《陳雷文選》

 | | | 轉寄

愷悅公主

作者 陳雷 2007.06.10

"Tsi̍tpah bān! tsi̍tpah bān! tsi̍tpah bān! …"Hōng'a tōa siaⁿ hiu, siang tshiú gia̍h koân kàisêng teh huah bānsòe."tsi̍tpah bān! tsi̍tpah bān! …"Tsùn'a tòe i hán, kā Hōng'a kui singkhu mo͘h khílâi se̍h. Tsùn'a lâng sè hiuⁿ, Hōng'a sin pûi thún, tian tsi̍t ē tshe tsi̍t sut á siaktó. Putkò sūsi̍t tsóngsò͘ sī 99 bān, sǹg nn̄g pái a, kah bô tsi̍tpah bān. Huah tsi̍tpah bān ke tsin sóng tō sī.

"lâi! góa tshōa lí lâikhì Soho bé súi saⁿ! kìtsāi lí kéng, khòaⁿ beh kúi tsa̍p niá …"kā Hōng'a kûi leh tsim, tsim kah Hōng'a ngiau, gī-gī tshiò. He tsîⁿ nā kimtsóa tsi̍t pé tsi̍t pé la̍k-la̍k iā,"tsi̍t bān, nn̄gbān, saⁿbān …", kui thô͘kha lóng sī.

"lí khòaⁿ! Tsùn'a!"Hōng'a huah tōa siaⁿ, tsí hit tâi tiānsī."lí khòaⁿ! lí lah! sī lí lah!"Tsùn'a kiaⁿ tsi̍t tiô, siang tshiú kā Hōng'a ê io pàng khì."Koh lâi te̍kpia̍t pòkò, kin'áji̍t ēpo͘, thiⁿ bó tang lō͘ Gio̍ksan gînhâng tshiúⁿkiap àn …"Koh pàng tshiúⁿkiap hiāntiûⁿ ê lo̍kiáⁿ."iùsut'á, 20 thóng hòe, 155 konghun, phīⁿ thâu tsi̍t lia̍p o͘ kì …"Taⁿ hāi a, hit ê tsìntsêng, i ū khì Gio̍ksan gînhâng khòaⁿ kúinā pái, bêngbêng bô khòaⁿ tio̍h ū kàmsī ê hipsiòngki. Iausiū oh, m̄ tsai tī tóūi khì hō͘ hip khì? kóaⁿkín hia ê tsîⁿ khioh-khioh leh, ūntōng tē'á tē tsi̍t tē, antsoân bō tì leh, sái o͘-to͘-bái tsáu khì éng hô Hōng'a in bó a hia bih.

Keh tsoán ji̍t tsiâⁿsi̍t tsài Hōng'a khì Soho bé súi saⁿ. Tsùn'a kiaⁿ hō͘ lâng jīn tio̍h, antsoân bō tì tiâu-tiâu, m̄ káⁿ thǹg lo̍hlâi. O͘-to͘-bái thêng tiàm Soho thâutsêng, kā Hōng'a kóng,"lí ji̍pkhì tō hó. Góa tòa tsia tán."Hōng'a phêpauá kōaⁿ leh, kakī tsi̍tê lâng ji̍pkhì, tsi̍t lâu kàu gō͘ lâu, se̍h nn̄g tiám gōa tsing tsiah tshutlâi. Siang tshiú kōaⁿ saⁿê tē'á tsiah tōa ê.

Sing tshēng tsi̍t su pâng kim huikan o͘ ê lého̍k hō͘ Tsùn'a khòaⁿ, tn̂gtn̂g thua kàu thô͘kha. Koh lâi ōaⁿ tsi̍t thò pe̍h pho pho ê iûⁿ tsng, kah tsi̍t niá té-té-té ê bê lí kûn. Sòa lo̍hlâi thǹg kah kngkng, mua tsi̍t su húnâng á pòaⁿ thangkng ê lāité saⁿ kûn, lāibīn tsi̍t niá ū le-suh ê sèsè e̍h-e̍h ê saⁿkak khò͘,"lí khòaⁿ! Kháiia̍t kongtsú Tân Kimhōng!"tsi̍tsiang saⁿ tshùn koân kia̍h'á se̍h tsi̍t liàn, tshe tsi̍t sut á uaihN tsi̍t tò. Tsùn'a khòaⁿ kah tsē bē tiâu, khí kông peh khílâi kha lâi tshiú lâi, ngia̍uh-ngia̍uh bong. Hōng'a m̄ hō͘ i bong."lí kakī kóng ê, thàntsîⁿ huat pōng, beh tshōa góa khì Kháiia̍t, tòa kongtsú thò pâng ""bêng á tsài, bêng á tsài lâikhì tòa."Tō beh kap Hōng'a sńg. Hōng'a kā sak tsáu, m̄ kap i sńg."bêng á tsài, bêng á tsài tsiah phah sǹg."Súi saⁿ súi khò͘ siu siu khí lâi. Kìtsāi Tsùn'a tshit ko͘ tsiâⁿ peh ko͘ tsiâⁿ, m̄ tō sī m̄.

Hit kúi ji̍t tiānsī bô sinbûn, thiⁿ bó tang lō͘ Gio̍ksan gînhâng tshiúⁿkiap àn pò kúi 偌 pái. Ta̍k pái hipsiōng tshutlâi, phīⁿ thâu tsi̍t lia̍p kì, tsiàⁿbīn, piⁿ'á bīn lóng ū, tshingtshing tshótshó. Tsùn'a bih tī Hōng'a in bó a hia, kui ji̍t m̄ káⁿ tshutmn̂g, ná káⁿ khì tòa Kháiia̍t?! Kan-na tsásî o͘-to͘-bái tsài Hōng'a ùi éng hô khì Tāipak siōngpan, antsoân bō khàm ba̍tba̍t, m̄ káⁿ thǹg khílâi. Ánne kòe saⁿ lépài, ji̍tsî kuaiⁿ tshù lāi, àmsî hō͘ Hōng'a 刁 kó͘tóng tshòng tī, ōaⁿ súi saⁿ súi khò͘ hō͘ i khòaⁿ, hiâu-hue sái ba̍kbé, bî bîtshiò, kā i siâⁿ,"Kháiia̍t kongtsú Tân Kimhōng."Tō sī kan-na m̄ hō͘ i bong.

Ánne ta-sò koh tsheⁿiau, tī hia siūkhó͘ siūⁿ bô pō͘. Túhó bô gōa kú hôpêng pēⁿīⁿ pēⁿ àn po̍khuat, Tâipak Tshī"satsí （SARS）"tōa liûhêng. Tsùn'a khòaⁿ tiānsī teh pò, keálō͘, tiàm ni̍h sìkè lóng sûi lâng tah tsi̍tê ma-su-khuh, bīn am kah bā-bā, m̄ káⁿ tshoán khùi, kiaⁿ hō͘ lâng òe tio̍h"satsí". Tsi̍t sî siūⁿtio̍h tsi̍tê hó pō͘, thiàu khí lâi hiu,"Hōng'a, góa tshōa lí lâikhì Kháiia̍t."

Kòa tsi̍tê N95 ma-su-khuh, koh lēnggōa ēng sepò͘ tsoh tsi̍tê tōa tshùi am, túhó tōabīn khàm bā-bā, tshun hia̍h-á kap ba̍ktsiu. O͘-to͘-bái sái leh, lâi kàu Soho, tōa 扮tō ji̍pkhì. Bé tsi̍t su nâ hái ê setsong, kim tauh-liú-á ê sia-tsuh, Italíah si á ne-khu-tái, koh tsi̍tsiang satba̍k'á hî thâu tsiamtsiam ê o͘ phôeê.

Nn̄g kòjîn tshēng tshēng hósè, he tsapo͘ ê suibóng bô sèng kám lâm tsheⁿ Gary Cooper ê phàithâu, lâng kóng saⁿ phiat lâng tō ian, mā ū saⁿ, sì pun tshingtshun lâm tsheⁿ Kua Tsùnhiông ê pānsè. He tshâ bó͘ ê suibóng bô kongtsú bêngsing Grace Kelly ê hongtō͘, lâng kóng koân屐 saⁿ tshùn io̍h, kha-tshng thâu tō ū hong, mā ū sì, gō͘ pun tōatáⁿ gējîn X Hiáutan ê tsusè. Nn̄g lâng N95 kiam sepò͘ ê ma-su-kuh tah leh, tha-khu-sih tsē leh, sáng-sáng sèsè lâi kàu Kháiia̍t.

Tòa gō͘ tsheⁿ Kháiia̍t tōa pn̄g tiàm kongtsú thò pâng, tsia̍h ê sī Huatkok sik sai tshan, gû iû tshi-suh, gia̍h to gia̍h tshiám, lim ê sī n̂gkim kam tiⁿ ê siang-phéng, phih-phih pho̍k-pho̍k pù-phok-á, khin-khin khiang-khiang tsiúpueá; tshēng ê sī pòaⁿ thangkng ê sebāng kòa le-suh, khòaⁿ khílâi iⁿ-iⁿ iáⁿ-iáⁿ, khah siông sī bong bong so-so, thǹg kah kngkng; khùn ê sī tah báng-tà ê hônghō͘ bîntshn̂g, tó lo̍hkhì nńg-nńg sìm-sìm, iô iô tshe̍k-tshe̍k, huaⁿhuaⁿ híhí, kui mê bián khùn.

Nn̄g mê nn̄g ji̍tthâu kàu bóe tsoântêng lum sa-bi-suh（room service）, tsi̍t pō͘ bián ta̍h tshut kongtsú pângking ê mn̂g. Hit ji̍t tiongtàu līkhui gō͘ tsheⁿ Kháiia̍t, he siàuliân bo͘-i（boy） tshēng tsi̍t sin âng jiông khan kim si tsèho̍k, tì tsi̍t téng keⁿ̄g ko koân bō, khàm tsi̍tê N95 ma-su-khuh, khiā tsiàⁿtsiàⁿ tī tōamn̂g kháu tán. Bō'á thǹg khílâi, kā in tàm tōa lé, kóng,"Thank yo͘, tosiā kng lîm."Tsùn'a thêng tsi̍t khapō͘, kiâⁿ óa khì, tu tsi̍t tiuⁿ tsi̍t tshing kho͘ ê tsih-puh hō͘ i, kóng,"Very good. "He bo͘-i koh áu tsi̍tê tōa lé, ia̍t tsi̍t hētshiú, hut tsi̍t ē tha-khu-sih tú lâi kàu bīnthâutsêng.

Tsi̍tlō͘ hi-hi haha, tshiò tńglâi kàu éng hô. Hāngá kháu khiā nn̄g ê kéngtshat á teh tán. Hâ té tshiuⁿ, tshēng tòng tshèngtsí ê saⁿ, kòa ' khòng satsí ' ê ma-su-khuh, tshun tshiú tsa̍h leh m̄ hō͘ in kòe."tshiáⁿ lín tsit-má tsiāmsî m̄ thongkòe.""Ai-ioh, sī siáⁿmi̍h tāitsì?"Hōng'a késian mn̄g."hāngá lāi teh lia̍h lâng.""tsintsiàⁿ ê? lia̍h siáⁿmi̍h lâng?"Hōng'a késian kiaⁿ."tshiúⁿ gînhâng ê, ū tshiuⁿ gûihiám.""Ôa, beh kiaⁿ sílâng!"nn̄g ê kóaⁿkín liu suan.

Kòelâi pài it Tsùn'a tsài Hōng'a lâi kàu Kháiia̍t tōamn̂g kháu, túhó tsi̍t tùi a-tok-á tshiú khan tshiú ùi lāibīn tshutlâi. Tsapo͘ ê thì kngthâu, kòa hīⁿkau, tshâ bó͘ ê tshēng gû'á khò͘, mua tésaⁿ, hiān tō͘tsâi. Hit ê tshēng âng jiông khan kim si ê bo͘-i khiā ti̍tti̍t, keⁿ̄g ko bō'á thuh khí lâi kiâⁿ tōa lé, kóng,"Thank yo͘! Come again."He a-tok-á kàisêng bô khòaⁿ tio̍h iā bô thiaⁿ tio̍h, ma-su-khu kòa tiâu leh, tī tōamn̂g kháu lám leh siotsim, teh kóng bye-bye. Hōng'a ùi Kháiia̍t oânkang tshutji̍p ê āupiah mn̂g ji̍pkhì. Tse ji̍t siōngpan, tsiàusiông sàu thô͘kha tshing pângking, kàu àm sî tsa̍p tiám hāpan, kui ji̍t bi-bi-á tshiò. Khoán hit king kongtsú thò pâng ê sî, bong he bîntshn̂g nńg-nńg sìm-sìm, iô iô tshe̍k-tshe̍k, tshùi ná liām,"Kháiia̍t kongtsú Tân Kimhōng …, Bóng hihán lah."


「一百萬！一百萬！一百萬！…」鳳a大聲hiu，雙手gia̍h kuân概成teh huah萬歲。「一百萬！一百萬！…」俊a tuè伊hán，kā鳳a規身軀mo͘h起來se̍h。俊a人細hiuⁿ，鳳a身肥thún，顛一下差一sut á siak倒。不過事實總數是99萬，算二擺a，kah無一百萬。Huah一百萬加真爽tō是。

「來！我tshuā你來去Soho買suí衫！據在你kíng，看beh幾十領…」kā鳳a kuî leh tsim，tsim kah 鳳a ngiau，gī-gī笑。He錢若金紙一把一把la̍k-la̍k iā，「一萬，二萬，三萬…」，規土腳攏是。

「你看！俊a！」鳳a huah大聲，指hit台電視。「你看！你lah！是你lah！」俊a驚一tiô，雙手kā鳳a ê腰放去。「Koh來特別報告，今á日下晡，天母東路玉山銀行搶劫案…」Koh放搶劫現場ê錄影。「查甫人，20 thóng歲，155公分，鼻頭一粒烏痣…」Taⁿ害a，hit個進前，伊有去玉山銀行看幾nā擺，明明無看著有監視ê hip相機。夭壽oh，m̄知tī tó位去hō͘ hip去？趕緊hia ê錢khioh-khioh--leh，運動袋á袋一袋，安全帽tì leh，駛o͘-to͘-bái走去永和鳳a in母a hia bih。

隔轉日成實載鳳a去Soho買suí衫。俊a驚hō͘人認著，安全帽tì tiâu-tiâu，m̄敢thǹg落來。O͘-to͘-bái停tiàm Soho頭前，kā鳳a講：「你入去tō好。我tuà tsia等。」鳳a皮包á kuāⁿ leh，家己一個人入去，一樓到五樓，se̍h二點外鐘才出來。雙手kuāⁿ三個袋á tsiah大ê。

先穿一su pâng金花干烏ê禮服hō͘俊a看，長長拖到土腳。Koh來換一套白波波ê洋裝，kah一領té-té-té ê迷你裙。續落來thǹg kah光光，mua一su粉紅á半通光ê內底衫裙，內面一領有le-suh ê細細e̍h-e̍h ê三角褲，「你看！愷悅公主陳金鳳！」一雙三寸kuân屐á se̍h一liàn，差一sut á uaihN一倒。俊a看kah坐bē tiâu，起狂peh起來腳來手來，ngia̍uh-ngia̍uh摸。鳳a m̄ hō͘伊摸。「你家己講ê ，thàn錢發pōng，beh tshuā我去愷悅，tuà公主套房 」「明á tsài，明á tsài來去tuà。」Tō beh kap鳳a sńg。鳳a kā sak走，m̄ kap伊sńg。「明á tsài，明á tsài才拍算。」Suí衫suí褲收收起來。據在俊a七姑成八姑成，m̄ tō是m̄。

Hit幾日電視無新聞，天母東路玉山銀行搶劫案報幾偌擺。Ta̍k擺hip相出來，鼻頭一粒痣，正面、邊á面攏有，清清楚楚。俊a bih tī鳳a in母a hia，規日m̄敢出門，ná敢去tuà愷悅？！Kan-na早時o͘-to͘-bái載鳳a uì永和去台北上班，安全帽khàm密密，m̄敢thǹg起來。按呢過三禮拜，日時關厝內，暗時hō͘鳳a刁古董創治，換suí衫suí褲hō͘伊看，hiâu-hue使目尾，微微笑，kā伊siâⁿ：「愷悅公主陳金鳳。」Tō是kan-na m̄ hō͘伊摸。

按呢ta-sò koh生iau，tī hia受苦想無步。Tú好無外久和平病院病案爆發，台北市「殺死（SARS）」大流行。俊a看電視teh報，街á路、店裡四界攏隨人tah一個ma-su-khuh，面掩kah bā-bā，m̄敢喘khuì，驚hō͘人uè著「殺死」。一時想著一個好步，跳起來hiu：「鳳a，我tshuā你來去愷悅。」

掛一個N95 ma-su-khuh，koh另外用紗布作一個大嘴掩，tú好大面khàm bā-bā，tshun hia̍h-á kap目睭。O͘-to͘-bái駛leh，來到Soho，大扮tō入去。買一su藍海ê西裝，金tauh-liú-á ê sia-tsuh，意大利絲á ne-khu-tái，koh一雙虱目á魚頭尖尖ê烏皮鞋。

二個人穿穿好勢，he查甫ê雖罔無性感男星Gary Cooper ê派頭，人講衫撇人tō ian，mā有三、四分青春男星柯俊雄ê扮勢。He查某ê雖罔無公主明星Grace Kelly ê風度，人講kuân屐三寸io̍h，kha-tshng頭tō有風，mā有四、五分大膽藝人X曉丹ê姿勢。二人N95兼紗布ê ma-su-kuh tah leh，tha-khu-sih坐leh，sáng-sáng勢勢來到愷悅。

Tuà五星愷悅大飯店公主套房，食ê是法國式西餐，牛油tshi-suh，gia̍h刀gia̍h tshiám，lim ê是黃金甘tiⁿ ê siang-phíng，phih-phih pho̍k-pho̍k pù-phok-á，khin-khin khiang-khiang 酒杯á;穿ê是半通光ê紗網掛le-suh，看起來iⁿ-iⁿ iáⁿ-iáⁿ，khah常是摸摸so-so，thǹg kah光光；睏ê是tah báng-tà ê皇后眠床，倒落去nńg-nńg sìm -sìm，搖搖tshi̍k-tshi̍k，歡歡喜喜，規暝免睏。

二暝二日頭到尾全程lum sa-bi-suh（room service），一步免踏出公主房間ê門。Hit日中晝離開五星愷悅，he少年bo͘-i（boy）穿一身紅絨牽金絲制服，tì一頂雞卵糕kuân帽，khàm一個N95 ma-su-khuh，khiā正正tī大門口等。帽á thǹg起來，kā in tàm大禮，講：「Thank yo͘，多謝光臨。」俊a停一腳步，行uá去，tu一張一千kho͘ ê tsih-puh hō͘伊，講：「Very good。 」He bo͘-i koh áu一個大禮，ia̍t一下手，hut一下 tha-khu-sih tú來到面頭前。

一路hi-hi哈哈，笑轉來到永和。巷á口khiā二個警察á teh等。Hâ短槍、穿擋槍tsí ê衫，掛『抗殺死』ê ma-su-khuh，伸手遮leh m̄ hō͘ in過。「請恁tsit-má暫時m̄通過。」「Ai-ioh，是啥物代誌？」鳳a假仙問。「巷á內teh掠人。」「真正ê?掠啥物人？」鳳a假仙驚。「搶銀行ê，有槍危險。」「Uâ，beh驚死人！」二個趕緊溜suan。

過來拜一俊a載鳳a來到愷悅大門口，tú好一對a-tok-á手牽手uì內面出來。查甫ê剃光頭、掛耳鉤，查某ê穿牛á褲、mua短衫、現肚臍。Hit個穿紅絨牽金絲ê bo͘-i khiā直直，雞卵糕帽á thuh起來行大禮，講：「Thank yo͘！Come again。」He a-tok-á概成無看著也無聽著，ma-su-khu掛tiâu leh，tī大門口lám leh相tsim，teh講bye-bye。鳳a uì愷悅員工出入ê後壁門入去。這日上班，照常掃土腳清房間，到暗時十點下班，規日bi-bi-á笑。款hit間公主套房ê時，摸he眠床nńg-nńg sìm-sìm，搖搖tshi̍k-tshi̍k，嘴ná念：「愷悅公主陳金鳳…，Bóng稀罕lah。」