《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十四章（更新版）
作者 庄司總一 著 楊東傑 指導 林俊育 台譯 2017.06.18
安子kah玉簾以後to̍h lóng無koh生kiáⁿ；玉簾是因為夫婦關係冷卻，安子卻是因為m̄是多產ê體質，加上身體虛弱ê緣故。她bat tio̍h過一pái寒熱病(malaria)，以後幾年中間koh有間斷性ê復發，mā有可能是因為án-ne tsiah造成障礙。
清子五歲了後，安子to̍h無koh懷孕，就án-ne無koh再存ǹg望。看tio̍h厝裡四界teh添丁koh飼kah真活潑，安子真ǹg望ài koh有一個，m̄-koh她預感家己bē koh再生kiáⁿ。因此清子成做in唯一ê幼苗，夫婦ê疼全部灌入清子ê身上。幼苗漸漸勇健，成長大漢，m̄-koh，樹枝看起來kah-ná小khóa彎曲ê款，因為伊ê苗床ê條件有khah差。
清子有小khóa狡怪，父母心內煩惱。
清文經常買tshit-thô物、o-lín-gió(日語ê人形，華語ê洋娃娃)、尪á冊tńg來，hō͘ gín-á歡喜。夫婦有時想beh獨占愛女；是m̄是家己khah愛她？是m̄是會hō͘ tsa-bó͘-kiáⁿ喜愛？In露出一種beh獨占ê慾望，連清文也無例外。M̄-koh，奶pô͘ 比糖á hō͘ gín-á koh khah戀慕，無論老父án怎做，幼兒iáu是真自然會khah親近老母。因為án-ne，安子對tsa-bó͘-kiáⁿ ê疼，家己有小khóa teh控制，hō͘ 老父有khah tsē機會，án-ne就會tú好平衡。
總是，老父jú疼她，顛倒會hō͘ 清子感覺心煩ê款。
「清子，今á日阿爸kā你買一項心適ê物件，乖gín-á，目tsiu掩起來，tsiah看啥物走出來？」
阿爸tùi篋(kheh)á內底the̍h出一隻tshit-thô物ê熊，絞ân發條，熊就慢慢á爬teh行。
「你看，有心適ho͘ⁿh？Tsit隻叫啥物名？」
「Hîm，hîm。」
「Hîm？M̄是án-ne講，用別ê名，阿爸頂回用尪á冊kā你教過ā，有烏毛，行路慢慢á，牠是金太郎ê朋友，eh，叫啥物名？」
「Hîm lah.」
「M̄是lah，m̄是lah！用國語(譯註：指日語)講看māi。」
清子恬恬無beh回答，假做無聽見，顧sńg tshit-thô物。Tsit時，清文雖然知影勉強gín-á m̄是辦法，m̄-koh iáu-koh是繼續問落去。
「戇gín-á，清子，你kám已經bē記得à？阿母，這kám是叫做“hîm”？」
「Eh，m̄是lah，he叫做“khu-mah”。」
「Tio̍h hō͘ gín-á家己講tsiah好，kám m̄是？」清文小khóa面結結對清子講。
「Taⁿ，你家己講看māi。」
「Khu-mah。」
清子勉強細聲án-ne講，發音正確。她真知日語ê “khu-ma”，為啥物thiau故意用台語講兩pái “hîm” neh？
清文夫婦疼gín-á，用完全ê日本式教育來培養，有機會就嚴格注意來教，努力beh hō͘ 她習慣講日語。M̄-koh，陳家hiah-ni̍h大，日本人kan-taⁿ安子一人，gín-á慣勢講台語是不得已ê。
「Tsit-ê gín-á有小khóa狡怪。Bē曉to̍h無話講，明明會曉，應該ài有gín-á款，直直講出來tsiah好。」
清文因為清子ê固執感覺無歡喜；其實第一是因為家己ê狡怪破壞gín-á ê快樂，所以後悔來厭氣。
「Koh tsit-ê gín-á bē ài kah人競爭。一般gín-á看tio̍h tshit-thô物，就會tiô óa來，kám m̄是？老父是無受歡迎ê，kám講已經teh hô͘ng棄嫌ā？」
「Kám án-ne？你siuⁿ過疼伊，tsiah成慣勢。Gín-á有一大堆tshit-thô物mā會厭。Iáu有一點，咱ê教育方針若無放鬆，可能無好。Tòa tī tsit-ê家庭，無beh hō͘ 她染kóa台灣ê風俗語言，mā是無理。」
「環境條件是án-ne，所以教育實在無簡單。因為我tī外口注意bē-tio̍h細節，你日常kám有tú-tio̍h啥物困難？」
「昨hng是節日，我ài她穿長手ńg ê和服，m̄-koh，她無ài；m̄聽話to̍h是lah。」
「Káⁿ是驚人笑，驚人kā她戲弄。」
「無no͘h，大家mā lóng o-ló她真súi，koh欣羨她，m̄-koh，她本人無sáⁿ歡喜。我想一定是tī tsit-ê家庭kan-taⁿ她一人kah大家無仝，她會感覺無趣味。」
「這是你ê神經質。若án-ne，勉強她接受日本式教育ê tāi-tsì mā tio̍h重新考慮。」
「橫直她tsiah五歲niâ，她會希望kah其他gín-á仝款穿台灣衫，講台灣話。等她大漢了後，自然會發覺家己ê境遇。目前採用放任主義，順她所ài khah好，kám m̄是？」
清文恬恬同意in bo͘ ê意見。聽了tú-tsiah ê話，suah禁bē-tiâu微微á笑。用日本式教育來培養tsa-bó͘-kiáⁿ，m̄是出tī義務，是自發性kā它當做原則。M̄-koh因為án-ne，若hō͘ tsa-bó͘-kiáⁿ 對台灣ê人情、風俗、語言完全輕視、討厭，家己kám會歡喜滿足leh？因為比起一切ê理論、思想、倫理，民族ê血統是koh khah微妙，koh有決定性。
M̄-koh，安子ê報告並無完全真實。清子模仿其他gín-á ê風俗習慣，並無相信he是好ê；她kah-ná感覺若無表現kah in同化，就bē-tàng防衛家己。當然清子iáu細漢，無親像大人有明確ê意識，安子昨hng tùi清子ê反應有感受tio̍h tsit種ê印象，心內有小khóa黯然ê感覺。
昨hng是女兒節(譯註：三月初三)，安子hō͘ 清子穿長手ńg ê和服，縛phòng-koân鼓形ê腰帶，穿有配鈴á ê木屐，se̍h ta̍k人ê房間。
蝴蝶不及錦鏽妝
桃花不競美粧兒
阿公阿山寫tsit-ê對句hō͘ 她，阿媽阿嬌hō͘ 她十圓ê紅包。Ta̍k人lóng o-ló她「khah súi」á是「心適」。總是，清子本人並無歡喜，面àu-tu̍h-tu̍h。她大概是感覺án-ne hō͘ 人tshōa teh四界se̍h，kah-ná是teh hō͘ 人看傀儡leh。
下晡，安子招待其他gín-á朋友來慶祝，因為是三月ê女兒節，應當kan-taⁿ邀請tsa-bó͘ gín-á，m̄-koh，清子強強beh請瑞文ê長男阿明。因為若án-ne會無公平，所以mā有邀請景文ê tsa-po͘-kiáⁿ。
客廳裝飾擺設人形尪á ê架á前，真大陣ê gín-á聚集tī hia。安子準備好食物kah糖á招待大家，請in kah清子相好，m̄-thang kā她排斥；因為根據tsa-bó͘-kán-á阿英ê報告，gín-á伴teh耍ê時無ài清子加入。照丈夫清文ê方針，án-ne ē-tàng kah周圍ê影響隔離，hō͘ 她有獨立ê理想教育，m̄-koh，安子感覺bē-sái kā gín-á ê靈魂縛tiàm樹木。 Gín-á食飽了後就開始遊戲，安子建議一人表演一項。Gín-á ê才藝只不過是講故事kah唱歌。
「白色ê底，染tio̍h紅色ê圓日頭」(譯註：日本ê國旗歌)第一個唱ê是景文ê tsa-bó͘-kiáⁿ美圓，她tsiah讀公學校一年，發音小khóa怪怪。M̄知siáng感覺好笑suah笑出來，美圓pháiⁿ勢kah面紅kòng-kòng，就停止，無koh唱。
「大家lóng teh笑我，我無ài唱à lah！」
「無lah！是美圓唱了真好，有心適tsiah teh笑。好lah！Koh再唱一遍！」
安子kā她安慰，m̄-koh，gín-á張起來，無ài唱。總是，想tio̍h需要完成任務，美圓用gín-á認真ê態度，換用台灣話講《無bó͘ 無猴》ê台灣故事。
「Bē-sái lah，講故事a̍是唱歌lóng tio̍h用國語(譯註：指日本話) lah。」
Tùi邊á插話ê是三房ê是長男阿明。阿明mā是一年生，m̄-koh m̄是公學校，是日本人ê小學校。當時真無簡單tsiah實施日台共學制度，雖然講是共學，其實台灣人tī一班內kan-taⁿ有兩三人，所以被選ê少數台灣人lóng是優秀ê gín-á。阿明mā是頭腦好ê gín-á，入日本人ê小學校，m̄-nā無感覺不便，而且所bat ê漢字比其他ê gín-á加十倍tsē，寫毛筆字連大人都不及伊ê筆勢。Koh因為伊ê父母瑞文kah春鶯lóng是真平凡ê人，所以in kiáⁿ ê優秀出群koh khah替in顯明光彩。
「Ueh，阿明，無用國語(譯註：指日本話)是án怎講bē-sái？」
二房ê長男景仁隨時kā伊反駁。伊是公學校ê三年生，是tsit陣gín-á中間年級siōng-koân ê。伊像(sêng)老母，目tsiu圓liàn-liàn koh五官四正，m̄-koh有淡薄á輕浮，看bē起別ê gín-á。Tsit-má伊對阿明ê話表示異議，並m̄是真正beh維護小妹ê認真態度，只不過是thiau故意beh恥笑人而已。
「比勉強用發音奇怪ê國語(譯註：指日本話)講，用家己ê話來講，kám無khah好？」
「M̄-koh，學校ê老師講，tio̍h用國語(譯註：指日本話) ā。」
「Hngh，假gâu。Án-ne tsit-ê bē曉國語(譯註：指日本話) ê細漢ê，beh án怎？」
「Bē曉ê人無話講，m̄-koh已經入學ê美圓已經是一年生ā。」
「Khi-sa-mah(譯註：日語叫對方侮辱ê話，華語ê「你媽的」)！臭屁gín-á！咱tī學校講一句台灣話to̍h hō͘ 老師罵，tńg來家己ê厝koh bē-sái隨便講，he是啥物意思？Βa-kah-iá-ló͘ (譯註：日語ê「馬鹿野郎」，華語ê「混蛋」)！」
景仁靠勢伊年紀大，án-ne嚇(hat)阿明，m̄-koh，阿明mā無teh認輸。
「罵人ba-kah-iá-ló͘就是ba-kah-iá-ló͘ lah。」
「Ba-kah-iá-ló͘父母所生ê就是ba-kah-iá-ló͘ lah。」
阿明認真teh對抗，m̄-koh，景仁半趣味teh kā伊凌治。「Mài lah，bē-sái講pháiⁿ話。」安子溫柔kā in制止，m̄-koh in m̄聽，繼續冤家落去。Ba-kah-iá-ló͘ ê罵語，除了是罵人ê pháiⁿ話以外，mā有一種新奇ê感覺。Án-ne對阿明來講，聽起來比用台灣話罵in父母koh khah hō͘ 伊感覺刺鑿(tshì-tsha̍k)。
「阮父母lóng m̄是ba-kah-iá-ló͘。好lah！我beh來tâu阮老父，講你罵人！」
「我m̄驚，lín老父tiāⁿ-tiāⁿ去hiah遠ê庄腳，今á日無tī-.leh。」
「伊liâm-piⁿ會tńg來。」
「伊又koh會去hō͘ 蛇咬tio̍h tńg來ho͘ⁿh？Koh再講，tsit pái ê蛇是koh khah恐怖ê女蛇，這是阮老父講ê。所以講伊是ba-kah-iá-ló͘ lah。」
Tsit時，安子激烈kā in責備。
「講啥物ah？Mài koh冤家ā lah。不管用國語(譯註：指日本話) á是台語lóng無要緊，m̄-koh bē-sái講“khi-sa-mah” kah “ba-kah-iá-ló͘ ”。」
真意外去hō͘ 安子阿姆嚴格責備，景仁kah阿明就án-ne kiu-kah m̄敢出聲。安子忽然顯出嚴格ê態度，m̄是kan-taⁿ針對gín-á講pháiⁿ話，同時也tùi景仁ê話聽出某種信息。少年人ê中傷m̄-nā是án-ne niā-niā，有透露某種意函tī-.leh。Kám講瑞文tī庄腳kah tsa-bó͘人有發生關係？兩年前hō͘ 蛇咬tio̍h ê災難了後，瑞文一時身體無好，無tāi-tsì討tāi-tsì做，無gōa久又koh再去庄腳，最近koh khah捷去，超過程度ê tsia̍p。伊ê理由第一是講beh管理家己ê土地，二來mā講是為tio̍h健康。大家ē-tàng理解，mā替伊歡喜有好ê傾向。M̄-koh，最近tùi in bó͘春鶯ê面所顯出無精神ê款式，安子感覺有啥物不妙ê tāi-tsì發生à。Kah tú-tsiah景仁顯然是tùi in老父hia偷聽來ê話合起來想，ē-tàng想像hit內面有新ê秘密tī-.leh。M̄-koh實際上，到taⁿ iáu m̄-bat聽過有關瑞文ê醜（tshiú）聞，koh再講，mā無人想會到，tī原住民tòa ê偏僻所在會發生ài重視ê痴情關係。
細漢gín-á ê講故事kah唱歌，照順序繼續進行。阿明siōng gâu講《月姑娘》(譯註：日本siōng古早ê童話故事)，安子phah-pho̍k-á kā伊o-ló ê時，忽然看tio̍h阿明天真無邪ê面，她suah koh再致意in老父ê tāi-tsì。安子想講她tsit-má對瑞文已經無抱tio̍h小叔á以上ê感情，m̄-koh，想tio̍h in bó͘以外伊koh有別ê tsa-bó͘，安子就感覺kah-ná清清ê水泉hō͘ 人lā kah濁濁，真無ài。她希望瑞文時時lóng清氣；he是安子奇妙ê感傷。
Taⁿ輪到清子ê表演。
「貓(Bâ )á貓á，貓á貓á。」
大家phah-pho̍k-á koh án-ne huah，來催清子。「來唱上帝ê kiáⁿ耶穌！」安子講了，就行向鋼琴beh伴奏。M̄-koh，前奏彈了，清子iáu無想beh唱。
「Ai-ah！是án怎leh？大家為tio̍h你做hiah tsē心適ê tāi-tsì，清子，你mā tio̍h唱一條歌ah！」 安子án-ne講，清子iáu是面臭臭無beh出聲。她已經khiā起來，又koh坐落去。不管安子án怎kā她騙koh kā她拐，清子lóng無beh tín動，安子非常困擾。
阿明就講：「阿姆，是阮大家m̄好，因為阮講pháiⁿ話lah。」
「啥物pháiⁿ話？」
「阮講：貓á貓á，貓á貓á。清子就受氣lah。」 阿明 kā嘴kik尖尖，巡視大家。Gín-á teh向清子講「貓á貓á，貓á貓á」ê時tsūn，安子感覺是聽起來真奇怪ê台灣話，m̄-koh想講大概是愛ê稱呼。
「阿明，貓á貓á是啥物意思？」
「我mā m̄知。M̄-koh，kah-ná m̄是好話。」
安子koh問景仁，景仁露出pháiⁿ勢ê面。
「我mā m̄知。」
「M̄-koh，pháiⁿ話to̍h是pháiⁿ話ho͘ⁿh？。」
「大家kan-taⁿ án-ne講，意思我lóng m̄知。」
景仁kik出為難ê面，表示伊m̄知意思。總是，he若真正是pháiⁿ話，追求到底，知影意思mā無啥物好處。後來，安子tsiah知影貓á貓á，貓á貓á to̍h是原住民kah台灣人所生ê gín-á，是kah一般teh罵雜種仝款ê pháiⁿ話。雖然gín-á m̄知意思tsiah án-ne講，m̄是親密ê稱呼。總是，所以hō͘ 人án-ne講ê當事人清子無歡喜，安子ē-tàng了解。
準講清子有改變想法，安子mā無ài koh叫她唱歌。清子是台日lām（混）血，所以hō͘ 大家疏遠ê事實，安子知影。Taⁿ親目看tio̍h她hō͘ 人歧視kah欺負，安子心內非常艱苦，suah憂頭結面起來。M̄-koh，tùi她心底tshèng起來ê受屈辱ê感受，隨時to̍h陷落去tī無奈、寂寞kah看破ê路糊糜(lō͘-kô͘-môe)窟；這是她家己造成ê。她絕對無後悔kah清文結婚，mā無應該後悔。M̄-koh，兩人生出來ê gín-á，bē-tàng講是幸福ê。Kah-ná是靈魂tòa痣(kì)來出世，mā ē-sái講痣hiah細粒無要緊，m̄-koh，hit粒痣一生lóng無法度消失mā是事實。尤其koh khah慘ê是痣會tòe年紀來變化，有可能會變koh khah大mā無一定。困擾koh可憐ê清子因為án-ne，就無koh表演才藝，老母暗淡ê心情自然流露出來。Ta̍k-ê gín-á感覺節目停頓，場面忽然冷靜起來，才藝表演kah-ná to̍h beh結束ê款。
「我來表演一個趣味ê把戲hō͘ 大家看。」
景仁自我推薦án-ne講，有想beh hō͘ 冷場koh鬧熱起來ê大人氣慨ê聰明做法；其實一開始，伊to̍h眞想beh表演伊ê才藝。
景仁tùi學生服ê lak袋á the̍h出一粒玻璃珠á，伊用大頭拇kah二(jī )指nih-teh hō͘ 大家看，tsiah khǹg入去嘴內。Koh kik kah-ná kā它吞落去腹肚底ê款式，ku-lu-ku-lu tín動嚨喉，最後顯出已經吞落去ê款，tńg-se̍h目tsiu 仁，吐一下大氣hō͘ 大家看。Ná親像是tùi街路藝人學來ê功夫，演技非常熟練。然後伊koh kā嘴peh kah開開開。Gín-á相信玻璃珠á已經吞入去腹肚內，用不可思議ê表情一直teh看伊ê大嘴孔。Teh看ê中間，景仁ê手做出tùi手ńg liàm ê動作，玻璃珠á就出現tī伊正手ê手心。Gín-á感動，講眞正不可思議，koh驚kah gāng去，kah嘴á開開，隨時koh phah pho̍k-á，歡喜kah tshia̍k-tshia̍k-tiô，要求景仁koh表演一pái。
景仁beh koh表演ê時，gín-á請伊表演別ê手藝。Tsit pái景仁kā一個空碗khǹg-tiám桌頂khap-.leh，kā一個銅錢á hē入去，koh講請大家注意看，銅錢á會變無去。大家恬落來，注目看hit塊碗公。景仁手hōaⁿ碗公，面向阿明吐嘴舌，一面得意洋洋án-ne講：「Án怎？Kah你ê《月姑娘》故事比起來，我ê變把戲(魔術) khah趣味ā ho͘ⁿh？你無論án怎gâu讀冊，mā無可能表演kah tsiah-ni̍h gâu。」
「小等leh！」
Bē堪得忍受ê阿明án-ne叫講。Tsit-ê小魔術師吸引大家ê注意力，hō͘ 伊嫉妒kah擋bē-tiâu。
阿明m̄知啥物原因對大房ê生活發生趣味，伊kah意阿姆安子kah叔伯小妹，伊mā有聽講以前老父瑞文tiāⁿ-tiāⁿ來訪問tsit家伙。Tāi-tsì ê真相是伊無法度判斷ê，m̄-koh聽tio̍h tsiah-ê tāi-tsì，hō͘ 伊感覺對大房ê人有一種特別深ê緣份。可愛ê清子hō͘ 其他ê gín-á疏遠，伊用同情ê眼光teh看；hō͘ 人欺負á是無人ài kah她tshit-thô ê時，伊總是會來為tsit-ê叔伯小妹。Tī hiah-ni̍h大ê陳家內面，伊感覺kan-taⁿ伊teh保護清子，伊也掠tsit-ê做驕傲；伊真珍惜tsit件tāi-tsì。
所以，tsit-má景仁tī安子kah清子面前有優越ê表現，伊to̍h bē-tàng忍受。其他ê gín-á真容易hō͘ 景仁ê變魔術迷惑，只有阿明用全精神真認真teh觀察伊變把戲ê手法，想beh tshōe出景仁變魔術ê機密。
「景仁，hit內底ê銅錢á kám一定會無去？」
「若你來變，無法度變無去lah。」
「M̄-koh，景仁，你kám一定會kā它變無去hō͘ 大家看？」
「Ai-ah！若有失誤，我hō͘ 你斬頭。若完成，你beh án怎？你beh hō͘ 我啥物物件？」
「Hō͘ 你錢，我身軀有四個五錢ê銅錢á。」
阿明hō͘ 伊ê五錢取代tú-tsiah ê一錢，景仁kā伊khǹg入去碗公內底。然後phah開一看，tú-tsiah確實tī hia ê銅錢á變無去à。大家當teh驚kah gāng去ê時，錢tùi景仁ê lak袋á出來。阿明擋bē-tiâu koh the̍h出一個五錢ê銅錢á，叫景仁koh表演一pái。仝款ê手法仝款成功。阿明漸漸起懊惱，用伊全部ê錢kā in試了了為止。
安子當teh想講無趕緊制止tsit件事bē-sái ê時，阿明重要ê sai-khia錢全部去hông絞了了à。景仁ê手藝技巧，安子家己mā看kah真感慨。真m̄好ê tāi-tsì！變把戲ê手藝一般是屬khah下階層ê物件，無適合純真ê gín-á來耍。尤其是kā它當做pua̍h-kiáu來耍，koh khah無適當；安子漸漸討厭起來。她忽然感覺tio̍h景仁有in老父ê sing-lí人手腕；血統iáu是無法度否定ê。
另外一方面，阿明真懊惱koh見笑，kiōng-beh哭出來，iáu-koh想beh倔強繼續抵抗。
「奸詐，奸詐，你是賊á！」
「我beh kā你phah oh。咱，kám m̄是約束好ê？Ná會講是賊á？你tsit-má m̄甘輸錢，哭mā無路用。」
「我m̄是m̄甘錢輸去，你奸詐lah，hit款把戲siáng mā會曉。藏玻璃珠á我mā會曉。」
「Hngh，án-ne好，變來看māi leh。」
阿明無beh聽安子ê阻止，kā景仁the̍h hō͘ 伊ê玻璃珠á khǹg入去嘴內。碗公ê變把戲，阿明án怎都想bē曉，m̄-koh，伊想講玻璃珠á一定是藏tī嘴舌下腳。伊照景仁ê表演方法，假講kā玻璃珠á吞落去ê動作，了後kā嘴peh開，玻璃珠á tī嘴舌下腳看無ā。細漢gín-á講：「Ah！阿明mā會曉。」Gín-á koh一pái驚惶，m̄-koh，同時也有失望ê款，因為景仁帶hō͘ in ê驚異感減半去à。Hit時，阿明顧tiâu面子，m̄-koh，hō͘ 伊料想bē到ê是景仁講：
「免假仙lah，kám m̄是iáu tī-leh？你看，嘴舌下腳露出玻璃珠á。」 景仁微微á笑，kā伊挑出毛病。阿明驚一tiô，趕緊努力kā玻璃珠á tī嘴舌下腳藏hō͘ 好勢；若馬腳sô出來就會hông笑，所以伊拚命努力kah面紅kòng-kòng。
「真好笑，kah-ná hō͘ 醫生挽嘴齒ê面，你看，看tio̍h à，看tio̍h à！」
景仁tiàm邊á thiau故意kā伊為難恥笑。玻璃珠á滑溜溜，kiōng-beh tùi嘴裡溜出來，阿明想beh kā它阻止mài溜出來，嘴舌尖一直teh tín動，已經無啥物撇步à。如果tī眾人面前，尤其是阿姆kah清子面前漏氣，伊寧可去死。伊kā心掠坦橫，目tsiu nih起來，tsit pái真正kā玻璃珠á吞落去嚨喉內底。
Tsit-má m̄是teh變把戲ā，玻璃珠á塞tī嚨喉，阿明起艱苦。安子驚一tiô走óa去，kā伊ê頭tshi̍h向下腳，phah伊ê kha脊phiaⁿ，大舞一場；結局hit粒玻璃珠á隔早起tùi伊ê褲腳溜出來。
清子khiā-.leh，目tsiu全目屎，手the̍h茶甌(au)，受氣ê面直看向景仁。安子看tio̍h，驚若hō͘ 她kā茶甌擲去，就tāi-tsì大條ā。安子kā它搶起來ê 時，清子忽然大聲哮出來。她的確眞m̄願，mo̍͘ h tī老母ê手，哮kah眞thiám。比起對欺負人ê景仁ê怨恨，清子koh khah可憐hō͘ 人欺負ê阿明 hit種迫切心情，hō͘ 安子心酸痛。
清子一直擔心阿明ê tāi-tsì，問老母講伊m̄知會破病bē？會死去bē？看會出她是不止á煩惱。Hit暗半暝，清子káⁿ是眠夢醒起來，mā問講：
「阿母，阿明ê腹肚會痛bē？」
「無問題lah，玻璃珠á已經kah大便tàu陣放出來à，免煩惱，好好á睏。」
「真正ho͘ⁿh ？」
心底真正安心ê款，清子露出微微á ê笑容。安子感覺gín-á真可愛，結果開嘴問一個無需要問ê問題：
「清子，你有kah意阿明無？」
「真kah意。」
「為啥物kah意伊？」
「我beh做阿明ê新娘lah。」
安子笑出來。
「Ah，是啥人講ê？」
「阿明講ê。」
老父醒起來。
「Ueh，半暝á teh講啥物tāi-tsì？」
「Tsit-ê gín-á iáu-teh擔心玻璃珠á ê tāi-tsì，我teh kā她講無問題，免煩惱。」
「真趣味ê gín-á，án怎會hiah-ni̍h kah意阿明neh？」
「她講beh做阿明ê新娘。」
「原來是án-ne oh。」
清文ná hah-hì，無意無意án-ne講。伊不管有趣味á是無趣味，伊khah愛睏。
「Eh，你想tsit-ê gín-á ê未來翁婿是啥物款ê人？」
「講kah kah-ná阿明明á載to̍h beh相親ê款。」
「M̄-koh，我感覺奇怪，beh成做tsit-ê gín-á ê丈夫ê人；oh，bē-sái講是人，tsit-má iáu是gín-á；已經定tio̍h存在tī世界ê某所在。」
「有啥物thang好奇怪ê？只要她m̄是beh kah比她少五歲ê人結婚，to̍h無啥物好奇怪ê。Eh，清子，你bē嫁一個比你少五歲ê新郎，kám m̄是？Ai-ah！Koh睏去à，真緊。」
「你kah我ê婚姻，tī咱出世以前to̍h由神kā咱決定ā；án-ne想起來，世界上ê tāi-tsì無一項是偶然ê，lóng是必然ê。」
「瑞文愛慕一個原住民tsa-bó͘ gín-á mā是必然ê。」
「這m̄是hō͘ 人會感動ê必然，m̄-koh，瑞文ê腦筋有小khóa糊塗，伊何必tio̍h去迷戀一個原住民tsa-bó͘ gín-á leh？實在有夠糊塗。」
下晡，阿明kā玻璃珠á吞落去ê時，安子感覺家己siuⁿ過大意，就去kā春鶯會失禮。春鶯為tio̍h kiáⁿ ê事iáu不如為tio̍h丈夫ê事hiah-ni̍h心tsa̍t-tsa̍t。何況阿明並無感覺身體有啥bē爽快，所以in ê話題自然to̍h tùi瑞文ê tāi-tsì談起。春鶯終其尾講出實情，向安子透露心中ê痛苦，因此安子明瞭瑞文kah hit-ê女子ê tāi-tsì是事實。M̄-koh，對方是hit種ê tsa-bó͘人，mài講是春鶯，就是安子mā無法度想像he是事實。 Hit暗，安子隨kā清文講tsit項tāi-tsì，清文mā是第一pái聽tio̍h，感覺非常意外。對安子來講，koh有一個意外，就是丈夫並無她所料想ê hiah-ni̍h憤慨。伊以前對無道德ê tāi-tsì lóng有強烈ê正義感kah嚴格ê批判，tsit-má suah變kah hiah溫柔koh寬容。Hit種態度hō͘ 安子感覺不滿，她認為tsit項tāi-tsì真嚴重，心內感覺憤慨，她ǹg望丈夫ê反應mā kah她仝款認真。
「你kám知影是啥物款ê女子？瑞文hō͘ 蛇咬tio̍h ê時，你趕去到hia，所以你bat看過，應該知影。」
「我看bē出她是原住民。」
「若無，kám會是台灣人？」
「Kah-ná有外國人ê混血。」
「He是你ê親小弟ê問題，你suah kā它滾笑teh講。」
「我m̄是teh滾笑。」
「Án-ne講起來，hit-ê女子是青目紅毛loh？」
「雖然m̄是án-ne，m̄-koh，hit山頂ê原住民有西洋人ê血統，比死海ê水流入去地中海koh khah有可能。你也知早前台灣bat hō͘ 荷蘭人統治過，到鄭成功ê時代，一kóa荷蘭人逃入去深山內。前無gōa久，瑞文the̍h一塊荷蘭ê瓷á來hō͘ 我看，聽講是tùi hit-ê部落來ê。這相當引起人對考古學ê興趣。」
不管清文án怎講kah hiah-ni̍h趣味，安子kan-taⁿ感覺伊ê講法真奇怪，而且她感覺是清文為tio̍h beh hō͘ 她討厭hit-ê原住民tsa-bó͘ ，tsiah thiau故意kā tāi-tsì講kah hiah-ni̍h好聽。
「你講kah hiah-ni̍h lo-man-tih- khuh (romantic)，m̄-koh以現實問題來講，到底tio̍h án怎tsiah好？瑞文mā真頭痛。」
「你to也真關心，kah-ná咱ê清子teh關心阿明吞玻璃珠á仝款。」 Hō͘ 清文án-ne一講，安子感覺kah-ná去kha̍p-tio̍h她內心ê痛。她對瑞文好回憶ê感傷ê影，iáu留tī心中ê一角。她知影tsit點hō͘ 清文看破，所以清文對小弟瑞文所發生ê tāi-tsì，thiau故意kik做無teh關心，á是用冷笑來反應。
「M̄-koh，án-ne春鶯真可憐，她講最近kah瑞文ê感情tsiah有khah好淡薄á，hō͘ 她感覺真歡喜。你看有啥物好ê解決辦法無？你去hit-ê庄腳行一tsōa，詳細kā它調查一下。」
「我來去看māi mā好，hoān勢ē-tàng the̍h一kóa趣味ê古董tńg來mā無一定。M̄-koh，瑞文實在有夠戇大獃。」 清文án-ne回答。Tsit種講法若準講是為tio̍h小弟，不如講是為tio̍h收藏古董。安子想beh koh kah清文參詳tāi-tsì，m̄-koh，伊suah改變話題。
「講tio̍h lo-man-tih-khuh，hit-ê原住民tsa-bó͘ 有可能是基督徒；如果她有西洋人ê血統，至少她ê祖先是基督徒。因為當時荷蘭ê宣教師深入山地努力教化ê結果，bē少原住民信基督教。He hoān he，tī hia ê野蠻人中發見tio̍h上主ê話，會hō͘ 人感覺真lo-man-tih-khuh，kám m̄是？其實瑞文hō͘ 我ê荷蘭盤á ê內面有寫聖經節，hiah-ê拉丁文有小khóa磨損，所以真pháiⁿ判讀，我真無簡單tsiah解讀出來，是箴言ê經節：上主創造萬物各有所用。有趣味ho͘ⁿh？」
清文得tio̍h tsit塊有特別故事ê盤á，的確hō͘ 伊ê心歡喜tiô跳。因為tú-tio̍h思想問題所受ê痛苦，所以對社會ê生態kah人，伊tio̍h盡量目tsiu放khah細蕊，kik無看tio̍h。伊顛倒開始提高對以前to̍h小khóa有ê古典美術興趣，其中siōng意愛ê是瓷á，尤其是注重支那陶器ê研究kah收集。
「我手中有一kóa荷蘭瓷盤， hiah-ni̍h顯明ê藍色釉藥色彩，實在是真罕得看tio̍h。當然這是極早期ê Ti-hue-lu-toh(譯註：デフエルト=Delft Blue，如圖：
)ê瓷á，to̍h是leh。Ah！已經一點à，kám m̄是？半暝iáu-teh講啥物古董ê話，好來睏ā lah！」
清文家己講話koh家己phah斷，然後kā荷蘭瓷盤記載ê聖經節 “Universa propter semet ipsum operatus est Dominus”（譯註：上主所造ê lóng合祂ê路用；連pháiⁿ人mā是為tio̍h災禍ê日來存在。=箴言16：4），當做床頭ê祈禱，tshi-tshi-tshu̍h-tshu̍h teh唸。了後就有輕輕ê睏聲，留安子孤獨一人，眞久lóng睏bē落眠。
