《陳雷文選》

 | | | 轉寄

死人戲

作者 陳雷 2008.01.13

1

Hit暗伊第一遍親目看人死去，tú-tú對對tī伊ê面頭前。Hit個煌a ê頭殼kap面hō͘槍pōng pháiⁿ去，血kap肉幼á phùn著伊ê衫，tshòng lap-sap去。不而過因為死了siuⁿ緊，前後一個目nih niā-niā，所以經過看也無詳細。「死tō是按呢o͘h。」Tse是伊hit一暗tī謀殺現場ê印象，算起來已經beh 20冬a。Hit時伊tú-tsiah 19歲，Ma-sah講beh tshuā伊去看人死。Ma-sah比伊大3歲，勝a叫伊大ê，凡是食薰、食酒、sńg查某空、作賊偷攏是Ma-sah教ê。

「死無啥。」Ma-sah kā勝a講，「你家己看一擺tō知影。」二個人騎o͘-to͘-bái tī街a se̍h一liàn。來到郊外ê空地，已經半暝翻點，對面一間kám-á店火猶光光。O͘-to-bái停leh，二人tō入去。注hit個頭家這日該死，tú beh關店，店內kan-na伊一個。看in入來，好禮問：「人客愛啥？」Ma-sah行uá去，笑笑應：「頭家a，我這個朋友猶m̄ bat看人死---。」頭家m̄知伊ê意思，tú beh koh問，已經一枝短槍pué出來，對伊ê面tsiong-tsiong piàng落去。連續2槍，血kap肉幼á phùn kah一四界。勝a無料著Ma-sah會tuāⁿ槍，驚一下gāng-gāng，無顧看tō走。Ma-sah作後壁jiok來，一手kā tsang leh，問：「看有真無？」勝a一身軀phi̍h-phi̍h-tshuah，驚kah嘴齒哺豆á。Ma-sah起愛笑，手裡hit枝槍tu hō͘伊，講：「Koh入去，看khah真leh！」

勝a驚Ma-sah笑伊無膽，成實槍gīm leh koh入去。Kā看，土腳一kho͘人tshiò-tshiò倒tī hia。目睭一蕾pōng無去a，另外一蕾開開，嘴舌thóng一半…。「死無啥。」伊學Ma-sah按呢家己大聲講，膽tō khah在，手槍gia̍h起來，相真真tō pōng，手tshuah tuāⁿ無tsiong，pōng著khong-khuh-lih ê土腳。Uat leh tō走出來，已經無看Ma-sah tī hia。

這暗繡a人艱苦無顧店，tī樓頂teh歇睏。半暝聽著樓腳pìn-pòng叫ê聲，驚一tiô，獨強peh起來，落來到樓梯頭，聽著有人teh講話；「死無啥。」Bih leh kā看，一個查甫gín-á手gīm一枝短槍khiā tī hia。雄雄pōng一聲，uat頭tō走，繡a bih tī樓梯頭m̄敢tín動，等到o͘-to͘-bái ê聲遠遠去a，才tsông落來。一看，taⁿ慘a，in煌a一kho͘人tshiò-tshiò倒ti7hia，土腳一tshok血猶teh流，叫bē應，已經死a。

Hit暗三重埔ê警察teh tshuē一個騎o͘-to͘-bái ê查甫gín-á，長頭鬃pak一個尾，ām-kún kho͘一條紅巾á，行路正腳小khuá pái腳。隔轉日tī菜市á掠著勝a，o͘-to͘-bái坐椅下面抄著一枝走私ê烏星手槍。叫繡a來認，siàⁿ-siàⁿ tō是伊。

勝a講槍是Ma-sah ê，人是Ma-sah thâi ê。叫Ma-sah來問，講he槍是勝a kā伊借ê。Koh繡a來認人，認m̄是伊，是勝a無m̄-tio̍h。結果人證、物證攏總有，勝a hō͘人起訴，判搶劫凶殺罪，定有期徒刑25年。判官戴念伊年歲輕，koh無前科，無判死刑。

2

「阿母，hit個人m̄是我thâi ê。」阿麗a ta̍k個月按屏東來看勝a，勝a ta̍k擺按呢kā伊講。阿麗a mā知影，in勝a無thâi人，kā伊講：「你koh忍耐一下，我想辦法hō͘你khah早出來。」Koh三個月，勝a關20冬到期，會使申請假釋。5冬前15年期滿，申請假釋無過。人kā阿麗講，這lō代誌ài行後路。Tsit-má阿麗a後壁路已經探聽好勢a，這回決定beh hō͘勝akhah早假釋放出來。

有人kā阿麗講，這款代誌ài去拜託咱tsia ê立委。阿麗去立委蔡萬能服務處問，服務員kā伊講：「太太，你放心。這項代誌阮一定轉達hō͘咱蔡立委知影。伊一定會kā你想辦法。」幾禮拜過了，攏無消息。人kā伊教，beh拜託立委mā ài行後路。Taⁿ這個後路tō是tī市內教插花ê蔡千嬌，立委蔡萬能ê親小妹。阿麗想，咱kap伊也無熟無悉，beh怎樣去拜託人？Tō專工去千嬌插花班報名學插花。一班二、三十個太太小姐，m̄是上班族ê，tō是厝裡îng-îng族ê，穿kah suí-suí，裝kah撇撇。Kan-na阿麗a一個粗腳短手，穿一雙運動鞋，一看tō是thàn食人ê扮，無啥人beh tshap伊。班裡ê陳太太khah親切，bē kik-khuì，問伊作啥事業？伊講：「光明街hit擔賣鵝肉ê，你知無？」「光明鵝肉」上出名，大家mā知影。」「He tō是阮ê。」陳太太心內想奇怪，taⁿ這個tok鵝肉ê，拍算錢thàn了siuⁿ tsē a，thài有hit個îng工來學插花？

Tú好這暗天赤熱，半暝過了，無啥人客，阿麗tú beh收擔。雄雄十字路口來二陣少年ê，一黨七、八個khiā tī光明街這頭，另外一黨10外個佔tī自由街hit旁，隔一個十字路大細聲teh相嚷。無張池拍起來，tsông過大路用槌á，也有用鐵鍊sut。過路人好閒（hiân）koh驚去sîn著拳頭phuē，攏khiā遠遠看。雄雄一個細漢gín-á拚命tsông來，一個大漢ê tī後面jiok，來到「光明鵝肉」亭á腳tú-tú好jiok著。一枝長刀tō kā phut落，連續二刀，一刀斬著kha-tsiah，一刀sut著ām-kún，a̍h tō倒落去。後面一陣gín-á hè-hè叫jiok到位，看人倒tī土腳，血kòng-kòng流，喝一聲「幹！」，作一下走了了。阿麗a才uá去看，僥倖a，koh是一個查某ê，短頭鬃，穿牛á褲，khah無16、7歲á。

Liām-mih警察kap救護車攏到，先kā查某gín-á載去病院，血流siuⁿ tsē，到位tō死a。警察問阿麗，有看著啥？阿麗講，二黨少年ê tī十字路相拍。Hit個大漢ê jiok到位，長刀phut二下，tō倒ù落去。警察問：「Hit個大漢ê你看有真無？」阿麗講：「A̍h to tī這個亭á腳niâ，thái看無真？」

隔轉日，掠著一個大漢gín-á，叫阿麗去認。阿麗in翁慶a，駛計程車代誌bat khah tsē，kā伊吩咐：「你去，攏講你bē認得。這lō tshit-thô gín-á相拍ê代誌bē tshap得。」阿麗去到警察局，警察kā伊講：「這tè玻璃咱看伊會著，伊看咱bē著。作你放心認。」阿麗看玻璃hit旁，坐一個大漢gín-á 17、8歲、長頭鬃pak一個尾，倒旁耳á釘一tsuā三個耳鉤，薰直直pok，手phi̍h-phi̍h-tshuah。邊a桌頂二條相拍用ê鐵搭鍊，一枝二尺長ê開山刀。阿麗看看leh，搖頭：「M̄是伊。」警察問：「你看有真？」阿麗tìm頭講：「有。」

出來ê時，遇著一個查某人坐tī hia teh háu，kā看，tō是插花班ê陳太太。「阮敏a pháiⁿ-kiáⁿ是pháiⁿ-kiáⁿ，絕對bē去thâi人ê lah！」koh講：「伊連死人to m̄敢看leh！」阿麗a講：「我知影，m̄是伊。」「你知影？」「我有看著。M̄是伊。」這時警察放敏a出來，講無代誌會使轉去a。

隔轉日，陳太太來tshuē阿麗，kuāⁿ一大盒水蜜桃，內面khǹg一包紅包來說多謝。阿麗講：「你m̄免kā我說謝。你ê心情kap我ê仝款仝款，我上蓋瞭解。」Kā勝a ê代誌規個講hō͘陳太太聽。「阮勝a kap恁敏a 仝款無thâi人，m̄-kú hō͘人認m̄ tio̍h，關beh 20冬a。」陳太太同情koh感謝，講：「我替你來去拜託千嬌。伊kap我中學、大學同窗，阮若親姊妹。」所以陳太太去拜託千嬌，千嬌去kā蔡立委講，尾a經過立委出面，成實假釋通過。勝a tī 20冬到期hit日放出監獄。慶a kā厝裡hit台中古計程車賣掉，用hia ê錢包紅包hō͘立委蔡萬能kap千嬌。家己改去車行租計程車來走。

3

四個月後，勝a tī芳明館tshuē著Ma-sah，hit時伊tō是後菜園幫ê頭ê。勝a uá去kā問：「大ê，你猶會記得我bē?」Ma-sah目睭微微kā看，酒lim了小khuá有teh醉，bē認得伊，問身軀邊陪酒ê戀a：「這個是啥人？」「20冬前你tshuā我去看人死，我tō是hit個勝a！」聽著勝a ê名，酒醒一半，kā戀a講：「阮細ê lah。」勝a拍二下聲喀，問伊：「Hit日你是按怎先走，放我一個？」Ma-sah koh kā看，若像一晡才無張持去想著，大聲笑：「我…我pak肚痛，先去漏屎lah，…哈！哈！…」面uat過kā戀a講：「阮細ê脾氣khah bái!」戀a看勝a生作大漢緣投，看kah目睭無nih，倒一au bê-á beh hō͘伊lim，一直kā使目尾。勝a看戀a生作白koh肥水，若紅桃teh笑，四蕾目睭suah相咬。Ma-sah問勝a：「A̍h你…你hit日hit個死人看有真無？」這時勝a規個人khiā起來，一欉6尺kuân，伸手來sa戀a手裡ê bê-á，一嘴灌hō͘ ta，應：「Tō是看無真，今á日koh來看一遍！」au-á大力siàng hō͘破，khian kah碎碎規土腳。雄雄m̄知uì tó位，pué一枝烏槍出來。He戀a目睭微微猶teh笑teh看伊，已經bē赴，先tuāⁿ一槍，倒tī土腳。過去Ma-sah mā彈一槍，pōng著nâ喉頭，酒才醒起來，血直直bū，phiāng tī椅a頂peh bē起來。

勝a àⁿ落去，tī in大ê耳a邊輕聲講：「死無啥。」tú-tú kap伊面對面，beh認真看伊死。He面規個kiù筋，若面巾 tsūn作一球。嘴peh開beh大聲哀，nâ喉pōng破--去，哀bē出聲。目睭仁內底，恨 kap怒tō是火lām油作伙teh燒，伸手來sa勝a，tsang著伊ê lan-lin-guh m̄放。Liâm-mih血流了siuⁿ緊siuⁿ tsē，力無去，手才放去，人phiāng落去土腳。紅貢貢ê血若水道按嘴phū出來，這時知影家己會死，suah起生驚，m̄敢死。目睭內ê火變作水teh求伊，叫伊m̄通hō͘伊死。Taⁿ bē赴a，血已經流了去，koh無teh phùn，規身人白sí-sat。明明he khuì to無去a，又koh 大力suh一下，按呢才攏總定(tiāⁿ)去，目睭神bē輸二pha電火球á雄雄hō͘人tsuân hua，a̍h tō真正死a。Hit個kiù筋ê面隨tō放līng去，概成按呢攏總無代誌a，嘴開開teh睏。

勝a khiā起來。In大ê一kho͘人細細漢倒tī土腳，雙手開開phuā tī戀a胸前。嘴hāⁿ-hāⁿ，目睭也bē記得kheh。Hit領ut kah tshio-tshio ê西裝褲，中央一tshok tâm-tâm，僥倖m̄知tiâng 時tshuat一pû尿tī hia。

「死無啥。」勝a嘴內念，「目睭若死，a̍h tō總死a。」桌頂sa一干bê-á來lim，連續灌二干，uat一個頭，páiⁿ leh páiⁿ leh作伊大扮行出去hit間走kah無人ê芳明館。