《陳雷文選》

 | | | 轉寄

飛車女

作者 陳雷 2007.04.15

一

阿英出世hit日，風颱凱蒂掃過台灣南部，時速160公里。Hit暗in老母pak肚痛，teh beh生。In老pē出去tshuē產婆，可憐規個佳里作水，風颱雨息電，beh去tó tshuē人？

In老母家己一個，tī厝裡等到半暝，等無人。Pak肚大痛bē等得，點一枝蠟條家己生。Ná知影tse查某gín-á出世就行m̄ tio̍h頭，倒頭生，kha-tshng先出來。In老母艱苦生，真久才生出來。Gia̍h ka刀家己轉臍，流血流傷tsē suah昏昏去。

後來hit位開漢藥店ê大姑婆，小khuah bat時也運也命也hit款ê代誌，kā阿英in老母講，查某gín-á出世倒頭生，將來m̄好，會k„u代誌。所以阿英國中畢業了，in老母驚伊出代誌，留伊tuà厝裡，m̄ hō͘ 伊出門去外地。M̄-koh佳里雖然是真好ê所在，小小草地ná有啥物大前途？阿英乖乖tiàm厝裡兩年，tshuē無頭路，ta̍k日食飽îng-îng，tsia坐hia坐做小姐。In老母想想leh m̄是辦法，姑不而將，kā阿英講：「Ah無你去台南tshuē恁阿姊看māi!」

三年前，人紹介阿菊去台南三裕紡織廠做女工，一月日幾lãa千kho͘。阿菊食頭路了，ta̍k遍轉來厝裡tshit-thô，攏是一遍一領新衫。阿英常常聽阿母講kā漢藥店ê姑婆講：「阿菊趁錢真tsē，無輸in老pē。」後來過年hit日，阿菊穿一領e̍h-e̍h、siuⁿ細領ê牛á褲轉來，khiâ一台o͘-to-bái爆爆叫，全新名流牌150c.c.，tī大姑婆面前pok薰hō͘伊看。自hit時起，in老母嘴就tiām-tiām合起來，無講起阿菊gâu趁錢ê代誌。

所以，in hō͘阿英去台南tshuē頭路，實在是姑不而將ê bē放心。M̄-koh阿英像鳥á放出籠ê歡喜，kā老母講：「阿母你m̄免煩惱，我會聽阿姊ê話。我食頭路趁錢買新衫轉來hō͘你穿。」

He阿姊看草地來ê小妹，頭鬃一簇直直ka到hīⁿ á頭，烏裙一領闊闊拖土腳像b¡ng罩，也好氣也好笑，罵伊講：「你穿按呢m̄驚人笑？」Tshuā伊去遠東百貨公司五樓買一領新裙，青色ê koh有真tsē蕾紅花，短短穿起來，腳頭u看現現。

阿英穿腳頭u看現現ê新裙出去tshuē頭路，市內市外ta̍k位去。一目nih久三禮拜，tshuē無半項，心內tio̍h急。阿姊ka伊講：「免煩惱，beh趁錢免驚無，頭路不時來tshuē mā有。」每暗khiâ o͘-to͘-bái載伊四界去，tshuē朋友tshit-thô。

阿菊ê朋友lok-kò-sok-kò真tsē。阿英上熟sāi ê就是khiâ兩隻o͘-to͘-bái ê明山。這個明山今年十八歲，體格好，m̄愛讀冊。高中已經轉學四遍，猶teh讀高一。伊常常kā人講，讀冊是為in老母讀ê。另外一位朋友阿良，sán-sán猴猴，ta̍k日來tshuē。這位阿良以前tī鐵工廠做工，兵做了轉來無頭路。M̄-koh阿菊對阿良上好，伊kā小妹講，這位嘴pok一枝薰ê阿良m̄是普通人。伊o͘-to͘-bái是光陽135c.c.改裝，時速200公里，人叫做白狐狸。Kap人拚車，有贏無輸，趁錢若趁水，比食啥頭路攏khah好。阿英看hit隻白狐狸，tiāⁿ-tiāⁿ停tī門腳口，規身軀白白，頭尖尖，尾翹翹，真實是完全現代化ê流線型。斟酌看，車頭前有一隻thí翅ê烏bit-pô，實在有影，tse m̄是普通ê。

Hit陣tī台南市，若是khiâ車小khuá有成就ê人，自稱騎士，招招來結作一黨。這種騎士黨有大有小，有好有bái，若是市內自來上tshìng就是烏bit-pô。Bit-pô頭阿林，你m̄通看伊é-é猴猴，講一句話吞一嘴nuā，慢鈍鈍。兩年前，有一隊台北來ê玫瑰騎士，專工來tshuē伊拚車。Tī鳳山戰備公路頂面，阿林一個拚五個，無人拚伊會過。連一隻BMW也擋伊bē tiâu。He台北來ê玫瑰騎士，hō͘伊削kah片甲不留，轉去以後，無面子，名改掉。自hit遍以後，風聲傳出去，北部南部無人敢koh來招伊拚車。有人huah講伊hit隻紅火狐狸，用一萬kho͘改裝過，若是駛上車，像teh透風颱，時速240公里，縱貫公路台灣頭到台灣尾，三點半鐘走了了。

十三歲ê時，in老pē買一隻o͘-to͘-bái，伊半暝偷牽出去駛。Hit時民族路無像tsit-má hiah鬧熱。Tī公園路口，就是tsit-má遠東百歲公司對面，有一條大水溝，橋腳有一個真大空烏烏ê夜婆洞。黃昏暗ê時，就有幾lō百隻夜婆飛出飛入，出來食báng。Gín-á時常tī hia用索á吊石頭掠夜婆tshit-thô。阿林ta̍k暝招朋友阿良偷駛車，tuì夜婆洞peh kiā去到台南病院，才koh落kiā衝落來。後來阿林做頭出身了後，想著tse以前艱苦奮鬥ê日子，受夜婆神ê保庇，號名作烏bit-pô，一律禁止gín-á掠夜婆。所以in兩人khiâ車ê技術kap工夫，攏是自細漢家己苦練出來-ê，kap別人無像，正港第一流，人人看in上有夠重。

二

風颱戴安掃過台灣南部，風颱尾猶m̄走。Tī高速公路頂面，風sù-sù叫，雨落bē停。In四人坐兩隻o͘-to͘-bái，公路兩旁ê田裡，一簇一簇ê電火tuè車走。He車親像兩隻拍青驚ê野馬teh相jiok，掠bē tiâu，向南一直去。

一路無車，來到半屏山ê所在，hn̄g-hn̄g有看頭前四隻o͘-to͘-bái走真緊，tī路中央liâm-piⁿ結結作一伙，liâm-piⁿ散散排一排，衝來衝去teh相jiok。阿菊對阿良ê後壁khiā起來，大聲嚷：「Kā jiok過！」

阿良ia̍t一下手，hit兩隻車順風做一夥走。阿英目睭放kheh-kheh，kā明山ê身軀lám leh，m̄敢t›n動。He車lú走lú緊，伊lú lám lú ân，身軀像火teh燒。代先有聽著碰碰叫ê車聲，雄雄無聽見，hīⁿ á內hú-hú叫，親像無著土，已經輕輕飛起來按呢。

不知luā久才koh慢落來，阿英目睭thí金，看著正旁兩隻o͘-to͘-bái，tò旁也兩隻，排齊齊kheh tī中央，做夥teh走。In走緊，in也走緊，in走慢，in也走慢。Hit四位騎士攏真勇m̄驚風颱雨，thǹg-theh無穿衫。上正旁hit個頭殼有一頂扁扁ê拍鳥帽，ua̍t過來一一直看。阿菊hō͘伊看到烽火to̍h，大聲嚷阿良：「Kā jiok過！」

Hit個戴拍鳥帽ê ia̍t一下手，四隻車kheh uá來，tī路中央橫橫排一排，kā in遮leh m̄ hō͘ in過。M̄-koh in是烏bit-pô騎士，ná有hiah簡單。看真真，順hit陣風，忽一下衝過去。油放盡磅，放一pû青煙，走kah無看--去。Hit四位騎士bô想著會hō͘ in衝過去，放一pû臭煙，噴kah kui面kui身軀攏是土，真衰siâu，無法度，車停落來，目睭金金看hit兩隻車一直走無去。

半暝過了，阿菊in四個倒轉來到半屏山ê時，風有khah tiām，雨愈落愈大，kui路暗眠摸，雄雄頭前四pha真光ê電火直直照來，四隻o͘-to͘-bái póng-póng叫，遮tī路中央m̄ hō͘ in過。He足光ê電火照著bô停ê雨水，反射入去in目睭內，一時suah青暝無看去。有聽人huah一聲：「幹！」，閃bē赴，人掛車衝出去公路外，píng兩liàn，pua̍h落田裡去。

阿良一枝腳hō͘ o͘-to͘-bái teh leh，倒tī淹水ê田裡，kui身軀痛kah bē tín動。目睭金金看著四個thǹg-theh ê人影，橫橫排一排，一步一步行uá來。暗暗中間，伊偷偷伸手去摸正腳ê腳肚，摸著pa̍k tī腳肚ê尖刀，刀柄掛土ân ân gīm leh，tiām-tiām等in行uá來。

做頭hit個戴一頂歪歪ê拍鳥帽，kuân-kuân khiā tī伊面前。阿良看伊正手gīm一枝長長翹翹ê鐵槌，一個拳頭母四枝指頭á，尾指切無去。伊tō是虎頭蜂ê阿雞，注死m̄死，tō是in ê死對頭。He電光hō͘人影遮去，阿良無看著伊ê面，有聽著伊ê聲，sih-sih-suaihN-suaihN，親像無食油ê破牛車lián。

「幹…恁…娘！m̄成gín-á，kap恁pē拚車！…」話講一半，鐵槌á gia̍h kuân起來，相真真kòng落去，連續七八下，一台光陽135c.c改裝，kòng kah mi-mi-mauh-mauh。阿良嘴齒筋kā leh，刀柄gīm hō͘ ân，beh pué刀á出來kap伊拚。Hit時阿雞ua̍t一個頭，停手無koh kòng。兩腳大步行去明山hia，仝款鐵槌á五六下，hit隻車kòng hō͘ pháiⁿ。

按呢才放in suah，四個騎士khiā tī公路邊排一排，lān鳥á掠出來，一人順風suān一pû尿，車khiâ leh做in去。

隔轉日，m̄成gín-á阿呆來公園機車行tshuē阿林，the̍h一個塑膠袋á hō͘伊，講是in頭家beh送伊。阿林講真多謝，恁頭家m̄通tsiah好禮。手拭拭leh，伸入去袋á內jîm，摸著一項tīng-tīng nńg-nńg ê物件，倒出來看，夭壽一隻烏烏kòng死ê夜婆，一條索á倒頭吊。

「你想beh死！」阿林罵阿呆，heh掠伊來拍。阿呆變一個鬼á面，走kah無看去。

阿林kā kòng死ê夜婆吊tuà門口，叫大家來開會。He lok-kò sok-kò十幾個騎士，看hit隻死夜婆hō͘風吹leh tin-tong hàiⁿ，有人受氣，有人愛笑。阿良兩粒拳頭母tsiah大粒，伊講：「Tse虎頭蜂愈來愈ah霸！」

Kā昨暝公路頂風颱hō͘冒險ê代誌講hō͘大家聽。阿雞thÆg-theh khiâ車遮in ê路，公路hiah大條m̄ hō͘ in過，mā in m̄成gín-á。無代無誌kā in兩隻o͘-to͘-bái kòng pháiⁿ，差一sút a hō͘ in用鐵槌拍死--去！

坐tī後壁面尖尖ê廖紳士，穿一su tshio-tshio白色ê西裝真憤慨，khiā起來講大聲話，拍胸坎，弄狗相kā。

「幹！ah實在真ah霸！…kap in拚！he虎頭蜂無實力，…m̄免驚，拚死出代誌，棺材本五萬kho͘我包！」

紳士廖家己無khiâ o͘-to͘-bái，伊是穿se-bi-lo，坐「腳裡落褲」(Cadillac)ê人…。m̄-koh你ài知，伊地下kiáu場做真大，聽講nā是有人拚車拚khah大ê時，伊一遍生理作幾lō百萬。

各位坐土腳ê騎士看紳士廖按呢憤慨，也自然tuè伊憤慨起來。明明有聽伊按呢講，若是拚死也有錢好趁，ná有tsia好空？！tse生理khah算mā算會和。大家khiā直比胸坎，gîm拳頭母圍uá來。一隻m̄知死ê tshio雞角kok-kok-叫，圍tī中央。阿林一手sa來，piak一ē ām-kún at hō͘斷，馬上請廖先生kuāⁿ去tshue阿雞，hit暗通知伊。

「某時某日，不管透風落雨，有卵核ê來健康路解決。」

健康路就是一條直直ê大路，路面闊闊攏無破空，hit當時拚車上高級有面子ê所在。而且nā是正經有修養ê騎士，普通無人愛講「拚車」，攏講是「解決」，khah有氣魄。

紳士廖去拜訪四枝指頭á阿雞，請伊pok一枝三五ê薰，hīⁿ孔邊講一句話hō͘伊做參考。

「烏bit-pô無實力，kap in拚，m̄免驚！…拚贏一擺三千kho͘我包！」

阿雞聽了有理，目睭金金看hit隻tshio雞角，„m-kún tin-tōng hàiⁿ，he「三千kho͘」tuà頭殼內緊緊轉二、三lìn。紙the̍h來、大大字寫一字「戰」。某時某日、不管透風落雨、男子漢大丈夫、一切tuà健康路來解決。

三

永福路巷á尾電火暗暗真有浪漫氣氛ê南園，大家來唱卡拉OK，歌聲kē-kē，lim bi-luh ê心內像嘴裡唱出來ê歌句，有真實感動ê朋友情：

「有緣千里來相會，見面歡喜lim一杯，…。兄弟做伙li̍k胸坎，好酒通醉講大話，英雄好漢無論輩，…」

愛唱歌ê阿菊唱一條「霧夜華爾茲」，koh手牽手，kap阿良唱文藝愛情「明月港都來相會」…明山上愛文夏ê「阿母請你ai保重」，唱bē好勢，唱kah走調。最後大家乾杯，唱「勇敢ê男兒」就是in拚車ê歌。

「咱攏是勇敢ê男兒，今日拍拚來犧牲，阿母請你ài原諒，為著生活，為著名譽，…咱攏是勇敢ê男兒，今日慷慨來犧牲，妹妹請你ài瞭解，為著面子，為著金錢。…」

Hit暗無月，in轉來到公園口ê時，滿天頂ê星tsia一粒hia一粒，親像大大細細ê真珠，iā kah一四界無人khioh。He銀河像一條掛tī天頂tsiah大條ê鑽石phuā鍊，suí tang-tang，金sih-sih。In兩個姊妹á相the khiā做夥，giâ頭看天頂，醉醉ê頭殼內有一個古怪koh真實ê預感。今暝拚車會大贏，in會贏真tsē錢，he天頂ê珍珠、鑽石phuā鍊攏是in ê，…。

一人點一枝香，khiā tī橋頭向烏烏一大空ê夜婆洞拜拜，今暗阿菊kap阿美虔誠請夜婆神保庇，hō͘拚車大贏。

四

Hit兩位食菜o͘-bá-sáng食菜馬虎，pua̍h大家樂真認真。In kap尼姑庵ê妙心大師平時有交陪，所以大師有特別kā in指點，私下hō͘一個pua̍h大家樂ê秘訣。就是為著這個大家樂ê問題，專工hit日叫孫á載in來健康路看人拚車。

若是烏bit-pô拚車，去到toh攏是人插插。In kap人kheh 規晡，才kheh著一位好位，tī一擔賣綠豆沙ê邊á。肥ê o͘-bá-sáng kā sán ê講：「按呢kheh tiō會死！…夭壽hō͘咱等tsiah tsē遍等攏無！」

Sán ê o͘-bá-sáng應伊：「人講這隊烏bit-pô m̄驚死上勇，駛車若像teh赴死，ta̍k遍攏有人出事。…今á日一定有，你看hit隻車。」

Sán ê ua̍t頭去看，後面一隻烏烏kuân-kuân棺材形ê車，車內坐一個運轉手，邊á坐一個pok薰ê中年人，鱸鰻hit型，就是平安葬儀行ê伙記。明明是載死人ê車，來tī hia等生理。肥ê o͘-bá-sáng看著死人車，就khah放心，親像嘴ta食冰枝，心肝火消一半。伊té-té ê ām-kún伸出去路裡看，hn̄g hn̄g hit頭，五、六枝旗á、幾lō十隻o͘-to͘-bái作一堆、頭前四隻kap紅旗á齊齊排一排、電火光光、碰碰叫。

「Ah ná猶bē beh開始？」

Hit四隻o͘-to͘-bái攏是頭尖尖、尾翹翹、現代化ê流線型。正旁hit隻kui身軀白ê，就是阿良ê白狐狸、拚車專用、m̄ bat輸過。坐tī白狐狸頂面、雙手l¡m 阿良ê查某，pa̍k頭鬃、湯thǹg赤腳，就是阿菊。阿菊拚車上蓋迷信、伊早早有kā阿英交代，thǹg赤腳才會贏。

Hit位先生人叫伊蘇裁判、穿一領白色té褲、薄薄通光像查某人ê內底褲，頭殼是抹油tshio tshio ê hai-kat-la頭、一手gia̍h三角旗á、一手講無線電話、tsông來tsông去真無îng。續落路尾hit頭一pha一pha煙火點to̍h起來，代先是霧霧ê白色，liâm-piⁿ變作豔美ê柑色、he火直直噴kuân起lih，一枝一枝像無停ê噴水泉，長長排做四排，通去到路盡磅ê所在。Kui路kā-kā滾ê人雄雄攏tiām去、kan-taⁿ有聽著爆爆叫ê車聲。穿通光內褲ê蘇先生tàm一下頭、三角旗ia̍t一下，四隻車像teh放大炮、作一khùn衝出去。 He車一隻jiok一隻駛過肥o͘-bá-sáng面前，伊看bē赴，手裡摸一kuāⁿ佛珠，嘴裡像食菜時按呢唸：「阿彌陀佛…阿彌陀佛…」。賣綠豆沙ê阿婆生理m̄做，一直hàiⁿ頭。

「夭壽oh！m̄驚死，駛tsiah緊！」

Hit隻白狐狸駛去到點煙火ê所在，ua̍t一個頭，koh倒轉來。一路做頭，sut一下衝過紅旗á線，差一sut à lòng著蘇先生，贏人一大節。大家作一khùn kā伊包圍起來，有人giú車，有人giú人。紳士廖走第一：「贏kah有tshun！贏kah有tshun」，the̍h三五ê出來請。

阿英看阿姊坐tī阿良ê後面，thǹg赤腳，笑bi-bi，翹腳teh pok薰。心內想：「實在有影，tse錢真好趁！按呢一tsuā來一tsuā去，就是三千kho͘！」伊學阿姊kā鞋á thǹg起來，tshun雙手去lám明山，kā伊ê身軀ân-ân lám來uá家己胸坎，tī híⁿ-á 後細聲講：「拚khah緊leh！」

Lim bi-luh了後ê明山，事實有十八歲少年人tuì阿英初初ê好感kap愛情，伊一句話khǹg tī心內無講出來。

「我拚hō͘你看！」

排tī倒旁，目睭gîn-gîn kā in看tō是虎頭蜂ê阿國，khiâ一台烏色BMW，像牛hiah大隻。蘇先生一面講無線電話，一面叫大家閃khah開。紳士廖臨時走--來，kā明山加油，拍伊ê肩胛頭。

「做你拚！有代誌五萬kho͘我包！」

He車真吵，明山無聽著伊teh講啥，kan-taⁿ有看伊tshun一枝長長ê手，五枝指頭á thí開一直ia̍t。

伊目睭尾看hit枝三角旗搖一下，像teh放火箭，做先就tsông出去。Hīⁿ á內親像有聽一個人一直teh huah：「拚khah緊leh！…拚khah緊leh！…」。雙手gîm ân ân，目睭看頭前，油一直催，心肝內無停一直講：「我拚hō͘你看！」。油放盡磅，車愈走lú緊，衝過肥ê o͘-bá-sáng頭前，伊又koh像食菜時按呢唸：「阿彌陀佛！」賣綠豆沙ê阿婆一直hàiⁿ頭。

「夭壽oh！駛tsiah緊beh去赴死！」

一句話講bē了，雄雄hit隻BMW tsiⁿ過來伊頭前，阿良想beh閃，suah hō͘滑去，tshū一下衝tuì路邊出去，人掛車連續pìng兩、三liàn，tuì tuì tsông著電火thiāu，tsiⁿ作兩節。續leh有聽人huah：「走！」一聲炸彈大爆炸，一簇大火掛烏煙tshìng到電火thiāu hiah kuân，o͘-to͘-bái to̍h火燒起來。

兩位o͘-bá-sáng看人出事，趕緊向火燒ê所在走去。Sán o͘-bá-sangkhah2 gâu走代先到，m̄驚火燒危險，kheh uá近去看。He查甫gín-á倒仆仆，頭歪一旁，一領牛á褲thiah做兩tè，土腳一堆血。另外hit ê查某gín-á，離伊差不多二十外尺，倒tshiò tshiò，thǹg赤腳，一領有大蕾紅花ê綠裙掀kuân-kuân，兩枝白白ê大腿thì開開，看現現，kui面攏是血。有一個掛目鏡學生款ê少年人跪tī伊身邊，雙手jih伊ê胸坎，teh kā急救。

肥ê o͘-bá-sáng做尾到，走kah喘phēⁿ phēⁿ，青青猴猴問sán ê:「Ah是幾號！」

倒tī土腳tio̍h傷ê阿英，迷迷中間有感覺有人teh jih胸坎，卻是伊受傷真重，目睭皮thí bē開，hiⁿ á內渺渺茫茫，有聽人hn̄g hn̄g teh嚷。

「幹！Ah tse明明攏已經死a！Ah你猶teh jih啥！」 M̄-koh伊知影家己猶bē死，趕緊beh 叫hō͘人知，伊猶bē死！心肝內出大聲huah。

「我猶bē死！…kā我救！…」

事實伊tio̍h傷真重，ná huāh 會有聲出來，倒tī土腳連嘴唇攏bē tín動…三分鐘了後，身軀內ê血流了a，一粒好好活活少年ê心，勇勇跳十七年，就按呢停去a。

Hit陣四圍圍一大堆人來看，有人講死a，有人講猶bē，一人一句，鬧熱tshih吵，bē決定。一個白頭毛穿suí衫ê老阿公行uá去，tī阿英ê身軀邊行兩、三步，看看leh，用伊hit枝兩尺長ê薰吹指倒tī土腳ê查某。

「無效a lah！…看he血流hiah tsē mā知。」

Ná講ná搖頭，大家才做一khùn tiām去。

掛目鏡ê學生jih一晡無反應，gia̍h頭來看四周圍ê人，大家聽老人按呢講，目睭金金有看若無看，suah無人beh tàu腳手。後面兩個鱸鰻款ê大人行uá來，kā伊tshò幹kiāu。

「Tse明明tō已經死a，ah你是猶teh jih啥？」

姑不而將，伊停手無koh jih，tuì土腳peh起來，雙手bak kah攏是血。Hit兩個大人，一個是平安葬儀行ê伙計，一個是駛死人車ê運轉手，k„兩個屍體扛去車頂。He伙計ná扛ná tshò。

「幹！兩個攏是m̄成gín-á!」

Hn̄g-hn̄g有聽著警察車tân風螺á聲。看鬧熱ê人無人愛插事，聽著風螺tân，像hô͘蠅食屎hō͘人拍，做一kùn走了了。肥o͘-bá-sáng tuè tī sán ê後面，猶m̄甘願走。看火燒teh beh了，kohua2去看，lak袋á內the̍h紙出來，kap車牌頂面ê號碼一字一字勻勻á對，目睭tshuh tshuh，伊圓圓扁扁ê肉餅面hō͘火照著，烘kah燒燒紅紅會發光，tō是tī hit時出現了一個真美滿溫暖攏是春風ê笑容。

「今á日這個包有ê…」

Hit張紙袋倒轉去，問sán ê o͘-bá-sáng。

「你看有真無？正正tō是師父講ê，一個倒tshiò tshiò，一個倒仆仆，明明就是上杯。」

Sán ê應伊：「Ná會看無真？真實講kah準準。…佳哉今á日hō͘咱等--著，若無後日就beh開獎--a，…」雄雄koh親像想著一項真重要ê代誌，嘴掩leh，beh笑m̄敢笑，uá去kā肥ê-bá-sáng講：「夭壽oh！你看he十七、八歲ê查某gín-á，倒按呢，兩腳開開看現現，一領裙li̍k hiah kuân，敢會看得？」

伊ê朋友親像無聽著伊teh講啥，原在家己一面真春風溫暖，大ê肉餅面ê笑容，手裡the̍h hit kuāⁿ摸到金金發光ê佛珠，嘴裡tsa̍uh tsa̍uh唸：「443838…443838」。過路人聽無清楚，掠準是這個阿婆pháiⁿ嘴teh罵人死去三八三八。