《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第二十五章（更新版）
作者 庄司總一著 賴永祥指導 林俊育台譯 2017.04.23
暗暝ná親像靜靜ê河teh流失；kah-ná m̄知影tang時開始流，mā m̄知影beh流向tó位去？廳堂ê桌頂hit台舊座鐘，m̄知是tang時pháiⁿ去？遠遠傳來ê雞啼聲，今á日猶原無變；天花板頂面吱吱叫ê仙尪á聲，五十年、一百年lóng仝款。
「不知不覺已經有歲à，一切kah-ná是昨hng ê tāi-tsì。世間事kah-ná做一個夢，所有ê lóng kah-ná teh眠夢；已經往生ê阿山tiāⁿ-tiāⁿ án-ne teh講。M̄-koh，he是gōa-ni̍h-á好ê夢leh。」
陳家ê阿媽阿嬌當teh beh迎接七十歲ê生日，真tsē人會來慶祝她ê生日，而且hit工tú好是明治節（譯註：記念日本明治天皇ê生日）ê好日。Koh khah ài慶祝ê是：她有享受長歲壽，又koh因為長年對社會ê貢獻，榮獲綠綬褒章，beh接受表揚。
總是，為啥物她會得tio̍h tsiah-ni̍h尊貴ê「勳章」neh？阿嬌bē明白。講實在，她一向對貧民救濟á是社會醫療ê功德，每pái lóng有適當ê捐款，m̄-koh，她並無做過啥物大ê社會服務，對世間mā無啥物特別ê善事，只有長歲壽是唯一明確ê事實。總是，她受tio̍h厝裡ê人、親朋好友kah社會人士ê祝賀kah稱讚，阿嬌就án-ne歡歡喜喜beh接受表揚。
昨暗她lóng有lim kóa紅酒，tuh龜一時á了後，倒tī藍色蠓罩內ê眠床，陷入kah-ná teh睏，koh kah-ná無teh睏ê茫茫渺渺狀態，久久tī kah-ná眠夢ê恍惚心境中。Tsit時已經是蠓á khah少ê季節，蠓罩門分開兩pêng，阿嬌時時ǹg窗á teh看天光bē？M̄-koh，她一直等bē天光。「Tsit時阿山若iáu tī-.leh....」阿嬌án-ne teh想，忽然感覺寂寞；她ê性命近來變khah年輕à。有年歲了後，她已經失去以前hit種固執無變化，beh kah時代倒péng行ê氣力；婚喪喜慶ê慣例kah經常ê規矩，jú來jú簡化；kah-ná teh剝洋蔥ê皮，最後啥物都無tshun落來，hō͘ 人感覺寂寞；m̄-koh，她已經看開ā。她想講家己tī陳家已經變成無路用ê人；tī她tsit代，陳家ê大家族就會結束。以前家族之間若有啥物爭執á是糾紛，她絕對無beh放鬆她心中hit隻掌握ê手。家庭kan-taⁿ一個，m̄-koh，tsit-má表面上kah-ná無啥物糾紛，其實lóng是隨人家己自由teh行動。景文hiah-ni̍h phah拚teh thàn錢，增加財富，m̄-koh，重要ê夫妻和睦卻無法度得tio̍h；in已經無koh冤家，mā無koh生kiáⁿ，已經彼此疏遠。瑞文是一個好人，m̄-koh，伊一直bē ài做tāi-tsì。長男清文不管老母ê反對，一意孤行去創業，聽講虧損bē少。她想起來，無一項tāi-tsì有順她ê意。雖然別家伙ê老人仝款對下一代有不滿，會nga̍uh-nga̍uh念，m̄-koh，她感覺是家己ê家族特別hō͘ 人操心。講起來，lóng是因為長男清文娶異族ê新婦；準講in夫妻比兩個小弟有khah出色，結局iáu是in teh破壞家庭siōng重要ê和諧；阿嬌一直有tsit款固執ê想法。總是，tsiah-ê一切lóng是前世所註定，是無法度改變ê；她án-ne teh想。近來，她常常去竹溪寺念經á是聽道理，有時甚至tī hia ê僧房tòa幾工。
阿嬌已經是來到tsit-ê年歲，難免會有tsit種心境。總是，幸福tī想bē到ê時來臨，並且phah開阿嬌封密ê心靈。世間人並無kā她bē記得，mā無kā她當做廢物；án-ne teh想ê中間，她家己已經bē記得ê驕傲kah自信，忽然又koh回復。明á載，她beh出席州政府ê表揚大會，接受頒發綠綬褒揚獎章。阿嬌一直teh想，她已經壓bē-tiâu歡喜ê心情，所以天phú光ê旭日tú kā窗á照白，阿嬌to̍h已經起床ā。
「素娥ah！素娥ah！你iáu未起來hio͘h？Tsit種大日子，你iáu ē-tàng睏kah m̄知thang起來！」
阿嬌teh叫tsa-bó͘-kán-á，家己一個人nga̍uh-nga̍uh念，m̄-koh，她kah平常時ê無滿意無仝，是開朗歡喜。阿山往生了後，素娥改來事奉阿嬌；她ê身體行動jú來jú有困難，素娥真細膩teh kā她照顧。素娥以前事奉ê頭家人真好，所以伊往生了後，她iáu-koh是對伊ê遺孀盡忠，實際上她並m̄是對女主人心服。阿嬌mā真清楚tsit點，所以對tsit-ê老tsa-bó͘-kán-á ê盡心kah親切，阿嬌雖然iáu未有啥物感受，m̄-koh，今á日她to̍h會記得素娥ê親切。
「夫人，你叫我有tāi-tsì ho͘ⁿh？今á日，你hiah早to̍h醒。」
素娥無禮貌teh hah-hì，m̄-koh，阿嬌並無發脾氣。
「當然loh！今á日是啥物日子，你bē記得à hio͘h？」
「Ná有bē記得，今á日是慶祝夫人七十大壽ê日子，而且mā beh接受啥物尊貴ê....。」
「是ah！我因為心情興奮，suah睏bē落眠。」
「實在是....。M̄-koh，夫人，hiah-ni̍h早，頂面ê官員iáu teh o͘ⁿ-o͘ⁿ睏neh。」
「M̄-koh，咱tio̍h量早準備。準備需要不止tsē時間neh。Oh，我beh淨身，緊叫hiah-ê tsa-bó͘-kán-á起來hiâⁿ燒水。」
燒水無gōa久to̍h kōaⁿ來，阿嬌就tī屏風後面淨身齋戒。然後，tsa-bó͘-kán-á幫她穿衫，kā參白ê頭毛，梳成「大頭鬃」ê髮髻（kè），koh kā縛腳了kah-ná生薑ê小腳穿鞋。
「Ah，真好看；少年ê時美麗，年紀大mā仝款無人會比得。」
素娥kā阿嬌o-ló，koh kā她點to̍h水薰草。
「老頭家tī另外hit-ê世界mā會真歡喜。伊做人真好，溫和koh慷慨，mā真有學問。M̄-koh，tī tsit種大日子，伊mā是會睏kah oàⁿ-oàⁿ tsiah會起床；伊是悠哉悠哉ê人。」
有神經質ê阿嬌，若有啥物tāi-tsì to̍h會án-ne la̍k-la̍k-tshuah。老tsa-bó͘-kán-á the̍h她來kah老頭家做比較，是有小khóa teh khau洗ê款，m̄-koh，阿嬌無啥感覺tio̍h，就koh講：
「Hit-ê人若khah長歲壽，kám有法度kah我仝款得tio̍h獎賞？」 阿嬌講kah真可惜ê款。老頭家iáu活leh ê時，阿嬌lóng kā伊當做無能ê人teh對待。Tsit-má阿嬌講tsit款話，tsa-bó͘-kán-á bē感覺奇怪。
「M̄-koh，夫人有今á日ê榮光，應該是老頭家ê致蔭ā。」
阿嬌聽tio̍h tsiah-ê話，suah感覺無趣味。
「Kám án-ne？阿山mā無teh做啥tāi-tsì，一日到暗kan-taⁿ四界teh hō͘-ló-sō͘.。」
「準講夫人....。」
「我kah hit-ê人無仝，是我親身去做sing-lí ê；是我kā陳家振興起來，koh積聚財產。所以家廟mā起起來，而且mā有奉獻，去做社會事業ā。值得歡喜kah安慰ê是，陳家已經成做khiā在bē搖動ê大家族，kiáⁿ兒mā隨人lóng有發展。」
「講tio̍h財產，he完全是景文ê經營成功，所以夫人今á日ê榮譽是伊ê功勞lah。」
素娥掠準她有推測tio̍h女主人真正ê心理，所以tsiah án-ne講。總是，阿嬌無表示同意，這真正是料想bē到ê tāi-tsì。Án-ne講起來，tsit位老夫人是kā一切lóng是歸tī家己ê功勞，tsit種自我感覺良好ê講法，連素娥都感覺受氣。
「M̄-koh，無論夫人gōa有才tiāu，我認為若m̄是lín kiáⁿ真gâu，夫人就無法度得tio̍h tsit種ê榮譽。」
「Tsit點免你講我mā知，m̄-koh，是tó一個kiáⁿ khah有才tiāu neh？是siáng hō͘ 我有tsit種榮譽neh？」
阿嬌tú teh講tsiah-ê kah-ná teh做謎猜ê話ê時，景文忽然出現，行入來房間。
景文是第一個來kā老母祝壽kah祝賀她beh受表揚ê人，伊講一大堆祝詞，表示伊iáu是比siáng都khah有孝。伊家己mā ǹg望tsit點會被肯定，所以透早to̍h來。伊講tsiah-ê hō͘ 老母歡喜ê吉祥話了後，tùi懷中the̍h出紅包來。 「我自早to̍h想beh買一個好禮物，m̄-koh，我ê腦筋想bē出到底tio̍h買啥tsiah好。若是買一個無適合ê禮物，不如獻錢....。」
「你免hiah費神lah，我無特別需要用錢。若是以前，to̍h koh是另外一回事，m̄-koh tsit-má年歲tsē ā，近來是teh過拜佛ê生活，所以你若beh hō͘ 我錢，不如 hō͘ 玉簾á是lín kiáⁿ。」
景文掠準老母因為伊ê孝心，會歡歡喜喜kā紅包收落來，m̄-koh，她竟然無照伊所期待ê。老母竟然對錢無興趣，這hō͘ 伊感覺真意外。
「這是我ê一點á心意，thang hō͘ 阿母隨意用；若是beh捐hō͘ 廟寺mā好，有一千圓，一千圓neh....。」
景文驚講tsit-ê金額會hō͘ 老母tio̍h驚，就kik kah-ná無啥tāi-tsì ê款。可惜伊一來素娥就因為有tāi-tsì ài辦，suah隨時離開無在場；景文感覺美中不足，若是有hō͘ 第三者tio̍h驚kah讚歎，án-ne to̍h會加真好。
「Án-ne，你ê心意我to̍h收起來，因為he是有收mā bē成做困擾ê物件。」
這完全tī景文ê意料之外。一千圓m̄是小錢，而且十張大鈔，每張lóng有khap朱紅色ê「壽」字，是伊專工準備來beh贈送她ê。伊真期待老母會感激，伊一直到tú-tsiah iáu án-ne teh相信。以前，老母確實是tsit種人，她對金錢比景文koh khah熱心。自景文少年ê時起，對商業á是財務問題，in母kiáⁿ兩人lóng會做伙參詳。M̄-koh，今á日ná會án-ne leh？心境ê變化ná會是tsit種ê？
「我獻錢hō͘ 阿母，kám會hō͘ 你ê心情變bái？」
「無lah，你ê心意我真了解ā。總是，自從我去廟裡念經，有修業了後，就kā金錢看淡ā。」
「連阿母mā講tsit款話oh？世間人一講tio̍h錢to̍h看bē起，á是講錢lah-sap，m̄-koh，啥人ē-tàng m̄免用錢leh？阿母mā是因為有財產，大家tsiah會來kā你慶祝七十大壽，mā tsiah會受tio̍h表揚，kám m̄是？」
「M̄-koh，準講有財產，若是對社會無回饋（kūi），to̍h無一個人會對你有好印象。你tùi少年開始to̍h為家庭phah拚，我絕對bē bē記得。總是，我感覺清文mā bē bái，伊有學問，人格koh高尚；伊大學畢業tú tńg來ê時tsūn，有一kóa做法受人批評，m̄-koh tùi中年起，伊有培養出溫厚ê風度，我就m̄-bat koh聽tio̍h人講伊ê pháiⁿ話。安子kah你ê玉簾無仝，她人賢慧，mā是受tio̍h好風評ê原因。In ê鳳梨罐頭事業，起初我雖然有反對，tsit-má感覺iáu是bē bái ā。因為有tsit-ê事業，咱陳家tsiah受tio̍h社會ê肯定；一講tio̍h陳清公司，無人m̄知。」
「Án-ne，阿母認為一切lóng是清文兄嫂帶來ê好光景loh？」
景文m̄知老母是以前to̍h án-ne相信，á是近來tsiah有tsit種看法。總講一句，景文tsit-má tsiah知影老母hiah-ni̍h支持清文in夫婦。
「我並m̄是講是in帶來ê名譽，m̄-koh，眾人lóng án-ne講ā。In創設一間大公司，kah-ná iáu未開始thàn錢，m̄-koh，he是因為是tú開始，無辦法。」 「你teh kā我教育tsit項tāi-tsì oh？若ài hō͘ 人對你尊敬，當然tio̍h án-ne。總是，事業若ē-tàng成功to̍h bē bái....。」
「Oh，kám講虧損hiah大？」
「我無真清楚，kan-taⁿ有聽tio̍h社會ê風聲niā-niā。總是，無影無跡ê講法會比實際ê大過十倍，靠bē住....。」
景文含含糊糊án-ne講。M̄-nā kan-taⁿ對in阿兄ê tāi-tsì，伊一向mā lóng bē講人ê是非；若m̄是到最後無步ê關鍵時刻，伊bē去抵擋對手，伊bē ài kah人相爭。M̄-koh，伊今á日真想beh講出來，想beh iah孔講：「阿兄ê事業已經強beh無命ā，kah阿母ê壽命仝款，已經面臨破產ê邊緣。你對tsit點lóng m̄知，顛倒對in ê評價siuⁿ過koân，想講家己ē-tàng得tio̍h表揚lóng是因為in ê緣故。阿母慶祝七十歲生日是好，總是人已經老糊塗ā。」話到嚨喉，景文koh kā話吞落去，無講出來。這m̄是不忍心hō͘ 歡喜kah kah-ná gín-á ê老母鬱卒，卻是因為景文家己已經失去hit種講出tsit款殘酷ê話來hō͘ 憤慨得tio̍h tháu放ê氣力 à。伊家己堅強ê意志á是信念，tú好是靠thàn錢來表現，所以，伊一直hō͘ 人恥笑講是ài錢如命。支持陳家tsit棟厝ê柱á若有軟弱ê嫌疑ê時，伊認為準講是tshun伊家己一個，伊mā tio̍h成做最後ê支持者，m̄-koh，眾人對伊ê觀感只是kā伊看做利己主義者而已。伊想講只有老母了解伊，想bē到tsit-má連老母mā對伊bē了解。
早起，清文陪老母阿嬌出席典禮，接受頒獎表揚。清文穿正式ê禮服，tùi正門真體貼牽老母ê手上車，老母mā真歡喜接受伊ê體貼，滿面笑容；tsit一幕看在景文ê眼內，若beh講是súi，不如講是不可思議ê光景。嫉妒之情鑿tio̍h伊ê胸坎á。清文m̄是老母ê親生kiáⁿ，koh是tshōa日本bó͘，bat擾亂老母ê心，m̄-koh， tsit-má她相信是清文夫妻ê功勞tsiah hō͘ 她有今á日ê光榮。除了厝裡決定hō͘ 老母ê生活費以外，為tio̍h beh保持她tī社會ê體面，景文常常私下hō͘ 她零用金；其他ê人lóng kā老母看做是麻煩，只有伊對老母有孝順ê心。景文想講家己是老母ê親生kiáⁿ，m̄-koh，tsit-má卻....。
家庭親像肉體內teh運行ê血液循環。充滿煮食物ê蒸汽、油tsìⁿ ê芳味kah糕á餅ê臭火ta芳味ê灶腳，ná親像人ê胃腸不斷teh製造血液。廳堂是心臟，tī hia有性命teh活動；燭台頂面teh燒ê蠟燭火、插tī花矸ê芳花，á是香爐ê烏沉香芳味，hō͘ 廳堂ná親像有性命ê心臟teh鼓動。紅色ê苧á布、綢á布á是呢á布頂面有「壽」字剪紙ê壽軸（te̍k），四面壁掛kah滿滿了後，koh掛到外面；贈送壽軸ê親人朋友來祝壽，in講了祝壽ê話，就面對廳堂正面ê壽位跪拜。厝裡ê人kā紅龜粿贈送所有ê厝邊，in收tio̍h紅龜粿了後，就tī家己厝ê gîm簷(tsîⁿ)掛燈籠á。祝壽ê厝頭前搭戲台teh演歌á戲，街頭巷尾ê人lóng來看戲。厝裡有連續幾工辦桌teh請人客。
像án-ne，以tsit家伙為中心ê鬧熱滾滾，hō͘ tsit所在發出kah-ná teh過節ê鬧熱氣氛。
總是，tsit種誇大ê舊式祝賀方式，因為近代文化ê複雜性kah快速ê發展，自然to̍h行向消失之路。陳家tsit pái ê祝壽，本來想講tī餐廳請一pái人客to̍h夠額；這m̄-nā是清文一個人ê意見，景文kah瑞文mā感覺m̄-thang tī時代ê潮流落伍。M̄-koh，老母本人iáu是希望照舊例來辦。她是陳家所留落來舊時代ê最後一個人物，mā無久to̍h會消失，所以，做kiáⁿ兒ê體貼老母ê心情，kā tsit-ê最後ê記念盛大舉行；眾人mā無kā它當做笑話，顛倒熱情贈送壽軸，可能mā是teh疼惜tsit-ê to̍h beh消失ê傳統。
M̄-koh，連農場監督游德仁mā送來貴重ê壽軸，這有一點á hō͘ 人無法度了解。伊只不過是陳清公司ê職員，kah陳家無親無故，tùi領小khóa月薪ê身分來講，tsit種kik大pān ê做法並無合身分。景文用孽á話對伊講：「實在不得了，你一下to̍h開去一個月ê薪水！」
總是，眾人想講這是游德仁暗中teh進行伊kah景文ê tsa-bó͘-kiáⁿ美圓ê婚事ê證據。M̄-koh，tāi-tsì kah謠傳ê無仝，因為事實上並無具體ê提親。玉簾報風聲講：想beh選伊來做in tsa-bó͘-kiáⁿ美圓ê翁婿，這只不過是beh掩蓋她家己ê弱點；景文會án-ne講，mā m̄是出tī真心，he是伊thiau故意beh hō͘ in bó͘ bē爽快ê講法。所以，in兩人根本都iáu未對游德仁提起tsit項事，連對tsa-bó͘-kiáⁿ mā m̄-bat提起過。
游德仁kā tsit種謠傳ê話當做笑談。若hō͘人講：「你真幸福neh！」，á是hō͘ 人問起tang時beh結婚？伊就會掠狂，m̄知beh án怎tsiah好？因為he是真hàm古ê tāi-tsì。準講伊有tsit-ê意思，mā kah-ná是燈籠á kah吊鐘ê譬喻；彼此門戶差hiah tsē，伊一開始to̍h m̄敢án-ne想。M̄-koh，伊耳孔所聽tio̍h ê消息是：她ê父母tùi真tsē人ê中間選tio̍h游德仁lah，嫁妝一萬圓lah，美圓因此無beh去東京讀冊lah....等等，致使游德仁感覺kah-ná是真ê；伊有時án-ne teh想，m̄-koh馬上to̍h koh打消tsit種想法。就án-ne，憢疑、困惑kah不安ê心情kah-ná hē tī天秤頂面ê磅子，hō͘ 伊前後左右teh搖擺。頭先hō͘ 伊無相信ê謠言suah變成清楚ê模式，而且成做某種理論：伊想講hit-ê夫人teh kā伊kô-kô纏，hō͘ 伊ê頭腦混亂kah真煩惱，原來並m̄是因為她本身有啥物問題，卻是為tio̍h她所疼ê tsa-bó͘-kiáⁿ teh tshōe對象ê一番熱心。
為啥物我看bē出hit-ê夫人真正ê心意neh？我因為嫌煩、驚惶，kan-taⁿ想beh避開她，實在有夠愚戇。而且我kā tùi她身上發出ê熱情，誤會做不可思議ê妖氣，suah陷入奇怪ê感情，he是gōa-ni̍h-á hàm古ê見笑tāi。她tiāⁿ-tiāⁿ講：美圓hō͘ 空氣槍phah-tio̍h，suah一蕊目tsiu失明，是一個可憐ê gín-á，想tio̍h她ê情形to̍h感覺人生暗淡。這mā是她信仰基督教ê原因之一。她為tio̍h不幸ê tsa-bó͘-kiáⁿ tshōe一個ē-tàng hō͘ 她幸福ê對象，kan-taⁿ án-ne而已。講是數學á是魔術lóng好，只要得tio̍h答案to̍h好；to̍h是hiah簡單。M̄-koh，頭家景文koh是án怎leh？伊是有名ê勤儉，伊ê意見neh？聽講in夫婦感情無好，家己ê bó͘ 經常出入年輕tsa-po͘人ê工作場所，伊kám bē致意leh？
游德仁對陳家二房景文ê tsa-bó͘-kiáⁿ美圓產生不可思議ê感情。講是不可思議，是因為她kah其他厝裡ê人無仝；她真少去農場，到taⁿ kan-taⁿ去過幾pái，當然游德仁mā無kah她講過話，而且看tio̍h她ê時，mā無留落來特別ê印象。她ê身材kah苗條ê老母無仝，她是一個瘦koh細漢ê tsa-bó͘ gín-á，面色蒼白，hō͘ 人感覺衰弱，kah-ná有病ê款；她ê面圓，m̄-koh bē hō͘ 人有豐滿（boán）ê感覺；kah妖豔（iām）ê老母比較起來，她bē真映目；雖然是一蕊目tsiu失明，因為有裝義眼，外表看bē出來。她唯一sêng in老母ê所在是圓圓ê目tsiu，其他ē-sái講是真平凡ê面形。M̄-koh，她看起來是一個溫柔koh驚見笑ê tsa-bó͘ gín-á，tú親像in老母所講ê，hō͘ 人感覺kah-ná有一點á陰暗不幸ê形。Tsit-ê tsa-bó͘ gín-á ê影像，不知不覺顯現tī游德仁ê腦海中。若是tsit種情形ē-sái講是戀愛，為啥物會變成án-ne leh？這tī肉體上á是精神上lóng真oh得解說。伊想beh kah陳家tsit個大家族結緣，teh ǹg望嫁妝，tsit種phah算bē-sái講完全無。總是，jú有tsit種phah算，熱情卻jú疏遠，m̄-koh，伊ê心suah mā jú hō͘ tsit-ê tsa-bó͘ gín-á吸引；游德仁家己都感覺莫名其妙。
游德仁帶壽軸來祝壽ê時，玉簾知影伊有嚴重ê錯誤想法。玉簾起緊張，taⁿ beh án怎tsiah好leh？她家己掖ê種籽，只好用家己ê手去收割。游德仁kah美圓ê婚姻，人人相信是真ê；她ê丈夫景文kah-ná mā是希望án-ne。Án-ne，玉簾只有家己下決心；只有一條路thang行，而且最後tshun tsa-bó͘-kiáⁿ家己ê意向。
「美圓，阿母想beh kah你講話。」
「是啥物tāi-tsì？阿母。」
玉簾下決心tsiah講出嘴，m̄-koh，她一講出嘴，又koh後悔。若是順其自然，可能會無tāi-tsì to̍h結束。
「Án怎又koh恬恬leh？阿母，你緊講ā。」
「你明年to̍h二十歲à；阿母十八歲to̍h嫁人。M̄-koh....。」
「Ah，出嫁ê tāi-tsì？」
「女大當嫁，你已經到應該結婚ê年紀。雖然近來tsa-bó͘ gín-á ê婚期比以前有khah慢，m̄-koh，tsa-bó͘人早慢ài嫁，若是有適當ê人....。結婚tī人生講起來ná親像teh pua̍h-pue，kan-taⁿ會出現吉á是凶兩種。阿母ê運氣無好，所以婚姻失敗，m̄-koh，並m̄是講世界上無好ê婚姻，mā是有會hō͘ 人感覺tio̍h活tī世間真好ê婚姻。雖然這是thang tú-tio̍h卻不可強求ê，m̄-koh，這是真súi koh真可貴ê；tio̍h án怎形容tsiah好neh？To̍h親像稀有ê寶石一樣。」 玉簾講出嘴ê問題，她卻漸漸kā它拖遠，連家己都m̄知究竟teh講啥物；她發見tsit點，驚一tiô，suah忽然間bē爽快起來。
「奇怪ê gín-á，ná會hō͘ 阿母家己一個人teh講話？美圓，你到底想án怎？」
「Án怎oh？阿母無問我ā！阿母，你家己tsiah是奇怪leh。」
「你真是感覺遲鈍ê gín-á，你應該知影ā。我是問你有關婚姻ê tāi-tsì，若有適當ê人，你願意無？」
「Oh，若有適當ê人....m̄-koh，我ê目tsiu án-ne，我無beh考慮結婚ê tāi-tsì lah。」
Tsa-bó͘-kiáⁿ án-ne ê回答消除玉簾心內ê不安。她是teh期待這，她忽然感覺輕鬆起來。
「是oh，若是像阿母tsit種無意義ê婚姻，顛倒家己一個人khah輕鬆koh幸福。Án-ne，農場hit-ê青年，你感覺án怎？」
玉簾án-ne問，她teh等tsa-bó͘-kiáⁿ ê回答有一兩秒久。Tú-tsiah ê安心只不過是瞬間而已，ná親像日頭tī雲層之間倉倉pōng-pōng teh出入ê時，hit-ê不安忽然koh再出現；無希望tsa-bó͘-kiáⁿ hō͘ 伊娶去ê心，kah希望tsa-bó͘-kiáⁿ嫁hō͘ 伊ê心，teh激烈戰鬥。
「我mā認為伊人溫厚老實，一定bē bái。」
顯然伊是ē-tàng hō͘ tsa-bó͘-kiáⁿ幸福ê人；玉簾想講伊hiah-ni̍h吸引她ê事實to̍h是siōng好ê證據。Án-ne，她tī社會上ē-tàng成做一個好老母，m̄-koh....。
「只是因為伊ê家境無好，可能有teh phah算。昨昏趁阿媽做大壽，伊有送禮來，想beh巴結咱，tsit點有小khóa hō͘ 人無滿意。」
玉簾án-ne teh iah伊ê缺點。伊若kah別個tsa-bó͘ gín-á結婚，玉簾iáu ē-tàng忍受，m̄-koh，若是beh kah她ê tsa-bó͘-kiáⁿ結婚，kám m̄是會永遠tī她ê心肝頭吊一粒重鉛？
「Ah，美圓，你認為án怎？為啥物m̄講話leh？遲鈍ê gín-á，阿母teh問你，你是有kah意á無？」
「M̄-koh，tsit種tāi-tsì....。阿母，你thiau故意teh kā我為難。」 美圓真pháiⁿ勢，就án-ne走離開。玉簾感覺她一下to̍h加老十歲。
慶祝阿嬌ê大壽鬧熱五工，ná親像m̄知tang時tsiah燒會盡ê大蠟燭，火燄一直真大。Tī陳家厝頭前搭ê戲台，日暗lóng teh演歌á戲，尤其是暗時，觀眾kui大陣集oá來，點電土火ê食物擔á mā來。戲台頂ê歌á戲，á是銅鑼、大鼓、鑱（tshîm）kah絃á ê伴奏，場面非常鬧熱。廳堂內宴席當teh熱場，一桌tsē八個人，厝內排五六桌已經滿滿，致使桌á tio̍h排到庭院。一百個、二百個ê賓客，一時無法度lóng同時招待，結果是分做幾nā日請客。
阿媽阿嬌ê胸前pín榮譽ê綠綬褒章，每暗tī宴席中露面，向賓客致意。她每pái lóng感動kah流目屎。她iáu會記得已經是十五六年前ê這件tāi-tsì：Hit年ê元宵節，厝裡ê魚池出現一隻迷路ê大龜，大家大鬧熱一tsūn。她認為he是陳家興旺ê好兆頭，果然是無m̄-tio̍h。Hit隻大龜hông放tńg去大海ê時，她kah-ná真m̄甘teh對大龜講：我家己年歲大ā，準講你koh再來到陳家ê魚池，我mā無可能koh看tio̍h你，m̄-koh，我有真tsē kiáⁿ孫，你就做tsit家伙ê守護神好lah。了後，丈夫阿山往生，m̄-koh，家己活到tsit-má，大家teh慶祝她ê七十大壽。Kiáⁿ孫隨人lóng有成就，tsa-po͘ ê去讀大學，tsa-bó͘ ê teh beh出嫁。孫á輩ê gín-á lóng來宴席答禮，招待賓客；大房由清子，二房由美圓kah她ê兄弟，三房ê長男阿明去tī台北讀冊，所以由伊下面ê gín-á出來招待。Kah-ná bat有過ê兆頭án-ne，tùi她ê樹身生出真tsē枝葉。Ē-tàng看tio̍h陳家hiah-ni̍h繁榮，感覺死mā甘願ê阿嬌，無有比這koh khah幸福ê lah。
只有一點，tsit-ê老婦人kah-ná bē記得她hit當時對眾kiáⁿ兒所抱ê觀念：長男清文擾亂家庭ê秩序，三男瑞文lán-si無beh做tāi-tsì，她相信只有次男景文tsiah是siōng可靠koh有孝。總是，她tsit-má ê看法有一點á改變ê款；這可能是老人ê健忘症，á是心境ê變化。總講一句，老母無koh再kah以前仝款肯定伊ê做法這hō͘ 景文感覺真無趣味。宴席上一直成做話題ê是清文ê陳清公司；準講是講tio̍h in小弟瑞文ê長男阿明，伊ê頭腦好，氣質koh bē bái，是一個有前途ê青年，所以做老父ê 就有自信kah自誇來應對。只有景文hō͘ 人問起ê時，伊無一項thang hō͘ 伊感覺得意ê tāi-tsì。Tī東京讀大學ê長男景仁是一個放蕩子，到taⁿ一直hō͘ 父母種種ê煩惱；最近koh kha̍p-tio̍h一個不良女子，向厝裡索取大筆金錢；iáu有tsa-bó͘-kiáⁿ美圓kah農場監督ê親事謠言，mā造成景文ê困擾。
第三暗ê宴席，游德仁受邀請赴宴，伊一直是驚驚惶惶bē-tàng鎮定ê款。景文無歡喜，m̄-koh mā是無辦法。Tsit-ê腳siàu想beh得tio̍h我ê tsa-bó͘-kiáⁿ，伊認為親事已經講好勢à。游德仁是一個驚見笑ê人，若hō͘ 人講tio̍hê時，伊kah-ná否定koh kah-ná無否定，tī嘴內含含糊糊回答，真pháiⁿ勢ê款，這已經是準kiáⁿ婿ê證據。美圓去到伊坐ê hit桌敬酒，她顯然有意識tio̍h tsit項tāi-tsì，她m̄知beh án怎tsiah好。想起來，實在是真奇妙ê tāi-tsì，這是做老父ê景文起先料想bē到ê tāi-tsì；taⁿ發展到tsit-ê地步，這究竟是siáng án-ne做ê neh？是玉簾，是她m̄好。
Tio̍h lah，tsit件婚事tio̍h ài決定。這是玉簾teh自做孽；hit-ê人若做她家己ê kiáⁿ婿，她kám是會痛苦一世人？這是她無kā丈夫看在眼內ê siōng好報應。好，tsit-má是siōng好ê機會，今暗tio̍h來宣布婚約。
「來，游先生，咱來乾一杯！」
景文行到游德仁hit桌。伊ê目箍（kho͘）紅紅，露出微微á醉ê歡喜款，但是心中卻是kah平常時無仝；伊一直無法度冷靜落來。
「真失禮！我有話beh kah你講，請你小過來一下，kám好？」
景文phak tī游德仁ê耳孔細聲講，游德仁直覺：該來ê tāi-tsìsuah尾就來ā。伊就án-ne tòe景文去teh演歌á戲ê外口。
景文從來m̄-bat有過tsiah-ni̍h惡毒ê心情。Tú-tsiah伊行向游德仁hit桌ê時，玉簾tī廳堂ê大門，她一直不安驚惶koh面色蒼白teh注意景文，但是景文無發覺tio̍h，所以伊beh報復ê激情lóng無轉溫和落來。伊怨恨in bó͘，只是án-ne niā-niā。不管hit-ê腳siàu是啥人，mā不管tsa-bó͘-kiáⁿ會有幸福á是無幸福，伊lóng無想tio̍h tsiah-ê；伊只是對玉簾ê怨恨成做一把火，to̍h起來；伊從來m̄-bat tsiah-ni̍h怨恨過in bó͘。反tńg來講，伊一向kám m̄是lóng hō͘ in bó͘ 拘束？Kám m̄是lóng為in bó͘ teh設想？雖然伊ê心內有án-ne teh反問，m̄-koh，伊ê反省tio̍h到khah後來tsiah會發生，今暗伊ê慾望kan-taⁿ想beh hō͘ 玉簾痛苦。伊tsit-má beh問游德仁ê心意，伊若是同意，景文就beh隨時tńg去宴席，向大家宣布游德仁kah美圓ê定婚。伊to̍h是tsit-ê意思tsiah kā對手叫來外面，m̄-koh，m̄知啥物原因，景文卻恬恬，gāng-gāng tùi觀眾ê後壁teh看戲台。
景文講是有tāi-tsì beh對伊講，kā伊叫出來外面，卻一直恬恬m̄講話，游德仁就起tio̍h急。景文看出對方ê心情，這比看戲台頂小丑á ê動作koh khah趣味。因為一時ê感情激動，忽然tshìn-tshìn-tshái-tshái決定behán-ne做，家己tsit種ê做法，想起來kám m̄是koh khah笑詼？Tsa-bó͘-kiáⁿ ê婚姻可能會hō͘ in bó͘感覺痛苦，mā hō͘ hit-ê tsa-po͘人成做受因果報應ê人，m̄-koh，tùi另外一方面來看，本來想講in bó͘會陷入痛苦，m̄-koh，無定tio̍h m̄是痛苦，顛倒是hō͘ 她感覺tio̍h花ê美麗kah芬芳經常tī身邊ê快樂leh。總是，結果會án怎neh？景文tī tsit種混亂ê心情中，伊iáu是失去最後ê理智。游德仁確實是專科學校畢業，個性溫柔koh老實，m̄-koh，伊想beh成做陳家ê kiáⁿ婿，恐驚是有phah算tī-.leh，伊ê目的顯然是在tī財產；準講m̄是án-ne，對方ê家境真sàn-tshiah，kah陳家並無sù配。所以，景文自開始根本to̍h無kā伊kah美圓ê婚事當做一回事。這bē-sái得，這無可能，伊對家己án-ne下令。到tsit種地步，伊iáu ē-tàng對真正ê家己忠實。
「請問有啥物指教？」
游德仁忍bē-tiâu án-ne問。
「Ah，是ho͘ⁿh，戲suah kā我吸引去à。人生ná戲，你講是m̄是？Ngh，我想beh講啥物？Kah-ná有一點á走精去。」
景文假做m̄知。游德仁卻認為伊心內有數，thiau故意kik án-ne來kā伊戲弄。
「我認為我kah府上不配....。」
「你講啥物？是teh講kah阮tsa-bó͘-kiáⁿ ê婚事oh？這真正是奇怪ê tāi-tsì，你是tùi tó位聽來ê謠言？」
「你beh kah我講ê kám m̄是tsit件事？」
「Oh，是為tio̍h tsit件事。總是，照你tú-tsiah講ê，凡事若無sù配，kám m̄是會無趣味？Ah，hit-ê演員出來à，你看！」
景文用目tsiu表示，叫伊看戲台頂hit-ê烏鬚英雄講：
「像講hit-ê做戲ê河原乞食，伊ê價值無三sián錢，m̄-koh，伊所戴ê嘴鬚卻值四sián錢，這是無thang辯解ê事實。」
景文用燈籠á kah吊鐘ê譬喻來kā伊暗示了後，就kā hit-ê gāng去ê青年放leh，趕緊走入去厝內。
