《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十六章（更新版）
作者 庄司總一 著 楊東傑 指導 林俊育 台譯 2017.07.02
有一工，陳清文kah安子去大南門外墓地ê山崙á。
Tsit-ê高台in兩人kā它號做「各各他之丘」，tú結婚hit當時，兩人tiāⁿ-tiāⁿ來tsia散步，m̄-koh此後已經幾年無來ā。
Hit工tú好是清明節，真tsē人來pōe墓，重重疊疊ê土饅頭之間，燒香kah燒銀紙ê煙tshèng上天，四界ē-tàng聽tio̍h哀哭ê聲。
安子bē了解，為何清文專工選tsit-ê傷感ê日子，tshōa她來tsia？清文掛烏目鏡來遮日頭光，hō͘ 人看bē出伊ê表情，mā oh得親近，kah-ná心內有啥物心思。最近台南ê市內，因為tsit-ê台灣人墓地ê遷移有引起糾紛，清文mā相當關心tsit-ê問題。
果然清文tùi山崙á看落來墓地，對安子講：
「講tio̍h墓地遷移tsit-ê老問題，如果tsia是日本人ê墓地，來pōe墓ê是日本人，你對tsit-ê問題有啥物看法？」
伊專工tshōa bó͘ 來tsia散步，to̍h是beh問她tsit句話。清文hiah-ni̍h用心良苦，不得不採取án-ne ê態度，安子體會tio̍h伊ê心非常苦悶。
市府用祖先祭祀大典ê事業名義，beh來kā台灣人ê墓地遷移整理，三年前to̍h開始計畫beh建設運動埕kah go-lu-huh(譯註：golf，華語譯做「高爾夫」) 球場。自hit時以後，m̄-nā台灣人tsit pêng強烈反對，連日本人kah官廳ê一部分人mā反對，致使當局無容易實行，mā不斷引起種種ê糾紛。清文tsit-má m̄是政府官員，mā無參加任何社會團體，所以無需要發表家己ê見解，mā無發表ê機會，m̄-koh，伊個人ê意見自開始to̍h是贊成。這是一個自由人ê單純意見，m̄是因為驚官府ê權威，mā無迎合時局ê卑鄙之心，所以伊問心無愧，無啥物見笑tāi。總是，伊周圍所bat ê人，雖然反對意見有強弱之差，m̄-koh lóng是持反對ê意見。因為án-ne，伊suah成做是異端者，hō͘ 人khǹg-tiám難堪ê孤立立場。人人lóng講伊娶日本人做bó͘ ê關係，tsiah會硬kā家己偽裝做贊成者。Tī tsit種情形下，辯解mā無khah tsua̍h；伊試過幾nā pái，已經經驗過à，到tsia來，伊對人ê誤解mā無感覺án怎苦惱。M̄-koh，tsit pái墓地ê問題一直掛tī伊ê心肝頭，剝bē離，漸漸suah tùi kah人ê關係游離出來，變成tiàm-tī靈魂中兩個家己teh格鬥ê形態，實在是不可思議ê tāi-tsì。 昨hng，文化協會ê王茂堂理事真難得來訪問。清文雖然已經退出協會，m̄-koh，因為伊bat擔當過重要ê幹部之一，所以無論表面如何，若phah開腹肚來看，當然別人會認為伊對目前ê問題事實上是無抱贊成ê意見。王茂堂來是beh kā清文使弄，講：「若án-ne，tsit-má是你拋開思考無明ê小市民生活方式，來勇敢面對現實，重新回歸家己ê絕好機會，kám m̄是？最近阮beh開一個反對說明會，你若有意願，希望你來扮演一個角色。」
M̄-koh，清文lóng無躊躇就kā伊拒絕。
「我料想bē到，你是tùi心底贊成ê人，我卻無發覺tio̍h。」 王茂堂露出失望ê表情，然後用khau洗ê口氣講：
「一段時間無見面，你to̍h變成一個優柔寡斷ê機會主義者à。」
「Tshut-tsāi lín án怎講lóng無要緊，m̄-koh我án-ne teh想，如果lín gia̍h雙手來贊成墓地遷移，he實在是hō͘ 人尊敬ê精神。」
「阮kah-ná對你ê評價siuⁿ過kôan；你ê心底結局是抱tio̍h無聊ê基督教和平主義。」
「M̄-koh，你kā它想看māi leh，hiah-ê ná親像土饅頭重重疊疊ê pháiⁿ看墓地，到底妨害都市ê發展有gōa tsē？我無beh採用lín hiah-ê會hō͘ 都市變成曲痀ê計劃，我希望ē-tàng tī枯骨ê頂面起現代建築物á是綠園。」
「哈哈，你kah-ná是穿高等官服ê官僚講法。Lín可能認為家己是進步主義者，其實你只不過是一個常識家niā-niā；你是完全喪失社會觀念kah階級意識ê空殼á。若是kā你ê近代建築kah綠園ê偉大美夢暫時khǹg-tiám邊á，為tio̍h beh起造一部分特權階級ê運動埕kah go͘-lu-huh球場，tio̍h需要來挖掘十萬市民埋葬in重要祖先ê墓地，án-ne，你ê看法如何？而且對一個無產階級ê人來講，一個墓kan-taⁿ補償二十圓，會造成人民ê大負擔，tsit點你認為如何？何況對tsit種刻薄ê現實，你kik kah有看tio̍h kah-ná無看tio̍h，你kan-taⁿ kā你ê夢畫tiàm空中來滿足家己，kám m̄是？陳先生，你kám無感覺家己內心一屑á純潔都無？」
「Tsit種話是我想beh問你ê。Lín以民眾指導者ê身分來反對墓地遷移ê中間，kám講lóng有純潔ê心？遷移費用ê負擔kah具體ê方法，結局是次要ê問題，kám m̄是？若講這是刻薄，lín ē-sái抗爭到底ā。M̄-koh，lín基本ê理由m̄是án-ne，lín kám m̄是kan-taⁿ為反對來反對？用尊重祖先崇拜思想 kah擁護傳統道德來做主要ê理由，以tsit種美德做藉口來訴求道義感，我感覺lín無適合án-ne做。Lín一向輕視koh棄sak心胸狹、卑鄙驚死、感傷ê精神，kám m̄是？Lín án-ne就會陷入自我矛盾lah。」
若去鑿tio̍h tsit-ê弱點，對反對陣營來講，尤其是有左派色彩ê人，會感覺tio̍h刺痛。所以，若繼續koh議論落去，清文tsit pêng會贏。M̄-koh，清文tī掠準勝利ê瞬間，伊suah感覺一種微妙ê敗北。用理論做武器，伊並無輸對方；m̄-koh，氣魄kah氣魄相接觸ê時，清文就忽然開始雙腳無力起來。
王茂堂拚命beh深入去清文ê內心弱點，伊用鼻孔冷笑對伊講：
「我無法度kah你仝款安份tī小資產階級；阮有大目標，所以有時tio̍h扮演m̄是家己意愛ê角色，á是你所恥笑ê陷入自我矛盾ê情境。阮愛民族，愛大眾，除了這以外無其他ê意思，而且阮為tio̍h tsit-ê目的，點to̍h熱烈ê精神，應該持有ê阮mā lóng有持有。M̄-koh，陳先生，你到底持有啥物？」
清文hō͘ 伊án-ne一問，就小khóa恬落來。M̄是oh得回答，是伊感覺回應tsit種幼稚ê議論，顛倒是表示家己無成熟。「愛民族，愛大眾，我一屑á都bē輸你。」伊kan-taⁿ án-ne回答就有夠額。Á是伊tio̍h koh khah根本性，koh khah廣義來回答講：「愛國家，名叫日本ê國家kah國民。」？。M̄-koh，清文koh感覺tsit兩句話kah-ná比王茂堂ê口氣koh khah幼稚，koh khah無信念。思想kah理論對茂堂來講，iáu是tī黏糊糊ê果凍狀態，伊kan-taⁿ會曉用嘴講講leh。M̄-koh，充滿迫害肉體ê懷疑tsìn前，不管講gōa tsē話，lóng kah無價值ê白紙仝款，必要ê kan-taⁿ一塊純金；王茂堂to̍h是teh指責清文無持有這。
墓地遷移ê贊成kah無贊成ê爭論，清文tsit pêng加真占優勢。M̄-koh，清文忽然感覺損傷ê m̄是對方，顛倒是家己kui身全傷。對方極力teh講：
「台日結婚hō͘ 你失去台灣魂，koh抹消你ê信念；除tsia以外你iáu有啥物？」清文驚一tiô，suah緊張起來，kah-ná伊到taⁿ lóng完全m̄-bat注意tio̍h tsit件tāi-tsì。伊會驚一tiô koh緊張起來ê原因，其實是伊kah安子結婚以來，這kah-ná是一種病不斷teh kā伊侵犯，漸漸變成慢性病，tsit-má甚至已經差不多變成無自覺ê嚴重症頭。M̄-koh，因為tsit-ê機會，suah hō͘ 伊覺醒起來；伊忽然間發覺，若無徹底治療to̍h會活bē落去ê hit種迫切感。
清文想beh tùi tsit-ê墓地，直接接觸守護墓地ê眾人，來探究家己ê真正心意。伊對安子ê假定問話，其實ē-sái講是對伊家己ê反問。
「人lóng mā無ài家己祖先ê墓hō͘ 人挖起來遷移，我當然無反對bē-sái。」安子án-ne講。
「無m̄-tio̍h。」
清文kah-ná同意，án-ne回答，了後隨koh用khau洗家己ê口氣講：
「連你都án-ne講，總是我卻無提倡反對ê論述，這是啥物原因leh？」
「這是因為你ê想法比社會khah進一步，無受感情束縛，超越自我，kā你ê心khǹg tī真正高尚ê理想頂面。」
清文ê態度嚴肅，安子mā有注意mài去鑿tio̍h伊尖銳ê神經。
「Tsia是鄭成功以來三百年ê墳墓之地，起造現今時代基礎ê先人tī tsia teh安眠，taⁿ beh kā in挖起來遷移，任何人lóng會有深深ê感慨。M̄-koh，tsit種感情kah現實問題是兩回事，我認為你ê意見無論如何lóng是正確ê，m̄-koh….。」
「無lah，你án-ne簡單to̍h做結論會傷腦筋，你可能無真了解我ê心情。我m̄是kan-taⁿ teh講墓地ê tāi-tsì，是teh講koh khah重大ê精神問題。針對tsit pái ê問題，有心ê人可能會評論講我態度堂堂正正，m̄-koh，我kám有影值得hō͘ 人án-ne評價？總是，我可能無把握tio̍h堅定koh確實ê物件。我提倡相反ê講法，家己想講án-ne真超然，其實難免會感覺奇妙ê孤單、內疚；tsit種感受hō͘ 我擋bē-tiâu。」
不管瑞文是m̄是用烏目鏡來掩蓋伊ê表情，安子已經非常清楚in翁ê想法。她驚一tiô，清文ê氣力kah熱情kah-ná枯焦ê樹葉四界飛，m̄-koh，án-ne bē-sái得，bē-sái hō͘ 伊tī tsit-ê時tsūn軟弱落去。Án-ne teh想ê中間，她隨kā綠色ê陽傘收起來，hō͘ 日頭光kah-ná kā心燒焦án-ne，點to̍h她激烈ê怒火。
「你到taⁿ iáu是tsit種懷疑論ê俘虜。」
「我並無án-ne想，m̄-koh….。」
「你koh-beh講是我ê原因ho͘ⁿh？」
清文恬恬無話。
「M̄是lah，是你想beh án-ne講ê。你sēng pháiⁿ家己，你是罪人。」
「請你mài誤解。Tī咱兩人ê關係上，我實際上無啥物thang好kā你責備ê。我所講ê m̄是tsit種人kah人之間ê關係，是抽象形態ê問題。咱兩人台日婚姻ê形態所產生ê一種悲劇，我只是想beh設法來解決lah。」
「你講是悲劇！悲劇、悲劇！」
這真是出tī安子意料之外ê話，因為siuⁿ過驚kah gāng去kah憤慨，她hit句「悲劇」ê音聽起來顛倒有歡喜ê款。
「這是我ê失言，應該講無幸福khah妥當。無論án怎講，kah世間一般ê意思有小khóa無仝to̍h是lah。若講無幸福，我是teh指質，m̄是量ê問題。譬喻講，我娶台灣bó͘ kah娶你ê tsit兩種都合，雖然仝款會有苦惱ê所在，m̄-koh，性質會無仝款；我是teh指tsit-ê意思。」
「Ai-ah，你án-ne ê想法可能有m̄-tio̍h；若是抽象ê物件to̍h lóng無量kah質ê區別à。幸福kah無幸福，結局kan-taⁿ是一種性質，可能是一種色彩無分明ê物件；有kah無，kan-taⁿ án-ne，kám m̄是？」
「我無像你hiah單純ê想法，我所講ê無幸福，是指有形ê無完全所產生ê精神無平衡。」
「清文！你ê頭殼真正有問題o͘h。」
安子就án-ne直稱伊ê名，無加尊稱。Hō͘ 她án-ne叫ê清文感覺真意外，叫出嘴ê安子本人mā驚一tiô；兩人lóng感覺不可思議，互相對看。安子直接叫丈夫ê名，以前kah以後lóng m̄-bat án-ne，kan-taⁿ有tsit pái niā-niā。可見tsit時ê安子想beh超越一切ê障礙，來消除她kah清文兩人中間ê隔離，想beh深入清文ê內心。兩人相看，因為緊張suah帶有敵意ê目神中，流露微微á ê笑神。這to̍h是尖鋒相對ê時，所發出ê美麗火花。
「你tsit-má當teh苦惱，我真了解你tsit種一籌莫展ê心情。你ê心情hiah-ni̍h沉重，m̄-koh，你iáu koh beh辯解，想beh掛面紗來掩蓋家己。你ná會無ài khah率直，khah盡力對我來透露leh？無lah，應該是講你tio̍h面對全部ê現實來向前突破。若是講bē出嘴ê苦惱，to̍h m̄是值得重視ê苦惱；它mā m̄是你hit種意義kôan ê苦惱，卻是無聊ê偏見kah扭曲。你kah-ná是一個無講理ê gín-á，陷落tī真大ê錯誤。你所講ê重大ê精神問題，詳細kā它想起來，kah精神一屑á關係都無，我認為he kan-taⁿ是感情問題。我án-ne講ê證據to̍h是：你雖然講m̄是teh kā我責備，m̄-koh，你án-ne teh辯解，結局suah kā你真正ê內心lóng顯露出來。我m̄知你家己有清楚了解á無？你ê心底總是有一個心結，你想講因為娶日本bó͘，所以無法度發揮家己所意愛ê想法。我當然真了解tsit點，我mā有責任；我所生活ê世界真狹(e̍h)，koh想beh kā你拖入來tsit-ê世界，thang hō͘ 你過平凡ê日子，這是確實ê tāi-tsì。M̄-koh，這是一個做bó͘ -.ê ê心，並m̄是因為日本bó͘ ê關係，你絕對無理由án-ne特別kā她限定。你ê錯誤to̍h是tī tsia；你因為kah日本人結婚，suah kā所有ê問題lóng賴賴tùi tsia來，koh受tio̍h它ê束縛。你一直停留tī hit種低路ê心情，你做啥物phah算？Ai-ah，拜託一下，從今以後，請你mài kā我khǹg tī你ê眼中，自由去做你意愛做ê tāi-tsì；你認為是好ê，你相信是正當ê，to̍h照你想beh ài ê去做。Án-ne你無受束縛，用自由開闊ê精神所做ê tāi-tsì，若koh tú-tio̍h困擾kah苦惱，我mā會感覺心安意足。你我兩人今á日kā次要ê tāi-tsì講hō͘ 它清楚。你是台灣人，我是日本人，這tī咱兩人ê真正性命中，kám m̄是無啥物關係？神用一種血創造所有ê人類，準講無tùi聖經中得tio̍h tsit-ê教示，咱mā真清楚，kám m̄是？人類kah狗to̍h bē有tsit種關係。用仝種血來創造ê人類，國界ê界定kah語言風俗ê無仝，有它ê意義，kám m̄是？當然有時會引起種種ê摩擦，m̄-koh，我無認為這是bē-tàng挽救ê無幸福；至少he bē消磨人ê心靈，mā m̄是會hō͘ 人失去信念ê悲劇á是無幸福。」
安子講話kah-ná機關槍，一句koh一句講bē suah，完全無hō͘ 清文插嘴ê餘地。平常時驚見笑koh溫柔ê bó͘，清文想bē到她會有tsiah-ni̍h激烈ê熱情kah正確ê理論，以及有力koh悲壯口氣。清文kah-ná去hō͘ 她khiú tiâu-.leh，suah無話thang講。安子本身tī興奮過了後，對家己án-ne kah-ná the̍h演講稿khiā tī講台頂teh高談闊論ê tāi-tsì，感覺真pháiⁿ勢。
結局，安子phah開心胸，無留槍籽，án-ne kā話吐出；雖然有得tio̍h滿足，m̄-koh，心情並無得tio̍h完全tháu放。顛倒感覺該hō͘ 丈夫ê suah lóng無tshun半項ê莫名空虛，而且因為án-ne，她想tio̍h丈夫到底有得tio̍h gōa tsē？伊無得tio̍h啥物lah，安子suah悲傷起來。
