《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第七章
作者 庄司總一著 賴永祥指導 林俊育台譯 2016.12.18
郭萬春kā工場設計圖ê藍圖tī桌頂展開，熱心teh做說明。
總是，清文對細節ê檢討無真致意，因為比前設計師所講ê預定規模khah大hō͘ 伊感覺遺憾。郭萬春講事業若beh擴展，tsit-ê面積無法度排三條生產線ê機械，m̄-koh, 清文ê意思是講將來ê tāi-tsì以後tsiah講，目前兩條生產線就有夠額。
「頂pái我有對lín講過，起初是計畫合資設廠，因為種種ê原因suah變成我個人獨資，預算也變少。若ē-tàng照我所想ê來做，mā是bē-bái。規模細koh有特色ê公司是我設立公司ê原則。」
就án-ne, tú-tsiah一直無講話ê游德仁oá來贊聲講：「無lah, 先生ê計畫絕對bē-tàng講細，kan-taⁿ農場ê用地to有....」 游德仁講到tsia就有所顧慮停落來。伊頂年tsiah高等農業學校畢業，無社會經驗，算是小心看頭看尾ê青年，五官四正，胸坎á厚，有tsa-po͘人ê氣派，一點á to無粗俗ê感覺，koh是用心打扮ê人。
預定負責工廠管理ê郭萬春kah游德仁完全倒páiⁿ，伊無像游德仁án-ne頭毛抹油。今後準講雙手bak-tio̍h機器油，乾燥ê長頭毛mā一定tshut-tsāi它散亂。伊胸坎á薄板，無肉ê手kho͘，手掌背面ê青筋浮現，面色蒼白。M̄-koh, 不管甚麼時tú-tio̍h伊，伊lóng無衰微ê款，帶一副近視度數真深ê目鏡，tùi目鏡後活lèng-lèng ê目tsiu，不斷映（iàⁿ）出tùi心底流露出來ê熱情。
「先生講無希望規模大，m̄-koh，我認為tio̍h ài tùi某種程度ê規模來開始tsiah好。因為鳳梨事業會thàn錢，大家lóng teh注目，漸漸teh興旺起來。聽講最近日本國內ê大公司mā開始teh siàu想，若是tsit種大資本ê公司入內，目前在地tsiah-ê ná雨後春筍teh發展ê小公司，就無法度競爭來消失去，á是被大公司收買去。所以，準講設立一間kah-ná珠玉hiah出色ê小公司，kám m̄是會去hō͘ 大湧吞滅？」
郭萬春用非常liú掠ê日語講話。台語已經成做kan-taⁿ日常用語teh用，小khóa科學ê論述á是微妙ê表達，現今ê少年人已經無法度用台語來講。總是，語言kah衫褲仝款，bē-sái siuⁿ過樸素，mā bē-sái siuⁿ過華麗。若是han-bān講話，會hō͘ 人懷疑頭腦無內容；若是講kah siuⁿ過好聽，會hō͘ 人輕浮ê印象。若m̄是講家己母語ê場合，hō͘ 人koh khah有tsit種ê感覺。所以，清文對tsit位青年ê日語hiah好真感心，m̄-koh mā有討厭ê感覺。
「總講一句，先生，這是大規模發展mā bē失敗ê事業，我tī以前ê公司工作過，我真了解。無論如何，鳳梨ê事業有利純—實在是siuⁿ過有利純。」
郭萬春露出帶有輕視kah諷刺ê奇怪冷笑，m̄-koh，新點to̍h ê薰煙隨掩蓋伊ê表情。「利純」tsit-ê詞一開始到taⁿ已經提起幾nā pái, 這是伊對以前工作ê公司á是一般搾取勞工ê資本家ê諷刺。因為清文知影tsit-ê青年出身sàn-tshiah，suah感覺連家己mā hō͘伊列入去伊所指ê資本家內面。因此，若m̄是郭萬春回復伊原本活潑明朗ê面色，koh補充下面ê話，清文一定會陷落心情無爽快。
「世間人無論如何lóng是án-ne teh看tsit-ê鳳梨事業，án-ne, 先生ê產業合理化kah勞資協調ê理想主張，世間人無一定會了解。世間lóng是teh相搶食，難免會tú-tio̍h碰壁，m̄-koh，tùi社會ê推測來看，mā是有成功ê可能。」
陳清文是基督徒，koh是教會學校ê老師，伊beh創辦事業，確實會hō͘ 人有「竹篙tàu菜刀」ê感覺。而且，伊ê小弟景文是sing-lí界ê高手，世間人會認為阿兄mā想beh顯露sing-lí ê膽識。清文當teh想講，tī事業具體進行tsìn前，伊tio̍h忍受世間人ê誤解。Tsit時，郭萬春tsiah-ê話引起清文內心ê共鳴。伊ê神情無卑屈，想啥講啥，顛倒hō͘清文感覺khah好。
「總講一句，咱koh來重新思考，kah農場ê配合mā tio̍h充分考慮tsiah ē-sái。Tio̍h lah, 游先生，土質ê情形án怎？」
因為郭萬春siuⁿ過無經過大腦to̍h講話，游德仁心肝phi̍h-pho̍k-tshái, m̄-koh無ài顯露伊ê不安，目tsiu一直看客廳hiah-ê舖排。清文一下án-ne問，伊就驚一tiô ua̍t頭過來。
「錳ê含量jóa-tsē？」
「Ah, 有3%，有khah tsē ê款....」
清文用手指尾lián伊厚厚ê嘴鬚，並無顯出無歡喜ê面tshiuⁿ。M̄-koh，游德仁kah-ná有小khóa驚驚，無koh加講話。郭萬春卻tī清文iáu未問起就先講： 「Hit塊土地kah-ná無適合栽種鳳梨，土壤含1%以上ê錳，鳳梨便無法度吸收鐵分，án-ne to̍h必須掖khah tsē鐵劑，自然肥料費用會增加。」
總是，清文iáu未要求詳細說明tsìn前，游德仁無想beh家己積極講出來。伊對陳清文ê高貴風釆kah高等教養時時有被壓倒ê感覺，m̄-koh，游德仁心內重重ê壓力是清文好額ê財力。馬賽克ê地磚，爛心木kui塊桌面ê桌á，hō͘ 人感覺冷ki-ki ê無火大理石暖爐，kah-ná用含蓄koh深刻皮膚呼吸ê陶器，一面壁掛印度壁毯織機圖案ê華麗壁毯....。Tsit-ê客廳ê高貴不時都hō͘ 游德仁感覺被壓倒，只要tī tsit-ê人ê下面做tāi-tsì，會比tī其它公司á是農業試驗所khah koân ê薪水。游德仁警戒家己，m̄-thang有粗魯á是無教養ê態度，致使傷害tsit-ê頭家ê感情。Á郭萬春tsit-ê人，是土直neh？á是大膽neh？竟然hiah-ni̍h無感覺生份teh大膽講話，游德仁驚一tiô，伊想tsit-ê人若m̄是真出色，to̍h是戇大獃。
因此，不管土質á是田園經營ê問題，lóng是郭萬春tùi邊á teh插嘴，致使han-bān講出家己主張ê游德仁suah無講話ê餘地。
「Tsit-ê人無beh講出家己ê想法，真傷腦筋。」
郭萬春講tsit款批評ê話，游德仁小khóa懊惱講：「咱兩人合做一個koh除二就會tú好。」
伊án-ne khau洗ê應答顛倒致使郭萬春講：「He, 游先生，án-ne無法度除lah，因為兩個kah-ná是實數kah虛數。」
「Tó一個是實數，tó一個是虛數？」清文雖然知影郭萬春所講ê意思，卻thiau工笑笑á án-ne問講。
「Ah, 是tó一個？....總講一句，tsit-má ê台灣青年是實數ê款，每一個看起來lóng是除會盡ê面tshiuⁿ，m̄-koh，實際上真困難除盡。」
「Tsit-má ê少年人確實變à。」
「內心ê不安kah搖動真嚴重，雖然tùi in ê面看bē出。」
「不安kah憂鬱是青年ê病。人生ê年歲中間，青年期是siōng無健康ê時期，雖然這kah-ná是逆向ê講法....」
「生理上有可能是án-ne，m̄-koh, 先生年輕ê時tsūn kah tsit-má ê情形無仝。Hit時是資本主義興起ê時期，對未來有光明ê希望kah期待。Á tsit-má neh....咱對現實ê問題一屑á辦法都無，kan-taⁿ苦悶，無夢想，無ǹg望。」
郭萬春消瘦ê面容iáu殘留蒼白ê微笑，m̄-koh，薄板ê額頭浮出一條粗粗動肝火ê筋，顯示出對現實非常不滿ê款式。清文想beh壓制伊ê激動，冷靜對伊回應。
「Tio̍h koh khah苦悶tsiah ē-sái。」
「Án-ne kám iáu無夠額？Tio̍h koh khah....」
郭萬春對清文所講刻薄ê話真oh得理解，suah感覺起gāng。
「咱tio̍h會án怎koh khah苦悶？台灣青年起初學日語真辛苦，然後....」
「你ê日語kám m̄是真liú掠à？」
清文用小khóa khau洗ê話氣講，m̄-koh, 郭萬春心內充滿熱情，無感覺受tio̍h小khóa khau洗。
「然後是升學ê困難，咱tio̍h經過比日本學生koh khah困難ê升學過程。Án-ne真無簡單畢業了後，就業mā會tú-tio̍h真tsē窒礙。Án-ne ná會bē患tio̍h不安ê病症？」
「所以，我講lín ê病iáu輕，tio̍h koh khah重病tsiah好，án-ne tsiah會思考死亡ê問題。」
「Bē了解，我bē明白。」
郭萬春ê目神小khóa嚴肅起來，伊ê視線tùi清文移到邊á ê游德仁，講：「你kám明白？」游德仁無法度回答，koh kā論點移到清文。清文kah-ná對郭萬春所講ê話聽kah真明白，用洋洋得意m̄-koh無熱心ê語氣「ngh-ngh」回答。總是，因為tsit位青年ê想法siuⁿ過偏差，hō͘ 伊suah無講bē-sái得。
「用腳頭u想mā知，物質ê充足kah社會條件ê安定是siōng根本ê問題，m̄-koh, 雖然是án-ne, 若認為物資ê尾溜有帶精神，he是大錯誤。Kan-taⁿ靠社會ê物資條件beh來解決人間ê痛苦kah不安是無tshái工，我感覺lín siuⁿ過注重物質。若用杯á當做物件，心當做是注入其中ê水來做譬喻。杯á ê形狀若歪斜無正，水ê形狀mā會tòe-teh歪斜。因此，水m̄是tùi形狀來成做水，是在tī水本來ê味，tio̍h新鮮，bē-sái濁濁（lô-ta̍k）。近來少年人ê煩惱，看起來kah-ná真深刻，其實非常單純。苦惱是片面ê，真正煩惱、不安á是懷疑，m̄是lín所體會ê niā-niā。生來to̍h有ê苦惱是經過內在ê孕育產生ê，m̄-koh, lín中間有啥物？當然，台灣今á日面對ê是大過渡時期，傳統kah-ná tshit-thô物á受破壞，lín因為án-ne起混亂來煩惱。M̄-koh, tùi我ê目tsiu來看m̄是án-ne。咱無氣力來預防傳統kah歷史ê崩盤，beh kā它毀壞來重建，卻無夠額ê健康koh明朗ê精神，kan-taⁿ tòa hia哭痛nga̍uh-nga̍uh念，kám m̄是？想beh做koh無辦法做出來，tsit種政治上受壓制ê tāi-tsì重複講kui百遍mā無啥物結果，不如虛心來處理—當然m̄是嘴講講leh to̍h有效—tio̍h kā心當做一張白紙，試做看māi。Tsit-má m̄是拒絕殖民地ê條件kah制壓ê時tsūn，咱tio̍h會記得koh khah充實家己。自到taⁿ咱lóng一直想beh得tio̍h物質，若是無夠額，就知影用機巧ê方向去奪取。低牆就peh過去，koân牆就se̍h過去，咱lóng實在知影好好á活落去ê方法，總是過一個會得過to̍h好ê生活，lóng m̄是徹底ê痛苦，因為無付出ê困難，無奉獻ê痛苦。咱tio̍h tī物質tik kah精神tik lóng khiā tī「付出kah接受」（give and take）ê原則。想看到taⁿ咱有對日本付出啥物，kám是一千萬石ê米á是十五億萬斤ê砂糖？—he只不過是台灣ê大自然kah土地ê產物，咱tio̍h加上koh khah豐富ê物件tsiah好。台灣kah台灣人已經行到tsit-ê地步。」
清文已經kah少年時代無仝，最近真少kā激烈ê精神表現出來，今á日卻kā語言熱情lóng拚拚出來。連郭萬春mā無應半句話，對伊ê話ē-tàng一一反駁，m̄-koh全體來講，陳清文高深ê人道精神，伊有被壓倒ê感覺。
安子入來客廳。
郭萬春kah游德仁經過紹介，就向陳夫人請安，ta̍k人lóng講有tāi-tsì就離開。
「來今á日顯然講了長篇大論ê話。」
安子看tio̍h清文phīⁿ-phēⁿ喘koh滿面全汗，用巾á teh拭面，就án-ne對伊講。
「對少年人說教，我已經有歲à。」
「我tú-tsiah tú-tio̍h瑞文，聽講別人對郭萬春ê批評無啥好。」
「He是，án怎講leh？」
「聽講伊tī前ê公司煽動工人，所以hō͘ 人辭頭路。」
郭萬春有過tsit-ê情形，清文起初to̍h知。M̄-koh, he是伊看出hit-ê公司ê經營結構kah制度中有矛盾kah弊病，伊tsiah採用煽動ê手段來要求改善。Á伊對清文無仝ê創業精神有興趣kah熱心，beh來盡力效力。伊ê想法確實有khah偏向一pêng，只要清文家己ê做法四正，對雇用郭萬春就免啥掛慮。
「Hō͘ 伊做看māi，若無好tsiah kā伊辭頭路。」
清文對安子án-ne講，語氣顯出伊自信bē發生hit款tāi-tsì。
「總是，伊傾向做tāi-tsì大手筆，像講這....」
清文指（kí）設計藍圖，向安子說明安置三條生產線機械ê工場設計。伊本來to̍h無想beh消極做事業，所以對郭萬春ê積極態度並無感覺無適當。M̄-koh, 安子想講若大規模開始suah龍頭蛇尾來結束，不如腳踏實地來做。
「若是景文mā出資做伙來做to̍h另外一回事。」
「若伊來合資to̍h無仝，到時會有一隻銀牛連厝門都tsiⁿ bē入來。」清文án-ne諷刺講。
「景文家己mā有想beh參加投資，我最近有聽tio̍h tsit-ê風聲。」
「啥物？奇怪ê人，伊bat極力阻擋我neh。」
景文tī籌備會改變心意，tńg去了後koh忠告，hit款勸解伊停止創業ê態度，清文想tio̍h hit暗ê情景就bē爽快，景文tsit-ê tsa-po͘人ê心理到底是án怎？真正hō͘ 人sa無寮á門，有夠複雜。
「伊是án怎講leh？」
「Oh, 我mā無啥清楚，m̄-koh....。伊想講阿兄kā伊誤解....，kah-ná心頭gāi-gio̍h gāi-gio̍h。」
「伊kám會掛意tsit項事？」
「M̄知án怎，伊今á日無元氣，看起來小khóa衰弱，頭lê-lê kah-ná teh想啥物tāi-tsì....伊一向m̄是án-ne, 而且玉簾tú-tú生gín-á ā....」
安子mā感覺真奇怪，她繼續koh講：「玉簾生tsa-po͘ gín-á neh。」
「Án-ne真好！聽講非常o͘h生ê款。」
「Ngh, 嬰á真細漢，hō͘ 人真煩惱m̄知飼會大項bē。」
「玉簾mā iáu未到無ài生gín-á ê年歲，kám m̄是？」
清文忽然想起玉簾hit暗吊tāu自殺ê tāi-tsì án-ne講，內心tshiak一下ǹg安子ê方向看。安子mā想起tsit項事，若是玉簾無kā hit暗想beh隱瞞ê tāi-tsì向清文講，而且這有可能是景文今á日憂鬱ê原因。Hit件事有去鑿tio̍h景文做人心底ê痛，koh因為án-ne, 玉簾若是ē-tàng加減維持in夫婦中間ê感情....án-ne, 情勢to̍h會khah好。
清文可能mā有án-ne teh想，加上忽然間兩人ê視線交接，安子想講in翁對hit暗ê事件mā有感觸tī-.teh。總是，因為見笑tāi m̄-thang對人講，tī叮嚀玉簾tsìn前，tī另外有機會對in翁講tsìn前mā tio̍h保密。
「M̄-koh, 晚年得tio̍h ê kiáⁿ khah可愛kám m̄是？」
「Ngh, 咱若是án-ne to̍h真好，kan-taⁿ一個獨生女有khah孤單。」
「至少清子若是tsa-po͘ to̍h khah好。」
「若是tsa-po͘ , 會親像tú-tsiah hit-ê青年郭萬春，雖然有喜樂，mā會成做煩惱ê因端。總是，因為咱無tsa-po͘ kiáⁿ, 早慢tio̍h搬出tsit-ê家。」
「Ngh, 咱來tī郊外起一間siap-tia̍p ê厝....我有teh考慮清子ê將來。」
「Ngh....」清文忽然感慨萬千，雙手交叉tī胸前，講：「我想起咱結婚hit當時，hit時我想beh搬出tsit-ê厝，你執意tsit-ê家庭無beh搬離開，tsit-má, 你顛倒....」
清文m̄是針對in bó͘ ê想法改變來不滿，是因為時代ê變遷有所感慨tsiah án-ne講。M̄是安子ê心有改變，是in夫婦兩人kah家族ê必然變化來引起ê。
「Hit時，咱sa無tsáng是山á是海，想講若離開陳家會變成流浪漢。Tsit-má to̍h無仝款，你我結合kah真密切，kah陳家ê人mā是án-ne。....咱mā和睦做伙，無論去到tó位lóng bē迷失。....今後kan-taⁿ tshun清子ê tāi-tsì需要咱操心。」
「Ngh, 清子ê tāi-tsì....」清文ê面露出陰暗ê影。
「有一點á拋一大liàn koh tńg來到原所在ê感覺。」
「這mā是無辦法。」安子沉重ê聲講。
清子出世帶有台灣人kah日本人ê血統，tùi她ê成長kah環境來講，講她是台灣人khah正確。做人老母ê安子有觀察tio̍h：清子早to̍h對tsit種命運抱tio̍h反感ê意識形態，將來她tī兩種血統ê中間會增加tó一種，是一個大問題。清子若嫁台灣人是siōng正統ê趨勢，tāi-tsì mā會khah簡單。總是，安子teh想講若親像她本人kah清文ê情形，清子mā有可能發生無符合父母意思ê戀愛，所以bē-tàng無設想若她本人無願意嫁hō͘台灣人ê情形。若是án-ne, 一直tòa tī陳家kho͘-á內，將來會成做種種不幸á是災難ê因端。
清文比安子koh khah慎重思考tsit方面ê問題，m̄-koh, 因為最近工作無閒suah bē記得tsit項事。Tsit-má忽然tú-tio̍h比鳳梨事業koh khah微妙ê問題，伊ê心情變kah真奇妙ê沉重。
「不知不覺，她已經是女大當嫁ê時tsūn。」
「她若是tsa-po͘ gín-á, 咱to̍h ē-tàng減少tsit-ê操心，m̄-koh....」
「分家伙ê tāi-tsì, 我tsiah koh kah老母參詳一下。」
「無lah, 我並無急。我是看tio̍h玉簾ê嬰á，tsiah忽然想起將來ê tāi-tsì。」
