《陳雷文選》

 | | | 轉寄

Kíng婚

作者 陳雷 2006.05.28

高友通校長ê三個查某kiáⁿ tō是大漢ê碧玉生作上suí，身材kuân koh lò，皮肉白koh幼，看起來秀氣koh高尚，bē輸美國電影名星Grace Kelly。讀台大護理系ê時，少年家á 不時tuè一大陣tī kha-tshng 尾，hō͘伊ê老母操心。畢業了後，留tī台大病院精神科作護士，mā是常常有醫學院ê學生來追求。但是m̄知啥物緣故，交來交去到taⁿ iáu未有圓滿ê選擇。有人批評，講suí查某gín-á 目睭生kuân kuân tī hiâ-á 頂，siuⁿ gâu kíng 挑。M-ā有人宣傳講，這個suí查某gín-á 脾氣bái ，有一個特別ê 怪癖。到底內容是怎樣，事實無人知影。

最近也鶴阿姨介紹這位林博士ê時，碧玉ê老母bē放心，有特別kā伊吩咐：“查甫gín-á 若是kan-na愛看外觀ê，不如hit款重感情ê。”這句話碧玉有記tī心內，不而過，伊bē曉beh按怎分別，啥款是愛看外觀ê。啥款是重感情ê人。

這位林先生是電腦工程師兼太空工程ê雙料博士，tī中央研究院作研究員。對碧玉會使講是見面tō合意，一看隨有情，不時按南港駛車來約會伊。碧玉看伊有學問，生作有人緣，見面koh有話講，對伊印象mā是bē bái 。按呢二人來往，經過2、3個月，漸漸lú會投機。M̄-kú碧玉心內會記得老母hit句話，若是kan-na愛看外觀ê。不如hit款重感情ê。因為伊m̄知影，這位博士到底是重感情ê抑是看外觀ê人，所以pak內ê情意m̄敢hē深落去，恐驚koh再來失敗。

按呢經過一個春天，to也一切順是。熱人來了後，博士才開始注意著一項龜怪ê代誌，概成這個碧玉有一個怪僻，不管好天pháiⁿ天，見面一定攏是穿長ńg ê衫。代先無特別kā張持，想講大概是女性愛suí，tuè時裝流行ê關係。尾a大熱起來，人teh 時行短ńg ê，伊mā是流大粒汗穿長ńg 。博士想beh kā問，koh驚pháiⁿ勢失禮。這個疑問想來想去，lú想lú無，suah放bē 落去，khǹg tī頭殼內，lú ká lú大giâ，親像tú著一個科學工程ê大難題，暝日思考，想無一個tú好ê答案。

尾a想kah無步，去請教伊ê阿姊，關於碧玉穿衫ê代誌，講hō͘阿姊聽。有影查某人ê心理阿姊khah內行，伊講：“Suah m̄知，查某gín-á愛suí，驚大日皮肉phak烏去。”博士講：“烏陰天無日，伊mā是穿長ê。”阿姊講：“定著是體質lám ，驚畏寒。”博士講：“好天出大日，流大粒汗mā是穿長ê。”阿姊講：“無tō是伊人khah保守，pháiⁿ勢穿短ê hō͘人看。”博士講：“這陣攏穿迷你裙，一雙腿suí噹噹。”阿姊hō͘伊應kah無話，想beh講：“Ah無…敢會是…”uá來博士耳á邊nauh一kuāⁿ 細聲話，博士suh一下khuì，吞一嘴nuāⁿ，大聲喝：“莫怪！莫怪！”目頭結一結，問：“Taⁿ beh按怎？”阿姊講，按呢生…按呢生…。

Tshuā小弟去se̍h百貨公司看查某人ê suí衫。Kíng 一領意大名牌「無啥錢 」（Versace）ê時裝，一su 3萬kho͘，長裙無ńg ，規套是半暝暗天ê烏色，tshap台灣海峽深海ê khóng 色，樸素簡單，高尚飄撇。包裝好勢，專工親身mo͘h去送碧玉。Kā伊講：“後禮拜你ê生日，這su衫我特別親手kíng 送你，Happy birthday！”碧玉足歡喜，講：“我生日穿這領hō͘你看。”約hit工tiàm開開大飯店跳舞慶祝。

這日博士先來tī開開飯店等。頭殼內一直想hit領衫。這個熱人以來ê疑問，今á 日tō beh有答案，緊張kah手tê á流tshìn汗。雄雄聽著鳥á唱歌碧玉ê聲：“你看這領好看--無？”Gia̍h頭一看，正正khiā tī面頭前，he碧玉笑微微，一身「無啥錢」ê洋裝，暗天ê烏色tshap深海ê孔色，胸前pín一支鑽石花ê pín針，bē輸天頂ê星粒，閃閃sih sih，hō͘伊頭目醉醉。詳細kā看，bē活lah，thài會又koh是長ńg ê!無看he皮肉!原來頂面koh再tha̍h一領，mā是烏色lām孔色。著驚koh失望，一時m̄知beh按怎應伊。目睭直直kā tsîn，按頭相到腳，按腳相到頭，bē輸teh看thǹg光無穿衫ê mo͘h-te-luh（model），thuh 一晡，用手指：“你…你tha̍h這領bē siuⁿ熱？”

Liâm-mi he舞廳放lo͘-man-tit-khuh ê音樂，溫柔ê uah-lu-tsuh，藍色ê多惱河。博士好禮請碧玉跳舞。碧玉peh起來，khiā tī伊面前，雙手liâu-liâu-a kā長ńg ê衫一紐一紐tháu開，作一下攏總thǹg掉去。僥倖--oh，你看！內面攏無別領，kan-na tshun hit su「無啥錢」ê洋裝，長裙無ńg ，頭到腳是烏色lām 孔色ê絲á ，規身是白粉幼棉棉ê皮肉，伊tō是kuân天大海teh飛ê天鵝，夢中妄想ê仙女下降…這時這個開開大飯店高貴ê場所，所有ê人客攏ua̍t頭過來，因為in m̄-bat看過tsiah-nih豔麗ê美女，tsiah-nih肉感ê身材，穿tsiah-nih高尚飄撇ê suí衫。Bē輸tī hit個當時，tī hit個地點，hit個夢想ê美國電影名星Grace Kelly雄雄親身來出現。規場tiām tsiuh-tsiuh，kan-na lo͘-man-ti-khuh ê 音樂，溫柔ê uah-lu-tsuh，藍色ê多惱河細聲細聲teh tân…

但是tse iáⁿ目ê光彩kap o-ló ê美麗伊有看見若無看見，有聽著若無聽著。因為伊kan-na注意著he bô͘-ńg暴露ê手，有一tsuā紅貢貢ê khì，按白白白ê肩胛頭直直直thàng落來到手khiau。粗pê pê，ló-ló長，一phòng一naih，bē輸一kuāⁿ 灌好ê生腌腸。Tshuah一tiô，指hit個khî:“Tse…tse是啥？”碧玉笑笑á應：“Tse oh？…tse我細漢騎車puah倒lòng著，thīⁿ足tsē針。”“Ah…ah thài tsiah粗tsiah大tsuā?bē輸…bē 輸…”“Bē輸蛇？…無m̄ tio̍h，tse叫作蛇khî。”“蛇？！”博士一世人上驚蛇，退一步，ná驚ná看，ai-ioh-uê，成實電火腳規隻koh會tín動，像蛇teh sô。“Ah…Ah thài m̄ kā割掉？”“割bē掉，醫生講，割掉koh發出來也是仝款，lú割lú 大隻。”

慘--ah，慘--ah，明明是神明teh創治伊。這個 áⁿ tī身邊跳舞ê碧玉，變作一個身軀生蛇ê美女。Koh驚koh愛，taⁿ是beh按怎好？是beh抑是m̄?是好抑是m̄好？頭殼gông tshia-tshia，bē輸土腳頂ua-lu-tsuh ê腳步， lin-long-seh，一時bē tàng決定。He真久khǹg tī心內ê一件事，本來tī這工生日beh kā伊求婚ê話，that tī nâ喉頭，suah講bē出來。

隔日去tshuē阿姊，kā碧玉穿suí衫手生蛇ê代誌講hō͘阿姊聽。阿姊講：“我早tō知！定著是，pháiⁿ物暗khàm，siàⁿ-siàⁿ hō͘我講--tio̍h!”目睭tsiah大kòng，大聲問：“Iáu-koh有啥？”博士驚一tiô ，Iáu-koh有？！阿姊講：“規身軀別位iáu有生啥？”博士講：“看會著ê tō是一隻niā-niā。”阿姊罵伊：“你娶某kap買車仝款，一項to bē使馬虎，看會tio̍h，看bē tio̍h ê攏ài看。”博士問：“看bē tio̍h ê beh按怎看？”阿姊uá來耳á 邊，講按呢生…按呢生…。

博士輕聲kā碧玉講：“我kap你熟悉tsiah久ah，ta̍k項代誌kap你攏坦白…”碧玉講：“Tse我知影。”博士講：“有一句話，m̄知beh按怎…”碧玉講：“無要緊，作你講。”心內歡喜kap期待。博士講：“若是終身大事，tse bē使tshìn-tshái得。”碧玉講：“Tse我瞭解。”博士講：“概成咱若去買新車，beh買進前，ta̍k項ài看hō͘清楚，檢查好勢…”碧玉tiām -tiām無應。博士講：“所以我想，iáu是咱先來去作身體檢查，the̍h一張全身健康證明書…”這時碧玉才完全明白伊ê意思，受氣koh失望，獨強lún leh，無拍青驚伊，好禮應：“Tse…我mā瞭解。親像咱買一台新車，ài有一張品質保證書。”博士歡喜，講：“Tō是按呢，tō是按呢。”停一下，碧玉講：“Ah無，你代先去檢查。”

博士去hit間新開ê高信大病院作全身檢查，交費4萬kho͘。Hip電光、超聲波、心電圖、通胃鏡、肺管鏡，大腸鏡、檢屎檢尿檢血、檢糖檢油檢鹽、…，內內外外，大空細空，攏總通 過koh驗過。報告出來，一切正常。博士足歡喜，the̍h來hō͘碧玉看。碧玉看he報告，ná看面ná憂，目頭結一結，一直hàiⁿ頭。博士奇怪問伊：“Tse報告一切正常，全部甲等，敢koh有啥問題？”碧玉講：“你ta̍k科攏通過，一科無及格。”博士tshuah一tiô，問：“Tó一科無及格？”碧玉講：“精神科一科。”博士m̄知伊ê意思，事實he新開ê高信病院設備一流，每一科攏有高科技ê儀器檢查驗定，數字證明，獨獨精神科無。“我kap你熟悉tsiah久--ah，ta̍k日見面，你也m̄是m̄知，我無起siáu ，mā無神經病。”碧玉起愛笑，講：“你無起siáu ，也無神經病。M̄-kú你ê心kap感情bē輸一枝suí面ê花干，可惜有pit一khî tsiah大khî。”Kā家己倒旁手ńg li̍k tsiah kuân起來，比hō͘伊看：“你看，kap這tsuā khî仝款仝款。”按椅á頂peh起來，koh講：“你講了無m̄ tio̍h。Tse終身大事kap買車、kíng 花干仝款，ta̍k項ài頂真，bē使 tshóng -pōng tshìn-tshái得。”Kā博士ia̍t一下sa-io-na-nah ê手，ua̍t頭作伊去。

轉來厝，歡喜kā阿母講：“阿母，我知影lah。”老母問：“你知影啥？”碧玉講：“我tsit-má知影beh按怎分，啥款是愛看外觀，啥款是重感情ê人。”老母問伊：“按呢這個電腦太空ê雙料博士，伊ê感情有外重？”碧玉應講：“Kap我手這tsuā khî平重。”

聽講最近新ê醫學科技會tàng用le-soh（laser）kā這款蛇khî整容改善。不過咱m̄知影，高友通校長ê查某kiáⁿ碧玉尾a有去作這種手術無。