《陳雷文選》

 | | | 轉寄

救鞭

作者 陳雷 2007.04.01

邱董ê kap伊ê太太婚姻bē和，是幾年來公司內外攏知影ê代誌，大家做伙ê時開講ê材料。主要是討論in bē和ê原因，無人真知。所以講來講去，難免謠言種種，有人講是錢，有人講是年歲ê關係……。大部分ê職員比較khah同情邱董ê立場，並m̄是因為職位ê關係。事實邱太太有一個小姐脾氣，心情bái tã亂開錢。小bái小開錢，大bái大開錢，真厲害ê是，也bat坐飛機去日本東京，tī銀座se̍h百貨公司，一禮拜m̄轉來。這款開錢ê方法，大家看bē慣勢，親像開in ê錢按呢。單單幾位新來ê少年查某員工，khiā tī女性解放ê立場，支持邱太太。M̄-kú tse kan-na是心理上、口頭上ê支持，對邱太太不滿ê婚姻，實質上無啥幫贊。

「查某人ta̍k日穿suí-suí去thit-thô，有錢通好開，愛啥有啥，猶teh嫌！」邱董ê擁護者按呢講。

「恁查甫人上無意思。查某人tō m̄是機器，ta̍k日開錢買suí衫就會歡喜？」邱太太ê支持者替伊辯護。

結果這個問題辯來辯去無結論。一直到hit年俄羅斯大馬戲團來台灣表演了後，才有明白ê解決。

關係這個醫術上ê難題，邱董本人有去請教名醫。花柳科介紹去肝科，結果講是XO lim siuⁿ tsē，影響著肝kap hoh-lu-bóng，所以查甫人無查甫人ê氣概，尤其是邱董ê比邱太太大十八歲，是真大ê不利。伊每日看阿某穿裙抹胭脂，食飽去坐美容院，心頭就po̍k-po̍k tshiak，像舊年公司了錢hit時ê心情，tsē少會影響公司ê業務。這點伊大細siān公司大股東劉董ê上關心。所以劉董問伊ê太太，伊ê太太問小妹，才知影這個問題ê醫學性。

劉董ê khiā tī查甫人ê立場同情邱董，kā伊勸：「這個症頭kap癌相像，tshuē中醫才有效。」Hit時台灣信中醫，也是莫怪。報紙the̍h來看，廣告一大堆，中醫會治癌，西醫bē曉。若是西醫治癌ài開刀，見開見死。中醫食藥免開刀，而且錢nā包khah tsē，koh會kā你包醫。

劉董介紹邱董去看中醫，就是盛德堂ê名醫，時常有人登報紙感謝伊。這中醫診斷是敗腎，大概是相當咱西醫ê腰子病。後來去元老堂，講是脾虛，koh來去漢生堂，講是膽寒，漢生堂劉漢生kā伊說明，tse kap西醫ê膽石無仝。藥á食來食去，有效ná無效，無啥「起色」。最後一帖，劉漢生才講：「欠一味」，伊講：「…絕症用極藥！若是虎鞭…包好ê！」He口氣，大概差不多是「包醫」ê意思…邱董聽講是「絕症」，到tsia來，khah tsē錢mā tio̍h ài開落去！

Hit年俄羅斯馬戲團是按怎來台灣公演，無人知影。第一俄羅斯kap咱無幫邦交，第二無外久前咱有teh反共抗俄。大概是這個原因，生理無好，演無幾場就huah倒。Hia ê虎豹獅象無飯食，beh拍賣。M̄-koh tse西伯利亞虎是全世界公訂beh絕種ê動物，尤其sī hit隻白雪虎，全世界tshun無幾隻，m̄是隨便人會使買。

邱董ê去木柵動物講beh捐虎，討一張證明去買虎，結果四隻公ê做一khùn總買。掠轉來厝裡無所在飼，tú好五樓厝頂闊闊，四角四枝鐵thiāu，一隻p†k一枝，用鐵鍊鍊ām-kún，鍊虎腳。He厝頂熱，無像西伯利亞ê清涼。虎bē堪得熱，m̄食飯，m̄ lim水，kōh m̄ bat hō͘人鍊慣勢，受氣鐵鍊beh咬hō͘斷，咬到嘴流血，腳流血。厝邊ê人聽虎暝日哀叫，也驚也同情，拍電話報警察。警察來，tō是公司時常敬禮ê管區，邱董熟sāi｡伊kā管區ê講，狗teh叫，tsit-má賊真tsē，飼大隻狗beh顧賊。想想leh，m̄是辦法，tse虎pháiⁿ飼。叫thâi豬ê來thâi虎，特別kā吩咐：「卵核á留起來！」

可憐這隻虎死ê比活ê khah 值錢。你若是小khuá bat中藥就知，tse虎骨、虎肉、虎血khah贏美國仙丹、治百病、補百身，連虎屎mā有人beh，隔壁拍電話hit位陳先生買去、曝ta做漢藥。結果邱董thâi虎suah thàn真tsē錢，單單四枝虎鞭掛八粒卵核á kù-tsāi人ko͘-tsiâⁿ也m̄賣，beh留起來家己用。

Koh去請教中醫劉漢生：「Tse西伯利亞ê虎鞭敢好？」劉漢生聽講是西伯利亞虎，tàm頭so嘴鬚：「若是虎鞭lú寒ê所在lú好。…」賣伊一帖漢生堂ê祖傳秘方，講是伊ê阿公親身用過，真有效，無隨便hō͘人用。結果開真tsē錢，差不多mā是「包醫」ê意思。

不過thâi虎了後兩個月，邱太太又koh坐飛機去日本，tī東京銀座一禮拜m̄轉來。雖然是按呢，邱董是一個bat人情ê人。Tsia ê西伯利亞虎，一路hn̄g-hn̄g來台灣，對伊不滿ê婚姻來奉獻犧牲，對tse救鞭ê勇士，伊心內有十分ê感謝kap敬意。而且以後時常有人客來in tau拜訪，大家互相敬XO ê酒，o-ló伊排tī客廳hit四領虎皮，光光金金，尤其是hit領白雪虎皮，人客攏會伸手去摸，hō͘伊感覺tsia ê虎thâi了有價值。這世界減四隻西伯利亞虎，應當是無啥要緊ê增差才tio̍h。