《陳雷文選》

 | | | 轉寄

美麗ê樟腦林

作者 陳雷 2006.02.19

一
Hit個烏肥ê阿澤是研究森林ê人。台大畢業作兵了，hō͘人派去阿里山森林管理實驗場作管理員。伊人tiau直，kap人koh好作伙，lak袋á若有幾kho͘銀，tō招人去食kap lim，開了了。Hit個樟腦林管理組ê下底，有五、六個退伍兵老芋á，伊mā常常請in去食。特別是hit個白ê，食了知滋味，看伊領錢ê日tō來招伊，若像是伊ê好兄弟。看tio̍h伊，tō笑hi hi；肩胛頭kā搭leh，叫伊「老郭」。

In幾個常常去食ê，tō是實驗場山腳一間叫作日月閣ê小菜店。Hit個日月閣tú好tī林場落去bē到半點鐘ê山路彎過去ê所在，kap一間新春旅社、一間kám á店作夥。日頭beh落山ê時陣，四、五個tō落來，對tio̍h西照日ná走ná唱歌。Hit個禿頭趙ê對日月閣ê小姐秀鸞上有意思，lóng走tī頭前，先入去店內面tshuē秀鸞lô-so。Hit個白ê愛食，對阿澤tuè tiâu tiâu，笑話kap粗話一直講。

「…我家鄉的姑娘呀…老郭…意思就不同…」想beh huāⁿ郭ê肩頭…m̄-koh白ê人é，才五尺kuân，huāⁿ bē好勢，山路koh落kiā，差一sut á pua̍h倒。

菜店ê頭家娘看in來，hâ一條花裙來迎接。搬椅á出來，大聲叫：「秀鸞a！」

菜店內面清清無別人，兩pha電火暗sàm暗sàm，內面秀鸞有聽tio̍h頭家娘teh叫，拖一雙木屐搖leh搖leh出來…he秀鸞看起來mā khah無二十歲，身軀肥水a肥水，面圓圓，無抹胭脂mā是bái suí a bái suí…hit個趙ê上蓋愛秀鸞ê肩胛頭，伊若穿無手ńg ê衫，兩個肩胛頭白白、圓圓、幼幼，趙ê手tō食豆腐，tsia摸hia摸，不sù鬼。

Hit個秀鸞是山裡出來ê，鼻kuân kuân，目睭lô lô，酒koh上gâu lim。伊對趙ê無啥物特別ê sa-bi-suh，m̄-koh對烏肥ê阿澤上蓋親切。阿澤若lim無了ê bí-luh，伊khah tsē mā替伊lim去，這點趙ê心肝內上bē爽快。

M̄-koh今á日大家酒lóng lim kah足歡喜。菜出無一半趙ê tō開始teh醉，叫秀鸞「我ê親親心肝…」，tsia摸hia摸，桌á頂ê bi-luh tshia tshia倒…。白ê kap另外一個陳工友beh lim酒，專門食菜，兩個人半隻白切雞食了了。頭家娘看阿澤無啥lim酒，phâng一尾紅燒鯽á魚kap一干高梁，來kā伊灌酒。

「今天呀，我說呀，老郭…，咱老趙害的是呀…不得了的相思病加上鄉思病…」

Hit個白ê gia̍h一雙箸，指伊ê面講…趙ê醉醉，聽tio̍h白ê講啥物相思病、鄉思病，一雙箸tuà伊面頭前指來指去。Suah一時認真起來，想tio̍h今á日食老a，山東ê故鄉kap伊ê某幾十年lóng無消息…suah beh哭beh哭，坐tuà椅á頂，目睭gōng-gōng一直看秀鸞，若像雄雄khong去án-ne。

五個人食了轉來ê時陣，月娘已經出來真kuân ah。規個山路hō͘月光照kah青青白白，像溪水洗過án-ne。趙ê hō͘陳工友半拖半行，沿路吐兩擺才轉來到宿舍。

二 隔轉日天iáu未光，阿澤tō起來。伊上愛一個人透早行山路。He林場ê山路tī日頭出來以前lóng tah霧，有時像tī雲海內面。阿澤上愛一個人走去山路上kuân ê所在，等日頭按山後壁出來。He peh起來ê日頭bih tī霧ê後面，若像電火照tio̍h báng tà。山內ê水氣像雲án-ne飛出來，樹林內幾luā種ê芳味若像花teh開。

等伊行來到東旁ê林場ê時陣，天已經足光。He東旁ê林場是一片足大ê樟腦林，一直透到三腳山ê後壁去。而且lú入去，he樹林lú老。Tī三腳山有足tsē大樟腦樹，看起來差不多lóng有一、二百年以上。

He樟腦樹葉á頂khuân一iân薄薄ê霜，hō͘日頭照leh tō無去a。葉á頂青青青，像玉á ê面。阿澤看he細欉樟腦樹ê芽、puh kah tsiâu tsiâu是，tō tuà簿á頂作一個記號，koh鼻hit個葉á puh出來ê味、koh tuà簿á頂拍一個圓kho͘ á。

Án-ne無îng kah二點外鐘，才lóng總檢查了。看起來這片新ê樟腦林狀況真好，伊才離開hit個所在。M̄-koh心內掛意三腳山ê樟腦林，bē放心。因為二禮拜前，tī hia若像有人偷tshò柴。伊走入小山路，行beh一點鐘，才來到三腳山。

山腳近小路所在ê樟腦林已經hō͘人tshò一片光光，iáu有一kuá大樹倒tī hia，iáu未搬走。阿澤看看leh，tshò去ê所在大概有二十幾甲，確定是有人teh偷林。詳細ê狀況記tuà簿á內，趕緊沿路走轉來實驗所。

伊決定beh作一個報告，kā偷林ê代誌正式報告hō͘閻所長知。叫白ê馬上the̍h報告紙來，詳詳細細tò teh填寫。Hit個白ê看伊teh寫報告，七問八問，知影是三腳山ê代誌hō͘伊發現，趕緊來趙ê宿舍kā伊通知。趙ê聽一下驚一tiô，昨暝ê酒lóng醒了了。想講這個新來ê台灣少年人，平時hō͘伊食秀鸞ê醋，tsit-má koh m̄知天地幾斤重，beh作報告，拍pháiⁿ伊kap大家ê飯碗，實在無想辦法kā修理bē sái。Hit暗tō去閻所長ê所在參詳。

三
Pê龍船ê前一日，阿澤tī台北監獄內面透早tō hō͘人掠出去。兩個sán猴兵á kā伊押出來監獄ê後壁埕。Hit陣tú好天beh光，天一旁烏ê，一旁微微á紅huá紅huá｡阿澤thǹg赤腳，踏tio̍h露水lóng會冷。Hit兩個sán猴兵á，一旁一個，kā伊押來壁邊khiā leh。He埕一片足大，koh無啥物物件，kan-taⁿ一枝thiâu á tī中央，過一目nih á，koh一隊兵á出來，lóng戴帽á phāiⁿ槍，tsàm腳步來到埕ê中央。兵á隊ê後壁tuè一個穿白衫ê人。Hit個人看起來koh少年少年，kap阿澤beh仝旁歲，剃光頭，雙手也無pa̍k leh。

等伊行到thiāu á前khiā好，有一個人huah號令，he聲kuân kah ló-ló長，若像狗teh吹風螺。「準備！…」「瞄…準…！」，「開槍！…」。Hit六個兵á khiā直直，槍gia̍h起來tō kā彈落去。阿澤聽he槍聲pin-pin pòng-pòng，目睭liap leh，hit個犯人tō倒落去，身軀tuà土腳tsùn兩下，tō死去a，無koh tín動。

Hit兩個兵á笑leh笑leh，koh kā阿澤押入來監獄內面。Hit陣tú好天khah光a，監獄內ê走廊一步一步有看leh行。阿澤ná行ná想，hit個槍殺ê是啥物人？

續leh hō͘人tshuā入來一間細細間ê房間，四個lah-sap ê壁kap一tè桌á。一個大kho͘有豬哥嘴ê外省刑事坐tī hia teh等伊。阿澤看hit個豬哥嘴ê，腳手軟一半。伊會記得頂禮拜tō是這位豬哥嘴ê kā伊修理，規身軀hō͘伊用拐á kòng kah腫歪歪，bē tín動。

M̄-koh hit個刑事今á日手裡koh無拐á，kan-taⁿ坐tī hia笑leh笑leh。才khiā起來講：「他叫王金水，其實是王金水第二，上個月也有一個王金水。…他媽的！你門台灣人，連名字都不像樣！這個金水，那個金水，都是他媽的金水…」

「今天這個金水，跟你他媽的一樣，不合作…告訴你這臭小子，別跟我耍本事…在這裡，你就是死了十次也無有人理，神不知，鬼不覺。基隆港裡有少他媽的金水？！…」

伊指桌á頂ê幾張宣傳單hō͘阿澤看，lóng是阿共á罵國民黨kap老蔣ê話，大字細字印kah清清楚楚！阿澤看一下驚一tiô，看tio̍h鬼！講是tī伊ê宿舍tshuē出來ê。

Hit個刑事問伊傳單是án-tsuáⁿ來ê，是啥物人hō͘伊ê？阿澤照實講m̄知。問來問去，連一個名to無。起gê siâu，khiā起來。一個兵á kā阿澤ê ām-kún tshui tiâu leh，另外一個手骨掠leh，一枝紅紅ê射tō kā注落。阿澤感覺伊ê手ê肉若像十枝刀teh割，痛kah哀bē出來。續leh頭殼若像火teh燒，像beh爆破；天地倒píng轉，beh吐吐bē出來。Án-ne差不多beh kah十分鐘，才痛kah暈去。

Hit兩個兵á，一個gia̍h頭，一個gia̍h腳，才kā伊kng去來桌á頂，像一隻死豬á倒tī hia。用一桶冷ki ki ê水按頭殼tsâng落去。Hit個阿澤才小khuá精神，兩蕾目睭開起來，tō koh暈去，m̄知人。Hit個兵á牽一條電線，pa̍k tuà伊ê腳ê大頭母。通一個電，阿澤ê身軀tō tsùn一下，精神過來。豬哥嘴ê大聲嚷：「快說！他媽的，這單子是誰拿給你的？…」

阿澤頭殼gông kah烏天暗地，想beh講mā講bē出來。

「他媽的不講！」

「M̄知影。」又koh暈去。Hit個顧腳ê兵á，電tō koh kā通落，阿澤ê身軀大力tsùn一下，koh醒起來。Án-ne問來問去，刑beh kah一點鐘，khah講mā是m̄知。豬哥嘴ê知影無khah tsua̍h，叫兵á kng入去，準suah。

Án-ne頭尾刑beh kah四禮拜，無啥物新資料，khah講mā是m̄知影。Hit個豬哥嘴ê，人叫伊崔情報長，心內mā知，若用藥á問bē出來，tō是無法度a。M̄-kú koh m̄甘願，叫he兵á有tiang時tō kā刑一遍，修理修理。Hit個阿澤，本來人烏肥烏肥，愛講笑，hō͘ in刑kah一kho͘人若死ê，bē講bē笑。規日倒tī土腳，頭殼mo͘h leh，若像teh發童乩。

四
Koh三個月後，阿澤才hō͘人判刑。講是共產份子，判五年有期徒刑。Hit個趙ê告密檢舉有功，賞金五千，白ê賞三千。阿澤坐監iáu未一年，hit片三腳山美麗ê百年樟腦林tō hō͘人tshò了了去a。

(這篇是陳雷ê第一篇台語小說，1986年寫ê。原文刊tī陳芳明主編、tī美國加州出版ê “台灣文化”)