《陳雷文選》

 | | | 轉寄

紅牡丹

作者 陳雷 2008.06.15

以前愛khiā-kuân,uì九份看基隆港ê海岸，hn̄g-hn̄g半個圓，闊闊若畚箕嘴。好天黃昏ê時，海港外口ê龜山，反射著nńg-tsiáⁿ ê西照日，概成一tè變魔術ê大鏡，港--裡ê水tō雄雄反紅若牡丹。Tsit-má罕得khiā-kuân看，因為溢tī心內底，基隆港ê水色永遠tshiⁿ-tsioh若紅牡丹。特別是八堵ê阿婆月梅，hit一日已經親嘴kā我講--過，in去tshuē--伊ê時，港--裡ê水色bē退，mā是紅ki-ki若牡丹。

這個小所在，這日街á e̍h-e̍h,人客tsa̍t-tsa̍t,thài會hn̄g-hn̄g看著我tō叫：「阿美，你來tī tsia？我四界tshuē你無。」Kā看，少年家一個，也無熟悉。Tì帽á,phāiⁿ冊包，學生制服，thài會bat我ê名？「你啥人？」斟酌kā看，生作斯文斯文，koh也緣投，概成面熟面熟。「我俊雄--lah。」「Tshuē我beh創啥？」「你bē記--得-a？」「Bē記得啥？」「今á日3月初8。」「3月初8？…也m̄是我ê生日。」伊hàiⁿ頭，起愛笑：「M̄是生日！」阮khiā kuân-kuân,tshîⁿ基隆港來ê海風，海水光iāⁿ-iāⁿ。Tiām-tiām無講話，一晡久才講：「咱ài來--去-a，in teh等。」我心頭雄雄phok-phok-tshiáng,燒hut-hut發面hông,bē輸大代誌teh beh來--a，我teh作夢。

Uì九份騎o͘-to͘-bái,載伊來到基隆市內，離港口無外hn̄g｡這間食店看--起-來舊舊，門口吊一tè khang-páng｢花井」。入--去，四個少年家teh食麵，攏穿學生制服，kap俊雄仝款。「Ah thài tsín才來？！…時間到--a。」Hit個少年sán-sán lò-lò,人叫伊班長，按呢問。「Ah to teh tshuē阿美。」四個攏uat過來看--我，班長問：「Ah你bē記--得？今á日3月初8。」我問：「敢是恁啥人ê生日？」In hàiⁿ頭，笑kah ha-ha叫：「生日！…生日！…」頭家娘捧麵出--來，細細 漢，看--起-來差不多50外，pa̍k一條頭巾，拖一雙木屐，講一句「I-la-sai」ê日本話，tō koh入--去。我kā看，店內清氣tam-tam，桌á椅á舊舊，無別個人客，kan-na阮幾個。In ná食麵ná開講，hi-hi-ha-ha，有時lām日本話，我聽無。「Heh，班長--a，你想今á日in敢會來？」阿源kap阿宏按呢問，二個講是兄弟á｡班長應：「應該會--lah，今á日好天。…咱等tsiah久--a。」Hit個添--a坐tī上內面，講：「若無來，咱明年才koh來。」大家koh kā我看，概成teh問我，明年敢beh koh來？Liâm-mi麵食了，in 5個唱歌，日本歌我聽無。頭家娘出來kap大家唱，歡喜唱幾luā條。唱suah，huah一聲「ban-tsái｣，tō是日本話「萬歲」ê意思。Koh捧燒茶出來大家lim。班長講：「頭家娘，真多謝，ta̍k擺攏來tsak-tsō--你。」

這時雄雄外口pin-pin-piàng-piàng teh放炮，連續幾luā聲。班長講：「來--去，時間到--a。」大家khiā--起-來，冊包phāiⁿ--leh，帽á tì好，準備beh出--去。我mā tuè in起--來。俊雄講：「阿美，你tsia等，千萬m̄通出--去，我liâm-mi轉--來。」Hit個班長，手伸--來kā我at手：「美--a，多謝--你。」這時看著伊手tê á心烏烏一個khî,概成會痛。添--a，阿源、阿宏攏來kā我at手，講：「多謝你去通知。」奇怪，ta̍k個手tê á心攏烏烏一大個khî｡想beh問，外口又koh炮á聲pin-pin piàng-piàng｡班長開門、五個作一伙一步踏--出-去，外口日頭光iāⁿ-iāⁿ。

Khiā門口看，街á路無人也無車，港口hit旁炮聲pi-pi po̍k-po̍k,lú來lú tsia̍p,m̄知是teh鬧熱啥？我看in五個人行去到路頭，一隻tho͘-la-khuh uì十字路口uat--出-來。五、六個兵á uì車頂跳--落-來，攏gia̍h槍，m̄知teh嚷啥，kā in包圍。雄雄in攏跪--落-去，雙手gia̍h kuân-kuân｡一下koh一下，he兵á用槍拐kā in摃，mau頭殼，mau身軀。我有看著俊雄kap班長代先倒--落-去。想beh tsông出去kā看，頭家娘kā我giú--leh，講：「你m̄通出--去！外口teh亂。」 我講：「兵á teh拍人！」伊講：「街路危險！你tuà tsia等。」Kā門tshuàⁿ--起-來。我uì門縫看，tho͘-la-khuh tú好uat角tō無看見--a。炮á聲又koh pin-pin pòng-pòng｡「今á日啥物代誌，thài會炮--a放tsiah tsē?」頭家娘kā我giú入去店內底坐，thîn一au燒茶，tī我身邊細聲講：「M̄是放炮，…兵á teh tuāⁿ槍。」「兵á是按怎tuāⁿ槍？」伊無應。我看伊目睭仁霧霧，若虱目魚無tshiⁿ冰koh冷ki-ki。過一時á才講：「你m̄免驚，liâm-mi tō會suah。」我起驚，身軀ka-冷-sún,phi̍h-phi̍h-tsùn｡外口啥物大代誌？兵á thài掠in去？In犯啥物罪，作啥物pháiⁿ代誌？…「你m̄免煩惱，in無作pháiⁿ代誌，…了tō會轉--來，你tsia等。」我tuà hia等，外口槍聲若29暝ê炮放bē suah。一聲一聲，有時緊有時慢，有時相連續，ti-ti ta̍k-ta̍k,bē輸連環炮，tō是機關槍ê聲。代先uì港口hit旁來，過--來四kho͘圍攏有，lú來lú uá｡M̄知經過外久，我等kah驚koh siān,tsàn bē tiâu tuh-ku--去。M̄知睏外久，作一個惡夢，khia tī海邊港腳散步，in五個人，一條鐵鍊tn̂g-tn̂g pa̍k作伙，uì in手tê á心kǹg--過，…班長作頭前，俊雄作上尾，…兵á teh tuāⁿ槍。…一堆一堆人倒--落-去，tàn落去港--裡，水色紅ki-ki......。一粒槍tsí tuāⁿ走精，pōng著我ê胸坎，驚一下精神過--來。槍聲pin-piag3叫，概成tō tī門口。雄雄pông--一-下門拍開，一個人tsông--入-來，tō是俊雄！規身軀tâm lok-lok，bē輸pua̍h落海--裡tú-tsiah ko͘--起-來-ê｡「美--a！你緊去！緊去阮tau kā阮pâ通知！」一張紙tu hō͘我，手冷ki-ki，血teh tin。我掠伊ê手，píng過來看，二個手tê á心攏kǹg一空，血teh流。「Ah是啥物代誌？…俊雄！是啥物代誌？！」頭gia̍h--起-來，伊人已經無--去-a。

頭家娘thó͘一個氣，講：「又koh等無--lah。」「等啥無？」「等厝--裡ê人無來。」「厝--裡ê人來創啥？」「來tshuā in轉--去。」「In tī tó?」「基隆港ê海--裡。…Ta̍k年3月初8攏tī hia teh等。」我猶m̄啥知影伊ê意思，這時伊講：「你taⁿ好轉--去-a。」店門拍開，外口好天出大日，光iāⁿ-iāⁿ，槍聲攏無，m̄知tiām去外久--a。路--裡人客來人客去，自由自在，有講有笑，又koh鬧熱tshih-tshih。

O͘-to͘-bái騎轉來到厝，姊--a看著我，青狂giú--leh tō huah：「美--a！你走去tó位？！」「我去食麵。」「食麵？！…大家攏teh tshuē你無。」「Tī港口hia。」「港口hia？…你食啥麵，四工無看人？」「四工？…我食一碗u-lóng,lim一au茶，…」伊ngē講我uì 3月初8下晡去九份了tō無看人，四暝四日無轉--來。阿pa去派出所報失蹤。

姊--a受氣m̄信，我mā受氣m̄信。O͘-to͘-bái載--leh，去港口tshuē hit tsuā路。頭尾se̍h 3、4遍、tshuē無hit間“花井”。明明tō是uá十字路口khah過--去hit間，thài會吊一tè khang-páng｢林森老茶行」？M̄信入去問，頭家講：「無--neh，咱tsia無一間食店叫作“花井”。」「Teh賣u-lóng--ê｡」「無--lah，阮tī tsia足久--a，m̄ bat聽講--過。」伊問坐tī店後面hit個老歲á:「阿pa，咱tsia敢有一間賣u-lóng--ê,叫作“花井”？」老歲á想想--leh，講：「有--lah。」掠我tsin-tsin看，問：「小姐，你tshuē“花井”beh創啥？」「阿伯，是tó一間？」伊薰炊gia̍h--起-來，桌á kho̍k--一-下，講：「Tō是這間--lah。」「這間？！…」「足久--a，你thài會知影？」「阿伯，外久--a？」「60冬--a-lah。」講hit年228了後無外久，“花井”頭家娘過身--去，伊kā店買--過-來。

害我hit暗睏bē去，敢是我神經teh亂想？M̄-kú明明手--裡這張白紙寫烏字。清清楚楚會記--得，伊手tê á心kǹg一空，血teh流，kā我請求：「美--a！你緊去！緊去阮tau kā阮pâ通知。」

Tse tō是我ê責任。隔轉日我騎o͘-to͘-bái去八堵，tshuē著大路邊一間二tsàn樓ê舊厝，店口teh賣冰。「小姐，食冰來。」查某人好禮kā我招呼。「借問，恁tsia敢有一個俊雄？」「無--neh，阮tsia無人叫俊雄。」「Tī基隆teh讀高中。」「無--neh。」伊hàiⁿ頭：「阮無gín-á tī基隆讀冊。」過--來小khuá bē放心，才koh問：「敢有啥物代誌？」這時店後面一個阿婆ná thōng--出-來，khiau-ku gia̍h一枝拐á,頭毛攏白--ê,疏疏tshun無幾枝。「阿母，這個小姐teh問，咱tsia敢有人叫作俊雄，tī基隆讀高中。」查某人驚阿婆聽無，大聲問。老阿婆行uá--來，khiā直--起-來，面hiàⁿ-hiàⁿ tsheⁿ-tsin kā我tsinⁿ，一晡久才講：「你thài bat阮俊雄？」我緊應：「阿ḿ,伊叫我來。」

伊伸手來摸我ê身軀、我ê面，概成teh檢查，看我是m̄是真--ê｡牽我入去店後面，一間房間細細間，暗暗一隻桌á,一條柴眠床。「阮俊--a叫你來？」我tìm頭，kā tī港口食麵ê經過講hō͘伊聽。外面teh放炮，伊kap四個同學出--去，tī十字路口hō͘兵á掠--去，用tho͘-la-khuh載--去，…「敢是hit間“花井”？」我驚一tiô,伊thài會知影？「敢是3月初8 hit下晡？」我直直tìm頭，心肝pok-pok siak。「下晡時á,槍直直tuāⁿ，bē輸29暝炮á放bē suah。」伊目睭kheh kheh，m̄知是teh拜拜，抑是teh祈禱，suh一個大khuì,uì thuah á底tshuē一張相片出--來，細細張足舊--a，色退kah黃黃，koh有tsiù空。Kā看，一個斯文緣投ê少年家，頭鬃té-té,穿學生制服，微微á笑，tō是俊雄。「阿ḿ,tō是伊--lah。」

伊雄雄sa我ê手tê,叫我眠床頭坐，嘴念：「Kap阿美講--ê攏仝款。」「阿美？」伊ná知影我ê名？「俊雄ê查某朋友。」「伊有來kā恁通知？」阿婆tìm頭：「足勇--ê,18歲查某gín-á家己一個，uì基隆m̄驚死，拚命偷走來到八堵，kā阮pâ通知。阮才知影。」

Hit陣已經四日後--a，兵á已經uì八堵、七堵經過，少年--ê thâi死足tsē,講咱八堵ê人bat kā in攻擊，刁治故beh教示。阮阿pa聽人風聲，真tsē thâi了tàn tī基隆港。尾--a招阮阿叔，偷走去基隆港tshuē,無hō͘阮母--a知。He中國兵á顧港口，m̄ hō͘ in過，錢、手錶攏pak hō͘ in，才放in去tshuē｡坐細隻船á,港內、港外kho̍k- kho̍k se̍h,碰--著tō kā píng過來看，有ê家己一個浮，有ê三個、五個浮作伙，手tê á鐵線kǹg作一kuāⁿ，分bē開。…有ê hīⁿ á､pīⁿ á 割無--去，認bē出--來。…「Hit日，港--裡ê海水照著西照日，紅ki-ki若牡丹。」阿婆按呢講。「Tshuē無？」「無--lah，尾--a koh去二擺，攏tshuē無。」

Tō是in五個學生tī十字路口hō͘兵á掠去了後，載去港口，手心kǹg鐵線pa̍k作伙，掃射tuāⁿ死，身屍tàn tī基隆港--裡，無koh再tshuē--著。Tse我已經攏知影，因為“花井” ê頭家娘hit日有kā我講，in ta̍k年這日攏轉來tī hia，tī港--裡ê海水等。今年60冬--a，又koh等無，明年ài koh再來。伊mā有kā我請求：「美--a，你緊去！緊去kā in pâ通知。」講suah，阿婆牽我ê手，細聲問：「美--a，tsiah久--a，你tsit-má轉--來，koh kā我講tsia ê代誌，是beh創啥是--無？」Kā我手tê á gīm ân-ân,m̄甘心放hō͘去，概成giú tiâu--leh通好會記--得，hō͘伊一個問答。

我kā阿婆說多謝，離開冰店，無kā伊講，也無kā in規家人講，in猶teh等。講bē出嘴，因為見若3月8日下晡，uá黃昏西照日ê時，基隆港ê水色無張無持變作紅ki-ki若牡丹。

(2007年3月，紀念228屠殺60年寫。)