《陳雷文選》

 | | | 轉寄

萬巒檳榔女

作者 陳雷 2007.04.28

你若是來阮萬巒食豬腳，tī beh peh上高速公路交流道前，tō會看著hit tsuā街á，雙旁一間一間ê玻璃厝，檳榔擔排kah tīⁿ-tīⁿ，五彩ê ne-ong燈閃閃熠熠。不管好天pháiⁿ天，凡若是寒流無來ê日子，（ah，阮萬巒uá恆春，四季如春。）he檳榔擔ê西施一擔拚一擔，lú穿lú少koh lú té。遇著生理khah無ka-ia̍h ê時機，（ah，罕罕也會有。）he西施小姐mā會大膽uì玻璃櫥á行出來，一個一個若芹蕉pak皮peh光光，tī街á tsa̍h人客，賣檳榔。我ta̍k日學校轉來uì tsia過，自然o͘-to͘-bái攏會慢落來，加減ná駛ná看。Ah，鬧熱ê仙境花市，爽快ê khi-mo͘-tsih m̄是外地人客會tàng完全理解ê。

第一工我tō有注意著，這個新來ê西施，bē輸暗頭第一粒出世ê星光，會siâⁿ人ua̍t頭koh kā看一擺。伊頭鬃尾pa̍k翹翹，染kah紅huáⁿ 紅huáⁿ ，mua一領獻獻ê紗á，kuân-kuân坐tī玻璃櫥á內，裙té kah差不多無看見。我kan-na有看著he肉感、肉色ê腳腿。

第二工，伊看我uì hia過teh kā看，笑一下kā我ia̍t手。第三工，我擋bē tiâu a，停落來買檳榔。Taⁿ 我檳榔西施ta̍k日看，m̄-kú koh bē曉食檳榔。Tshìn-tshái the̍h一包tō是。找錢ê時，緊koh kā看khah真leh，he目睭仁大粒koh烏水，bē輸烏鑽石ê蓮霧。嘴唇抹粉紅，翹翹kap法國明星B.B.仝款。伊又koh笑一下，我m̄知按怎，無張持緊張家己漏嘴講：“我明á tsài koh來。”

隔轉日koh來，伊講：“阮ê檳榔上蓋贊。”事實tse檳榔tsa-hng我有刁治kā試過，苦koh澀，實在晡bē落去。“晡久會甘，有夠khuì力。”我按呢kā pûn:“別擔ê我攏食bē合。”

過來ta̍k日來買檳榔，有時一日來二擺。才知影伊名作香水。不時芳水hiù kah芳芳，話ta̍uh-ta̍uh講。Hit日我專工候kah uàⁿ-uàⁿ，等伊下班，招伊去食阮萬巒豬腳。“你猶未kā我講你ê名。”“失禮，失禮，我叫正雄。阮tau人叫我Masa。”“我叫月娟。”“你m̄是叫作香水？”“玻璃櫥á內底叫作香水，玻璃櫥á外面叫作月娟。”伊笑笑á講。原來「香水」是伊賣檳榔ê「藝名」。 伊厝裡有三個小弟，攏teh讀冊，伊是上序大。國中畢業tō無koh讀a。“你是按怎來賣檳榔？”我關心問伊。“阮老pē kā我講“去賣檳榔好lah！”，我tō來賣檳榔。”“你實在真乖koh聽話。…恁老pē teh作啥？”“伊tī工廠。”我心內同情伊。咱tsia台灣真tsē賣檳榔ê查某gín-á攏是厝裡散赤，無法度通讀冊，ài賣檳榔鬥thàn錢飼家庭，hō͘小弟á去讀冊。“A̍h你leh？猶teh讀冊？”“我？我tī義守讀第二年。”伊二粒目睭liô 過來kā我tsîn:“讀冊上好，thàn錢無簡單。你看阮賣檳榔，一個月ài賣外tsē你敢知？”Tse我知。In賣檳榔ê mā是ài算業績，才tio̍h穿少少裝suí suí，hō͘人客食冰枝，看作o͘-lin-gio tshit-thô，……我心內感覺pháiⁿ勢，真正關心，想beh瞭解伊…。

了後定定招伊出去。Ta̍k擺beh用o͘-to͘-bái載伊轉去，伊攏m̄。我想in tau大概tuà tī真破散ê所在，m̄愛人知。Hit回去土雞城食土雞，經過月世界，一稜一稜ê山崁直直尖尖，hō͘月光照kah禿禿。阮坐tī山崁下腳，月tī山後，近kah若像伸手tō摸會著。我會記得電視頂bat看過，美國Armstrong登陸月球ê時，he月面是平坦ê沙地，無尖尾ê山崁。雖然tī tse無半枝草、無半隻蟲ê月世界，表面完全無生命，暗眠若男女二人來，應該會感覺kap月頂面仝款完全ê孤單稀微，不過愛情ê花欉發了上蓋ām。

“你敢有查甫朋友？”這句話我心內khǹg真久beh問伊。伊面ua̍t 一旁，停一時á才應：“有若無leh。”“按怎講？”“Khah早有，tsit-má無--a。”伊ê聲概成會tsùn，像tshe-lo͘h（cello）teh奏Ba-hah（Bats）ê音樂，苦苦甘甘。當這時，尖利（lāi)ê山稜一tsuā一tsuā暗去，天裡ê烏雲suá來tsa̍h著月。“恁查甫ê攏仝款。”“O͘h？…”“有目睭無心肝。Kan-na愛看查某gín-á suí腳suí面，攏無要緊tsin內面有啥。”伊拳頭母tah家己ê心肝頭。我瞭解伊ê意思，伊是感情ê受傷者，mā是環境ê受害者。我一時替伊不平。

愛情hō͘我勇氣，我去tshuē阮老pē討一個頭路。阮老pē tī高雄開一間廣告公司，員工幾nā十個。“你這個朋友會曉創啥？”伊問我。“攏會曉。聽電話、寫字、泡茶…”“啥物學歷？”學歷有啥路用？會作代誌上要緊。“伊--伊國中畢業。”“Bat作啥頭路？”Taⁿ害a，“伊…伊teh賣檳榔。”“賣檳榔？！”阮老pē目睭tsiah大kòng:“你敢知影賣檳榔一個月thàn幾萬？”“無外tsē--lah。”“無外tsē?咱tsia查某gín-á無一個kap he會比--得。”“Tse…tse m̄是錢ê關係，…頭路ê品質ê問題。”拜託一晡，了一碗公nuā，討一個助理祕書ê頭路，接電話、khioh批、泡茶…，一個月萬六kho͘ …“作了若會用得，三個月後加薪。”

我走去tshuē阿娟報好消息，已經玻璃櫥á內面換一個小姐teh顧。頭毛換染金色，仝款mua獻胸ê紗á，一領迷你熱褲té kah bē輸老阿婆á ê內底褲。“香水leh？”“無作a，in老pē叫伊轉去。”我驚一tiô，是m̄是in老pē tshuē著khah好thàn ê頭路叫伊去？聽講KTV陪人唱歌、舞廳陪人lim酒攏比賣檳榔khah好thàn。“你敢知影in老pē工廠tī tó?”我緊張問。“Uì tsia直直去，到hia uat正旁，koh直直去，到hia koh倒旁直直去…，上尾á間tō是。”“你敢知影in老pē叫作啥？”“陳順益。”

O͘-to͘-bái tshui leh緊走。Tshuē著hit間「榮光紡染公司」，kuân牆á圍leh，鐵門有人teh顧。我問顧門ê:“恁tsia員工敢有一個陳順益？”“你tshuē伊beh創啥？”“我有要緊ê話beh kā伊通知。”伊入去內面，liâm-mih出來開門tshuā我入去。機房lìn -lòng叫，伊戴一頂安全帽khiā tī hia teh看，人kuân-kuân烏烏，概成是工頭？“啥物代誌？”伊問。“月娟ê代誌…”“阮月娟按怎？！”“伊ê頭路，…我替伊tshuē著一個好頭路。”伊掠我看一下，問：“你啥人？”

伊tshuā我去一間辦公室坐。我kā伊請求：“阿伯，這個頭路無像賣檳榔hiah好thàn，m̄-kú品質加真好。”伊tàm頭：“Hm̄h，品質，品質真要緊。”概成家己teh kā家己講。“阮老pē家己ê廣告公司，一個月萬六kho͘。三個月後加薪。”伊the̍h薰出來pok，一個小姐入來，講：“日本電話。”伊電話gia̍h起來，mo͘h-si mo͘h-si日本話直直lù。講suah，kā小姐講：“叫阿發a這張訂單後禮拜tio̍h-ài出貨。”Liâm-mih小姐轉來：“頭家，發a講拜一tō出貨。”Taⁿ苦a，我敢有聽m̄ tio̍h?伊tō是公司ê大頭家？…A̍h thài 叫in查某kiáⁿ去賣檳榔？A̍h thài m̄ hō͘ in查某kiáⁿ讀大學？…A̍h thài會…

“你阮娟a bat外久a？”伊才koh問。“3個月、4個月a…”我心內受氣，問：“阿伯，你thài 叫伊去賣檳榔？”伊koh the̍h一枝薰來pok：“阮娟a ho͘ⁿh，kap阿旭a冤家，a̍h tō tiuⁿ m̄讀冊，tsia頭路便便也m̄食，m̄才會人受氣kā罵“A̍h無你去賣檳榔好lah？”成實tiuⁿ leh tō去賣檳榔……Ai-ioh，穿穿he敢成實會看得？這個gín-á ho͘ⁿh，tsīng細漢hō͘ in老母sīng pháiⁿ去。”“伊…伊khah重感情lah。”我替伊辯解。“講阿旭a有目睭無心肝，kan-na愛伊ê身軀，無惜伊ê感情，連in熟悉ê啥物animal也bē 記得。”“熟悉ê animal？”“Hioh lah。舊年娟a去日本tshit-thô，東京地下鐵遇著阿旭a，講按呢相bat熟悉一周年紀念。”“O͘h，‘按呢mā 會使得’(anniversary)。”“Ai-ioh，我kap in母a tī阮番á寮熟悉30外冬a，mā m̄ bat teh計較啥物‘按呢mā 會使得’。Tsín ê gín-á實在kāu頭路。”“Tō是按呢冤家？”“Tō是m̄，khàu kah m̄食m̄睏，據在阿旭a姑成也m̄ tshap人。Hō͘我罵一句，a̍h tō tiuⁿ去賣檳榔。”

小姐又koh入來叫：“頭家，美國電話。”我kā伊相辭，伊吩咐講：“據在伊lah。我公司tsia mā幾nā個頭路隨在伊kíng。”出來到大門口，tú好一隻BMW烏頭á車hu̍t一下tsông到位。一個少年家跳出來，走過來這旁開車門。Uâ!代先uì車內伸出來是一雙尖尖ê紅皮鞋，屐á三寸kuân，koh來是二枝長長thiau-lāng、肉感、肉色ê腳腿。我一看tō認出來是阿娟ê。伊穿一su干烏té裙ê洋裝，戴一頂大頂白帽，圓圓ê面khàm一半。看著我，歡喜tsông來kā我lám leh：“你thài 會來tī tsia？”粉味芳貢貢。Hit個少年tuè tī伊後面uá來，穿一領有le-suh ê sia-tsuh，一領e̍h-e̍h-e̍h ê長褲，頭鬃luah kuân金siak-siak，像Elves Presley ê飛龍機頭。雙手kuāⁿ 4、5腳大細腳ê商品袋。“這個阿旭lah。”原來有目睭無心肝ê tō是伊！“你看，我ê生日阿旭a攏會記得。”伊指hia ê商品袋，原來是月娟ê生日。佳哉，佳哉，這個有目睭無心肝ê阿旭a，佳哉這回會記得。“Bai-bai！”娟a kā我ia̍t手。In二個人uì鐵門入去。我O͘-to͘-bái pho̍k-pho̍k-pho̍k踏hō͘發，m̄甘願，hit隻金tap-tap ê烏色BMW se̍h一liàn，騎轉來到阮萬巒ê街á。暗頭á當鬧熱，一間一間ê玻璃厝，仙境花市，五彩ê ne-ong燈閃閃熠熠。我O͘-to͘-bái liâu-liâu-á駛，tshîⁿ he恆春吹來ê南風，店裡teh放送燒lō siâⁿ人ê歌聲：

恁kā我號真suí ê名，
叫我穿真té ê裙，獻領ê衫，
hō͘我踏kuân屐坐kuân椅，
講按呢才bē tsa̍h著
我二枝肉感ê大腿。

用細間ê玻璃厝kā我té leh，
包裝作a̍p-á內底ê『洋娃娃』，
外口點五彩ê ne-ong燈，
hō͘過路人目睭tsha̍uh-tsha̍uh nih，
四圍ê pùn-sò看作仙境花市。

人客a，「歡迎光臨」，
來lah，來lah，
嘴哺檳榔，
目睭食冰枝，
無爽m̄免錢。
來lah，人客免細字，
阮tsia有上贊ê萬巒檳榔，
規街á路ê檳榔西施。