《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二十六章（更新版）

作者 庄司總一著 賴永祥指導 林俊育台譯 2017.04.30

Tsit暗，阿明無事先通知一聲，to̍h忽然tńg來厝裡。

阿明m̄知厝裡teh慶祝阿媽七十大壽。伊看tio̍h門口前kui陣人圍teh看戲，廳堂ê宴席mā當teh鬧熱滾滾；伊m̄知到底是發生啥物tāi-tsì，kah-ná是去看tio̍h別人ê厝。伊tī門口徘徊一下，然後進入門內，看tio̍h kui家伙lóng集中tī廳堂teh鬧熱，每一間房間顯然lóng是空ê，所以伊就khiā tī前埕ê石階teh看宴席。

「Ah，he是阿明ho͘ⁿh？」伊hō͘ 一個人客發見。因為真吵，大家無同齊發見，m̄-koh，伊ê出現kah-ná波浪一桌傳過一桌。無一時á，大家ê目tsiu to̍h lóng teh注意伊。M̄-koh，hō͘ 大家tio̍h驚 ê m̄是瑞文ê長男忽然出現，卻是伊ê外表hō͘ 大家驚kah gāng去。伊無剃ê頭毛留真長，嘴鬚mā無修，身上所穿ê洋服lah-sap koh破舊，hō͘ 人bē想tio̍h伊to̍h是hit-ê像老父hiah緣投ê阿明。而且一般人m̄知高等學校ê學生thiau故意án-ne無妝無thāⁿ ê習慣，tsit-má tī當teh祝壽ê場面，伊án-ne行入來，致使大家lóng非常困惑，鬧熱滾滾ê宴席氣氛mā kah-ná忽然消失。

瑞文催伊緊kā阿媽祝壽，講吉祥ê話，向人客phah招呼。Tī光iàⁿ-iàⁿ ê場面，阿明ê面hō͘ 敏感ê人得tio̍h ê印象，比伊服裝無整齊koh khah hō͘ 人有奇怪ê觀感。伊m̄-nā是面色蒼白，目箍深深，可愛ê圓面變kah瘦pi-pa而已；伊ê外表hō͘ 人看起來真刺鑿（tshì-tsha̍k），ná親像犯tio̍h啥物大過失suah煩惱kah bē堪得，結果kā感情消磨了了，戇戇ê面lóng無表情；ē-sái講是睿智ê影跡一點á都無ê戇呆面tshiuⁿ。

阿媽問伊，是m̄是破病？她雖然擔心伊破病，m̄-koh，tsit-ê孫á無bē記得阿媽ê生日，tùi遠遠ê台北趕tńg來，所以阿嬌ê歡喜沖淡她ê擔心。總是，瑞文tùi阿明kah平常時有koh樣ê氣色，看出伊一定是有問題。伊隨時離席，kā阿明tshōa到伊ê房間。
「阿媽七十大壽，你beh tńg來，ná會無先寫phue講一聲？你是m̄是破病？Mài kan-taⁿ一直khiā-.leh，坐落來！Ngh，你tang時變kah hiah瘦？」
「我ê身軀並無啥物無爽快。」
「Án-ne，是為啥物特別ê tāi-tsì tsiah tùi學校請假tńg來？」 瑞文因為lim酒醉à，無法度控制家己ê情緒。
「Án-ne kui身軀kah-ná乞食ê款，koh是為啥物？若是服裝整齊tńg來，he是為tio̍h慶祝阿媽ê大壽tńg來，大家會認為你是一個可取ê gín-á，m̄-koh，你tsit-má tsit ê款根本to̍h m̄是為tio̍h祝壽，kah-ná是痟ê。我實在真無面子，苦bē-tàng緊tshōe一個地洞鑽入去。」

不管伊是啥物理由tńg來，tsit-má伊hō͘ 老父感覺真見笑，而且伊koh無beh tshap老父ê責備。M̄知伊有聽入耳á無？瑞文看tio̍h in kiáⁿ iáu是lóng無反應ê表情；阿明kan-taⁿ捷捷用手指尾ê指甲teh tiak薰屎。阿明本來無pok薰，瑞文認為伊是準講pok薰mā無所謂ê堅定koh認真ê gín-á，m̄-koh，tsit-má伊ê形看起來kah-ná是teh自甘墮落。
「Tsiah-ê lóng免講mā無要緊，總講一句，你bē-sái無緣無故m̄去學校上課。」
「我無ài去學校ā。」
「無ài去學校？！」

瑞文機械式反應，重複講一遍了後，就tùi椅á khiā起來。阿明突然出現ê時，瑞文憑直覺感覺不安。其實伊對阿明服裝無整齊，á是可能破病ê擔心，iáu是bē比對tsit-ê問題koh khah不安；瑞文tsit時tsiah注意tio̍h tsit點。阿明進入高等學校ê時，伊hiah-ni̍h-á ài beh讀文科，非常無ài讀理科，瑞文卻硬硬ài伊讀理科，讀了後，阿明iáu是非常不滿ê款。若因為án-ne來誤入歧途to̍h慘loh；其實伊tsit-má to̍h已經有一點á墮落ê款à。為啥物當初無beh順伊ê意志neh？瑞文tsit-má有teh後悔，所以伊用充分讓步ê口氣講：
「阿明，你講ê kám是真心話？若是你認為無論如何to̍h無適合讀理科，án-ne，改讀文科mā無要緊。」
「我已經無ài去學校ā。」
「你是teh對siáng講話？」

In kiáⁿ到taⁿ iáu m̄坐落去，做伊悠哉悠哉teh pok薰。瑞文忍受bē-tiâu，phok一聲siàn伊ê嘴phóe。瑞文想：我tsit下出手kā伊處罰siuⁿ過重à，我從來m̄-bat kā伊phah過，伊一定會哭、憤怒，koh會罵人。若án-ne就hō͘ 伊去發洩，因為激動ê時啥物話都講會出來。而且，伊kám會koh再去學校？伊一定無ài koh去à，伊會koh khah堅持無ài去上課。M̄-koh，瑞文koh想：伊jú嚷，只是嘴嚷嚷leh niā-niā，伊腹肚內根本都無想beh退學，伊kan-taⁿ想beh蹧躂人。

M̄-koh，哭起來ê是瑞文，被phah ê阿明顛倒是kan-taⁿ瞬間面á臭臭；伊目tsiu ta-ta，無流目屎，無憤怒，mā無罵人；kan-taⁿ講：「這kah阿爸無關係！」這是伊唯一ê反抗表示。

瑞文ê氣力tùi腰消失去。伊phiân來phiân去，行倒tńg來桌á邊，面phak落去，哭起來。伊沿路tshǹg，沿路講：
「你講kah我無關係oh？你tsit-ê不孝kiáⁿ！是án怎講父kiáⁿ無關係leh？你tú-tsiah kah-ná幽靈出現tsìn前，你kám知我是當teh講啥物？我tú tī人客面前講你是我ê驕傲。我講你koh一年to̍h beh去東京讀大學，將來beh做一個有為ê醫生，當然mā會得tio̍h博士學位；若無，最近工科萬能，所以若成做工程師mā是bē bái。Tú講到tsia，你to̍h kah-ná幽靈突然出現。」
「醫學博士、工程師....這只不過是咱ê夢niā-niā。」
「Tsiah-ê有為ê人，tī咱台灣你想有gōa tsē？阿明，你tú-tsiah所講ê是你家己一點á都無考慮清楚ê tāi-tsì neh。Mài-koh hō͘ 老父煩惱à，這是罪孽neh！M̄-thang án-ne teh折磨老父！」

因為阿明無回應，瑞文無法度koh講啥，最後露出認輸ê可憐款，期待in kiáⁿ來kā伊同情，所以伊就kā頭taⁿ起來。總是，阿明hō͘ 老父siàn嘴phóe ê時，伊pok ê薰suah lak落去，所以伊koh重新點to̍h一支薰。伊目頭結結，微微á露出苦悶ê款，kan-taⁿ án-ne講：
「人無法度折磨別人；我只是對家己厭倦，tsiah來折磨家己。」

瑞文覺悟伊家己無法度苦勸in kiáⁿ，所以隔tńg工請大兄清文來kā伊開拆道理。 清文真了解in姪á ê脾氣kah思想。Tsit-ê青年表面看起來真溫和，內心卻有滿腹激烈ê熱情。伊一直teh幻想kah追求美夢；伊tsit種傾向比一般ê青年khah強烈。伊有時會hō͘ 人感覺伊khiā tī性命ê橋頂，沉迷tī追求虛幻，有跋落深淵ê危險性。雖然是án-ne，伊tsit-má iáu未完成學業，to̍h想beh去馬來西亞ê Jio-ho-l州ê橡樹園，實在是siuⁿ過hàm古koh亂來。
「你為啥物會有tsit種想法neh？」
「我mā bē明白是為啥物；大概是hō͘ 南方ê風引誘去。」
「Án-ne，你m̄是進前，是teh逃避。Bē-sái得，絕對bē-sái得。」
「阿伯，你kám m̄是mā bat beh逃避現實？你年輕ê時bat出國過，he是....。」
「是ah，所以我了解你ê心情，mā ē-tàng對你提出充分ê忠告。總是，你顯然比我khah脆弱；我雖然逃避現實，m̄-koh，he是為tio̍h beh回復到新ê現實世界所行ê路。我守tiâu知識分子最後ê城池，m̄-koh，你卻無仝；你kám m̄是kan-taⁿ理智上ê敗北？南方ê風，美麗ê大自然，勞動....等等，你想，這kám m̄是kan-taⁿ beh回復自然原始ê盧梭主義？」
「無辦法lah，因為我ê世界真狹koh濁濁混雜。」
「你所描寫ê廣闊koh美麗ê世界，你kám掠準神會hō͘ 你？」
「總講一句，我無法度知影，m̄-koh，我teh追求；我是一尾無法度活tī濁水裡ê魚。有一個猴gín-á bat恥笑我講：若是日本kah支那戰爭，你beh óa tó一pêng？阿伯應該ē-tàng想像hit時我所受tio̍h ê侮辱是啥款？這to̍h是我ê處境。因為無崇高ê特權，mā m̄-bat有性命ê危險，所以我無法度達到智識á是理論ê最高境界；tī tsit種環境之下，對hiah-ni̍h-á寂寞ê我來講，beh赴戰場來死，kám有啥物意義？」

美麗ê崇高幻想kah-ná蝴蝶tī阿明ê胸坎á teh展翼，伊tú beh kā牠掠tiâu hit瞬間所發出ê閃sih目光，kah teh phâng茶入來ê安子ê視線相tú。
「昨暗我真正驚一tiô，差一點á盤á to̍h lak落去土腳。」

安子teh笑，有一點á「誇張」án-ne講。她ê目光kah阿明閃sih ê目光相接ê時，安子掠準阿明大概已經看thàng她ê心，所以hō͘ 她驚一tiô。安子為tio̍h tsit件事，昨暗kui暗一個人煩惱kah無法度睏落眠。Kah tsit件事比較起來，清文對阿明án-ne積極beh kā伊講道哩，實在是lóng無抓tio̍h伊心中teh癢ê所在。
「安子，伊想beh去馬來西亞，beh向高高在上ê傲慢挑戰。」
「我有聽tio̍h。你為啥物會忽然起tsit種想法neh？Ná親像teh眠夢leh。你是長男，而且學業koh iáu未完成。」

安子án-ne講，她深深受tio̍h良心ê責備，因為伊寄hō͘ 清子ê phue是安子kā它藏起來ê，清文並m̄知。
「阿明，你是一個真出色ê幻想家，m̄-koh，tùi阮ê目tsiu看起來，總是感覺有一點á偏差kah不可思議。」
「夢大概lóng是偏差kah不可思議。阿伯ê事業kám m̄是一種夢想？總是，它顯現出來ê m̄-nā m̄是偏差kah不可思議，而且因為siuⁿ過正派，suah有一點á khah現實，kám m̄是？這是我ê看法。畢竟tsit種事業受tio̍h金錢ê支配，koh受tio̍h經濟條件ê限制，結尾mā是枉然；kah-ná是一phō kē路ê通俗小說。」

阿明tsit段話hō͘ 清文kah安子感覺tio̍h驚。阿明一向lóng是kā in ê事業á是精神美化，m̄-koh，hō͘ in感覺真意外ê，m̄是阿明對事物看法ê改變，卻是伊平常時溫馴koh謹慎ê態度，tsit-má忽然變kah hiah-gâu講話；hit種想beh講啥to̍h講啥ê態度，實在kah以前有真大ê無仝。
「阿明，你beh追求單純，m̄-koh，這去馬來西亞tshōe bē-tio̍h，去Ta-hi-ti（=Tahiti，華語譯做：大溪地）mā tshōe無；準講去到世界ê ta̍k角落mā lóng tshōe bē-tio̍h。」
「若tshōe無，我就一直tshōe到死為止。」
「你ê腦筋有問題，顯然是teh鑽牛角。你kā理由講出來，阮若做會到，阮願意為你做任何tāi-tsì。」
「Mā有lín做bē到ê tāi-tsì ā。」

阿明笑一下。安子想：如果伊tsit-má提起清子ê tāi-tsì，tio̍h án怎處理leh？她感覺腳底冷ki-ki。阿明tsit種使khioh-ka̍k（自暴自棄）ê款，顯然是因為愛情ê慾望無法度得tio̍h ê結果。清文完全無了解伊ê實情，所以m̄-nā感覺阿明ê回答真曖昧，而且對伊hit種相當傲慢ê態度起受氣。
「人tī世間當然有做會到kah做bē到ê tāi-tsì，m̄-koh，總是ē-tàng kā它講出來kám m̄是？啥物是無可能ê tāi-tsì？」
「我想beh tī空中飛。」
「啥物？你想beh成做一個飛行家？」
「北冥有魚，其名為鯤；鯤之大，不知其幾千里也。化而為鳥，其名為鵬；鵬之背，不知其幾千里也。翼若垂天之雲，將徙於南冥....。」

阿明khiā起來，有一點á挺胸，ná親像一個豪傑，tī室內行來行去。伊確實kah平常時無仝；原本無pok薰，tsit-má卻悠哉悠哉teh pok。伊感覺不安，目tsiu不斷teh nih。伊對阿伯ê問題雖然有問必答，m̄-koh，kah-ná無充分意識tio̍h對方ê存在，態度ku怪koh冷漠。伊對老父瑞文沉默koh傲慢，差不多是無beh tshap伊ê態度；m̄-koh，對阿伯清文ê態度是認真，所講ê話mā m̄是lóng無合理。無論如何，清文明白tsit-ê姪á ê精神已經是tī無健康ê狀態。Án-ne，若beh kā伊ê煩惱是啥物問清楚，á是苦勸伊mài休學，á是phah斷伊想beh去遠方ê無理想法，不如先hō͘ 伊靜養，hō͘ 伊ê心情靜落來，這tsiah是目前ê先決問題。