《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第二十三章（更新版）
作者 庄司總一著 賴永祥指導 林俊育台譯 2017.04.09
清文tsit-má tú-tio̍h一個真大ê困難。
因為伊已經kā郭萬春辭頭路，所以必須趕緊tshōe一個適當ê人選，若無，機械ê運轉會bē順序，而且，今年到明年公司ê業績是伊事業成長ê關鍵；已經每年連續赤字，tsit時若無來一個快速ê成長，公司koh khah會產生危機。伊ê資產已經大部分lóng投入，為tio̍h beh彌補虧損kah期待今後ê發展，公司已經進入需要貸款ê狀態。清文心內ê不安漸漸擴大起來；án-ne繼續落去，會án怎leh？清文想講家己無適合經營事業，有時會感覺tio̍h難堪ê後悔，á是心情疑惑。Tsit時，伊一定有產生想beh反駁kah對抗小弟景文ê意識。
景文以前從事ê稻米買賣，tī收音機出現了後to̍h停止，改做經營雜項ê買賣商業。Tāi先，伊siōng大ê收入是約二十甲ê魚塭；魚塭kah田地無仝，池á內飼ê虱目魚、鰱魚á是鯉魚ê數目有幾萬尾，oh得以面積來推測，所以稅金ê核算bē真嚴格。Tùi鹽田，伊mā有得tio̍h利益；而且koh tī三年前，開設海產批發店，kah對岸ê福建交易，mā有thàn錢。Án-ne應該是已經有夠額à，m̄-koh，會thàn錢ê sing-lí，伊lóng mî-nóa去做；若有兩台貨車ê拍賣俗物出來，伊to̍h kā它買來，koh當做三台車ê貨賣出去。伊koh kā幾間老舊teh出租ê房屋買來，mā是得tio̍h真好ê利純。景文án-ne經營種種ê行業，事業無論大細lóng有thàn錢；其中有一個聽起來to̍h hông感覺無好聽ê，是伊接受別人讓渡hō͘ 伊ê處理屎尿ê權利，當伊去做hit-ê行業ê社長ê時，連無關心丈夫事業ê玉簾都受氣。 Tsit種無顧體面，kan-taⁿ顧thàn錢，koh精神旺盛ê商業根性，只有tī hit-ê行業鍛鍊過ê人tsiah有hit-ê本事；生手koh受過教育ê人，無論如何都做bē來。清文tī經營方面無beh kah景文競爭，m̄-koh，對景文ê堅強精神，伊kan-taⁿ怨嘆kah伊bē比得。清文當然有伊真koân ê理想，這是in小弟所無ê，mā是伊連想都想bē到ê理想。總是，tsit種理想，若是經營失敗，就會kah-ná美麗ê彩虹消失去，這是無可奈何ê事。景文問清文講：
「阿兄，經營方面近來án怎？」
景文án-ne問起；伊有可能m̄是teh khau洗，m̄-koh，清文聽起來感覺m̄是好滋味。伊tú beh開始鳳梨罐頭事業ê時，景文teh阻擋伊ê忠告，一幕一幕浮起來伊ê腦海中。景文極力teh kā伊苦勸；伊並無講阿兄m̄是創業ê料，mā無恥笑伊ê美夢真戇，伊kan-taⁿ講：從事hiah-ni̍h大ê事業，若bē順利，he並m̄是阿兄一個人ê問題，卻是關係tio̍h陳家全家ê浮沉，所以tio̍h慎重考慮。在tī景文來講，這是伊罕得看tio̍h ê認真態度；而且hit時景文不斷teh kā清文苦勸kah阻擋，m̄-koh，清文kā伊sak開，講：你掠準我若事業失敗會去求你hio͘ h？做你放心，我死mā bē kā你討飯食。清文bat án-ne講大話，所以，對清文來講，若是事業失敗，實在是真無面子。
清文近來tiāⁿ-tiāⁿ teh tiak算盤，用真tsē心神teh關心農場ê收成á是工廠ê效率。伊研究勞動時間ê延長，á是工資ê減少，á是各種經費ê節省；雖然是不得已tsiah tio̍h án-ne做，m̄-koh，mā是tio̍h kah當初ê理想倒páiⁿ來行。這雖然是暫時ê措施，m̄-koh，tsit種不得不tio̍h違背家己意志ê tāi-tsì，hō͘ 伊感覺真無奈。 Hiah tsē年來，清文ê心情m̄-bat hiah-ni̍h bái kah ài嫌東嫌西。最近所發生ê清子thiau故意逃避伊，以及安子對tsit件事ê說明方法，lóng hō͘ 伊感覺無歡喜；因為伊ê心情無法度開朗，kui個家庭mā lóng欠缺光明。
安子ê心情mā是真bái。
Hit暗，安子kah tsa-bó͘-kiáⁿ溝通了後，她peh起lih清文ê冊房，想beh kā實情kah tsa-bó͘-kiáⁿ ê心情對清文講明，m̄-koh，她一時失去勇氣，suah講是因為月經ê關係。M̄-koh，隔tńg工，清文聽tio̍h清子親嘴講m̄是án-ne，suah hō͘ 伊koh khah陷入雙重，甚至三重ê無爽快。
「安子，昨暗你ná會講hit種無聊ê白賊話？」 清文已經真久無tsiah-ni̍h激烈teh責備in bó͘ à。伊koh繼續發脾氣講：
「咱已經結婚beh二十年ā，你iáu-koh án-ne teh對外掩蓋tāi-tsì。」
「真失禮lah！我m̄是beh掩蓋tāi-tsì；hit當時我to̍h m̄知beh án怎解說tsiah好，所以suah無意中講出hiah-ni̍h無應該ê話；何況，你hit時kah-ná teh哭....。」
「我感覺真遺憾；我無ài人kā我同情。」
「Ai-ah！He m̄是同情，我m̄是teh kā你同情。Beh án怎講tsiah好leh？我m̄免加講，你應該mā真了解。咱三人ê心底lóng互相真了解，因為我有án-ne ê同感，所以....。」
「若是án-ne，你ná tio̍h用hit種奇怪ê藉口？」
「是án-ne oh，我真kē路，真無應該。」
「你講是腹肚內lóng無án-ne想，你想講我若m̄知就準tú好；你實在真gâu。你kám無想tio̍h受騙ê我會án怎？」
「我m̄是beh kā你騙，m̄-koh，我卻hō͘ 你想做是án-ne....。」
「你家己無想beh kā我騙，m̄-koh，你ê想法是teh sēng gín-á，án-ne hō͘ 我真傷心。講tio̍h hit本日記，你講是無寫啥物pháiⁿ事，所以就單純決定kā它留落來，結果suah hō͘ tsa-bó͘-kiáⁿ有機會讀tio̍h。Hiah-ê已經是過去ê tāi-tsì，無要緊，m̄-koh，tsit-má你對清子ê態度mā是無定性，無氣魄；所以，清子會漸漸對我疏遠，這是因為你m̄好。你若是無幸福，to̍h講無幸福，幸福to̍h講幸福；tio̍h對她表明清楚，tio̍h hō͘ 她明確知影你ê心情，tio̍h做到「殘殘豬肝切五角」ê地步。我昨暗確實有teh哭，因為我實在真艱苦心。所以，你mā tio̍h用真實來面對問題，kám m̄是？」
「請你mài koh講大道理，是我m̄好lah！我實在kā tāi-tsì想kah siuⁿ天真，是一個軟弱ê人。所以，我ê體質無法度去突然tak-.tio̍h活活ê kah容易受傷害ê tāi-tsì。這你應該了解kah真清楚，我想你mā無需要hiah認真，m̄免hiah-ni̍h受氣。你若ē-tàng認定我是善意ê，án-ne to̍h....。」
總是，清文一時無法度tháu放鬱卒ê心情，伊有潔癖ê心bē-tàng容允無理由ê謠言。Tsit時，清文心內有講bē出嘴ê事業煩惱，所以khóa tāi-tsì to̍h會惹起伊ê無歡喜；安子mā變kah真無元氣。
父母ê煩惱，gín-á ê感受siōng-kài敏感；清子想講父母可能iáu是無gōa幸福。Tú親像Mô͘-pak-sàn（譯註：1850~1893，法國作家，Henry-René-Albert-Guy de Maupassant，華語譯做「莫泊桑」）tī伊出名ê《女人ê一生》小說最後所講：人生是無幸福，mā m̄是無幸福，只是程度ê問題。異族婚姻，平常時看起來和諧無事，m̄-koh，mā可能會因為小khóa tāi-tsì to̍h來破裂，bē-tàng講是一種ê融合；老母想beh kā它美化。總是，he只不過是老母哀傷ê願望；清子án-ne teh想。
清子是一個bē ài「多愁善感」ê人，m̄-koh，她ê個性mā無容易感傷；她凡事lóng看它ê實際情形，然後冷靜思考。所以，她無法度親像in老母hiah-ni̍h單純to̍h認為家己是幸福ê。她生長tī富裕ê家庭，有值得驕傲ê父母，生活自由自在koh啥物都無欠缺，這當然to̍h是別人眼中ê幸福。總是，因為她是陳清文ê獨生kiáⁿ，就被決定無法度離開陳家kah台灣；混（lām）血ê宿命是無要緊，m̄-koh，她被決定無法度離開陳家kah台灣，致使她感覺無自由，suah悲哀起來。準講招一個kiáⁿ婿來繼承陳家，若是lóng無成就任何事業to̍h來死去，tsit種人生有啥物意義leh？她想beh選擇一條無仝款ê道路，想beh從事別種ê工作；m̄-koh，因為她iáu未成年，所以對將來想beh從事ê工作iáu未清楚。總是，她to̍h是想beh做有價值ê tāi-tsì。Tsit種野心kah願望ê產生，tú親像in老父清文ê性格。她bē ài安居tī一個小小ê所在，kah-ná是一隻ǹg望beh去外面展翼飛koân ê鳥á；tú kah以前ê清文一模一樣。
Tsa-bó͘-kiáⁿ對老父ê反抗，並m̄是針對老父tsit-ê人，只不過是對老父所造成ê限制做出反抗而已。所以，若有人問她khah kah意老父á是老母ê時，清子有可能會回答khah kah意老父；雖然是án-ne，她ê表面行為卻是倒páiⁿ。她ê心理感覺老父真好，m̄-koh，為啥物會對伊hiah冷淡leh？清子家己mā bē清楚ná會án-ne。老父最近顯然因為事業bē順teh心情苦悶，m̄-koh，清子iáu是bē去親近老父。這必須tio̍h老父發脾氣，kā kui腹肚ê苦情吐吐出來，á是清子自動飛入去伊ê心懷，án-ne tsiah有法度伐(hua̍h)過兩人之間ê溝á。總是，清文對tsa-bó͘-kiáⁿ lóng採取開明ê放任態度，這m̄-nā是因為清子是台日婚姻所生ê gín-á必須付出ê代價，mā是因為獨生kiáⁿ是掌握父母幸福ê關鍵；如果她叛逆，就會有致命ê創傷；若是她起變面á是誤入歧途，he to̍h會不得了。所以，清文消極teh控制家己，無beh kā她教訓，mā bē對她受氣。總是，清文án-ne jú顧慮，清子jú感覺無趣味，suah變成thiau故意beh反抗老父。
像講關係家廟完工ê話題，清文若jú o-ló花崗岩柱á ê雕刻bē bái，清子to̍h jú kā它貶低講：
「Kám án-ne？我認為he無夠看。台灣ê藝術無sêng藝術；tsit句話m̄是我講ê，是阮ê歷史老師講ê。Kan-taⁿ雕刻ê工夫複雜koh幼工，m̄-koh無注入靈魂。」
Koh有一pái，她明知老父無ài她去夜市á，她卻thiau故意去。
「我今á日去夜市á食排骨酥kah ian腸，koh有雜錯湯。」
「你tsit-ê gín-á，若食pháiⁿ腹肚beh án怎？M̄-thang koh去hit種無衛生ê所在。」
「M̄-koh，雖然講無衛生，大家lóng講真好食。近來連一koá高等官員mā lóng大大方方去食；雖然講是大大方方，當然m̄是穿官服，是穿便服去夜市á。」
清文目頭結結。台灣人夜市á ê點心擔，lóng是一koá煎ê、煮ê、炸ê食物，koh hō͘ 人感覺無衛生。Siōng大ê原因是，去hit所在ê人lóng是低階層ê市民；清文希望kā清子tùi細漢to̍h培養高尚ê氣質，所以m̄-bat hō͘ 她去過夜市á。其實清子家己mā無真ài去，她感覺tsiok gāi-gio̍h；她ê目的只是beh惹父母受氣。
她thiau故意做出惹人受氣ê tāi-tsì，m̄-koh，老父卻無當面對她受氣；因為無得tio̍h反應，清子suah感覺真寂寞。家己做人ê tsa-bó͘-kiáⁿ，ná會做出hiah-ni̍h邪惡ê tāi-tsì？對其他任何人，甚至是對pháiⁿ人，她mā m̄-bat án-ne；她kan-taⁿ ài有老父真實ê疼，成做老父所疼ê tsa-bó͘-kiáⁿ。雖然她tiāⁿ-tiāⁿ án-ne熱切teh期待，結果lóng是無聊ê結局，她iáu是無法度投入老父ê懷抱。Tī小說á是電影時常有tsit款ê情節，lóng只不過是感情上ê發洩；講kóa哀傷ê話，á是哭哭leh，聽候激情過了後，就變成kah-ná真見笑ê無聊，然後因為無聊，就án-ne來放棄。清子期待beh做甜蜜ê少女，結果suah倒反。
如果老父bat對她大受氣，koh kā她siàn嘴phóe，這to̍h會成做嚴肅ê問題，án-ne她可能會講：「阿爸，真失禮！」清子當teh án-ne思考ê時，有一工下課tńg到厝ê正門，她看tio̍h tsa-bó͘-kán-á tùi信箱the̍h一張phue出來；她看tio̍h清子to̍h tshuah一tiô，kik做無tāi-tsì ê表情，講：
「小姐，你tńg來à。天氣真熱ho͘ⁿh？今á日有做好食ê枝á冰，夫人講等你tńg來to̍h the̍h hō͘ 你食；她去農場，無tī-.leh。」
「Hit張phue hō͘ 我看一下！」
清子一時kah-ná想tio̍h啥物tāi-tsì。總是，tsa-bó͘-kán-á無啥願意hō͘ 她看，清子koh khah懷疑。阿英iⁿ-iⁿ-n̄g-n̄g，kā the̍h phue ê 手iap去kha脊後，就想beh逃走。
「阿英，你kám bat字？」
「Ngh，一點點á，我kan-taⁿ bat咱厝裡ê人ê名。」
「你kám有看m̄-tio̍h？若是偷the̍h人ê phue，你kám知影會án怎？會hông押去派出所，真嚴重neh！」
阿英已經有歲à，koh bat人情世事，清子ê話hō͘ 她不得不認輸。她就勉強kā kha脊後hit張phue the̍h出來。
「Oh-ho͘h，你看，果然是你偷the̍h人ê phue。He是阿明寄hō͘ 陳瑞文先生ê phue。」
「真ê oh？真失禮！我看m̄-tio̍h à。」
「所以，咱mài kā你失誤去the̍h tio̍h別人ê phue tsit項事講出去；你kā phue khǹg倒tńg去，tsiah免hō͘ 人懷疑。」
Tsa-bó͘-kán-á聽了真放心ê款，笑一下，就行倒tńg去信箱。清子kik kah-ná無tāi-tsì，緊緊行入去厝內。
清子想講阿明寄hō͘ 她ê phue to̍h是án-ne被沒收ê。暑假了後，叔伯兄哥阿明tńg去台北ê學校以後，清子kan-taⁿ收tio̍h伊一張phue，然後就án-ne斷絕音訊。清子tsit pêng無常常寫phue hō͘ 伊；若是有寫，mā只是kā伊回phue niā-niā。總是，阿明講離開遠遠了後，寫phue成做一種快樂；所以自從伊進入台北ê高等學校了後，koh khah慇勤teh寫phue hō͘ 她。M̄-koh，伊卻突然無來phue，hō͘ 清子感覺真心悶；今á日，她tsiah偶然了解其中ê秘密。
一定是有啥人吩咐阿英án-ne做；因為tú-tio̍h清子，她一時緊張，kan-taⁿ看tio̍h信封寫「阿明」兩字，就收起來。阿英知影家己做m̄-tio̍h tāi-tsì，tùi大門口入來厝內，隨時替清子開電風，the̍h枝á冰hō͘ 她，koh講kóa扶tháⁿ ê話，努力beh kā tāi-tsì掩飾起來。
「今á日，你對我特別好neh。」
清子起先kik kah無tāi-tsì ê款，然後kā她叫來走廊ê椅á頭前。
「阿英，我有一點á tāi-tsì想beh問你。我已經真久無收tio̍h阿明ê phue ā，你kám有看tio̍h伊寄來ê phue？」
清子顯出做你隱瞞，我mā是知影ê態度teh問話，m̄-koh，tsa-bó͘-kán-á搖頭，堅持講m̄知影。清子忍受bē-tiâu，講：
「你講白賊，若無，你tú-tsiah看tio̍h寄phue ê人是阿明，ná tio̍h倉倉pōng-pōng kā它收起來？」
清子用強烈ê話kā她逼問。Tsa-bó͘-kán-á因為做m̄-tio̍h tāi-tsì hō͘ 人發見，不得不坦白承認。
「只有三張phue。」
「是siáng吩咐你án-ne做ê？」
Tsa-bó͘-kán-á m̄肯坦白講。
「Kám是阿母？」
「M̄是。」
「好，你m̄講，我直接來問to̍h會知。」
「M̄是夫人，是頭家。」
阿英講了，to̍h驚kah趕緊逃走。
清子感覺真意外；因為她認為kah-ná是老母teh擔心她kah阿明之間ê tāi-tsì，所以一定是老母ê意思，想bē到竟然是老父ê主意。 清子雖然kah意阿明，m̄-koh，mā m̄是無收tio̍h伊ê phue to̍h會感覺煩惱á是bē爽快；準講有一點á心情鬱卒，m̄-koh若閱讀三十分鐘ê冊，á是彈一曲鋼琴，á是kah同學開講一下，就會回復正常。所以，無讀tio̍h阿明ê phue並m̄是啥物大tāi-tsì。Ē-sái講因為藏阿明ê phue是老父ê主意tsit-ê事實，koh khah刺激tio̍h她ê感情；所以她m̄-nā是單純因為tsit項tāi-tsì teh受氣，她認為真正直ê老父，竟然會使用tsit種小人ê詭計，hō͘ 她koh khah受氣。Án-ne講起來，這應該m̄是kan-taⁿ tsa-bó͘-kiáⁿ會gāi-gio̍h，kám講老父to̍h bē gāi-gio̍h？所以，清子會有tsit種個性，做老父ê mā有責任。清子tú想beh伐過眼前ê大溝，hit-ê大溝卻kah-ná jú來jú闊。
被藏起來ê phue
可愛ê小清子：
請容允我án-ne稱呼你。你可能會笑講he kah-ná是少女歌劇ê意味，m̄-koh，你mā是叫我阿明ā。
今年ê熱天真無意思，因為腦炎ê流行，suah無法度去農場。春假ê時，我tī hia讀一本Hiat-seh（譯註：Hermann Hesse，1877~1962，德國作家，華語譯做「赫塞」）ê原文冊。暑假kan-taⁿ tiàm tī厝裡，糊裡糊塗teh過日子，m̄-koh，有讀完To-su-tho-i-e-hu-su-kí（杜斯妥也夫斯基）ê《罪kah罰》。了後，我忽然tio̍h熱病。你應該iáu會記得，咱兩人去安平海水浴場，穿游泳衫倒tī樹影下面ê沙灘ê時，hit-ê作者真長ê名我唸幾十遍，m̄是，是幾百遍neh—La-su-khoh-li-é-kho-huh•Su-ta-ló-gín•I-bue-an•Ta-lí-ah•A-li-io-siah....。Tsit種ê亡靈tī我ê語言中跳來跳去。就án-ne，我lô-lí-lô-so講差不多二點鐘，結果你講：「To-su-tho-i-e-hu-su-kí mā無啥物趣味，我無kah意hit種陰陰苦悶ê宗教。」我感覺kah-ná去hō͘ 人phuah一盆冷水，hō͘ 我真失望。「你tsit-ê人，這m̄是用歡喜á是無歡喜來判斷ê文學。」我kan-taⁿ ē-tàng án-ne講，因為tshōe無別種話thang講。
你ê心到底是有熱情á無？我甚至感覺懷疑，我hiah熱狂teh談To-su-tho-i-e-hu-su-kí，你卻kah-ná lóng無聽入耳leh。
我tńg來到台北ê學校了後真慘，iáu是討厭讀冊；學校只不過是破壞青春之夢ê所在。有人teh講，高中生活是人生ê黃金時代，m̄-koh，in卻是一點á都無teh疼惜性命，in kan-taⁿ隨便teh浪費時間。In穿破舊ê衫á褲，腰hâ舊舊ê毛巾，腳穿大木屐，tī街á路大步行，發出kho-lok-kho-lok ê聲。你kám bat看過tsit款ê學生？這只不過是一種極端ê打扮，in卻來掠tiâu tsit-ê普通打扮ê我，koh斷定我是軟弱ê人。為tio̍h tsit點，我受tio̍h仝班ê一個人ê制裁；伊kā我giú去學校ê後埕，kā我siàn嘴phóe。因為對方是練柔道ê高手，像我tsit種瘦koh薄板ê人beh kā伊反擊，ē-sái講是草猴對斧頭。M̄-koh，我下決心beh迎接挑戰；當然tī第一回合我to̍h倒落去土腳。我目tsiu烏暗眩，鼻血流到嘴邊，m̄-koh，我koh peh起來迎接對敵。然後又koh倒落去，又koh再peh起來....。因為tsit種執拗而且無tshái工ê反擊，我m̄知重複幾十遍ê被phah倒；ná親像幾nā pái被phah倒；koh再phiān來phiān去，緊去纏tiâu對手ê拳頭。就án-ne，到最後，對手ê同學kā我東倒西歪ê身軀扶leh，講：「Ueh！阿明，mài koh án-ne繼續落去，停止！你若無停止，我會哭出來。」伊án-ne teh講，koh用手指ngiau我ê kueh-lang-kha，我看見伊ê目tsiu有目屎teh閃sih。
Hit暗，我kui暗無法度睏落眠；m̄是因為被phah m̄甘願，mā m̄是因為我戰贏暴力，當然mā m̄是因為心內怨恨tsiah來失眠，可能是因為我kah伊lóng盡力戰鬥到底，所以兩人lóng達到無法度無和解ê感情境界。
Hit種怨恨、憤怒，á是醜惡ê鬥爭ê結局，竟然表現出來ê是tsit種美好koh單純ê人類ê疼。Hit-ê粗暴ê猴gín-á是真正teh哭；我án-ne teh想，koh因為siuⁿ過感激，suah無法度落眠。
M̄-koh結果neh？我倒tī眠床兩三工了後，我koh去學校上課，我掠準兩人見面一定會互相握手。總是，伊面無任何表情，kan-taⁿ講：「Ueh！我掠準你已經死去à。你若無信táu to̍h koh來，你beh koh hông phah是m̄是？」伊án-ne講，koh kan-taⁿ哈哈大笑而已。
我美好ê想像就án-ne kah-ná玻璃破碎去；我to̍h是tsit種人。 我tsit-má非常悲慘，這m̄是因為受phah；我m̄是受tio̍h tsit種暴力to̍h被phah落ê細隻鳥á。總是，我滿腹沉重，kah-ná身軀siuⁿ重suah飛bē起來ê鳥á，感覺無吐bē爽快，á是tio̍h kā kui腹肚ê食物消化掉。你kám知影有啥物良藥？總講一句，請你寫kóa啥物kā我回phue kám好？ ...... ...... 小清子：
我m̄知影頂pái為啥物會專工對你講hiah-ê戇話？聰明ê你大概會感覺出來，我ná鹿欣慕水án-ne teh渴慕愛情。Tsit種愛情絕對無任何雜質，bē-tàng有空縫thang夾任何物件ê單純，ē-sái講是有母愛tsìn前ê愛。Kah hit-ê粗暴ê同學ê最後相lám ê瞬間，我真正體驗tio̍h hit-ê閃sihê光。M̄-koh，hit-ê súi ê物件kan-taⁿ瞬間存在，完全無持續性。 我tsit-má為tio̍h tsit種ê愛teh苦惱。像講我是台灣人，你是混（lām）血ê，m̄-koh，我一時á都無tsit種自我意識á是偏見。我koh感覺你是魚，因為是tī水裡，所以看tāi-tsì會有偏差。Án-ne講起來，我mā是魚，m̄-koh，我真ǹg望ē-tàng kā你tshōa離開水。Tú親像《莊子》內底ê鯤變成大鵬鳥一樣，咱彼此成做koh khah大，thang tī碧藍ê天空teh kho͘飛。這若靠一個人ê力量是無法度完成ê，我需要你，你mā需要我。Ueh！你會koh kā我冷笑ho͘ⁿh？這是你ê毛病，m̄-koh，不管你笑我，á是kā我tshòng-tī，lóng無要緊。久長以來，你lóng是用tsit種gāi-gio̍h ê態度teh對待我。你自細漢to̍h hō͘ 陳家ê gín-á排斥，hō͘ 人用奇怪ê眼光來看。總是，我無án-ne做，我只有kā你護衛；我了解你ê立場，有一粒疼你ê心。M̄-koh，你對我無和氣，thiau故意beh tshōe我ê孔縫。你是一尾可憐ê魚á neh，我無法度koh再忍受，我無beh hō͘ 你iáu是一尾魚á。
我真浪漫，為tio̍h beh hō͘ 我ê夢ē-tàng實現，我bē-tàng無一直保有一個無ài hō͘ 她溜走ê對象。
你kám無beh成做大鵬鳥tī天空kho͘-pue？你kám無想beh有tsit種大koh健全ê熱情？你究竟有想beh ài á無？我ê心肝充滿ǹg望kah絕望，歡喜kah苦惱ê不安情緒一直占領我ê心。求你一定tio̍h kā我回phue。 ...... ......
無回phue。準講一tsōa、兩tsōa mā好，我ta̍k工lóng gōa-ni̍h-á teh ǹg望你ê回phue。
Tsit幾工，我無去學校上課，閒閒tiàm-tī宿舍；我無ài上數學、物理kah化學ê課，m̄-koh，成績一向並無bái。總是，我iáu是bē ài上hiah-ê課；我對2+2=4無興趣。Tī我ê心內，2+2總是=3 á是=5。
我ê頭殼一直為tsiah-ê問題teh煩惱，不如帶Li-lu-kheh（譯註：Rainer Maria Rilke，1875~1926，德國詩人）ê詩集出去外口，tī淡水河邊坐落來，我真ài tsit種悠哉悠哉ê時間。我眺望大屯山、觀音山kah七星山，mā眺望秋陽照射之下，有平底船teh來來去去ê河面，會感覺tio̍h不可思議ê誘惑。南風經過我ê心，吹向馬來西亞，我真想beh去南洋。馬來西亞ê Jio-ho-l州（譯註：Johor State），阮老父ê朋友tī hia teh經營橡樹園，我想beh去hia工作，m̄-koh，我又koh想beh就án-ne跳落去淡水河。總是，描寫自殺者心理ê To-su-tho-i-e-hu-su-kí（杜斯妥也夫斯基）並無自殺，我mā絕對bē án-ne自殺。就是決心明á載beh自殺ê人，若頭殼頂忽然lak一支鐵鎚落來，伊mā會反射性來避開。人生短短，雖然知影早慢會死，卻koh感覺死亡iáu tī真遠ê所在；有時甚至感覺kah死亡iáu有無限ê距離，所以用tsit種kok-pih ê意識，安心teh過日子。自殺ê人並m̄是無想beh活tsiah來死，不如講是希望活落去；to̍h是講siuⁿ激烈ê生kah死ê慾望同時重疊teh。
Ah，我到底是想beh講啥leh？總講一句，我非常無健康；暗時bē睏tit，身軀相當瘦。M̄-koh，請mài kā我誤解，mā免驚我。我真正希望ê是啥物，聰明ê你一定已經知影。
我想beh知影ê只有一點，我究竟有生存ê價值á無？Kám有被拯救ê價值？這有兩個方法thang證明：被愛á是無被愛。所以，準講你ê phue kan-taⁿ寫一句：「你是戇大獃」mā好。因為án-ne我就thang成做一個有被拯救價值ê人。Tsit-pái，請你一定tio̍h kā我回phue....。
