《陳雷文選》

 | | | 轉寄

亞力出頭天

作者 陳雷 2007.02.18

伊khah愛人叫伊ê美國á名A-le-khu-suh(Alex)，大家攏知影，所以攏按呢叫伊 。有時無小心叫伊亞力，伊tō無歡喜，目睭gîn一下，tìⁿ無聽著無beh tshap人。Kan-na tī高速公路頂kuân，超速hō͘警察á掠著ê時，看伊ê駕照，叫伊ê名鄭亞力，才姑不而將tìm一個頭，tshìn-tshái應一下。注死44歲生日這工，駛hit隻西美載一tè生日雞卵糕，tī高速頂kuân看著少年查某，掛烏仁目鏡駛Bian-juh S500，青哥神kā人tuè。少年查某駛130走hō͘ jiok。結果家己技術無夠，tsing著Bian-juh S500 ê kha-tshng。西美píng三liàn，人無死，pín-á骨tsi̍h二枝，腳筒骨斷一節。少年查某停車落來看，這個m̄成gín-á規面規su西裝攏是雞卵糕，白ê、紅ê、青ê、黃ê，好氣也好笑，講：「無彩happy birthday雞卵糕。」A-le-khu-suh tī車內裝傷，大聲哀細聲tshan，差一sut á beh死去。少年查某有錢人驚麻煩，尾a tshìn-tshái講講leh，賠伊現金50萬，準suah無輸嬴。這tòng夭壽á大錢tō是按呢生出來ê。Ah無，一個公司職員á，一個月領無4、5萬、beh去tó位生tsia ê錢？若無、uì tó僥倖，會惹tsia ê khin-khin khiang-khiang ê代誌來？

A-le-khu-suh有錢tshio-tshio iāⁿ-iāⁿ，kap A-le-khu-suh無啥錢扮勢無仝。代先是白西裝、烏皮鞋、紅ne-khu-tái，過來二tshok niau鼠á嘴鬚，一粒hái-kat-á頭，buah油lua̍h二tsàn，「海洋理髮」美美小姐介紹，一粒二千kho͘剃ê。同事看會出來，攏講：「A-le-khu-suh píng車thàn大錢，行路kha-tshng會khau風。」In某愛君tī仝這間東南旅行社上班作「小姐」，替頭家王東南thîn茶接電話，應付人客，解說講：「腳骨siak pháiⁿ去，猶未好lah。」

M̄-kú「物理治療」一個月，腳骨好去，行路也是猶會khau風。有時上班愛tō來，m̄愛tō無來。頭家問in某，講是身軀猶未tú好，bē堪得作。過來雄雄幾luā日無來，頭家koh問in某，應講是「A-le-khu-suh人無去。」驚一tiô，才想起舊年年底發獎金，了後mā是「A-le-khu-suh人無去。」家己一個溜去澳門pua̍h-kiáu，輸kah空空才轉來。

一禮拜無消無息，in某暝日煩惱，會食bē睏。有人講是hō͘人綁票，為著hit 50萬，有人講是溜去澳門，又koh 去pua̍h-kiáu。獨身ê葉博士來公司khah無一冬，目睭大細目，辦公桌kap A-le-khu-suh相隔壁，普通時tō有意思愛君。這日行來kā nih一個目，偷偷á kā講；「A-le-khu-suh無pháng去。」愛君驚一下，問：「A-le-khu-suh tī tó?」

Hit下晡下班，kap博士去維也納lim ka-pi，博士koh kā nih一個目，講：「A-le-khu-suh tī 日本。」「Tī日本？！」「坐亞航ê去東京。」「去東京？！」「頂禮拜訂機票二張。」「機票二張？！---kap啥人？」「一張鄭亞力，一張藍陪陪。」「藍陪陪？…藍陪陪是啥人？」Tō是博士辦公桌tī A-le-khu-suh隔壁，頂禮拜訂機票伊有看著。

巷á底這間，「腳底神仙」腳底按摩專門。A-le-khu-suh píng車了後，ta̍k日去「腳底神仙」物理治療。Hia ê腳底小姐看愛君來，好禮相爭叫：「歡迎光臨」愛君問：「恁tsia敢有一個陪陪？」「陪陪o͘h？伊tsit-má hioh睏無來。」「Tiang時會轉來？」領班ê講：「M̄知neh，頂禮拜去日本tshit-thô，m̄知tiang時才會轉來。」目睭看愛君ê腳，koh講：「人客，叫別個小姐服務，好無？阮tsia紅紅上gâu掠。」詳細kā問，才知影這個新來ê腳底小姐陪陪，生作細細漢，紅紅講 ，染金頭鬃紅指甲，胸前phāiⁿ二粒屏東椰子，奶á有去phu-la-su-tsi-khuh整容手術。生理上kài好。A-le-khu-suh若來，攏hō͘伊「物理治療」。

到tsia來知影代誌大條。趕緊去玉山銀行對數，數簿tǹg出來，存款零！Tiang時50萬領了了，tshun無半仙。銀行小姐碧瑤kap伊有熟，講頂禮拜A-le-khu-suh kap一個查某gín-á來領去。「敢是細細漢，金頭鬃紅指甲，胸前phāiⁿ椰子？」「屏東ê hiah大粒。」碧瑤小姐比hō͘伊看：「Tō是伊。」Taⁿ害a，in A-le-khu-suh tuè人走，tshuā phāiⁿ椰子ê腳底神仙陪陪，tī伊18歲生日hit工，50萬現金總領，坐亞航ê作伙去日本「生日快樂」。

過來4個月無消無息，公司上班，同事使目尾，kha-tsiah後tshī-bú-tshī-tshā ：「Bē轉來a lah。…khah講mā是新雞-nuā-á khah好，…」漸漸，漸漸，uì台北市苦心ê 4月到怨嘆ê 5月，uì中山北路懊惱ê 6月到憤慨ê 7月，lú想lú 受氣m̄願；漸漸，漸漸，he老雞母hō͘人放sak ê心情，變作「好a，作你攏mài轉來！’你會，我mā會’ê決心。Hit日下班前一分鐘，行來博士ê辦公桌，kā伊射一枝親蜜tah心ê目箭，講：「來，你tshuā我來去維也納lim ka-pi。」

總是a，終其尾a in A-le-khu-suh mā是又koh轉來。「Honey，我轉來a。」入門tō大聲huah，bē輸hit日早起出門去上班，下晡下班tú-tsiah轉來 。Kā看，ai-io-uê!beh thài會認得？規粒hái-kat-a頭siah kah光光若金瓜，niau-鼠-á嘴鬚無去a。目睭皮腫腫kho͘一kho͘烏ê，概成一禮拜無睏。拖一雙運動鞋，tha̍h一領T-sia-tsuh，胸前tǹg英文大字：「I love Madonna」。「轉來beh創啥？…sáng叫你轉來？！…攏mài轉來好lah！」in某開始罵。「Honey，我ta̍k日teh想你，趕緊轉來看你。」「看著鬼！…想你ê死人lah！…錢領了了作你去，放我kap兩個gín-á tī tsia niauh-niauh看，phōng-phōng siû，一通電話to無！你teh想，想你ê死人！…」氣kah人phi̍h-phi̍h-tshuah。

奇怪a，頂回澳門pua̍h-kiáu轉來，錢輸kah空空，mā是歡喜koh流目油，kā伊「honey」lám leh tsim：「…你轉來a，我煩惱kah beh死…」Taⁿ這回怎樣變siàng?無講「honey，你轉來a」。「離婚！…我beh離婚！…」愛君大聲嚷，mà-mà-háu，相手giú leh khau頭鬃。莫怪a，這4個月陪陪陪去tshit-thô，日本、韓國、琉球四界去。尾a tī Ha-ua-i錢開beh ta a，遇著一個泰國生理人頓巴參，kap伊仝款，niau-鼠-á嘴鬚koh二tsàn ê hái-kat-a頭，講是tī首都Ban-kok開大家來觀光大飯店，請in去tshit-thô͘。第二工，陪陪tuè伊走，也無講一句bai-bai。「離婚？！你teh講啥物siáu話？…那有可能！」愛君hō͘伊罵，khàu lú大聲，一siū頭鬃雙手大力giú，khau kah若雞母tshíng ê｡A-le-khu-suh雄雄去想著，定著是有別個查甫人…「你講！是啥人？！…是啥人？！」一桶烏醋、一桶紅醋、一桶白醋tshia-tshia hō͘倒，相手掠伊ê肩胛頭大力直直hia̍p。「你講！是啥人？！…你講！…」「啥人？啥人是beh按怎？tshìn-tshái路邊khioh一個mā比你khah嬴！」可惡a，成實這個查某tsiah無情，才四個月niâ …連這句話也講會出來。Lú想lú m̄願，定著是hit個死博士，普通時tī辦公室，不時使目尾teh看in某，…可惡a，趁伊無tī ê時kā伊拐！「tshìn-tshái路邊khioh一個，…」好a，m̄知恁pē ê厲害，拍一枝hō͘你到。隔轉日，拖一雙運動鞋，穿hit領「I love Madonna」ê T sia-tsuh，行入來辦公室。博士看著，ia̍t手叫一聲，「你轉來a」，A-le-khu-suh行uá去，mā是笑面叫一聲「我轉來a。」，Té槍pué出來tō kā pōng，一槍pōng桌頂，一槍pōng椅腳。博士驚一下gāng-gāng去，嘴á開hāⁿ-hāⁿ 哀bē出聲，若佛á tshāi tī hia bē tín動。雄雄huah：「走！緊走！…」才想著peh起腳lōng。又koh一槍，tú好 tuāⁿ著腳，人tō phak落去。走過來jiok in某愛君，這二個鬥一擔，順續tio̍h hō͘死！一枝槍gīm tī手裡四界烏白比，辦公室內底小姐phi̍h-phi̍h tsùn，驚kah ki ki叫。猶是頭家王東南膽在，少年ê時bat tī金門作過兵，椅頭á giâ起來，相真真大大力tō kā khian去，順勢一腳 liòng kuân，踢一步kha-la-teh，tsàm一下A-le-khu-suh車畚斗倒頭栽，倒tī土腳據在人制裁。

結果「殺人不遂」官司起訴，判6冬。關3冬了，teh beh假釋，人問伊：「鄭亞力，你有悔改無？」A-le-khu-suh嘴齒筋咬leh應：「我今á日踏出這個監牢，第一tō是去買一枝槍，tshuē hit二個死無去ê!」所以無假釋放伊出來，koh再好禮關3冬，kap大尾鱸鰻關一間。Hō͘大尾鱸鰻欺負強姦，修理kah金金，6冬到到才放出來。這回教示了到khuì，m̄敢koh作怪，放tiau beh thâi人。獄長kā伊警告，後回若koh入來tsia，m̄免想beh出去。

Hit個進前，in某愛君去法院告離婚，kap博士結婚。公司ê人聽講A-le-khu-suh放出來a，替in緊張，這回taⁿ有戲通好看。總是A-le-khu-suh出來了後，教示kah乖乖，m̄敢tshīⁿ-tshn̍gh，無去攪擾、tshuē人算數。半冬無事過了，雄雄東南旅行社同仁，人人接著一張紅帖，某時某日tī國泰賓館敬候光臨，阿拉頓肉小姐kap鄭亞力先生beh結婚，邀請大家來食喜酒。

Hit日白西裝、烏皮鞋、紅ne-khu-tái、mā是koh niau-鼠-á嘴鬚兼二tsàn樓á hái-kat-á頭，tshio-tshio iāⁿ iāⁿ 。A-le-khu-suh看著愛君kap博士，行路khau-風專工uá來介紹：「這位是阿拉頓肉小姐。」Hiàⁿ 頭kā看，ai-io-uê，牛爺馬爺kuân A-leh-khu-suh一個頭，二個hīⁿ gia̍h-gia̍h，一個面長長，中央一枝phīⁿ若麻竹筍bē記得割。Tàm頭落來，一領làu胸烏禮服，tah金閃閃sih-sih，胸前二粒肉奶若屏東椰子，tsiⁿ kah tsa̍t-tsa̍t，強beh lak出來。「Hi，please to meet yo͘。」 阿拉頓肉小姐英語100%。愛君kā看，三kuāⁿ真珠àm-kún phāiⁿ到肚臍，ta̍k粒雞母uê，若美國土豆hiah大粒。「Hi，please to meet yo͘。」博士m̄認輸，l¡u英語40%。「恭喜o͘h，A-le-khu-suh！恭喜o͘h，阿拉頓肉小姐。」愛君杯á gia̍h kuân-kuân kā in敬酒。

尾a調查出來，這位阿拉頓肉小姐是Ma-le-si-ah（馬來西亞）ê律師，來台灣有緣kap A-le-khu-suh熟sāi，kap in翁離婚，tuè A-le-khu-suh走。無外久，A-le-khu-suh tī中山北路開一間「Alex旅行社」，內面tshiàⁿ幾luā個人，生理bē輸東南。人講A-le-khu-suh生作猴猴，生成有查某人緣，為著查某去落難，mā是為著查某出頭天。