《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第五章

作者 庄司總一　著 楊東傑 指導 林俊育 台譯 2016.12.04

第五章
Hit年ê三月中旬，安子接tio̍h老父中風跋倒ê通知，就tshōa清子匆匆pōng-pōng出發tńg去日本。

自從嫁來台灣，回鄉tsit pái是第二pái。第一pái是tī陳家ê大家長阿山往生第二年ê熱天，她踏tio̍h離別十二年ê故鄉土地。Hit時，清子已經teh讀小學，所以是利用tsa-bó͘-kiáⁿ ê暑假歇睏ê時去。她去過日本一pái，tsit pái m̄是專工tshōa她去認bat日本。雖然已經是學期尾，到春假iáu有二禮拜久，因此，對老母來講並m̄是thang歡喜ê tāi-tsì。所以，清文對tsa-bó͘-kiáⁿ講：「你一pái去會無啥物趣味，留落來kah阿爸做伙khah好。」

M̄-koh，清子講：「雖然是án-ne，前pái去是熱天，kah台灣仝款hiah-ni̍h熱，真無聊。Tsit-má是落雪ê時tsūn，thang回鄉看落雪。」清子一定beh kah老母去日本，nga̍uh-nga̍uh念m̄聽話。

因為án-ne，kā老父無ài她做伙來ê tsa-bó͘-kiáⁿ勉強tshóa來，安子顧慮tio̍h翁婿，就想講tio̍h盡量早tńg來台灣。

安子選擇老父反對ê婚姻，koh是嫁來遙遠ê所在。為tio̍h一屑á有孝to̍h無ê報賞，起碼mā tio̍h兩工á是三工來親近老父，安子抱tio̍h一絲á ê ǹg望趕tńg來，m̄-koh是中風，suah無法度達到她tsit-ê ǹg望。Tńg到厝ê時，老父五十嵐惣右衛門已經死五工ā。因為án-ne，做頭七了後，幫忙處理後事，kā親族一一拜候，to̍h想beh趕緊回台。Mā m̄知什麼原因，真緊to̍h過了十工二十工。有人講起既然tùi遙遠ê台灣tńg來，想beh阻擋她回台，安子一開始to̍h警戒永遠tòa落來。總是，tsa-bó͘-kiáⁿ清子真意愛田庄，無hiah容易想beh回台。安子家己mā真少有機會踏tio̍h故鄉ê土，回台ê日子就án-ne一日一日延落去。

Tī日本停留ê期間，翁婿清文有來幾張phue，m̄-nā單純埋怨她長尻倉，ta̍k張phue lóng是約十張便紙條ê長phue，參雜報告她無tī-.teh中間陳家所發生想bē到ê tāi-tsì，講kóa家己ê心情，mā有講出對將來ê計劃kah理想。

第一張phue
令尊蒙主恩召，昨昏我去電弔念，tsit-má用phue信tùi心底來致反悔之意。 你iáu是bē赴臨終見面，我相信你一定感覺真可惜。中風若m̄是致命ê病，koh再我若m̄是無閒行bē開腳手，我mā當然tio̍h行一tsōa。Tī惣右衛門先生往生tsìn前，我無論如何to̍h想beh見伊一面。回想過去，記憶猶新，lín老父hiah-ni̍h反對咱ê結婚，我koh khah想beh kah伊koh見一pái面，來kah伊親切講話。我雖然怨恨輕視hit-ê無知koh拗蠻ê田庄親人，he已經是過去ê tāi-tsì，tsit-má當然感覺真對不起。人已經往生ā，m̄是想講án-ne講講leh to̍h suah-suah去ê無責任，mā絕對m̄是kan-taⁿⁿ對死ê感傷。「你想beh，這bē-sái得，bē-sái得，若是台灣人....」Lín老父án-ne狂話，用薰吹頭敲花鱸ê邊緣，bē振bē動ê頑強形像，tsit-má iáu tī眼內顯顯kám m̄是？Kan-taⁿⁿ因為是台灣人....到tsit種地步，我當時iáu少年，對hit種bē-tàng達成高價熱情ê無合理，非常憤慨，我想he是令尊反對ê唯一理由。總是，準講我是日本人，完全m̄-bat見面無相bat ê別國人，伊mā bē歡喜。令尊應該是希望你kah祖先代代做伙生活ê在地人結婚，為tio̍h hit-ê土地經營生活。無受tio̍h近代資本主義污染ê純粹農民氣質，樸素愛土地ê頑固靈魂，kah-ná喬木深深釘根tī土地。Phah破tsit種堅固ê地殼，個人主義ê自由puh芽出來ê時，當然會引起摩擦kah爭執。Án-ne講起來，咱當時結婚tsit件事，m̄是kan-taⁿⁿ是偏見，koh khah是結連siōng基本的ê思想的ê差異，這結局kám mā是詭辯？我m̄是用「食bē-tio̍h葡萄講葡萄酸」kah詭辯teh對你講tsiah-ê tāi-tsì，諒必你會充分了解tsiah tio̍h。

你tsit-má ê感受án怎？令尊享年七十歲ē-sái講是天壽，你tsit-má kah故鄉ê緣份mā jú來jú薄。我bē-sái家己推論講：你大概是因為距離kah時間ê關係，致使你不幸ê現實感變薄。Mài koh悲傷，投入懷念久久ê故鄉懷抱，我想像你會輕輕鬆鬆過日，有甜koh恬靜ê心情。清子ê情況án怎？台灣ê學生來到日本第一pái看tio̍h雪，非常珍惜，就kā雪用郵便小包寄去燒熱ê本國，聽講有tsit種真kah kah-ná是假ê傳說。Tī清子ê小小心內，mā應該有紛紛落雪kah白siak-siak ê雪景ê驚喜tsiah tio̍h。總是，tsit-ê熱帶產ê小鳥，tī驚人ê風雪kah極冷ê天氣之下，一定會寒kah sih-sih顫kám m̄是？Tsit-ē gín-á tī出發ê時，當地台南已經是春天—mā是kah-ná熱天ê春天已經來到....。檨á樹受季節風一吹，白花四散；木棉樹ê粉紅色奇怪ê花，tī透明ê空氣中吐出有毒ê氣（khùi）....。

清子ê年齡已經有距離ê觀念，我想她對氣候kah水土ê變化iáu真困擾，若m̄是án-ne to̍h真幸運。總是，tio̍h請注意m̄-thang感冒。

第二張phue
今á日報告你無tī-teh ê時所發生ê大tāi-tsì。
阿陣失蹤ê tāi-tsì，三日前ê早起to̍h失蹤，到taⁿ lóng無看tio̍h人影。厝內ê人teh傳話，有人講會忽然koh tńg來，有人講bē koh tńg來。好佳哉，瑞文笑笑á sī。我講：「準備搜查，你看án怎？因為大概知影離開ê方向。」瑞文講：「搜查無路用lah，我一直想講tsit-ê tāi-tsì一定會發生，實際上我mā有心理準備，離開顛倒心情khah輕鬆。」雖然是án-ne講，伊iáu是顯出寂寞ê苦笑。 伊前to̍h bat對我講，hit-ê tsa-bó͘人對健康無gōa好ê伊來講，實在是一個重擔，對方要求beh離開，ē-sái算是幸運。老母以下厝裡ê人mā感覺hit-ê看bē順眼ê人無去有khah好，獨獨in bó͘春鸞teh怨嘆hit-ê逃亡，實在是一個奇怪ê tsa-bó͘人。大bó͘ kah細姨成做好朋友，世間有真tsē例，m̄-koh，親像春鸞kah阿陣ê款式無tsē。是愚蠢á是賢慧，無親像春鸞hit款ê妥協性。Tùi根源來講，因為確實是因為疼翁婿來妥協，無比情婦無tī-.teh koh khah歡喜ê tāi-tsì。

M̄是kan-taⁿⁿ我一個人án-ne想。不而過，大昨日春鸞來我tsia，真正悲傷koh怨嘆，目屎流目屎滴講，tio̍h kā阿陣tshōe tńg來，án-ne hō͘ 她逃走去，家己真對不住。因為她有夠愚蠢，阮兩人講話bē對tâng，她就勻勻á講出她ê苦情，我實在mā有受氣，就嚴格表示意見講：「Lín翁已經笑笑á處理，你tsit種笑死人ê做法對lín翁來講，是增加見笑而已。M̄-thang hiah-ni̍h-á意氣用事....」 春鸞án-ne真實告白她ná會拒絕tsit-ê事件，原來如此，我tsiah了解真相。 實情是án-ne：五日前ê一個事件—有實際傷害ê事件—tī厝裡發生。Tī景文所在ê美圓，阿陣射出空氣槍ê槍籽phah-tio̍h hit-êtsa-bó͘ gín-á ê正蕊目tsiu。

Hit工，我出外tńg來，厝內絞起真大ê騷動，問了tsiah知是án-ne：美圓tī厝後ê竹林teh拾集白鴒鷥lak落來ê翼，hit箍阿陣m̄知她tī hia，teh射tùi竹á頂面飛落來ê斑鴿，suah射tio̍h美圓。因為hit時春鸞tú好tī hia，她mā有無阻止射槍ê責任，koh khah害ê是，阿陣根本to̍h無beh聽話。總共來講，因為厝裡兩三個gín-á有空氣槍，我bat警告：厝內使用空氣槍真危險，絕對tio̍h禁止。不而過，tsit pái ê事件實在真遺憾。這雖然是gín-á ê過錯，應該是大人ê職責，當然引起厝裡ê人大憤慨。

我tsông去到厝後ê時，可憐ê美圓已經送去病院。Kui厝ê人對加害者阿陣用殘酷ê目神kā她看，tsa-bó͘人kā她tshoh罵，tsa-po͘人kā她手phah腳踢，kah-ná teh kā她刣kah半死。無論如何，過失已經發生，我若無阻止in ê暴力，阿陣可能會死去。春鸞面色青sún-sún，一再講：「M̄-thang責備阿陣，因為是我無好。」問她tāi-tsì mā lóng無效。

五日後，阿陣已經無行蹤。照瑞文講ê，既然犯了hiah嚴重ê過失，她當然bē堪得koh再tiàm tī陳家，每一個人lóng認為he是她忽然逃走ê理由。 總是，大昨日春鸞ê告白，加害者m̄是阿陣，是春鸞家己本身。有小khóa偵探小說ê味，m̄-koh，事實上有koh khah人性ê奧妙。

Hit工，厝內做翁婿ê lóng無出外，阿陣偷偷á入去厝後想beh引誘春鸞試射空氣槍。她看tio̍h竹林內ê斑鴿，就叫春鸞射一下看māi。春鸞就án-ne想beh滾笑看māi，瞄準扣鈑機。Tsa-bó͘ gín-á kah叫聲同時tùi竹林liàn出來。Tāi-tsì大條ā，春鸞瞬間目tsiu前一片烏暗。總是，tī身邊ê阿陣突然kā空氣槍搶（tshiúⁿ）過來，趕緊講幾nā pái：「是我射ê，我做ê。Án-ne講tsiah好，知無？」就kā gāng去ê春鸞放下teh，往竹林tsông去。然後kā美圓抱起來，大聲huah講：「是我射ê，做錯hiah大ê tāi-tsì，請原諒我。」teh哭ê huah聲，四箍圍lóng聽會tio̍h。

Tsit種自我犧牲ê精神，你感覺án怎？我一直感覺真偉大。M̄-koh，了後 koh kā它想倒tńg來，有bē了解ê所在。忽然想beh替正妻擔罪，tī眾人面前哭teh huah講是她家己所做ê行為，超過hit-ê無智識ê tsa-bó͘人ê本能，極其戲劇化。你kám會感覺tsit-ê義俠的ê精神真súi？Siōng起初她kā hō͘ 蛇咬tio̍h ê瑞文ê手腕用鐮á刀phut斷，koh kā毒血suh起來ê一心一意ê純情kah行為，tsit兩種事情ê中間有小khóa無仝—換句話講，kám有意識的ê概念？我雖然是án-ne想，hit種行為並m̄是普通人容易做會到ê。

「實際過程是án-ne，家己對不起阿陣，ná會無tī眾人面前講明家己ê過失？就án-ne hō͘ 阿陣走去，不得已tsiah來自責。」 春鸞án-ne講。「Hit種感受暫且ē-tàng了解，獨獨講tio̍h koh kā阿陣tshōe tńg來，到底會變成án怎leh？阿陣原來kan-taⁿⁿ值得你所kah意ê tsa-bó͘人，她為tio̍h瑞文kah你ê幸福來離開陳家。若是án-ne解說，你故意kā tāi-tsì蒸發出來kám有賢明？應該隱藏tī心內假做m̄知，kā tāi-tsì就án-ne埋葬起來。Án-ne做m̄是為tio̍h你家己本身，是為tio̍h瑞文kah你 hiah-ê kiáⁿ兒。你叫我保守tsit-ê秘密，m̄-thang洩漏hō͘ 其他ê人，連阮翁瑞文mā bē-sái對伊講明。」 我án-ne對春鸞誠懇解明。本來應該保守故事主角kah我兩人中間ê秘密，順續tī tsia洩漏hō͘ 你知，有khah失態。哈哈。

第三張phue
事業ê計畫準備有漸漸teh進行，今á日有去實地檢查瑞文ê土地，伊kah我以及一個名叫游德仁ê高等農林學校出身ê青年，三個人做伙去。 你mā知，hit所在是tùi XX車頭落車，坐手推車行一里半，然後koh行路二里。所在真偏僻，有考慮運搬作物無方便，m̄-koh，目前tùi台南通到山裡ê XX製糖公司ê道路當teh進行，預定無久to̍h會通車，若是án-ne，hiah-ê田地to̍h會得利。Koh再講，種鳳梨（ông-lâi）tio̍h經過將近二年tsiah ē-tàng收成，所以暫時kah運搬ê不便無啥物關係。

瑞文無啥ài kah阮做伙去ê款式，是我強迫tshōa伊來。你mā知，伊tī tsit所在附近hō͘ 蛇咬tio̍h，因為tsit-ê災難，結局對伊來講，無幸福類似離奇古怪ê生活tùi hia開始，tsit-má阿陣koh逃走去à，tsit所在to̍h是hit-ê tsa-bó͘人出世ê所在。因為有án-ne ê地緣關係，m̄-koh，瑞文無ài做伙來ê原因，我看出伊對家己重要財產ê田園無關心，這tsiah是可怕ê tāi-tsì。大概有teh想像，m̄-koh到位一下看，tsit-ê不在地主ê馬虎，比想像ê koh khah慘淡。專家ê游德仁所講ê免講，連我這外行人ê目tsiumā看會出：甘蔗園過度貧弱，田岸雜草生kah滿四界。分（pun）財產ê時，有掠tio̍h景文做孔ê pháiⁿ tāi-tsì，因為án-ne無歡喜ê先入為主感受，伊對家己ê土地無迷戀；á是因為這本來是官地ê放領地，有真tsē囉嗦ê問題，á是因為困難放租等等ê辯解，總是，mā辯解講無kah tsiah-ê困難奮鬥ê意志kah無氣力。伊mā因為加入我ê事業來工作，kah以前無仝款ê新生活ê喜樂，無比這koh khah好ê tāi-tsì。

田園有十公頃，想beh做農場kah果子園，抱tio̍h有啥物成果ê夢。夢是真歡喜，m̄-koh，實行無hiah容易。今á日來到tsit-ê土地一看，有koh khah痛苦ê感覺。嘴乾想behlim水，無古井，mā無泉水。農夫kah工人lim溪水kah lah-sap ê窟á水，傷寒kah赤痢不斷是當然ê tāi-tsì。無啥講有hō͘ 毒蛇咬tio̍h，m̄-koh hō͘ ma-la-li-a蠓（báng）釘tio̍h是時常ê tāi-tsì。Tio̍h設法kā tsia建立一個安全ê健康地，hō͘ 阮kah工人lóng ē-tàng安心工作。

其實需要tsit種安全ê設施，只不過是為tio̍h kā人類精神正確koh súi ê融合ê一個方法。這是起初to̍h需要考慮ê最後問題：資本家kah勞動者、持有者kah無持有ê人彼此之間，是m̄是hō͘伊得tio̍h光明，這是相當困難ê tāi-tsì，tio̍h先實際落去做看māi tsiah會知。我tsit-má tī心內畫一個大理想ê圖，m̄是模仿西洋學者所畫ê理想社會Hua-lán-jiû/ファランジュ/ phalanx（譯註：世界大百科事典 第2版 - ファランジュ ê用語解説：Tùi社会主義ê中間產生ê，フーリエ著《四運動ê理論》(1808)，建設共同社会ファランジュ，解放女性，聖•西門/サン･シモン/Saint-Simon主義者kā一対ê男女形式社会的個人ê設計圖。）Hua-lán-jiû是全民ê物件，雖然包含人類、社會、自然ê意志，kám是想beh行向前所未有ê pháiⁿ狀態。事物不斷teh更新，即使hit-ê感覺導向pháiⁿ ê方向，hit-ê意志有khah好ê狀態，一定是beh期待khah koân ê狀態。因此，lóng bē-sái有根本的ê pháiⁿ想法，á是無健康ê思想。總是我想，思想hit-ê物件ê結局是幽靈，mā是形影niā-niā。人類ê性命—連接行動ê性命實體投落來ê影。像王茂堂hiah-ê人批判tsit-má ê我，講我是tùi思想逃亡，果然kám是án-ne？若是án-ne mā bē bái，因為ē-tàng tùi家己行動ê大地puh出新ê思想ê芽。

我做一個台灣智識分子，一直teh思考，mā有teh煩惱，回顧過去，反省到底有做kóa啥物tāi-tsì，kah-ná只不過是kan-taⁿⁿ口出怨言，白白要求物件。M̄是kan-taⁿⁿ我一個人，台灣人lóng siuⁿ過頭追求幸福。Kan-taⁿⁿ追求幸福是人類墮落，若是台灣人知影人生ê根本m̄是幸福是義務，一定會生出koh khah美好koh高尚ê精神。台灣完全欠缺tsit款物件，因為kan-taⁿⁿ急teh追求，咱tio̍h koh khah積極來考慮付出。

Án-ne講起來，日本人ê你kah台灣人ê我結婚to̍h會有意義。Kan-taⁿⁿ互相有疼koh有理解，m̄是án-ne to̍h來達到互相無夠十全十美ê年齡。未來咱ê結婚ê型態tio̍h ài考慮包含特別ê課題，你kah我lóng tio̍h隨時做啥物事業ê心理準備。無想tio̍h講是鳳梨罐頭業，顯出一點á奇妙ê情況。形狀雖然奇妙，內底koh是純粹芳芳ê果肉kah果汁。因為景文退股，無beh共同出資，結果tio̍h我個人經營。我對事業無經驗，koh有個人ê缺點，合合做伙來想，這確實m̄是簡單ê tāi-tsì，到tsia來tio̍h需要你ê好助力kah勇氣。

雖然是án-ne，tsit-má iáu未需要對你強調á是要求。因為我知tī你ê心內已經有共同做事業ê熱情kah堅定ê信念。