《陳雷文選》

 | | | 轉寄

心戰

作者 陳雷 2006.08.06

(I)

Tī hit年，tse算是一件稀罕困難ê病例。所以手術成功了後，電視、新聞報真tsē，o-ló伊是台灣上gâu ê心臟外科專家，mā是國際一流ê權威。

這個病人tō是聽著洪教授ê名聲專工按印尼來ê。洪教授詳細檢查了，kā伊講：「陳先生，你年歲tsiah大a，又koh經過三擺心臟病發作，這粒心已經pháiⁿ一半，無夠力來負擔你ê身体。所以你不時行路會喘，無行mā喘。」老人問教授，有啥物辦法通好醫。教授講：「你這個狀況kan-na會lú來愈bái，bē lú來lú好。除了換心以外，無啥物辦法。」老人講：「若是按呢，我無躇躊，你馬上kā我換一粒。」教授搖頭：「陳先生，tse m̄是換豬心，隨時beh tō有。你ài等候。有人死去，願意kā伊ê心臟捐出來，才有通換。」老人問：「Ài等外久？」教授講：「無定著。Tsit-má社會上無人愛捐心，有時ài等半年一年，mā無一定tō有。」老人無歡喜講：「教授，我今年72歲a，tī印尼財產事業一大堆，我bē等得！你趕緊想辦法kā我tshuē一粒心，費用外tsē完全m̄免考慮，錢m̄是問題。」教授無歡喜講：「陳先生，tse m̄是錢ê問題，是有心無心ê問題。我tsit-má kā你登記tī緊急候列ê名單，若有，馬上kā你通知。」

一月後，陳先生koh來看洪教授。教授檢查了講：「狀況有khah bái去。M̄-kú心臟猶未有。」老人講：「無要緊，我家己有帶來。」教授奇怪問：「你有帶啥來？」老人叫伊ê後生入來。He後生穿西裝、梳金頭，tu一張名片hō͘教授，講：「我是陳水森。我專工按印尼替阮老父帶一粒心來。」教授無瞭解伊ê意思，問：「你怎樣帶心來？」He後生tshuā一個查甫gín-á 入來。看起來17、8歲，烏烏細漢細漢，目睭gōng神gōng神。後生kā伊講印尼話，伊tō行uá來，嘴內iⁿ iⁿ ū ū，bē輸5歲gín-á teh講話。後生kā教授講：「伊雖然頭殼gōng gōng，m̄-kú腳手好勢，身體勇健，我ta̍k日攏用滋養品飼伊，心臟一定是勇ê。」教授驚一tiô，指hit個gín-á ：「Tse…tse… 」一直搖頭。後生講：「教授，你m̄免煩惱。伊是番á ，生作gōng gōng，父母m̄ tîⁿ 。我3萬盾kā買來。」按lak袋á jîm一張紙出來，the̍h hō͘教授，講：「証件攏tī tsia。」教授kā看，紙頂面有漢字寫：「同意書。我kiáⁿ阿母沙.豬拉東賣hō͘陳水森。現金3萬盾全數付清。木巴.豬拉東，年月日。」後生kā gín-á手骨掠leh，講：「Tse是賣斷ê，tsit-má這項代誌完全我來決定，你一切m̄免掛慮。隨時beh換攏會使得。」

這時洪教授才完全明白伊ê意思，tō是in買這個gín-á beh來換心。想bē到世間會有這款ê代誌！著驚koh受氣，目睭皮tiuh-tiuh-tshuah，khiā起來，對二人ê面huah ：「Tse換心是天賜ê，m̄是錢買ê!恁等候，有隨時kā恁通知。」

也是tú á好koh佳á 哉。三日後發生一tsân車禍，有人hō͘車tōng死，心臟捐出來。洪教授接著通知，馬上安排，kā陳先生緊急手術。開刀kā伊ê胸坎破開，pín-á 骨剪斷，kā hit粒pháiⁿ去ê心ka掉，thīⁿ一粒新ê勇ê hō͘伊。He換好ê心臟，一粒圓圓若豬心hiah大粒，又koh phih-pho̍k phih-pho̍k tī老人ê胸坎窟內面活活跳。實在醫術高明，一禮拜後，陳先生tō會家己起床，peh起來行，bē喘bē siān，bē輸作一下少年幾luā 十歲。成實ê，成實是換一粒心ê奇蹟，khioh一條性命，作一個新人仝款。

(Ṳ)

3個月後，又koh有一個老人來tshuē教授。問起來才知影是陳水森ê朋友，專工按印尼來。教授問伊陳老先生ê近況，伊講手術了後，一切順是，狀況真好，事業拍拚，bē輸少年人ê khuì力。Tō是陳先生特別介紹伊來。

教授一看，這個老人嘴唇烏綠，坐tī輪椅喘。詳細檢查了後講：「你ê心臟真是衰弱無力。」老人問：「有啥物辦法好醫？」教授講：「這個心已經pháiⁿ去a，ài換心。」老人問：「Kap陳老先生仝款？」教授tìm 頭。老人講：「若是按呢，m̄免躊躇，你馬上kā我換一粒。」教授搖頭：「Tsit-má無心，你ài等候。有人死，心臟捐出來，才會thang換。我tsit-má kā你khǹg tiàm緊急候列ê名單，若有，隨時kā你通知…」老人講：「Tse你完全m̄免考慮。我是專工攏有準備好才來ê。」教授聽m̄知伊ê意思，按怎攏有準備好？老人叫後生tshuā一個gín-á入來，17、8歲ê腳tau、烏烏細漢細漢、gōng-gōng khiā tī hia。教授才雄雄會記得，3個月前陳先生mā是按印尼tshuā一個這款ê gín-á beh來換心，tshuah一大tiô，huah 講：「Tse…tse bē使--得！Bē使得！換心是天賞賜ê，m̄是錢買ê！」

那知後生應伊講：「按怎bē使--得？陳先生in 會使得，按怎阮tō bē使得？」教授講：「陳先生伊真佳哉，tú好有人車禍tōng死，疼心救人，心臟捐出來…」後生面對面kā教授一直看，親像tī這個少年教授ê面頂beh tshuē一個過去掩khàm ê大祕密，看一晡才講：「你敢m̄知影？」教授問：「M̄知影啥？ 」「你成實攏m̄知影？」教授搖頭，後生才講：「Hit個車禍tōng死ê，疼心救人ê，心臟捐出來ê，hō͘你出名ê，tō是伊按印尼買來ê番á ！」

教授坐tuà hia若é-káu ê，一個嘴開hāⁿ- hāⁿ，話suah講bē出來。一目看hit個老人坐tī輪椅頂喘，面一直烏綠去，m̄知beh如何處理。伊liâu-liâu-á khiā起來，一步一步行離開in三個人，頭殼gōng tshia-tshia，bē輸槌á huh著，ná行ná念：「我m̄知影…，我攏m̄知影…」行轉來辦公室，tǹg tuà phòng椅裡，神神一直想，伊這半世人認真拍拚得來ê成就，伊對醫學救人百分之百ê信心，雄雄像大地動ê kuân樓作一崩崩倒倒去…。因為tō是伊，親手kā人thâi ê gín-á 心臟換hō͘ hit個老人，伊tō是hit個偷the̍h心ê幫手。而且敢m̄ tō是，因為伊奇妙ê醫學技術，hō͘ hit個心pháiⁿ去ê老人變作自私野蠻ê謀殺者？