《陳雷文選》

 | | | 轉寄

琴聲Siu-be-to͘h (Stsubert)

作者 陳雷 2006.07.09

(1)

若是少年老師瑞英，音樂是人生上大ê安慰kap歡喜，生命ê泉水。Tse是伊ê天份，生時kah來ê，或者mā會使講是伊ê束縛。細漢ê時，tī學校聽老師彈琴，看kah無人教家己會曉彈。老師疼惜伊ê天份，免費kā教，mā hō͘伊上台表演，去kā伊ê老母講，這個gín-á大漢ài作演奏家。但是瑞英in tau食頭路人ê家庭，gín-á 6個，那有法度hō͘伊一個查某kiáⁿ專工彈琴學音樂？所以去讀咱高雄師範，畢業了作音樂老師。雖然是無彩一粒真珠落（lak）tī lok-kô͘-a-muâi裡，拍損了天份，m̄-kú kap伊ê性情猶算有合lah。

畢業了無外久嫁去市內一個生理人ê家庭，in翁林強tō是林茂建築公司ê大kiáⁿ。林茂本人khah早少年ê時作土水，雙手拍拚，舞kah家己也有一間公司，bāu工程起販厝。林強作兵了無出路，叫來老父ê公司thuā生理。

這個林強生作大大漢，講來m̄是啥物pháiⁿ kiáⁿ。不過tī生理場thuā久，薰酒查某ta̍k項會，脾氣有時若牛，有時若狗，粗工人ê底tì，m̄是斯文性ê人品。時常酒家lim到暗暗，半暝轉來，酒醉tō beh冤家拍人。

瑞英嫁了隔轉年生一個查某kiáⁿ，名叫琴聲。這個gín-á規日乖乖家己sńg，罕得吵叫。M̄-kú飼到三歲外，猶m̄ bat聽伊叫一聲阿母、阿pâ，kap伊講話mā無反應，若像是臭耳兼é-káu ê。

Tshuā去病院檢查，耳á好好，聽力正常，tō是kan-na m̄講話，m̄應話。尾a去看小兒科ê專家，診斷是Au-thih症（Autism），也有叫作自閉症。講是一種先天性怪奇ê症頭，耳目嘴好好，kan-na頭腦無仝。He gín-á頭殼內ê世界，bē輸hō͘暗色ê玻璃封起來，關tī hin內面，kap外口bē通。所以有聽若無聽，mā bē kap人講話，無啥辦法通好醫。

老母聽一下心肝強beh落無去。無彩一個tsiah古錐ê suí查某kiáⁿ，現現áⁿ tī燒燒ê身軀邊，kā惜kā疼，親像mo͘h一tè冷ki-ki ê冰角，bē笑bē khàu，無反無應，實在比臭耳é-káu ê khah害。He作老母ê心情，空空bē輸白作--ê。

但是伊無放棄，每日彈琴唱歌hō͘伊聽。講也是奇怪，這個gín-á見若聽著音樂，tshit-thô物放leh，坐tī hia定定無tín動，像音樂家teh欣賞。原來琴聲kap老母仝款，有音樂ê天份，生時kah來ê，mā會使講是伊一生ê束縛lah？

伊教琴聲彈琴，隨教隨會，進步真緊。M̄知經過外久，mā m̄知tiâng時開始，無張持ê中間得著一個真龜怪ê感覺，bē輸琴聲ê音樂有時teh kap伊講話。Tī hit個來去ê一目nih，這個暗色玻璃封起來ê世界，親像雄雄hō͘日頭光照著，伊會tàng影著hin內面。

(2)

這雙紅鞋是啥人the̍h來ê，伊m̄知影。Hit早起出門ê時，齊齊排tī門腳口。想講大概是啥人bē記得ê，問對面kap隔壁間，攏m̄知影。Kuāⁿ去樓腳顧大門ê桌頂khǹg，hō͘人去認。那知隔轉日透早，he鞋又koh倒轉來，排tī門口teh等伊。連續幾偌工，beh tàn tàn bē掉。斟酌kā看，規雙新新，koh是tsit-má上時行ê太空流線型運動鞋。想講無彩，kuāⁿ入來hō͘琴聲穿看māi，koh合合合，khah-thiám是專工買來ê。這雙鞋穿起來若活ê，踏一步tō tsiu̍h一聲，後腳跟一pha電火tō sih一下。琴聲日時穿teh彈琴，暗時穿leh睏，m̄ hō͘人thǹg起來。

M̄知啥物緣故這個以後，琴聲ê音樂lú-khah親近，不時teh kap伊講話。He音樂像日頭光照著玻璃封起來ê世界，hō͘伊看著hit內面，m̄是空空無半項，是一個有栽真tsē款感情ê花欉ê溫室，歡喜、鬱卒、期待、失望…，kap別個gín-á仝款仝款。但是這雙鞋á真正ê祕密，二禮拜後伊才知影。

這條歌伊m̄ bat聽琴聲彈過，mā無想著無人教伊家己會曉彈。He Mo͘h-Tsa-toh（Mozart）ê音樂是天使ê歡喜，挽大紅ê玫瑰teh tshìng芳，會hō͘人醉。琴聲目睭kheh-kheh，若像人無tī hia，m̄是伊teh彈琴，是音樂家己teh彈。

He鞋á開始發光，tuè音樂sih一下sih一下。伊叫是家己目睭tîng-tâⁿ看m̄-tio̍h。Uá去kā摸，規雙燒hut-hut。驚一tiô，趕緊beh kā thǹg起來，suah bán ân-ân，pak bē落來。鞋á liap-liap sih，lú來lú紅，像雞kui-á pûn風一直變大雙去。 雄雄音樂停去，琴聲流汗珠ê面頂有一tsuā微微á笑，bē輸風尾吹過一khut淺淺ê水面，一時á tō無去。伊m̄知影tse是事實無？因為tsīng出世猶m̄ bat看琴聲笑。琴聲khiā起來，hit領海色水流ê長裙kā鞋á khàm著，鞋á ê光tō hua去。Liâu-liâu-á，像雞kui-á消風kiu倒轉去，kap以前平大雙。

按呢伊才知影，這雙鞋是一個活活ê奇蹟。琴聲若歡喜，伊tō歡喜pûn風變大雙。琴聲若鬱卒無歡喜，伊tō會倒kiu變足細去。

(3) M̄-kú這個祕密伊無kā翁講，因為琴聲有Au-thih症以後，in翁受氣，bē-tàng接受。攏賴講是in某tài--來-ê，生一個這款怪物！以前愛lim酒行酒家，tsit-má koh khah厲害。半暝若是酒醉轉來，a̍h tō害lah，入門tō pháiⁿ嘴操幹kiāu，tshuē人冤家。In某恬恬走去bih，m̄ tshap伊也bē使，拖出來拍，大醉大拍，小醉小拍。不時拍kah烏青結血。拍了無夠khuì，叫伊唱歌。

「唱！你唱！」雙手肩胛頭掠leh，大力kā hiap。
「幹！叫你唱，你m̄唱！」嘴phué sai落去。
「火車…火車ki-ki叫，…10點5分到板橋…」
「幹！唱khah大聲leh！」
「…板橋查某suí kap笑，…轉來去賣某來hō͘伊招，…」

Kā in某giú來，大力lam2leh，tu嘴beh kā tsim……。He酒味kap tú-tsiah吐ê臭味hō͘伊擋bē tiâu，頭ua̍t走m̄ hō͘伊tsim。

Phia̍k一下一聲，嘴phué koh kā pa落。「幹！恁父…」大力kā tshia，siak tuà土腳。衫kap裙thiah-thiah破，規身軀光光，一kho͘人若大隻豬哥teh tī頂kuân，ngē kā伊強，kā伊創治，…像teh使牛使馬。

「哈！哈！…板橋查某……」o̍͘h一下，又koh吐吐出來。

(4)

Tī Siu-beh-tō͘h ê音樂ê內面，伊tshuē著臨時ê安慰，像「冬天ê旅行」按呢beh行離開這個家庭，tshuā琴聲去一個無虐待ê收容所，hō͘人拍會使m̄免唱歌ê所在…。無注意琴聲坐tī hia家己teh唱，「…火車…火車ki-ki叫…」。雄雄pōng一下一聲，phiāng tī土腳。Kā抱起來，已經m̄知人去ah，hit雙鞋lia̍p-lia̍p-sih，kap腳kiu kah若紅嬰á ê hiah細雙去！

「嚴重是有嚴重lah。」醫生kā伊說明。
「A̍h是按怎lah？Thái會雄雄按呢？！」
「白血病。」
醫生tàm頭。「超急性ê，…真緊…」

一禮拜後，琴聲倒tī tshū白床巾ê病床過身去。Hit位同情心ê少年醫生kā老母講，大概是咱高雄水kap空氣毒素污染太厲害ê關係。Tsit-má ta̍k年攏有真tsē gín-á tio̍h這個病。伊kā琴聲換一su天色phòng-kíng ê suí衫，海色水流ê長裙，頭毛lua̍h二個mi-尾á ，用紅ê li-bóng縛起來，換一雙奶色白皮鞋。Hit雙紅鞋kuāⁿ轉來厝，tshāi tī phiⁿ-a-no͘h頂面。Ing暗beh睏ê時，kuāⁿ去眠床頭kap伊作伴。

半暝翁轉來，又koh規身軀ê酒味。代先kā伊拍，才koh叫伊唱歌。

「唱！你唱！」按呢kā伊hiap。
「…火車…火車ki-ki叫，…10點5分…」伊實在唱bē出來。
「幹！koh唱！10點5分按怎？！」
「…10點5分…10點5分…」伊實在唱bē出來，koh hō͘人拍。衫kap裙thiah-thiah破，一隻豬哥ji̍h tī頂面，ngē kā伊強。

雄雄lìn-lòng叫ê聲，林強使牛使馬當teh創治，無看著眠床頭一雙紅鞋teh tín動，lú tsùn lú大力，才停起來看。He鞋a lia̍p-lia̍p-sih teh發光，想講taⁿ慘ah，是m̄是家己酒lim過頭，目睭lim pháiⁿ去a？嘴內念：「M̄通koh lim a。」He鞋á pìn-pòng跳teh siak-tiō，tshuah一tiô，規個人攏nńg去。鞋á sa來手裡，suah ki-ki叫，像gín-á teh哀。氣一下，大力siàng出去，khian按房間外去。

隔轉日天未光，瑞英liam腳peh起床，房間外tshuē著hit二腳鞋，khioh好勢排tī phiⁿ-a-no͘h頂頭。「無要緊，m̄免驚。」按呢細聲kā鞋á講，也親像teh kā家己講。耳空內遠遠有Siu-be-to͘h ê琴聲kap歌聲，he溫暖期待ê音樂伸手kā伊歡迎，beh kā伊tshuā去hit個冬天孤單ê旅途，去到一個無暴力kuâⁿ冷ê樹林內hioh 睏，……。「緊慢，緊慢伊會變。」酒tō會停起來，伊按呢想，tō m̄免koh唱歌。He鞋á搖一下，後腳跟hia火sih 一sih，若像teh beh hua去。Lú來lú白siak，一直kiu細雙，tú好tī伊目屎liàn--落-來hit目nih ê中間，kiu kah規個攏總變無去。

「…10點5分…10點5分…」He Siu-be-to͘h ê音樂無去，kan-na有火車lìn-lóng叫ê聲…