《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第六章
作者 庄司總一著 賴永祥指導 林俊育台譯 2016.12.11
安子kah清子tī四月上旬tùi日本tńg來。
親子三人平時過tio̍h安靜ê生活，四十日久bó͘無tī厝裡，hō͘ 清文感覺加真寂寞。母kiáⁿ平安koh元氣飽足tńg來，其中有從來m̄-bat看過清子hiah-ni̍h歡喜kah碰碰跳ê款式，tī清文乾燥ê所在吹起清新ê風。
「Tsit-ê tsa-bó͘-kiáⁿ講是愛田庄，無想beh tńg來。學校已經慢人一個月，真傷腦筋。」安子無意無意án-ne講。
「Ná會leh，安子學校成績超前，小khóa歇睏一下無啥要緊。清子，kám m̄是？」
幾工無看，因為北國ê冷風，少女ê皮膚peⁿ kah ân-ân，面皮mā小khóa紅霓。Tsit-ê tsa-bó͘-kiáⁿ tī老父ê眼內，kah-ná新鮮ê水果hiah映目。
「日本kám有影hiah趣味？有tshit-thô啥物？」
「Tshit-thô真tsē項....，釣煎餅、紙牌、雪人、滑(tshū)雪。爸爸mā做伙去，m̄知gōa好leh。」
清子面容表情顯出老父無看tio̍h日本ê田庄情景真可惜。
「我來kā爸爸考試，tī田庄ê老父án怎叫？」
「我知，老父叫做 “Ta-ta-tsiá”，老母叫做 “Ga-ga-tsiá”。」
「Án-ne，你kám知大家án怎講我ê tāi-tsì？....M̄知ho͘ⁿh，叫我是
「Mian-khoh/愛兒/めんこ」。」
清子天真天真án-ne講，hō͘ 父母笑微微。
「這是hō͘ 爸爸ê記念品。」
清子tùi行李箱the̍h出兩個鄉土尪á，日本ê東北地方有kā嬰á hē tī用稻草做ê籃á叫做 “i-ju-meh/いづめ”ê風俗，就是取tsit-ê形ê尪á。
「無比這koh khah好ê記念品à，你tsit-ê gín-á koh知我愛藝術品，有夠巧to̍h tio̍h....真可愛ê尪á，這kám mā是叫做「愛兒/めんこ」？」
「Ngh, 叫做 “I-ju-meh/いづめ” lah，田庄ê家，阿嬸ê嬰á mā hē入去hit內面，講是真溫暖、真爽快。M̄-koh，我煩惱án-ne hē tī籃á內，身軀kám會伸長？我tiāⁿ-tiāⁿ kā尪á tùi “I-ju-meh/いづめ”抱出來。」
「總是，我mā hō͘ 媽媽hē入去hit內面，屎尿mā lóng流出來。」
「討厭，你tsit-ê人....」
安子án-ne講，koh kā清文睨一下，伊隨時無koh笑，目tsiu移去看鄉土尪á ê面，雖然無啥物無爽快，卻有小khóa寂寞ê感覺。Tùi久久無做伙ê親子歡喜ê氣氛中，kan-taⁿⁿ伊露出in母kiáⁿ tùi tńg來ê歡喜，忽然受tio̍h安子án-ne teh嫌，總是感覺有勸解ê語氣。
「若是用台灣ê搖籃kā我養大，我mā會像爸爸hiah-ni̍h koân大kám m̄是？」
「M̄-koh，iáu是日本ê氣候khah好，你kám m̄是有khah肥起來？血氣mā khah好....你tī hia有食真tsē絲蔥ho͘ⁿh。」
安子kah-ná刺目來避開清文無惡意koh溫柔ê視線，行oá去壁龕來看掛圖。....Hit-ê無夠額ê蔬菜，bat成做in夫婦之間精神的結連ê原因ê日子。安子tú嫁來台灣ê陳家頭無jōa久，hō͘ 產褥熱bú kah神志不清，一直亂唸「絲蔥」ê時，清文不止á煩惱她有思鄉病ê象徵。Hit當時，伊ê愛情非常強烈，koh受民族的ê偏見束縛，對in夫婦來講，確實有意識tio̍h宿命ê安排。In mā了解久長經驗ê訓示，民族的ê偏見kah無一致ê困難，社會全體ê條件之下有宿命，tī小小個人ê夫婦範圍內，m̄是hiah-ni̍h根本的ê內疚。
「是lah，食是有食，m̄-koh，無感覺特別ê好味。因為是家己出身ê家鄉，當然會懷念，總是去到位一下看，並無hiah-ni̍h懷念。木棉ê被（phōe），會ki-ki-kū-kū出聲，房間陰暗濕氣重，koh再lóng無娛樂，總講一句是無方便。變做都市人了後，hit款ê田庄無koh再是好tòa ê所在。」
這是安子ê實際經驗，對in翁lóng無掛慮全盤講出來，清文mā非常清楚。因此，講起絲蔥ê tāi-tsì，半sńg笑teh講，mā絕對m̄是討厭ê khau洗。只要母kiáⁿ元氣飽足、歡歡喜喜回台，確實是thang歡喜ê tāi-tsì。總是，講siuⁿ tsē關係記念品ê話kah放肆ê感情，小khóa有受愚弄ê款式。真無簡單tńg來到厝，輕鬆吐一下氣（khùi），mā是ài有tsit種ê感受。
「你kā沈南蘋（譯註：1682年－？，清朝ê畫家，tī 長崎停留二年ê時間中，傳入花鳥畫ê寫生kah技法，伊ê弟子熊代熊斐等人形成南蘋派。）the̍h出來掛à....。」
安子終於注意tio̍h壁龕ê掛圖，in收藏ê書畫中間，清文siōng誇耀沈南蘋ê鵪鶉圖，特別看重。一下看去，tī紫壇ê台邊有貴重ê吳須赤繪做裝飾。清文用啥物心情teh等in兩人tńg來，一直掛意tio̍h án怎來迎接，無必要koh講。Kan-taⁿⁿ無閒家己ê tāi-tsì，無掛意in翁ê心情，安子無意中感覺見笑。雖然是án-ne，清文完全無想beh來責備。
Tsit-ê人tang時變kah hiah溫柔ê好老父，安子ê胸坎á忽然tsa̍t起來。 講有關係事業ê人客來，清文就去會客室。然後，koh有玉簾生kiáⁿ ê消息，安子就行去hit所在。 留落來清子一個人，忽然輕鬆起來，閒閒無tāi-tsì ê款，tī tsa-se-khih/座敷客房邊á ê籐椅坐落來。她the̍h出畫圖紙，tú想beh用畫圖筆畫啥物ê時，女婢ê阿英來到她ê邊á，kā她無tī-teh ê時發生ê tāi-tsì—玉簾ê tsa-bó͘-kiáⁿ 美圓hō͘空氣槍phah-tio̍h，一蕊目tsiu失明，阿陣逃亡ê內情，一一講出來。幾十日夫人kah小姐無tī厝ê中間，阿英一直渴望beh講話。自從阿英kā清子洗尿tsū-á，唱台灣gín-á歌hō͘ 她聽ê時算起，阿英來tsia做工已經十幾年ā。Hit中間有兩年離開tsit-ê家，有下級官員ê台灣人講親tsiâⁿ，去到位一看，hit-ê tsa-po͘人已經有bó͘ à，她結局hō͘ 人關tī每個月用十圓租來ê lah-sap房間內。兩年後koh tńg來清文kah安子ê所在到今á日，她相信無有比tsia khah好ê所在，知影tio̍h óa靠人，義理堅定，有戇直ê精神。Tī tsia小家庭ê生活，安子kah清子lóng kā她當做家族來對待。Tsit種ê好待遇想講會小khóa得意忘形，即使有tsit種情形，ē-tàng十幾年長期間hiah-ni̍h親睦，其實lóng是靠諒情寬恕。
阿英所講陳家ê傳言，十二歲ê清子bē理解。她差不多lóng無關心女婢熱心對她講ê話，the̍h畫圖筆ê手一直teh振動。因為實際上，不管對手所講ê有了解無了解，清子lóng teh想完全別項tāi-tsì。
「無ài聽lah，去走，去走！」
Gín-á終於發魔狂性ê脾氣，ná會用台灣語án-ne講。阿英phut一下面lóng膨起來，kah-ná是因為tsit-ê tsa-bó͘ gín-á有阿嬸ê關係，就厚厚唸行tùi灶腳去。
清子熱心繼續畫圖，iáu未畫好勢就tàn掉，一直用新ê畫圖紙。Tùi五六歲to̍h開始愛畫圖，m̄-koh，到taⁿ iáu未畫好勢，是因為她tùi畫圖無真熱心，總是m̄知teh想啥物別項tāi-tsì。Kan-taⁿⁿ teh想明á載tio̍h去學校—he無趣味，為tio̍h beh掃除tiāⁿ-tiāⁿ進入頭殼內ê hit-ê想法，想beh用畫圖筆來kā它擦消。學校若歇睏一個月，m̄是神經大條ê gín-á mā會不安，會急kah坐立不安。M̄-koh，清子顛倒反，學校永遠歇睏是她siōng歡喜ê tāi-tsì。會有ná親像病人恢復期hit款ê爽快kah安然ê另外一個原因，她會記得無好ê秘密歡喜kah心情好ê勝利感。老母ê後頭厝kah hiah-ê田庄ê人情風物，確實hō͘ 她新奇ê吸引力，m̄-koh，清子活跳跳tńg來，想講永遠免去學校，這mā是異想天開ê經驗。....總是，明á載開學，老師kah朋友lóngkā她叫做「陳小姐」。Ná會án-ne leh？Ná會bē-tàng bē-sái叫我家己老母後頭厝ê姓「五十嵐」？Ná會m̄是叫做「佐藤」á是「齋藤」leh？連姓「陳」來講，ná會有「清玉」，有「清蓮」，m̄是「清瑛」leh？
Khiā tī建仁寺牆外ê苦楝á樹，白頭殼á來唱一節、兩節to̍h koh飛走去。微微á風吹來，真迷人，有時tsūn小khóa kā樹葉á吹koân。庭院內其它ê樹á，iáu是初夏ê黃色，受光線照來引起小khóa燒熱ê氣氛裡，lān神lān神iáu teh睏。 講陰暗kah幽靈是thang驚ê，總是，清子是驚完全別款ê異樣恐怖，為tio̍h無ài絞入去hit-ê寂靜ê深淵，掠tiâu畫圖紙來畫hit-ê叫做“I-ju-meh/いづめ” ê鄉土尪á。雖然客房ê桌頂有排兩sian mo͘-té-luh，清子lóng無teh看....
「清子小姐，你tńg來ā。」
阿明tùi庭院ê紫色門探頭出來講。
「我入去mā無要緊ho͘ⁿh，阿伯kah阿姆kám是lóng無tī-.leh？」
阿明tùi續接門邊ê陽台peh起來。身材無koân，聲音koh低，小心細膩，有提心吊膽ê款式。總是，伊一下出現，寂靜ê鏡框都會破kahli-li-lak-lak。少年人ê面tshiō-tio̍h戶外ê日光to̍h熱phut-phut，身軀看起來kah-ná有自由ê風。
清子peh開大蕊目tsiu來看，因為阿明已經是一個高中生，穿一領新形ê秋天制服真大pān，kah-ná有漿過糊á黏kah真硬tsiaⁿ。帽á mā因為日曝流汗koh亂sú用，變kah皺pih-pah，鞋á mā是án-ne，hō͘ 塵埃iàⁿ kah白siak-siak，行起路來，kiⁿ-kiⁿ-kóaiⁿ-kóaiⁿ，發出kah-ná活物ê叫聲，koh笨tshiâng kah 踏bē-tio̍h土腳。He是tú-á初初開始，完全hō͘ 人感覺tio̍h新鮮ê氣息。
「你kám有收tio̍h我ê phue？」
「Ngh。」
「Ná會無kā我回phue？」
清子tòa tī日本田庄ê時，阿明有寫兩三張phue hō͘ 她。Kah-ná當然有會收tio̍h她ê回phue ê權利，阿明用小khóa橫霸ê口氣講。雖然有kóa責備ê意思，總是，tsit-má tī伊細細ê靈魂充滿新ê經驗kah新ê感情，想beh tshìn-tshìn tshái-tshái kā它tháu放。
「你ná會tī日本tòa hiah久？會落第neh，清子小姐。」 阿明用khau洗koh威脅ê口氣講。
「你tsit-ê講大話ê中學生，你去落第好lah。」
清子tu嘴激氣（khùi）口講，因為她ê嘴唇厚，激hit-ê面有夠pháiⁿ看。
阿明koh khah感覺失望，面對每年結業式做班ê總代表ê清子，會講出「落第」hit款話，只不過是khau洗koh威脅ê滾笑，m̄是本來ê意思，清子會了解tsiah tio̍h。無論如何，為甚麼tio̍h bú kah hiah-ni̍h鬱卒ê氣氛。....Tiāⁿ-tiāⁿ lóng tsit款形。
Koh khah細漢ê時tsūn，阿明看tio̍h陳家其他ê gín-á無beh親近清子，lóng會kā她維護，kah她做朋友，清子mā會親近阿明。Tī beh讀小學ê時tsūn，hit-ê可憐ê親愛kah信賴，忽然消失去，變成奇妙ê冷淡。兩人仝學校，講是日本人ê學校，m̄-koh mā有收少數優秀ê台灣人兒童做伙讀。阿明三年ê時，清子入學一年á。Kan-taⁿⁿ一年á ê時，阿明招細漢ê叔伯小妹，早起時做伙去學校。總是，二年以後，m̄知甚麼原因，阿明去招她，lóng講你先去，若無to̍h是家己一個恬恬á提早去學校。Tī學校內面相tú，mā激空氣m̄講話，尤其是tī其他朋友面前，lóng激做無相bat ê外人。這tī gín-á中間是免不了ê奇怪ê見笑kah顧慮，m̄-koh，清子ê無關心á是迴避ê傾向，mā延長到家庭內。清子差不多lóng無去阿明tòa ê所在tshit-thô，阿明有時á去清子ê所在，á是學校ê朋友來訪，á是去仝所在練寫字，清子lóng無hō͘ 伊面子，kā伊趕tńg去。
阿明真無幸福。M̄-nā是tī陳家，其他家庭ê gín-á大部分有兩三個老母。M̄-koh，阿明hit-ê第二個老母是番á，所以特別受人白目看待，hit-ê阿陣tsit-má mā無tī-.teh ā。老父瑞文koh再是tshìn-tshìn-tshái-tshái koh 意志輕薄ê人，以及老母春鸞ê無教養kah戇直，深深刻tiâu tī tsit-ê敏感ê少年人ê腦海裡。無論如何，家己tsit房ê生活水準低，比較大伯清文ê文化的ê生活，koh khah感覺家己tsit房ê低劣。細漢ê時tsūn，無teh關心tsit-ê愛慕kah欣羨，tòe teh漸漸成長，就變成khah清楚ê觀念。因此，發覺hō͘ 叔伯姊妹棄嫌ê時，阿明有單純寂寞以上ê複雜屈辱感。
阿明hit年ê春天入中學，tī tsit-ê小都市無koh khah koân ê學校，所以想講阿明成做中學生是真偉大。真tsē少年人因為án-ne，tsit種koân-koân飛舞ê靈魂，tī第一學期應該bē降落來地上。Tsit-má tī清子ê面前出現，是對屈辱ê報復，mā是beh ài iáu細漢ê表小妹來kā伊認同。
阿明靠tī陽台ê hōaⁿ手，目tsiu金金看koh beh開始畫圖ê冷淡清子，小khóa怨恨就受氣。
「清子小姐，kám無beh來去tshit-thô？」
「Ngh，無ài lah。」
阿明對tsit種粗魯koh冷淡ê回答，心頭火to̍h，m̄-koh，一個面iáu笑微微。阿明人真斯文，至少對伊tsit-ê叔伯小妹，無論受tio̍h甚麼款ê屈辱kah受氣，mā是價值轉換，kā它當做無要緊，當然tiāⁿ-tiāⁿ溫柔對待。有時甚至面受抹烏kah烏mà-mà，伊m̄-nā無受氣，koh gia̍h起筆來，tī鼻孔下面畫嘴鬚，hō͘ 大家笑哈哈。
總是，阿明今á日ê感情ná親像風teh吹，bē堪得受tio̍h小小壓制，若無深入虛假隱瞞ê隙孔，無法度了解真相。
「你teh畫啥物？」阿明kah-ná雲中飛車ê高壓氣勢行oá來。
「He是啥物？.....Ah, 是he o͘h。」阿明注意tio̍h桌頂ê鄉土尪á，目tsiu看hit sian尪á，用輕聲ê氣口講。
「He kám是日本ê土產？真奇怪neh。」
阿明雖然m̄-bat看過mā m̄-bat聽過“i-ju-meh/いづめ”，m̄-koh，清子所畫ê尪á比實物koh khah奇怪。清子自細漢所畫ê圖，比一般gín-á ê幼稚畫圖有小khóa khah無仝。粗線條，立體感khah薄，hit種無要無緊ê幼稚畫風，kah近代畫ê抽象變形作風有類似ê所在。清文tiāⁿ-tiāⁿ ài講清子ê畫「有sêng Paul Gauguin（法國畫家，1848 – 1903」，mā講「畢卡索看tio̍h mā會kah意ê畫」。因為清子ê畫風是án-ne, tī學校ê畫圖班，受tio̍h擔任老師ê觀點無仝，致使所得ê分數mā無仝。 阿明mā承認清子ê其它學科成績真優秀，總是，伊一直認為清子所畫ê圖真kē路。
「Hit-ê尪á叫做啥物？」
「我無behkā你講。」
「到底叫做啥物....你無ài講to̍h suah-suah去。....橫直，一屑á to無beautiful（台語=súi）。」
「Biu/Beau....？」
「我mā無behkā你教。」
「Kám是英語？」
「Ah, 讀初中就會讀英語，tsit-má起，我beh kā阿伯tsia ê冊讀hō͘它了。」
Tsit-ê少年人挺起胸坎，注神看清子，想beh加減膨風一下。
「Tsit-ê英語是甚麼意思？」
阿明看tio̍h清子起好奇心，心內得意kah起激動，表面上假做無啥tāi-tsì，悠哉悠哉。
「是真súi ê話。Beautiful....beautiful, 花súi。Tsit-ê清文阿伯ê厝kah花園，以及安子阿嬸lóng真súi，全世界lóng真súi。」
「好ah, 好ah, lóng講講hiah-ê pháiⁿ話....」
清子tùi邊á ê椅á khiā起來，懷恨在心kā伊睨，koh bih嘴。清子m̄知什麼意思，總是感覺he m̄是pháiⁿ話。M̄-koh, 不管是好話á是pháiⁿ話，iáu是感覺家己hō͘ 阿明隱瞞，心內真bē爽快koh懊惱。
「A-ah, biu-ti-hul/beautiful是甚麼？什麼意思？」
清子kā阿明逼問，kā伊制服胸前ê鈕á掠tiâu，新ê鈕á金光閃閃。阿明忽 然感覺心肝the跳，她ná會án-ne掠tiâu我ê鈕á？Ah, tsit-ê鈕á mā是beautiful。Tsit-ê清子可愛ê手指來摸tio̍h鈕á，是因為她對我ê認bat、尊敬、愛情。伊認為清子對伊ê討厭是teh假仙，若是她真正討厭伊，tsit-ê世界就一屑á to無beautiful。阿明kā美ê醚suh入去身軀內，kui身軀suah 膨起來。就án-ne, 歡喜koh khah歡喜。伊iáu是假做無關心，繼續維持hit種刻薄ê態度。
「我kā你講好lah。」阿明表示behkā她講ê款式，卻koh含湖其詞講：
「Hit-ê尪á kah你所畫ê圖lóng無beautiful，你受氣ê面mā變kah無beautiful à。」
Án-ne恥笑teh講ê時，阿明hō͘ 清子giú一下向前。
「死鬼á, 我siōng討厭阿明。」
伊若傾向清子giú ê順勢就好，卻顛倒kā身軀phiaⁿ tó-páiⁿ去，鈕á ê線suah斷去，lak落去馬賽克地磚頂面，發出可憐ê聲。
「Ah, 鈕á, 我ê鈕á....」
阿明雄狂去jiok鈕á, kā它拾起來。膨起來ê胸坎á忽然消落去，勻勻á疼痛起來，滿目ê目屎含（kâm）teh。金屬ê鈕á lak tī土腳發出ê聲，ná親像伊teh哭。
