做豬、牛á是鳥loh！若án-ne，tsit隻鴨kám是前世犯tio̍h重罪ê人loh？)
Tú好hit時，桌頂phâng來一盤鴨ê料理，玉簾thiau工用箸挾（nge̍h）一塊鴨皮hō͘ 大家看。年紀大ê目tsiu 顯出譴責ê目神，嘴káuh-káuh唸；少年ê感覺真好笑suah禁bē-tiâu大声笑出來。大家用tsit-ê笑聲做煙霧來掩蓋褻瀆神明議論ê方向。這是天官賜福人間ê上元佳節，tsit種話題實在是khah無適合；阿嬌kah玉簾互相停止爭論。
總是，獨獨長男清文忽然koh再講起tsit ê問題。
「M̄-koh，咱bē-tàng斷言講寺廟一定bē去hō͘ 人phah pháiⁿ，á是講hit-ê時代bē臨到。」
「講啥物痟話！Hit款ê大地動，一百年mā無一pái。」阿叔小khóa表示反駁ê氣勢。
「無lah！M̄是指天災地變lah！是teh講社會ê變遷。」
「Án-ne講起來，koh khah bē有hit款ê hàm古。你to̍h是有思想上ê問題tsiah hō͘ 頂司kā你注意，mài煩惱hiah-ê有ê無ê lah。啥物黨，啥物協會？咱台灣人若lóng是án-ne hō͘ 總督傷腦筋ê人，he to̍h害tio̍h阮。你是食燒肉羹燙tio̍h，食冷肉片也pûn風(受害過，過頭驚)。」
「寺廟ê tāi-tsì只是一個例niā-niā，咱有種種ê pháiⁿ習慣kah複雜ê儀式等，koh過無gōa久受禁止ê時to̍h beh來ā。實際上，咱有真tsē tāi-tsì tio̍h改革kah禁止。Tsiah-ê若hō͘ 頂面忽然一時強迫咱來做，不如咱家己反省，慢慢á來改tsiah是良策。一時to̍h隨時來改，打擊會真大，mā會引起種種無好ê摩擦」
Tsit-ê警告對台灣人來講是真值得考慮ê事，m̄-koh，tī hit-ê場面無人ài beh議論。Tú成做話題，對手ê阿叔mā無beh聽清文講話。
「啥物？穿紅衫ê tsa-bó͘怎樣？」
阿叔án-ne講了就加入邊á teh談論色情ê人。
清文kah-ná去hō͘ 人冷落，心內感覺奇妙ê寂寞。想起來，筵席一開始大家就對伊敬而遠之。景文ê龜ê tāi-tsì，瑞文hō͘ 蛇咬tio̍h ê話題，鬧熱滾滾teh討論，m̄-koh，無人beh kha̍p-tio̍h清文ê tāi-tsì。這m̄-nā是大家因為伊phah-pháiⁿ陳家ê名聲感覺無歡喜，對厝裡ê人來講，思想，to̍h是精神性ê事，大家感覺無啥有趣味；講無趣味，其實是無法度理解。雖然in無法度理解，m̄-koh，清文是真ài in努力來理解kah批判。「無法度救ê一陣人，無法度救ê民族。」清文心內teh念，陷落tī失意ê心情。
Tī tsa-bó͘人ê桌，大家談笑鬧熱滾滾，其中發出嬌艶笑聲ê是玉簾，出字謎hō͘ 人ioh ê mā是她。
「兩人十四個心，ioh看是啥物？」
玉簾kā所有ê人看一liàn，要求答案。嬌豔ê目tsiu仁因為有酒氣變kah紅kì-kì，她故意掩蓋心內ê憂愁kah憤怒，裝kah真活潑爽快。
「Eh，ioh-tio̍h ê人請kā杯á gia̍h koân。」
除了兩個人以外，其他ê人大概lóng已經知影謎底，kā杯á gia̍h koân講：「Ē-sái講出謎底未？」M̄知謎底ê kan-taⁿ安子kah景文ê細姨阿龍。
「請大家mài siuⁿ早講出來！」玉簾一方面阻止大家，一方面ua̍t頭去看安子，對大家講：「Ai-ah！你免客氣lah，安子阿嫂明明知影答案，謙卑kah假做m̄知。」然後óa去她ê耳á細聲講：「德字lah，道德ê德。」Koh hō͘ 安子kā杯á gia̍h koân。
「大家lóng是才女，hō͘ 我tsit-ê無學問ê人來出謎題，kah-ná無啥意思。」然後玉簾向坐tī對面siōng邊á ê阿龍講：「Ueh，阿龍ah，你kám也學安子？免客氣lah，趕緊學（o̍h）安子kā杯á gia̍h koân。Ueh，你kám真正ioh bē出來？無可能lah，兩人十四個心，是啥物？」
阿龍微微á搖頭，玉簾明明知影她m̄-bat字，她是thiau故意beh kā她為難；仝桌ê人lóng掠阿龍金金看。若受tio̍h án-ne ê tshòng-tī，大家lóng會有想beh緊thang鑽入去孔內ê心情。M̄-koh，阿龍kan-taⁿ小khóa頭lê-lê，面lóng無紅。阿龍ê嬰á iáu未斷奶，所以脹起來ê奶房kā青色ê衫á襟突起，挽了ê目眉無koh畫眉。玉簾kā她khau洗，koh用目tsiu kā她睨(gîn)，面色、動作lóng真颺（iāⁿ）氣，目色koh kah-ná毒箭射來ê感覺，m̄-koh，對方kah-ná hō͘ 小膽ê狗吠卻lóng無反應ê鈍牛leh，hō͘ 玉簾看了koh khah bē爽。這是玉簾ê常態。
「Siuⁿ過簡單lah，免想mā會曉答。Án-ne我koh出一個khah困難ê。烏紙畫烏龍，ioh看是啥？四書內面ê一句話。」
「有看當做無看見。」
大家頭腦iáu-teh想，iáu未kā杯á gia̍h koân tsìn前，春鶯to̍h搶頭前回答。她看tio̍h玉簾用仝款ê手法teh虐待阿龍，實在忍受bē-tiâu。玉簾無歡喜。
「Án-ne bē-sái lah！Siuⁿ緊講出來to̍h無趣味ā，一定tio̍h照規則來。」
Ta̍k項小心ê春鶯hō͘ 玉簾極力責備，就kiu kah恬恬去。
「Án-ne koh來，化戴草khiā leh，啥物字？」
「Uah，厲害。雖然厲害，m̄-koh siuⁿ簡單lah。」邊á有人án-ne講。
「簡單mā ioh bē出來。是啥物字？」
玉簾án-ne講了，kah siōng起頭仝款teh為難阿龍，坐tī邊á看kah擋bē-tiâu ê人教阿龍講：「花，花。」化戴草khiā teh to̍h是花字。M̄-koh，hit-ê人用真細聲kā她教，阿龍suah聽m̄-tio̍h聲調。
「是火。」
「Eh，是火oh，真奇怪ê解答。M̄-tio̍h lah！你，kám m̄是beh ioh花？
Taⁿ你堂堂是陳家ê第二夫人，mài koh講花ê tāi-tsì；賣花姑娘是古早古早ê tāi-tsì lah。」
這是真大ê侮辱，因為賣花有賣春ê含意。
玉簾笑kah東倒西歪，她ê翡翠耳鉤tōng-tōng-hàiⁿ。安子看玉簾tsit-ê款式，感覺bē忍心，就無法度koh恬恬落去，小khóa嚴格責備講：
「玉簾姊，án-ne好à lah！你kám無感覺阿龍真可憐？」
「她kah我是siáng khah可憐？你kám會知？」
「He我雖然m̄知，總是你酒lim了心情鬱卒，請mài koh lim ā，phah-pháiⁿ身體to̍h m̄好loh！」
總是，玉簾無beh聽她ê忠告，無beh放手，繼續攻擊。
「Tsit-má來ioh女人khiā leh，是啥物字？好lah，好lah！Lín是有學問ê人，我無beh問lín tsiah簡單ê謎，我是teh問阿龍。女人khiā leh，你kám知？M̄知我kā你教。這to̍h是妾字。討厭neh，你到底知á是m̄知？」
玉簾用拳頭母phah桌頂，碗公ê湯溢出來，杯á倒落去，酒流出來。Tsit款無成體統ê狼狽混亂，連tsa-po͘ 都看bē落去，視線投向玉簾hit pêng去。Tsit時tùi siōng遠ê上座傳來sau聲ê聲音。
「小等leh！妾m̄是立kah女neh。」
「Heh，á無是啥？老糊塗。」
「我看起來kám有像老糊塗？He m̄是立，是 （譯註：造字：「立」下面一豎），就是罪ê意思；tī古早ê支那，kā罪人當做婢僕來使用，所以 kah女合做伙to̍h是侍女，所以....。」
「Ah！老父果然是大學者，kah-ná一部康熙字典leh。Án-ne，妾to̍h是有罪ê女人。」
玉簾ê面露出勝利ê光芒大聲講。Tsit-ê勝利感hō͘ 她ê激動小khóa鎮靜落來，若無會演出一齣koh khah失體面ê戲。阿山真巧，利用伊ê話來撫平新婦ê心；阿山有時á會顯出tsit種細條神經來。
總是，阿山tsit pái已經盡全力來扭轉場面氣氛。筵席tú開始，伊to̍h無lám無ne，koh是jú來jú無精神。菜一盤一盤teh出，m̄-koh，伊lóng無gia̍h箸去挾（nge̍h），一直teh lim ê紅酒mā感覺無味無素，tshńg瓜子ê手指(tsáiⁿ)mā一直teh tshuah。坐tī邊á ê阿嬌看kah真無奈，著急講：
「Ueh，你siōng愛食ê魚翅上桌à！阿山，你ná會無ài食？以前hiah-ni̍h愛食，三人份ê量都食了了leh！」
「可惜，我已經到食m̄知滋味ê年紀loh！」
Án-ne講了，阿山盡力，m̄-koh忍bē-tiâu，kiōng-beh hah-hì。
「你ná會hiah-ni̍h無元氣？今á日m̄-nā是好日，咱ê魚塭á koh掠tio̍h大龜，kám m̄是双重ê喜事leh？ Kan-taⁿ你一人kah-ná魔神á面青sún-sún。Ai-ah！加減食kóa，無會死去neh。」
阿嬌用瓷(hûi)湯匙á khat魚翅tu去到阿山ê嘴邊，強叫伊食落去。
Tiàm後壁teh服侍ê tsa-bó͘-kán-á素娥kā她阻擋，提出異議講：
「無ài食to̍h mài勉強伊食，老爺今á日身體無爽快ê款。」
「M̄是kan-taⁿ今á日án-ne，伊今á日身體無爽快，到底是siáng ê罪？」
「你beh講是我loh！」
「當然loh！你hō͘ 阿山變成煙鬼，你kā阿山ê壽命縮短十年至二十年。」
「Ai-ah！豈有此理！M̄-koh，tsit-ê大人根本to̍h無想beh活到百歲。」
「你講啥物？」
「無lah！咱tau老爺ê觀念kah一般世上ê人有小khóa無仝，伊根據莊子ê學說，認為死亡mā是快樂ê境界。」
「你mài講tsit種誇口ê話，半字都m̄-bat，莊子、孔子若聽tio̍h會起狂。若講死亡hiah快樂，suah bē曉去後埕ê龍眼樹吊tāu。」
阿嬌kah素娥之間開始險惡ê爭論。「Mài tòa hia做無意義ê冤家！」阿山án-ne kā in阻止，就ûn-ûn-á peh起來，就án-ne中途離席。伊雖然m̄是無ài kah家人享受天倫之樂，m̄-koh，伊giàn阿片giàn kah非常痛苦，實在忍受bē-tiâu ā lah。
阿山hō͘ 素娥陪伴退席，時間拖hiah長ê筵席，安子mā感覺真厭倦ā，而且玉簾已經相當酒醉，m̄知tang時會koh thut-tshôe，安子mā真擔心。
「玉簾姊，你kah-ná真艱苦，咱就到tsia來告辭，來我ê房間lim咖啡，然後咱來 ī 你頂pái教我ê九連環(譯註：智慧ê環)。」
想bē到玉簾at-sa-lih to̍h答應，春鸞mā peh起來，要求tàu陣去，安子就tshōa in兩人離開筵席場。
安子tshōa兩人進入客廳，她phâng咖啡出來。玉簾kā咖啡杯óa去嘴唇，m̄-koh無隨lim；她就án-ne無tín動。好強ê玉簾無ài hō͘ 人看tio̍h她teh流目屎ê面，微微á tshèng起來ê咖啡蒸汽，掩蓋 bē-tiâu她ê目屎，tī siang-te-li-a燈(譯註：tsandelier，玻璃kah金屬裝飾ê室內燈) ê照明之下，珠淚閃sih銀色ê光，流落來她ê嘴phóe。
「Án怎？Βeh ī 智慧環無？」
安子想beh提高她ê興趣án-ne講，春鸞用真高ê聲回答講：「好lah！咱來ī。」春鸞m̄是想beh phah破沉默來提高玉簾ê元氣，是因為她m̄-bat有過像ing暗hiah-ni̍h充滿幸福感；in翁拾回一條命，mā已經痊癒ā。Hō͘ 她感覺幸福ê m̄-nā是hit-ê tāi-tsì niā-niā，實在是因為hit-ê災難hō͘ 丈夫瑞文ê心改變。她對in翁誠心誠意全精神ê看護，顯然比蛇毒koh khah深深刻tiâu tī瑞文ê心。結婚以來，瑞文m̄-bat對她流露一點á愛意，有時甚至惡言相對，動腳動手，taⁿ她一變to̍h變kah hiah溫柔koh親切。
「Tú-tsiah樂師演奏九連環ê曲，若運氣無好，我mā有可能陷入去智慧之環。」春鸞án-ne講。
九連環曲ê由來是án-ne：古早有一個少年ê寡婦哀嘆空閨寂寞，請求ta-ke hō͘ 她koh嫁。重視貞操ê ta-ke就想出一個九連環ê智慧之環，kā它製造出來hō͘ hit-ê新婦，若她ē-tàng脫出手環，就ē-sái再嫁。Tsit-ê手環看起來真簡單，卻有六重ê底層。為tio̍h beh脫開hit-ê手環，新婦白白空過十幾年ê歲月，hit時也已經超過tshōe翁ê年紀。結果因為ta-ke ê聰明，新婦也ē-tàng保守她ê貞操。
安子想beh the̍h出玉簾hō͘ 她ê九連環，m̄-koh，玉簾講無想beh ī ā，kā她坦白拒絕。
「玉簾姊kám講一屑á趣味都無？」春鶯不服án-ne講。
「He是你春鶯siuⁿ過熱。我有khah koh樣，m̄-koh，ing暗你是án怎leh？平常時面thu̍h-thu̍h無話講ê人，kan-taⁿ ing暗tsho̍p-tsho̍p叫，講bē-suah。」
「無法度lah！Ing暗m̄知án怎，我感覺真幸福to̍h是lah！」
「Án-ne真好ā。」
「玉簾姊，你kám無幸福？家己若想講beh有幸福，to̍h有幸福ê身份。丈夫納妾，我lóng無所謂，也ē-tàng和睦相處，只要丈夫mài kā咱bē記得á是棄sak to̍h好，因為第一夫人比第二夫人khah占優勢。你後頭厝ê老父，kám m̄是有第三夫人leh，你siuⁿ過苦心堅持lah！」
「春鶯，你單純，真好。像你tsit款ê tsa-bó͘人，幸福就ná親像去後園á挽果子hiah簡單，你ná會有法度了解我ê心情leh？」
玉簾對春鶯án-ne講，無koh tshap她，就向安子講：
「假使清文兄娶細姨，你會án怎？」
「當然kah你仝款會真苦惱。」
「你看，我講了無m̄-tio̍h。」玉簾得tio̍h支持，就用輕視ê眼光teh看春鶯，然後koh問安子：
「M̄-koh，若是細姨bái koh戇大獃，你會án怎？若是一點á可取都無，你會án怎？」
「Ngh，我bē了解你tsit-ê問題ê意義，súi kah bái kám有啥物無仝？」
「無仝lah！大大ê無仝。」
玉簾激烈kā她否定，春鶯tùi邊á插嘴講。
「你是teh指阿龍？M̄-koh，若是她比你khah súi，無lah，若kah你平súi，你一定會koh khah嫉妒，koh khah討厭，kám m̄是？」
「你真戇，若是外表、心地lóng súi ê tsa-bó͘人，án-ne to̍h有thang競爭；嫉妒kah受氣mā會變成khah súi，我to̍h bē án-ne有反常ê懊惱。阮老父hiah-ê細姨lóng是美人koh賢慧，kah阮老母koh會投機，厝裡lóng無風波。M̄-koh，阮hit-ê景文，雖然講人各有所hèng，總是伊mā無必要選ah選，特別去選hit-ê野貓tńg來厝裡。Kah-ná去hō͘ 狗奪魂了後ê白痴，koh bái-kâu-kâu ê tsa-bō͘-gín-á，真是無體面，hō͘ 我無面thang見人，想tio̍h to̍h懊惱。我想beh出去吹暗風，咱lóng出來去怎樣？」
Hit時，安子忽然想起一項tāi-tsì；若是玉簾講ê話是事實，án-ne她kah春鶯兩人ê想法根本to̍h無啥差別。女人對納妾風俗ê觀念，kan-taⁿ受個人ê感情左右，若tùi社會ê見解來講，in一屑á都無kā它看做是罪惡。總講一句，he m̄是道德上ê問題。 Tsiah-ê風俗習慣已經深入人心，tsit-má忽然想beh來改，對自我意識強koh有潔癖，而且使khioh-ka̍k（自暴自棄）koh帶有破壞偶像傾向ê玉簾來講，beh承認納妾制度ê事實，會khah有自我矛盾ê感覺。
In三人tàu陣行出去。
街á非常鬧熱，冷冷ê暗風hō͘ 火把(pé)烘燒，hō͘ 煙充滿，四界傳來各種響音phah入耳孔。Tùi大厝ê深落，á是小路，á是廟埕，傳來管絃音響、銅鑼kah大鼓ê聲、戲台hì-hè叫ê聲、賣物ê聲等。家家戶戶門口排列拜拜ê物，香(hiuⁿ)煙phōng-phōng-tshèng。走馬燈liu-liu-se̍h，照出各種影像。大路頂面有長達五十尺ê龍燈，吊掛珠寶teh亂舞。打扮súi-súi ê tsa-bó͘ gín-á kui陣teh遊街；細漢gín-á提ta̍k人苦心製作ê虎、兔、狗、雞等ê精彩ê彩燈傑作，得意洋洋teh遊街。Tsit暗，少女會得tio̍h愛人á是良緣，無子女ê婦人會得tio̍h kiáⁿ兒，人人抱tio̍h各種ê迷信來燒香、燒銀紙，á是耍(sńg)到三更半暝。 安子in三人入去天后宮拜拜。
春鶯想beh知影家己ê運勢，tī tsit工用某種方法來占卜家己一年內ê吉凶是一個習慣。玉簾講她知影無論如何家己pháiⁿ運，所以免去卜卦。M̄-koh，安子勸她既然來ā，就入去卜看māi，所以in就入去廟內。
廟ê內堂充滿蠟燭ê煙霧，hō͘ 人kiōng-beh bē喘氣。春鶯行óa神明頭前，tùi燭台點to̍h香，拜拜了就kā香插入香爐，然後跪拜koh khiā起來拜，了後用牛角形ê筶(pue)pua̍h落去土腳。春鸞ê拜拜真虔誠，m̄-koh，玉簾to̍h kah-ná是義務leh，m̄情願，安子卻是一半趣味niā-niā。
Pua̍h-pue了後，就ta̍k人去抽籤，籤會指示方向。春鶯抽tio̍h南籤，玉簾抽tio̍h北籤，安子抽tio̍h東籤。各人照指示ê方向行去，tī路裡á是人家厝偷聽人講話，根據所聽tio̍h ê話來占卜家己一年中間ê吉凶；這叫做「聽香」，是女人ê迷信。M̄-koh，ē-tàng充分暗示家己命運ê話真oh得聽tio̍h，所以kan-taⁿ拾家己khah有合意ê話，然後請經驗、學識khah豐富ê人來解說。三人tńg到厝tsiah會去請教老父阿山。
講tio̍h tú-tsiah tùi慶祝筵席中途退場ê阿山，tńg到房間就趕緊叫素娥tshoân阿片膏來suh兩三帖，tsiah感覺爽快起來。
Tsit時，長男清文入來。最近老父ê身體有明顯衰弱起來，m̄知tùi tang時開始，伊每工講《紅樓夢》kah《金瓶梅》hō͘ 伊意愛ê tsa-bó͘-kán-á素娥聽，m̄-koh，tsit-má聽講mā已經忽然停止à。Tī筵席中間，清文也tiāⁿ-tiāⁿ為老父ê身體teh擔心。阿片若適當使用，kah酒精仝款，無一定有害，有時koh會提高沉重ê精神，hō͘ 無活氣ê肉體活起來。阿山ê年紀已經無法度抵抗tsit種藥物ê刺激，mā無法度kā它合理化，已經是中毒ê狀態，若tshut-tsāi伊去，死亡只不過是時間ê問題niā-niā。M̄-koh tsit中間，清文lóng有機會tio̍h勸伊禁阿片，m̄-koh，老父對阿片執迷不悟非常嚴重，講若kah死亡交換也bē後悔，所以清文費盡千言萬語mā無tshái工，最後mā看破；tshut-tsāi伊去。最近因為衛生設施ê進步，阿片中毒ê治療已經有相當ê成績，所以kah-ná有一點á ǹg望。
「看你khah有元氣à！Tú-tsiah看阿爸痛苦ê情形，hō͘ 人不忍心看。」
「你，koh有我邊á ê人teh為tio̍h我種種ê擔心，所以我想beh改阿片。 Tsit兩三工kā量減少，結果身體bē堪得，致使到tsit款情形；bē-sái siuⁿ過相信人ê意志，無法度lah！」
阿山微微á笑，tú-tsiah痛苦ê ná溪谷一般ê皺紋中顯出喜樂，深沉ê目箍也有活氣ê眼神，sau聲慢慢á講ê話mā感覺加真正確。
「來pok薰草án怎？我án-ne ，kám m̄是品行眞好？」伊就phah開銀色ê薰盒，the̍h出三年前in kiáⁿ回國ê時送伊做等路ê埃及薰草。The̍h一支起來點火ê阿山，全骨ê手指已經bē koh tshuah à；伊表情ê流露、身體ê動作，lóng比伊本來ê情形koh khah好。Giàn阿片ê人to̍h是tsit款形，無像lim酒醉ê人有特別激動ê感情，精神上mā khah平靜koh有秩序。清文看tio̍h老父活跳跳幸福ê款，感覺無需要勉強伊改阿片，致使伊失志。
實際上，清文ài in老父改阿片ê心情，m̄-nā是父kiáⁿ ê親情，mā有顧tio̍h陳家tī社會ê體面。當時台灣ê阿片制度tú tsiah成做輿論ê對象，對阿片漸禁政策ê疑問kah不滿也表面化，政治團體kah社會運動團體ê綱領，一定tio̍h加禁止食阿片ê條款。清文雖然tsit-má已經完全退出hiah-ê團體，m̄-koh，伊感覺家己ê親人中若出一個違反時代ê人，是真無妥當ê tāi-tsì。
「Án-ne講起來，阿爸ê心中iáu teh想講若ē-tàng，beh改掉阿片ê心情ho͘ⁿh？」。
「Tsit ê 瑞文受tio̍h 災難以來lóng一直夢tio̍h蛇，hit ê夢ê恐怖，bē-tàng用嘴講」。
聽tio̍h án-ne，清文忽然想起De OOincey 寫ê《英國阿片癮ê告白》(譯註： “Conffesions of an Inglish Opium Eater”，如圖： )。
「若是án-ne，食阿片ê人無一定會快樂，我tsit-má想起有一個西洋作家寫伊食阿片ê痛苦。M̄-koh，hit-ê人óa靠伊ê意志力，到尾征服沉重ê pháiⁿ習慣。」
「這無啥物奇怪，我tī日本內地來台tsìn前就食阿片，你知我後來mā是有改掉ā。Tùi氣喘khah嚴重起來了後，我tsiah koh開始食，tsit-má改bē起來 à，總講一句，年紀大ā lah。」
「總是，入病院ē-tàng改掉。阿爸，咱來去病院做根本ê治療，你看án怎？Hō͘ 你ê晚年ē-tàng過khah健康，khah快樂，kám m̄好？」
「若kah你仝款iáu少年，我會án-ne做。可惜，我知家己ê命數，你趁早為我準備棺材，tsiah是有孝。」
「我想，若ē-tàng hō͘ 你長歲壽tsiah是有孝。」
「我已經活有夠久à lah。」
「我ǹg望你koh khah長歲壽；長歲壽本身是好德行，kám m̄是？」
「無lah！活leh tio̍h感謝，死koh khah tio̍h感謝，生死lóng仝款。
若kā兩個分開，to̍h變成完全無去。孔子、老子kah你所信ê耶穌lóng是án-ne，in lóng tī in家己ê壽命到ê時to̍h死lah，kám m̄是？若活到tsit-má會án怎？大概會成做病院ê研究材料，á是tī動物園ê閘(tsa̍h)á內，á是博物館內ê展覽物，in ê真理、教義kah言論，mā會失去全部ê光彩。或者用你最近當teh珍惜ê古董來講，有一工in會消失去；至少是因為有消失ê可能性，in tsiah有價值。若kah經過十萬年iáu tī-.teh ê石頭仝款，to̍h啥物意義、啥物價值lóng無ā，kám m̄是？所以，死m̄是悲哀，mā m̄是恐怖ê tāi-tsì。總講一句，適來夫子時也，適去夫子順也，安時處順，哀樂不能入也。道理to̍h是án-ne lah。」
「總是，tsit種思想kah理論，若無信仰ê根基，只不過是空空ê言論。道理beh án怎講lóng ē-sái，m̄-koh，tùi人ê感性來講，死亡當然有哀樂tī-.leh，m̄-koh，若kā死亡看kah hiah輕，我無認同是án-ne。聽講未開化ê人無啥驚死；對死有驚惶ê心hō͘ 咱ê人生變成有意義kah有發展，mā to̍h是hō͘ 咱koh khah有文化，kám m̄是？」
「若án-ne講起來，你kah我中間ê看法kah-ná無真大ê差別。無lah，無lah！大無仝，kah-ná是koh kah-ná m̄是。清文，若照你ê講法，結局死亡是恐怖koh討厭ê tāi-tsì，若án-ne，不得不tio̍h kah死亡爭鬥ê人生，to̍h無快樂à。」
「這是因為活leh無一定會快樂；人生ê意義ē-sái講是忍受苦惱，koh再kā它超越ê一種慾望。」
「原來是án-ne，若是án-ne得tio̍h 智慧kah文化，我希望是án-ne。耶穌教ê教義to̍h是án-ne lah。我bat想講若有機會ē-tàng去拜聽耶穌教ê學說，taⁿ免聽mā想像會到。Tio̍h lah，真久以前，我bat tī lín-tau看tio̍h耶穌ê像，he m̄是hō͘ 人看了有好感ê面。祂ê頭koh戴一個莿á ê王冠，面流血，是充滿悲哀kah痛苦，親像teh哭ê面；he kah慈悲、圓滿ê佛像大大無仝。耶穌教認為人生是苦難ê，這是想講人類tī大自然中是特別ê存在；kā人類siuⁿ過誇大，是一種自我ê驕傲kah傲慢ê想法。人類若kah草木禽獸相siâng生死興亡，kah空中ê天體相siâng運行，to̍h bē有苦惱，kám m̄是？」
「總是，阿爸，我用一百年ê時間mā無法度深入了解tsit種ê空虛kah無路用ê哲學，尤其是東洋ê人生觀，tī支那、印度hō͘ 真tsē人迷惑，這是認為快樂比痛苦khah好，無為比勞苦khah快樂ê一種想法。」
「你ê話真糊塗，痛苦容易快樂難。你若講我án-ne是teh玩弄（oán-lōng）莊周ê言論，你to̍h大錯loh。我今á日ē-tàng講出tsiah-ê話，是我用久長歲月努力出來ê結果。照你所知，我自少年就經歷人生ê無常，因為瘟疫hō͘ 我ê bó͘-kiáⁿ同時死亡，hō͘ 我充分tam過悲哀kah痛苦ê滋味。我表面上看起來kah-ná悠哉悠哉，其實心底卻m̄是án-ne。我不斷觀察大自然kah人生，也思考各種事務。到tsit-má我已經ē-tàng自我超越，he是老莊學說ê致蔭，m̄-koh m̄是老莊ê物件，是我ê人生觀；無lah！應該講是眾人ê物件。」
離開阿片ê話題，阿山kah平常無仝，tsit-má用嚴肅ê態度熱心teh講。清文無想beh繼續kah老父討論落去，he m̄是因為兩人ê思想根本to̍h無仝，是因為無像平常時ê老父，tsit-má嚴肅ê談論hō͘ 伊感覺真意外，而且清文懷疑he是m̄是kan-taⁿ口頭講講leh ê信念，清文感覺tsit點真值得懷疑；這有可能是伊沉醉tī食阿片ê興奮teh講大話，á是伊急beh防衛in kiáⁿ禁止伊食阿片tsiah做出ê姿態。無論如何，平常時清文sa無in老父ê性格，tsit-má tsiah知原來其中mā有隱藏對人生ê真誠kah熱情。清文改變本來ê偏見，對老父開始敬畏kah深愛起來。
