《陳雷文選》

 | | | 轉寄

悲心

作者 陳雷 2007.10.14

白頭毛ê仙童子講過ê hit幾句話，許月真相信，我是感覺tsiâⁿ實古怪。不而過，tsit-má kā想起來，若像自hia ê話以後，伊就hē一個決心teh等待。

Tsīng細漢就是這款，醫生講是天生悲憂ê心理病，看伊ê目神就知影，像日月潭ê水，烏烏深深 看bē到底。聽講伊另外一個阿姨也是仝款，tse症頭tsē少有遺傳ê性質。不而過，許月ê病症一冬比一冬khah重去，二、三年前就有teh食藥á ，舊年真食力ê時mā有去入院，tī台大精神科tuà三、四禮拜，電療了後，出院來若像就加真好勢ah。

Hit tsām，我想減彩也會使講，許月是一個快樂ê人。在我看來，tī伊ê悲憂症離開伊ê時，實在kap咱普通人仝款仝款，有koh轉去學校讀書，成績mā無輸人。熱人，伊ê阿母聽精神科醫生ê意思，抱一隻khiû毛ê貴賓狗hō͘伊做伴，號做阿白。這隻古錐ê狗akiaN2會聽人話，不時tuè tī伊身邊，目神烏烏深深， 像湖水看bē到底。我有teh懷疑，是m̄ 是狗á也會有悲憂ê症頭leh？

Tō是tī年尾人teh鬧熱ê時，tse狗tsông出去大路hō͘車kauh死。許月tī房間內bih一禮拜，無出來見人。了後去照明寺tshuē緣結大師，tō是伊ê阿母學拜佛ê師父。師父請教寺裡ê仙童子，伊會曉看往生觀來世，師父問伊：「Tse狗為何來？」仙童子規頭殼發白頭毛，身軀像一叢老 khok-khok ê tshîng-á樹，hit早起大概茶猶未lim，無啥精神，目睭kheh-kheh就應伊：「來還債」。 師父問：「還何債？」仙童子應：「往生殺人」。師父念一句阿彌陀佛，叫許月點一束香拜，koh問：「Tse狗為何去？」Hit時仙童子差不多beh tuh-ku去，應伊：「往去輪迴受難池，來世做豬hō͘人thâi。」tú好寺工phâng茶來，仙童子lim一嘴茶，師父念一句阿彌陀佛，許月koh點一束香。
許月轉去厝了後，安靜過三日，koh來tshuē師父。Hit工寺裡teh做鬧熱，前埕吊一大堆紅紙燈，雙邊插一tsuā中華民國在台北ê國旗，kap學校內用ê hit牌仝款。許月求師父，hō͘阿白出世做人，mài做豬hō͘人thâi。師父聽了歡喜，心內thàng pak內，雙手合十，念三遍阿彌陀佛，一tsuā仙人踏雲ê腳步，tshuā許月去見淨雲師姊，tō是大尼姑剃光頭化裝 ê。淨雲師姊ê辦公室有一塊大塊辦公桌，桌頂有一枝大哥大隨動電話，mā有tshāi一枝中華民國在台北ê國旗。不過，tsīng早淨雲師姊tō有kā人講過，伊是無黨無派ê，in拜佛ê攏是無黨無派。伊the̍h一張粉紅色ê傳單hō͘許月，紙面印烏字：「中國佛教會台北分會。照明寺啟建水陸大法會報名登記表。」正旁有印報名登記ê種類kap價數：「總水陸功德主，捌拾萬kho͘。正水陸功德主，五拾萬kho͘，勝水陸功德主，參拾萬kho͘。副水陸功德主，貳拾萬kho͘。內壇功德主，壹拾萬kho͘。內壇副功德主，貳萬kho͘。以上可以入內壇禮拜。」倒旁有印：「梁皇大壇主，壹拾萬kho͘。長生祿位大牌，五仟kho͘。往生蓮位大牌，五仟kho͘。往生蓮位小牌，貳仟kho͘。冤親債主，壹仟kho͘。以上限外壇禮拜。」許月請教淨雲師姊：「Tó一項khah好？」師姊講：「阿白殺人大罪大孽，三迴不得超生，只求正功德主，副功德主無效。」放冷氣ê辦公室四面壁比hō͘許月看，壁頂tah kah tīⁿ-tīⁿ，一排一排齊齊ê紅紙條á ，tō是報名功德主捐錢ê結緣單，「佛海有緣，苦海無邊。Tsia ê攏是正功德 主ê名字。」伊講。

許月瞭解師姊ê話，轉去kā阿母講，正功德主才有效，副功德主無效。阿母聽了心不安，m̄ 是為著錢，卻是恐驚許月ê悲憂症koh再來發作，專工去請教伊學拜佛ê師父，是m̄是先tshuā許月去台大精神科看māi?師父無歡喜，心內thàng pak內，目睭神閉，雙手合十講：「阿彌陀佛，許月童心無病，只有我 佛大慈悲，將來會有應果。」許月ê阿母聽了師父ê話訓，點香歸心，替許月報名登記照明寺水陸大法會，交現金五拾萬kho͘，作一個正水陸功德主，許月會使入內壇禮拜。 另外koh捐一個往生蓮花大牌，tī 外壇禮拜。Tī辦公室交錢ê所在，空氣中有放錄音ê the-phuh，勸世兼賣藥ê話語：「世間ê道理是圓ê，人ê身魂是惡ê ....人有七情六慾才會破病，m̄是念經就會好，照明寺有設五大中醫診所，大家有問題多多去參考。坐船坐車頭會hîn，就是欠血小板，欠葉綠素；腰骨會酸會痛，就ài調肝血，食福祿壽調血丸.......」手續辦好，淨雲師姊講：「真週至」，師父講：「善哉，救人就是救家己。」許月老母ê心才安靜落來。

許月十八歲生日hit日，伊ê阿母koh買一隻khiû毛ê狗á kiáⁿ hō͘伊，mā是白色ê貴賓狗，bē曉聽話。M̄-kú到hit-tsām，許月ê悲憂症已經深重過度，變做一粒純粹ê悲心kap完全無理由ê絕望，無法度koh再回頭倒轉來。隔轉日早起，厝裡ê人聽狗á kiáⁿ teh puī，發見許月穿一領白雪新衫，面向窗á 口，吊死tī四樓房間內面，算歲壽足足十八歲過一日。雖然許月無留最後ê話字，我知影其中ê緣故，因為伊bat聽念經ê人講起，凡是十八歲以前未成年去陰間者，先落地獄去受罪，所以伊有忍耐一段時間，勉強一直等，到十八歲生日hit日。

葬禮真鬧熱，做七kap百日總是有尼姑來厝裡念經，m̄許月in tau有錢ê關係，tse成百萬開落去，mā是一thuaⁿ ê負擔。但是，中國佛教會台北分會照明寺ê師父有吩咐，就是因為許月過身去ê狀況kap普通人無仝，而且年歲這方面也有問題，一切ài特別慎重。許月ê父母年歲khah有，koh是孤單查某kiáⁿ 一 個，事實bē堪得食老失去許月ê悲哀，為著伊，錢無計較，一切攏照師父ê意思。

結果真tsē朋友講，若是一個十八歲gín-á，這款ê做法是真週至ah。我想，tse當然是因為in無聽著白頭毛ê仙童子講ê hit幾句話，mā koh m̄知影許月過身去ê背景ê緣故。