《陳雷文選》

 | | | 轉寄

人生59

作者 陳雷 2006.09.17

Tī台中市，差不多大家攏知影，姓賴ê in是三代ê大好額人，自in an公賴鐵起，tō是gâu看厝瞻（tsiam）地，tsit-má聽講市內四界kan-na有店面ê樓á 厝上無也有3、40間，菜市á 對面hit tsuā，規排攏in ê。有一項心適ê tō是，姓賴ê，自in 阿公起，tō是三代孤kiáⁿ單傳，tú好賴鐵、賴釘kap賴皮攏單單生一個查甫kiáⁿ，所以財產無分散去，lú積lú tsē。

另外一項大家攏知影ê，tō是in雖然錢財豐富，三代攏是ùn鹽咬薑ê kiat á哥，凍霜鬼。看起來，tse也是一種遺傳。有人講，tō是tsiah-nih liap屎無量，才會孤láu三代bē分枝。特別是這個賴皮，歲頭食到50外，tshuā一個某，生一個kiáⁿ，省kah衫m̄甘買，鞋m̄甘穿，出門tō是lan-lin-guh拖淺拖。酒koh是上蓋興，攏beh lim別人ê。罕罕a lim久pháiⁿ勢，講伊今á日beh請，攏tú好身軀邊無tsah錢。所以朋友交無幾個，攏是不得已生理來往ê niā-niā。

這個少年家邱進行tuà tī賴皮厝邊，kap伊有熟悉，tī第一產物人壽保險公司食頭路賣保險。公司ê主管知影賴皮好額，kā伊講：「你這個厝邊賴先生，錢飽飽，厝規tsuā，若招有伊一棟生理，khah贏招別人十棟。」進a知影賴皮作人khiap屎，he金錢有入無出，khah kiâm he賣鹽ê，kā主管講：「這個賴先生，beh thàn伊一仙錢khah thiám liàm伊一枝毛。招伊一個不如招別人10個。」主管無歡喜講：「咱公司tī台東業務擴張，tō是欠你這款會衝ê去開發。年底以前，若是賴先生這棟生理猶作無，你tō會使去hia拍拚經營。」

這個邱進行想：「Taⁿ li̍k ah。我父母、查某朋友攏tī tsia、若是派去台東，m̄-tō khah thiám hō͘人放生去！」趕緊tō去tshuē賴皮，請伊lim酒，招伊買保險。這個賴皮一年m̄知外tsē人來招伊買保險，內底空頭攏知影，問講：「恁公司看頭hiah大間，a̍h是有實無實？會倒bē倒？」進a講：「阮公司舊年業積全台灣第一枝，ta̍k年thàn大錢，內面外面實實實，beh thài會倒？」賴皮講：「恁公司ê錢攏是客戶收來ê，若是公司thàn大錢，tō是客戶了大錢，我ná通kā你買？」

按呢連續請伊lim 3 thuaⁿ，he賴皮若像ham-á死去sa̍h bē開嘴，一句「ok」講bē出來，m̄買tō是m̄買。進a看破無法度，tshuē查某朋友講：「香a，年底咱來去台東拍拚開發。」He香a雄雄聽無，huah講：「Taⁿ你是teh講啥？」進a kā伊說明，才知影m̄是講sńg ê。想想leh問：「這個賴先生，錢khah愛，抑是命khah愛？」進a講：「若是賴先生，錢比命khah有重。」香a問：「A̍h這個賴先生，性命攏總有幾條？」進a講：「Mā是kap咱仝款，一條niā-niā。」香a講：「若是按呢，代誌tō好辦。」Kā進a講，你按呢生…按呢生…。

Tō先去作一個「客戶瞭解」，資料調查詳細，一切準備妥當，koh來tshuē賴皮，請伊lim酒。賴皮講：「咱酒bóng lim，保險ê代誌免講。」進a講：「賴先生，你若是樓á 厝m̄保，性命mā ài保。」賴皮問：「Tse是按怎講？」你樓á 厝hiah tsē間，一間燒了猶koh有。若是性命單單一條，無去tō烏有（iú） ah。」賴皮講：「保厝保命攏仝款，公司thàn錢，客戶了錢。」進a講：「若是你，無仝款。你買人壽包thàn錢，bē了錢。」賴皮問：「按怎包thàn錢？」進a講：「你今年買人壽，明年死，一年保險金tō領來，thàn大錢。」賴皮無歡喜：「你是teh講啥？我一世人勇健健，m̄ bat破病，按怎明年死，領保險金？」

進a tshìn-tshìn a笑，按皮包á內抽一張紙出來，tō是一個拍字整齊，印好ê表。進a按頂kuân到下面一tsuā一tsuā比hō͘賴皮看。「你看，這個你ê阿祖賴有。」Kā看，名ê邊a一個數字59。賴皮問：「這個是啥？」「這個tō是伊人生59。」「59歲死？」進a tìm 頭，koh比：「這個你ê阿公賴鐵。」Kā看，邊a mā是一個數字59。問：「人生59？」進a koh tìm 頭。Koh讀落去，下面 hit tsuā tō是老pē賴釘，mā是59歲死！大驚一tiô，手phi̍h-phi̍h-tshuah，酒sa來lim。 進a知影伊心內搖hián ，m̄放伊suah，繼續進攻，大聲問：「賴先生，你今年外tsē?」「相鼠。」「相鼠ê 58。」He賴皮人若緊張，面tō kiù筋，嘴歪一旁去。一般講來，這lō khiap屎ê凍霜哥攏無膽，上蓋驚死，sīm一時a才應：「明年59。」

進--a tìm一下頭，講：「Tsit-ma阮公司特別優待，凡是無有破病記錄ê，60歲以前買，m̄免身體檢查。」Taⁿ thàn錢ê代誌，m̄免人講，伊真緊tō算有。Tō是按呢，賴皮一世人第一回買保險，mā順續kā in某買一份，因為喜a mā是相鼠，今年58。

隔幾工邱進行買一個時鐘來送賴皮。賴皮講：「A̍h你成實ê，未曾未tō送鐘來，beh hō͘我死。」進a講：「專工拜託人按日本the̍h轉來ê，kā你說多謝lah。」The̍h tī手裡看，he鐘細細ê á，古錐古錐，電池充ê。進a講：「你看。」時間tsuān一點正正，he鐘suah會唱歌，tân「Hō͘ Alice」ê古典音樂，koh來suah有一個suí查某gín-á出來，跳豔熱ê脫衣舞bang-gah。精彩跳差不多beh kah 2分鐘，音樂tiāⁿ去，查某gín-á雄雄無去。賴皮koh kā tsuān看māi，僥倖--ah，2點也會跳，3點也ē跳，he查某gín-á見若著點tō出來跳脫衣舞ê bang-gah。

歡喜一下，時鐘the̍h轉來厝，khǹg tī眠床頭，日時斟酌等，時間到tō來看bang-gah。暗時無看驚了電池，beh睏進前電池先pak掉，透早起來才拍電話去電信局問時間，kā電池khǹg倒轉去hō͘伊行。In某喜a看伊愛看脫衣舞ê bang-gah，一日tī hia tsiú時間，心內無歡喜。問伊tse鐘是按怎來ê，才知影in翁有買人壽保險，包明年大thàn錢。想想leh，無啥tio̍h頭，kā賴皮講：「A̍h你若是成實明年beh去，mā tio̍h先去hō͘醫生檢查一下，看是啥病。」賴皮hō͘某講一下，心頭悶悶。人想著死，難免不安。過年了，lú想lú擋bē tiâu，去榮總大病院作檢查，規身軀按頭到腳，按內到外驗透透。結果無一項tîng-tâⁿ，kan-na大腸口hia生一粒真珠大ê零散肉á，順續切掉。醫生講，無代誌，勇健食到百二。

按呢賴皮才放心，m̄-kú也suah來失望。Taⁿ若猶未beh死，無彩買hiah tsē保險。想想leh ，叫進a來問，講beh退保。進a講，退保會使，ài罰金。按呢teh bē-tàng決定。Ná知tú好hit日lim酒轉來，路裡落雨pháiⁿ行，無tú好淺拖落一腳，pua̍h一倒hō͘過路車tōng著，lòng一下m̄知人，車去病院救。醫生講內傷腦出血，緊急開刀。開了人suah顧睏m̄醒。醫生kā喜a說明，腦受傷siuⁿ厲害，taⁿ bē醒ah。按呢一睏三工無醒，in某想無步，轉去厝裡the̍h hit個日本時鐘來，tshāi tuà病院眠床頭，tsuān hō͘時間tú-tú一點到，he鐘tō唱歌跳bang-gah。喜a kā時鐘tu tuà賴皮耳空邊，大聲叫：「皮a，時間到！」成實好用，he賴皮無張持目睭皮thí金來，beh看bang-gah。In 某大聲kā 伊講：「醫生講你無救ah。」賴皮聽了停一時a，有一個微微ê笑容，kā某講：「佳哉he人壽ê有買無退掉。」Koh看hit個時鐘，2分鐘到，「Hō͘ Alice」kap bang-gah攏無去。賴皮吐一個khuì，吩咐講：「暗時會記得，電池無用ài pak掉。」講了目睭kheh，隔日tō過身去，算算leh，tú好人生59，賴皮食到到，kap賴有、賴鐵、賴釘仝款，財產成百億，koh加hit個第一人壽保險3千萬。

這筆錢付了，第一產物人壽保險公司ê主管無歡喜，叫進a去講話：「Taⁿ賴皮這棟生理你也作了ah，咱公司台東欠人經營。你少年會衝，年底去hia拍拚開發，上有前途。」