《陳雷文選》

 | | | 轉寄

無彩hiah gâu

作者 陳雷 2006.12.10

咱人大部份uì生到死渺渺茫茫，一生過beh了a也無啥物通好kā人展風神ê成就。不過有時罕罕a也會無張持遇著「一生偉大ê時刻」，親像Niu-tong（Newton）頭殼hō͘蘋果kòng著，親像Ah-khi-mih-to͘h（Artsimedes）洗身軀hō͘水淹著，雄雄得著一個一世人瞬間ê靈感啟示，uì hia致使到偉大ê發明，貢獻人類，hō͘後來ê人o-ló數念感謝伊。咱tsia布袋偏僻ê草地，人口小koh散赤，kan-na有通pha̍k鹽，tshun ê無半項。不過近來有一位廖先生大栽，tī伊五十歲hit冬，有kap Niu-tong頭殼hō͘ 蘋果tìm著仝hit款ê經驗，得著靈感，suah一時變作出名ê發明家，到taⁿ大家若講起，攏猶十分ê尊敬數念。

這個「一生偉大ê時刻」其實也有伊ê因緣原故，tio̍h-ài uì頭講起，請恁理解。廖先生大栽19歲ê時tī一間漢藥店食薪hô作伙記。大概人khiáu koh認真，無幾冬tō bat幾偌款藥草ê名，也會曉學人tsat脈，講脾火、腎寒、大腸氣…種種ê道理。自按呢家己出來開一間漢生堂中藥店，兼kā人tsat脈看病，lī筋絡…。因為伊人khiáu，又koh肯kā人說明脾火、腎寒、大腸氣種種ê道理，所以不止á生理ka-ia̍h，漸漸tī布袋變作有頭有面ê人。

近來咱台灣社會上有teh討論救母語ê代誌，這點廖先生真有理解注重。所以布袋社區成人大學開第一期台語班ê時，伊tō去參加。Hit個曾美麗老師tú-tsiah師範畢業，先教in台語羅馬字，寫he tō͘-kún-á字。廖大栽問老師：“Tse tō͘-kún-á字ná是字？”老師講：“Tse tō是咱台灣話ê英文字。”若是英文字這個物件，世界一流伊無計較，舊年tī成人大學伊也有學過，所以tō認真學羅馬字，liām-mih tō學會曉讀會曉寫。

無外久班裡一個朋友蔡先生知，伊三個後生攏讀大學畢業，大家真尊重伊。Hit日kā廖大栽講：“這個羅馬字無夠好。”大栽問：“按怎無夠好？”蔡知講：“我已經發明一套比tse koh-khah好ê!”“你家己發明ê?”“叫作蔡氏新世紀文書法。”大栽驚一tiô問：“啥物叫作蔡氏新世紀文書法？”蔡知先生講：“你若是英語小khuá有基礎，你tō知影。這個k應該是g，這個t應該是d，a̍h這個b應該是v，按呢才有道理。”koh講：“Tse tō是蔡氏新世紀文書法。”Taⁿ這個廖大栽舊年有學英語，自認英語小khuá也有基礎，hō͘伊講一下，lú想lú有理，tō開始學蔡氏新世紀文書法。班裡陳先生文藝kap黃先生烏魚tī農會作過代誌，頭殼teh轉mā是緊，攏也來學這套新文書法。

Ná知二禮拜後，hit個鄭明理先生，in kiáⁿ是一個相命仙，概成真有學問，英語mā有基礎，kā廖大栽講：“這個蔡氏新世紀文書法無夠好，我有一套koh khah新ê。”大栽問：“你家己發明ê?”“叫作明理台文，成大ê教授已經有試過a，贊koh好用！”大栽問：“啥物是明理台文？”鄭先生講：“你英語敢是bat學過？若是小khuá有基礎你tō知影。這字ts應該是j，這字tsh咱英語無，應該是q，a̍h這字kh才是c，…”廖大栽用伊有基礎ê英語一下kā想，mā是有理，tō也來學明理台文。

因為這個關係，成人大學台語班分作二派。文嬸a、風琴a、張文藝、遠東黃ê kap蔡先生用蔡氏新世紀文書法。Tshun ê大日a、明月a、深井a、中和仙、豆花清a、kap鄭先生用明理台文式。Kan-na廖大栽本人m̄知tó一式khah好，bē-tàng決定，有時用蔡氏，有時用鄭氏。無外久庄裡ê人知影蔡先生kap鄭先生攏發明一套新字，大家講：“實在有夠gâu lah，學生比老師khah厲害！”廖大栽聽人按呢講，心內無自在，親像人teh講伊無gâu，平平一個老師教ê，人會曉發明，伊thái bē曉!”

心內tō悶悶，ta̍k日恬恬kik頭腦，決心beh來發明一套khah贊ê字。暝無食，日無睏，坐leh也想，倒leh也想，真久想無一個辦法。Hit日tú好菜頭嫂a來看血壓，一個面紅膏赤（tshiah）-tshih，大栽tsat伊ê脈，phi̍h-phi̍h pho̍k-pho̍k跳，講：“菜頭嫂，你肝火衝著大腸，氣that tiâu leh，我kā你針針leh，開一帖藥á kā你通。”Tō kā伊tshak針炙(tsiu)，一枝tu̍h tī手裡，針大腸經，一枝tu̍h tī面裡，針膀胱經，koh一枝tsha̍k tī腳尖tu̍h腎經…。He針ná tsha̍k ná念，親像和尚早時teh念經，一時無細字，he針tsha̍k uì家己ê大-pū-ong，雄雄suah恬去，定定khiā tī hia。菜頭嫂kā看，taⁿ害a，嘴開開，目睭也無teh nih，一kho͘人gāng-gāng，bē輸身魂hō͘摸（mo͘）siūⁿ-á摸去。大力kā tshuah二下，才精神過來，大聲huah：“我知a！我知a！”uì店裡tsông出去，tī街á路liù-liù走，直直hiu：“我知a！我知a！”Tú好tsông來到廟口，碰著蔡知，雙手tsang leh問：“大栽，你知啥？”大栽hī-hā笑，嚷講：“比你ê khah贊！比你ê khah贊！”一枝大pū-ong比hō͘伊看，he針猶插tī hia，to也無teh痛。Tō是tī hit個當時，kap Niu-tong頭殼hō͘蘋果kòng著仝款，伊大pū-ong hō͘針tu̍h--著，身魂脫殼，得著一世人瞬間ê靈感啟示，uì hia致使到偉大ê 科經」發明。

伊kā宇宙天地萬物ê內容分作十四系，tú好kap人体14條經脈相對配，叫作天人合一。每一個字屬一個系，親像「人」 這字屬tī膀胱系，kap膀胱經相對，寫ê時字尾加一個khô͘-á，表示膀胱。親像「地」屬tī大腸系，kap大腸經相配，字尾畫一條長長若腌腸，表示大腸。按呢一字一系，一系一經，清清楚楚，一看tō知影hit個字tī天人合一「科經網」ê地位。關於字母ê部份，有參考蔡氏kap鄭氏ê好處，koh再改進，K改作x，v改作w，c改作y，完成一套上蓋新ê文字，tō͘-kún-á字lām科經，無人看有，叫作廖氏大栽科經法。

按hit時起，全力奉獻台文。病人無看，店裡生理放hō͘ in某去huāⁿ，家己關tiàm樓頂房間內，暝日拍拚。經過六個外月，才完成一本五萬字ê辭典，叫作廖氏大栽科經台華英大辭典。家己koh出錢去印，寄hō͘全國各地圖書館。辭典內面有一節感心ê自序：“大栽無驚苦心，經過五十年人生無停考驗，將宇宙億萬ê時、空、物、象、能、理、事、念ê概念整理歸類，攏總14系60科，完成完整全新ê科學經路網…。大栽科經是咱台灣人家己發明ê新世紀文字，尖端科學ê武器，台灣人文化ê原子彈。…” 辭典完成了後，tī布袋開成人台語班，免費教大栽科經法。雖然bē輸傳教福音ê心情熱心拍拚，總是m̄知啥物原因，一班開落，免一、二禮拜，學生走了了，tshun無半個。廖大栽想，這款好物無人瞭解，按呢教m̄是辦法。若是beh救文化，tio̍h-ài uì學校內ê學生開始。所以tō去tshuē布袋國小孫校長先進，也tō是伊ê gue̍h- sun -á。孫校長聽伊說明科經，概成聽有koh聽無，概成有理koh sa無niau-á毛，問伊講：“阿舅，像這個科經法敢有khah簡單ê入門？”一時m̄敢決定，kā大栽講：“你tse tsiha-nih好ê物件，留tī布袋無彩。我kā你推薦去教育部，全國落去教，大大來發展。”大栽大歡喜，吐一個khuì講：“你才是第一個真正瞭解科經ê人。” 孫校長kā科經推薦hō͘教育部國語推行委員會委員董小梅。這個董委員是政治大學中文系教授，對母語教育自來有真感冒ê意見。看著這個科經法，lú看lú花，lú讀lú無，歡喜一下講：“這款好物！教落去到底，學生、老師包你土土土！”馬上去tshuē教育部主任祕書容先生包心，tō是伊ê好朋友，母語感冒ê仝路親家。容主任祕書看了，滿面春風，講：“實在好物！你放心，這項代誌我包心kā你包辦！”

Tō去聯絡報紙、電視界ê記者，大大宣傳，“創世紀ê大發明，教育部全力推薦！”又koh替伊走tsông,爭取國際十大發明獎。Hit年八月總統召見，tī總統府hip相。廖大栽人é，khiā tī後壁排邊a，無啥看著。去kā相片放大，tsah一個放大鏡四界報人看：“你看，這個我lah！”菜市á ê查某人看有，攏真感動，問伊講：“A̍h你kap咱總統thái tsiah熟lah？”大栽講：“登輝仙我古早tō bat a。”賣蚵á te ê阿銀a問伊：“A̍h你是發明啥？連總統也叫你去hip相。”Siah甘蔗ê Tiⁿ a khah bat代誌，應講：“Suah m̄知影，發明科學lah。”“科學o͘h，tsi-má ta̍k-項mā攏靠科學。”按呢規布袋ê人攏知影大栽發明科學，總統召見，換嘴叫伊大栽仙ê。

咱講gâu人té命，hit年12月大栽仙破病，診斷肝癌尾期，車轉去厝裡家己醫。食中藥祕方，無二個月tō死翹翹。死了in某照伊ê吩咐，墓牌頂刻科經ê字：“大栽科經台文法發明人廖大栽…”Ta̍k個tō͘-kún-á字尾有科經ê大腸、小腸、膀胱…ê符號，無人讀有。菜市á查某人攏kā伊可惜，講：“Tō是siuⁿ gâu，天teh怨妒。”“無彩tsiah-nih gâu，寫kah無人看有。”死hit年tú好51歲出頭niā-niā，實在有影，無彩hiah-nih gâu lah。