《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十七章（更新版）
作者 庄司總一 著 楊東傑 指導 林俊育 台譯 2017.07.09
了後koh過兩三工ê暗時，清文kah安子本來約好beh去病院探訪老父阿山，m̄-koh，清文講有一個熟似ê人收集真tsē唐三彩，約好beh請伊去參觀，所以伊就家己一個出門。安子感覺清文kah-ná是故意án-ne變更，就決定家己一個去病院，就開始準備出門。
阿山為tio̍h治療阿片中毒，tsit一個月tòa入去一間私人病院。因為m̄是普通ê破病，厝裡ê人並無顯出煩惱ê氣氛。M̄-nā án-ne，厝裡ê人認為阿山已經年紀hiah大，tsit-má為tio̍h戒除一向所意愛ê物件，何必特別來入院受苦leh？其實阿山顯然本人並無意思beh án-ne，he是清文建議ê；大概是清文家己無ài ê物件mā beh強制人戒除。阿山年紀已經超過七十歲，tsit-má to̍h ē-tàng為伊準備棺材ê時候à。所以清文硬ài老父接受治療ê理由中，希望老父健康kah長歲壽ê孝心mā有，m̄-koh，khah主要ê是驚社會ê批判，尤其清文bat一時是社會運動ê一份子，對hiah-ê進步ê人來講，伊不得不tio̍h顧陳家ê面子。所以厝裡ê人lóng恥笑清文ê私心，對伊勸老父接受痛苦治療來戒除阿片ê無慈悲行為真不滿。M̄-koh，阿山今年以來身體加真衰弱，若無脫離阿片中毒ê病症，醫生診斷恐驚今年活bē到年底。所以不管清文ê動機如何，伊勸老父入院治療是必然ê措施。治療結果iáu算良好，是值得慶賀ê tāi-tsì，所以bē-sái kan-taⁿ批判清文。
安子穿和服開始準備beh出門ê時，她忽然想講為tio̍h beh hō͘ 老父歡喜，ing暗to̍h穿台灣衫。M̄-koh，一下beh穿ê時，suah發見絲á襪lóng破去，每一雙lóng有破裂，無一雙她看會滿意。因為真久無穿洋裝ā，安子無想beh去補絲á襪，suah kā in放leh。Tsit時，她mā pîn-tōaⁿ去補，若beh送去店舖hông補mā嫌費氣，結果iáu是穿原來hit領和服。換穿和服ê原因就是kan-taⁿ án-ne niā-niā。M̄-koh，做夢mā無想bē到，穿和服竟然幫助她脫離險險á to̍h喪失性命ê災難。這是hit暗發生ê tāi-tsì。
安子行出家己ê厝，來到陳家前門圍牆ê時，去tú-tio̍h也tú行出家己房間ê瑞文。In真罕得是夫婦兩人同齊beh出門，m̄-koh，詳細kā她看，koh m̄是春鶯。
「Ah，真久無見面loh！」
瑞文pháiⁿ勢，án-ne講。事實上，安子已經有一段時間kah伊無相tú。總是，伊有幾nā pái來探訪老父ê款，m̄-koh，安子lóng m̄-bat kah伊相tú過。
「春鶯，ing暗lín夫婦beh去tó位？」
因為前門hia光線khah暗，安子ē-tàng thiau故意假講認m̄-tio̍h人án-ne講。瑞文對家己ê放蕩行為，不管啥人對伊án怎恥笑，lóng無比hō͘ 安子看tio̍h koh khah hō͘ 伊艱苦心。
「Tsit位是tsit pái tshiàⁿ ê tsa-bó͘-kán-á。Ueh，向大嫂請安！」
瑞文用kah-ná受氣ê聲音對邊á ê tsa-bó͘人講。
「Ah，失禮！是非常有派頭ê tsa-bó͘-kán-á o͘h。」 她穿一領水藍色ê長衫，面抹白粉，啥人看tio̍h都bē想講是tsa-bó͘-kán-á；tsit位to̍h是陳陣。
安子想講山頂落來ê tsa-bó͘ gín-á bē曉日語，所以無顧慮就án-ne kā她khau洗。Hō͘ 主人叫講tio̍h kā人招呼，阿陣就恬恬á行禮。看起來kah-ná bē習慣ê款，態度硬piàng-piàng。其實阿陣來到陳家tsiah無幾工niā-niā。Hit暗受tio̍h暴民ê攻擊，tùi部落逃走，來到台南已經是半暝ā。因為時間hiah-ni̍h òaⁿ，瑞文安排她暫時tòa街á ê旅館，kan-taⁿ家己單獨tńg來厝裡。過幾工了後，tsiah用tùi庄腳tshiàⁿ來ê tsa-bó͘-kán-á ê名義，kā阿陣tshōa入來厝裡。
安子ing暗第一pái看tio̍h tsit-ê問題中ê女子，因為好奇心ê使弄，就無客氣kā她斟酌看。有一pái清文tùi荷蘭瓷盤ê歷史事實講起，提起tsit-ê女子ê時，有半sńg笑teh講她可能身上有流外國人ê血。Tsit-má安子禁bē-tiâu 注目kā她看，並m̄是想beh tī暗時探出她ê濫血微妙特徵，卻是kah-ná忽然面對情敵，只不過是奇妙嫉妒引起ê衝動動作niā-niā。
「Ing暗真熱，一點á風都無。」
Tùi房間門行出步道，安子用手ia̍t面；她bē記得帶葵扇。
「Ueh，kā你ê葵扇hō͘ 夫人用。」
瑞文tùi有小khóa距離ê後壁命令阿陣。安子mā隨時ua̍t tńg身過來。
「多謝。」
安子tòe嘴án-ne講，tùi阿陣驚驚the̍h hō͘ 她ê手中，kā葵扇接過來。安子表現出來ê動作無啥物，m̄-koh，心情kah-ná是瑞文被奪走ê感覺。接過葵扇了後，隨時koh tńg身向前，趕緊kā葵扇ia̍t一下ia̍t一下。Tsit時，她鼻tio̍h ná親像茉莉花ê幽香ê味，kám是tsham tī葵扇ê味？Á是kah瑞文並肩teh行，tùi伊身軀芳油散發出來ê味？安子忽然心內有所感觸。
「想bē到你也會娶細姨，畢竟你是一個台灣人。」
安子驚一tiô ê口氣中，有參雜怨嘆kah侮辱輕視。
Tsit時，若是丈夫清文to̍h會隨時反駁講：「娶細姨也m̄是限定台灣人tsiah會！」M̄-koh，瑞文無辯解，無受氣，kan-taⁿ因為見笑kah困惑，面紅kòng-kòng。伊對安子一向lóng是完全無抵抗ê態度，伊tsit種溫和ê款式，安子看tio̍h就常常同情伊，suah無氣力thang kā伊責備；其實安子想講她ná有權利kā伊責備leh？
所以，安子ê口氣隨時溫和落來，koh改變話題。
「Lín kám是beh去看電影？Tsit-má teh演Tshia-puh-lín (譯註：Tsaplin，喜劇電影短片ê影星) ê電影，kám m̄是？」
「Ngh，á阿嫂你beh去tó位？」
「Beh去探訪老父。Tshia-puh-lín ê演技真好，電影叫做《巴黎ê婦人》，kám m̄是？Tsit pái伊無出來演，家己做導演，聽講tsit齣電影非常好，我mā有想beh去看neh。」
「最近阿兄kah-ná無啥teh看電影ho͘ⁿh？」
「因為伊去hō͘ 古董迷去，真無好！」
「總是，阿兄ê頭腦iáu是離bē開社會問題。Ing暗伊kám m̄是去公會堂？」
「伊講是beh去朋友ê厝看古董，ing暗公會堂kám有啥物聚會？」
「你kám m̄知？墓地ê老問題lah，有一個反對遷移ê演講會，一定會大暴亂，危險！危險！」
瑞文無意中án-ne講出來；伊並無特別kā阿兄ê tāi-tsì khǹg-tiám頭殼內。M̄-koh，安子聽tio̍h，就想起清文可能藉口beh去別位，卻是去hia。這忽然引起她奇妙ê不安，就tī步道ê uat角所在，kah瑞文in告別離開，趕緊叫出：「拖車ê！」，然後向公會堂ê方向去。
Tú-tsiah瑞文講一定會有大暴動，m̄-koh，安子擔心ê m̄是清文身邊危險ê tāi-tsì。只是幾工前文化協會ê王茂堂來訪問，勸清文上台ê時，清文斷然拒絕，m̄-koh，安子想tio̍h若是伊心境忽然改變，tāi-tsì to̍h不妙loh；若án-ne to̍h有khah過份。為啥物安子對tsit點hiah-ni̍h擔心leh？He是清明節hit工，她有講了siuⁿ過頭；m̄-nā是án-ne，ē-sái講是kā清文徹底痛擊，這kah-ná hō͘ 伊相當ê震撼，清文到taⁿ lóng m̄講話。Tùi好ê方面來講，若是伊ê心有反應是bē bái，若kan-taⁿ傷tio̍h感情suah hō͘ 伊有使khioh-ka̍k（自暴自棄）ê反彈，無的確伊to̍h會去參加ing暗ê演講會。今後免管lín bó͘，做你照你ê信念自由去做；安子hit時真清楚án-ne講。其實何必hiah-ni̍h冠冕堂皇án-ne講leh？安子忽然tùi女性ê弱點生出後悔ê想法。
公會堂內底聽眾滿滿滿。安子先去看貼tī頭前ê演講題目kah演講者ê名，結果並無看tio̍h清文ê名；伊結局是無來。安子對家己ê加操心，無去探訪老父suah走來tsia，bē了解為啥物家己會hiah-ni̍h緊張。
M̄-koh，她確實是tsông來到不妙ê所在，會場內面kah-ná風吹菅草sa-sa叫teh吵鬧。演講者不時teh煽動聽眾，鼓勵ê聲kah共鳴ê huah-hiu聲tùi四界傳來。維持秩序ê治安人員阻止演講者ê鈴á聲大響，演講者向hit-ê方向看一下隨停止，m̄-koh隨koh繼續演講。然後鈴á聲koh再響，親手án-ne，有幾pái連續ê鈴á聲kah演講停止。中斷演講ê時間kan-taⁿ兩三分鐘niā-niā，公會場內ê氣氛充滿一種緊張ê壓迫感，ná親像風灌kah飽飽ê汽球，隨時會去hō͘ 人鑿破，場內ê氣氛充滿一種緊張ê壓迫感；現現看會tio̍h危險迫tī目睭前，果然phòng一聲汽球破去à。
若去hō͘ tsit-ê可怕ê擾亂絞入去to̍h真頭痛，佳哉安子khiā tī siōng後壁，她隨時tùi正門ê門口逃走出去。M̄-koh，tī tsit-ê瞬間，後面傳來比激烈戰場koh khah恐怖ê聲。
「陳清文有在場，tsit-ê背叛者，kā伊phah hō͘ 死！」
Tsit-ê忽然傳入耳ê聲，安子掠準是聽m̄-tio̍h；tsit-ê「kā伊phah hō͘ 死！」ê聲可能m̄是teh指陳清文，是teh指別人。罵聲是tī暴亂tsìn前，tùi群眾ê中間傳來。吐出煽動言詞ê演講者不斷teh做個人攻擊，K氏kah L氏是受攻擊ê目標，in兩人是市內ê頭面ê實業家。照演講者所暴露ê講法，tsit兩人勾結官廳來包攬墓地整理事業，想beh thàn一tòng大錢，tsit種官廳ê走狗，出賣同胞ê卑賤ê人tio̍h受糾正、批評。In後來tsiah知，tsit兩人偷偷á來傍聽；一旦想beh tshòng tsit項事業，in真知輿論反對ê聲真大，所以趁ing暗tsit-ê機會beh來觀察群眾ê真正意向，tsiah來決定是m̄是beh去承包tsit項事業。Hit時，因為聽眾起亂狂，in兩人險險好好á遇害，是由警察保護tsiah脫離災難。
Án-ne講起來，清文kah hiah-ê利用民眾ê切實問題beh來thàn一tòng大錢ê tāi-tsì一屑á關係都無，為啥物會kah hiah-ê人仝款，成做攻擊ê目標neh？這是因為前幾日王茂堂來拜訪ê時kah陳清文不歡而散，王茂堂就因為憤慨，提出以陳清文為贊成者ê例，這hō͘ 清文成做民眾ê敵人來kā伊責備，結果激動聽眾kā清文當做是kah出賣同胞ê奸商仝款。雖然清文khiā tī kah民眾相反ê立場是為tio̍h正義，m̄-koh，聽眾mā是無beh放伊suah。
Tsiah-ê全部詳情，安子tī事件了後tsiah知影。面對危機ê hit當時，她kan-taⁿ想講beh如何來拯救丈夫，kui頭殼內kan-taⁿ想tsit項tāi-tsì。她忽然又koh beh tsông入去會場，m̄-koh，混亂ê群眾中間，無孔縫thang hō͘ 她進入去一步。安子kan-taⁿ著急，其他無啥物辦法。Tsit時，她忽然看tio̍h清文tùi群眾中間跳出來，走向門口，差一屑á to̍h kheh-tio̍h安子ê肩胛頭。伊禁bē-tiâu叫出：「你」，m̄-koh，清文顯然無注意tio̍h安子ê存在。安子隨時tùi後壁jiok去，m̄-koh，幾nā個tsa-po͘人比伊khah tāi先jiok-tio̍h清文，以公會堂頭前暗淡ê大王椰子樹做中心，kā清文包圍起來。
安子想beh叫警察，m̄-koh，警察kan-taⁿ集中精神teh鎮壓暴徒，以及保護K氏kah L氏，kah-ná無閒thang來照顧清文。Hit暗ê事件本來kah清文lóng無關係，只是伊pháiⁿ運去hō͘ 人絞入去niā-niā，而且清文tī社會ê地位ná親像一張白紙，警察當然kā伊放bē記得。安子發覺tī tsit-ê場合無法度óa靠警察ê保護，所以她勇敢突破包圍，khiā tī丈夫ê頭前。Tsit時，光亮ê一刀tùi她ê目tsiu前liô過去。
清文抱tiâu teh beh向後倒落去ê安子，無顧一切走向大路去，tsa̍h一台人力車落來。
「來去回春病院，拚速度！Khah緊leh！」 He是阿山入院中ê病院，以普通ê速度，只不過是十分鐘ê距離。 三輪車tī合歡木ê路樹中間跑走，安子倒坦橫tī車ê後座。清文kā她tháu開衫褲ê帶，看tio̍h白色ê內衫流出鮮血，伊驚一tiô。Tùi熱天薄衫鑿落去腸á ê部位，若萬一，有可能是致命ê深傷。
「安子，會痛bē？」
「Bē lah，無啥要緊。」
「真失禮！」
安子thí開目tsiu，露出微微á ê笑容。丈夫kā她會失禮ê低沉聲音，ná親像寺廟ê鐘聲，神秘koh莊嚴ê餘韻滲入去她ê全身。「真失禮！」Tsit句清文ê聲，確實意義深長；he m̄-nā是對in bó͘ 拯救伊性命ê行為表示感謝niā-niā，是有超過感謝ê意義tī-.teh；就是一種對teh beh失去家己所愛ê人á是家己面臨死亡ê時，大部分ê人lóng會發出ê話。對過去一生ê精神kah行為做總決算，清文發現伊對安子ê付出比伊tùi安子所得tio̍h ê少一大碼。伊ê悔恨沉重壓縮了後，結果所發洩出來ê謙卑話就是 「真失禮！」。
無no͘h，清文無感覺安子teh beh死去，卻去hō͘ tsit種心情束縛tiâu leh，到底是án怎leh？伊忽然tùi惡夢中醒過來，直直看安子ê面。安子ná親像細隻鳥á hiah-ni̍h溫柔，目tsiu mi-mi，幾條散亂ê頭毛落tī蒼白ê面上；bē講得ê平靜面容，握tiâu ê手掌有汗濕koh溫暖。清文看tio̍h tòe車體teh搖tín動ê頭殼，伊感覺安子kah-ná死去à ê款。
來到病院，安子hō͘ 人送入去治療室接受急救。清文tī外口teh等ê中間，伊想像siōng bái ê phah算，緊張kah行來行去。Tòa tī病院teh照顧阿山ê老tsa-bó͘-kán-á素娥聽tio̍h消息，趕來問講夫人是án怎leh？有性命ê危險無？素娥真不安ê面色teh問，tī hia teh行來行去ê清文無發覺tio̍h她，無kā她回答，mā無kā她看一目。 過無gōa久，治療室ê門phah開，院長出現。
「院長，情形án怎？有要緊無？」
醫生明朗ê微笑暗示狀況bē bái，伊用tú洗了iáu未ta ê手phah清文ê肩胛頭。
「陳先生，你ê運氣真好，受傷ê部位是要害，我mā真煩惱，m̄-koh詳細kā她看，卻無啥物大傷。孔嘴六公分，深二公分半，內面ê腸á lóng無異常，一禮拜了後就ē-tàng出院ā。」
「Án-ne真多謝，因為她是hō͘ 人tùi薄衫頂面鑿落去，我掠準會....。」
因為感覺安心，伊後壁ê話to̍h無koh續落去講。
「你若是日本人應該早to̍h注意tio̍h，為啥物夫人hō͘ 人鑿hit刀無啥物嚴重？」
醫生tshōa清文入去治療室，指安子ê腰帶hō͘ 伊看。一看，原來如此，果然腰帶ê銀絲菊花圖樣正中央ê結蕊hō͘ 刀鑿破去。如果安子若穿洋裝á是台灣衫，he就不堪設想loh，清文想tio̍h to̍h koh起驚。伊án-ne teh想，就kā tàn tī籃á底亂亂ê腰帶the̍h起來折hō͘ 它好勢。 為tio̍h beh接受好ê治療，清文決定hō͘ 安子tòa院。Tī hit棟台灣式房屋改造ê病房邊á，有一棟獨立ê日本式病房tú好有空位，安子就án-ne tòa入去。
Tsit-ê意外事件報tńg去陳家，大家隨時趕來到病院。Tsa-bó͘-kán-á阿英哭teh來tshōa清子，玉簾kah春鶯坐車趕來，in比其他ê人khah早到位。去參加sing-lí場ê宴會ê景文kah去看Tshia-puh-lín電影ê瑞文，in接tio̍h緊急通知也lóng趕來到病院。新聞記者明知事件內容禁止刊登，in mā是走來問一kóa討厭ê問題。
Tāi-tsì處理到一個段落，清文吐一個大氣來輕鬆一下。Tsit時聽tio̍h有人細聲teh叫伊，一看to̍h是素娥。Tio̍h lah，伊tsit-má tsiah發覺，tú-tsiah當teh處理急救ê時，tī伊邊á ê to̍h是素娥，她一定是iáu-teh煩惱，beh來問安子ê狀況。清文無beh驚動老父，就叫素娥注意，tio̍h對老父簡單提起to̍h好。M̄-koh，素娥心情非常著急，kā清文報告ê是另外一個意外事件：阿山失蹤à。
病院koh引起一tsūn ê喧嘩；各病房、ta̍k角落lóng tshōe透透，m̄-koh，to̍h是tshōe無阿山。阿山一定是趁大家teh無閒安子ê意外災難ê時，早to̍h脫出tsit間病院。
「真害，伊已經治療到tsit-ê坎站，suah….」
院長S氏改變tú-tsiah講tio̍h陳夫人ê時ê樂觀面容，tsit-má有小khóa失望。S氏mā是基督徒，kah陳清文夫婦是朋友關係，所以對阿山ê治療特別用心；這ē-sái講是超越職業意識ê奉獻努力，m̄-koh，伊無一定有成功ê把握。阿山m̄-nā是阿片ê中毒者，而且是koh活無幾年ê高齡者，肉體上有真tsē毛病tī-.leh。若處理bē好勢，有可能會變成為tio̍h beh矯正牛角suah去thâi死牛ê結果。阿山一向ta̍k工食一兩半ê阿片，以伊ê年齡kah體力來講是相當超量，所以醫生採取ta̍k日減量ê方法，hō͘ 伊避免因為禁食來受劇烈ê痛苦。一般來講，若是對有體力ê人就會採用對症下藥ê辦法，然後tsiah hō͘ 伊食鎮定劑á是安眠藥來減輕痛苦。M̄-koh，對阿山tio̍h特別謹慎，m̄-nā án-ne，tsit種阿片中毒者ê特徵之一是gâu講白賊，所以為tio̍h beh分辨患者講話ê真假，tio̍h調查看伊有偷藏阿片á無。而且因為患者若心理上過頭絕望會去自殺，所以醫生mā tio̍h隨時記tiâu精神病學ê方法。因此，勒戒阿片對患者來講，當然是真辛苦，主治醫師也tio̍h謹慎注意，koh ài有耐心。經過努力ê結果，阿山漸漸有起色，tsit兩三工已經無禁食ê症狀，koh有食慾，S氏醫生當teh開始放心鬆一口氣。Tsit時，阿山suah來溜走，莫怪醫生非常失望喪氣。Kám講一切lóng變成烏有，已經絕望ā？阿山溜走，除了去tshōe阿片以外，無可能有別ê目的。
果然tī市內四界tshōe了ê結果，到半暝tsiah發現阿山去ê所在，就是tī lah-sap koh雜亂ê街頭；阿山倒tī一間阿片薰館ê眠床頂。
長時間禁食阿片，阿山對阿片hah-kah beh死，伊一定心內充滿歡喜kah爽快teh食阿片。伊tī hia睏重眠，無論án怎kā叫kā搖，lóng無法度kā伊tùi武陵桃花源叫tńg來。清文bē-tàng離開安子，所以無在場。景文、瑞文kah幾位僕人kā阿山扛起lih車頂載tńg去厝裡。Tsit時，有人建議koh送tńg去病院，m̄-koh，in想講病院對阿山來講等於是監獄，送伊tńg去顛倒是無慈悲ê行為，所以in iáu是先kā伊送tńg去厝裡。
清文接tio̍h已經發見老父ê報告就安心落來，m̄-koh隨koh接tio̍h電話講：「人已經往生à！」
阿山ê死hō͘ 人感覺是解bē開ê謎；kā伊扛入去伊ê房間ê時，景文iáu滾sńg笑講：「Beh去阿片薰館mā tshōe一間khah好ê所在，án-ne hō͘ 阮thiám kah beh死，無kā伊the̍h運搬費算bē hô。」In根本lóng無想講伊已經死去à，聽tio̍h老母阿嬌悲傷哮起來ê時tsiah知。Tī阿片薰館發見ê時，in想講伊是iáu活leh。瑞文講：「真奇怪，我有聽tio̍h老父teh睏喘氣ê聲，而且身軀mā iáu燒燒，m̄-koh....。」景文講：「我看tio̍h伊ê目tsiu皮有teh tín動，m̄-koh....」言語上in án-ne斷言，m̄-koh，心內iáu-teh懷疑是m̄是tī阿片薰館發見ê時，伊to̍h已經死à？真是不可思議。Tsiah三十分前ê tāi-tsì，m̄-koh，記憶kah-ná陷落tī雲霧中，無法度確實證明真相。所以in認為是tī車底ê時，伊不知不覺斷氣去；這是tsit時siōng適當ê解釋。M̄-koh，一直無法度排除tī發見ê時無感覺是teh扛屍體ê奇怪想法。
阿山ê死無hō͘ 真tsē人現場感覺tio̍h，是真自然ê過程。
老母阿嬌若講是teh可憐丈夫，不如講是對丈夫死kah hiah pháiⁿ看teh掠狂哀哭。大家族ê家長應該是tī家族同齊用心看護kah疼惜之下，tī豪華ê眠床頂瞑目tsiah tio̍h。Taⁿ阿山kah-ná流浪漢死tī路邊，這beh ná會看口得？而且無一個人看tio̍h伊斷氣，án-ne阿山kah-ná是靈魂無tè去ê鬼。老母對清文無停teh批評攻擊講：「伊會落到tsit-ê地步，lóng mā是你出ê主意。」
清文承認m̄-tio̍h koh kā她安慰，m̄-koh lóng無法度hō͘ 老母平靜落來，最後伊大聲講：
「阿母，請mài koh hiah-ni̍h激動。老父m̄是像（tshiūⁿ）lín所想像ê小人物，伊絕對無認為死亡是悲哀ê tāi-tsì，koh khah無像阿母hiah-ni̍h迷信，kan-taⁿ講hiah-ê無合故人意志ê話。請你詳細看老父ê面容！」
阿山年老體衰土色ê面，浮出ná有ná無ê微笑；生前bat伊ê人，對伊樂觀飄逸ê風采，到taⁿ iáu ē-tàng tùi伊ê面容看出。半開ê嘴kah-ná teh講：「Tùi自然來生koh回歸自然，有啥物thang悲哀leh？我用siōng適合我ê死法來死。」
十工後舉行葬式。
清文想beh採用盡量簡單ê儀式。台灣ê冠婚葬祭非常繁雜koh浪費，所以m̄是kan-taⁿ清文主張tio̍h極力來糾正，新時代ê人mā lóng抱仝款ê看法，而且像阿山tsit款已經達到生死相同ê悟性，簡單ê儀式顛倒khah sù配。M̄-koh，因為阿山是家長，而且享受長歲壽來往生，所以全家族無人beh聽清文ê意見。尤其是阿嬌，她認為阿山hiah-ni̍h pháiⁿ聽ê死亡款式，為tio̍h beh回復伊ê名譽，洗清世間pháiⁿ聽ê傳聞，tio̍h大大舖排tsiah ē-sái得。
所以，無論清文ê意向如何，阿山ê葬式是tsit-ê城市前所未有ê盛大奢華。親像神轎裝飾ê棺木由三十二個人扛，綿延數百人ê送葬行列，鳴鉦、phah鼓、pûn鼓吹等等鬧熱ê出山音樂，混合眾女子ê哀哭聲，形成一種奇怪ê交響曲，盛況空前。
身穿麻衫，頭戴麻布三角帽ê孝男，跟tòe棺木ê邊á teh行，tsa-bó͘人坐轎跟tòe tī後壁。安子孔嘴痊癒ê情形真好，五工前to̍h出院，她tshōa清子參加出山ê行列。
「阿母，阿爸teh哭neh。」
清子kah-ná bē堪得hiah鬧熱ê行列kah哀哭震天ê送葬ê刺激，頻頻對老父感覺不安，所以來問老母：
「阿爸為啥物teh哭？」
「你gín-á m̄-bat tāi-tsì，我已經kā你講過阿公死去à。」
「M̄-koh，阿母你無teh哭，為啥物leh？」
幼兒ê疑問hō͘ 安子有一點á困擾，oh得kā她回答。每pái行到街路uat角ê所在，安子ē-tàng tùi轎ê窗簾看tio̍h清文ê形影；伊身穿麻衫，thuh枴á，穿草鞋，雙pêng有人扶伊teh行。M̄-koh，清文tī tsit-ê場合，kan-taⁿ ē-tàng表現風俗上充滿形式ê哀傷，只不過he是kah伊真情哀悼老父往生無仝ê另外一種方式；所有ê人lóng是án-ne，尤其是tshiàⁿ來做孝女ê tsa-bó͘人，甚至捻（liàm）坐tī仝轎ê幼兒ê kha-tshng-phóe hō͘ 伊哭，來忠實達成她ê義務。
以家庭做社會單位ê生活，一個人ê生死對伊本身ê意義kah感情，hō͘ 背後khiā-.teh ê龐（pâng）大家庭ê影遮tiâu-.leh，suah失去伊ê光輝。所以，像講安子頭胎夭折ê gín-á án-ne，十歲以下ê gín-á死亡，被用非常冷酷ê方法處理，kah-ná teh處理厝裡死去ê狗一樣。若講tsit-má tsit-ê家長ê情形，he是為tio̍h beh誇耀家己ê富裕kah繁榮，無惜千金，大大舖排。清文tsit-má陷落tsit種舊傳統，感覺真無奈。他想講沿路teh看送葬行列ê日本人á是新時代ê台灣人，大概會笑伊講：看你tsit-ê款式！這to̍h是提倡社會文化進步ê男人ê後果。M̄-koh安子知影，清文tsit-má ē-tàng充分忍受tsit種ê侮辱。
無gōa久，埋葬完成了後，陳清文夫婦tńg來到厝。
Thǹg掉喪服，換穿清爽ê浴衣，兩人坐tī二樓樓台ê藤椅頂。Hō͘ 死人入土為安，清文暫且放落肩胛頭ê重擔，大大吐一口氣。夫婦兩人一時無話，眺望外口。天空罩雲一片灰色，水氣飽滿ê空氣重kah bē tín動。白蟻成群teh飛，hō͘ 人感覺黃昏ê腳步近óa loh。
一隻白蟻落入去咖啡杯á內，安子叫一聲「Ai-ah！」，m̄-koh，清文不管，伊kā白蟻掠出來，kah-ná無啥tāi-tsì，就kā咖啡lim落去。安子忽然想起幾年前ê tāi-tsì；tio̍h lah，是結婚了後無幾年ê tāi-tsì。Hit時，清文抱tio̍h希望進入官界服務，無gōa久伊去hō͘ 人排斥出來，當teh陷落困境ê時tsūn，安子為伊泡一杯kha-lu-phi-suh飲料，卻粗心大意，無看tio̍h杯á內落一隻胡蠅，hit時，清文對她ê態度是非常恐怖ê激烈。Tsit-má tī喪事期間，清文ê心情無法度hō͘ 激情入去，m̄-nā是án-ne，伊ê人格成長，冷靜koh心胸開闊，安子感覺真歡喜。
「時間過了真緊，咱結婚已經十年ā，tsit中間發生種種tāi-tsì。」
「各種tāi-tsì lóng有。」
「M̄-koh，雖然結婚已經十年久，咱iáu是gín-á ê想法，無了解生活ê方法，kám m̄是？」
「確實是án-ne，所以，hit工你為我做尊貴ê犧牲ê時，你若有三長兩短，我想我會bē堪得。Tsit十年中間，對我來講是
受侮辱kah混亂ê時代，以後希望咱會有koh khah光榮ê時代。」
然後兩人又koh恬恬眺望天空，kah-ná雲霧一般ê白蟻陣，tùi陳家ê厝頂飛向天空，過無gōa久，蟻翼lak落來土腳；白蟻hō͘ 地基朽爛，柱á蛀孔，醞釀（ùn-jiòng）陳家敗壞摧毀ê勢面。M̄-koh，兩人án-ne teh看，心內卻teh想：過無gōa久，hō͘ 陳家改變ê m̄是白蟻，以後是咱ê時代。
