《Tui3台語開始》

 | | | 轉寄

聖經百科全書─聖經是什麼？、歐洲第一位基督徒

作者 張德麟 2008.10.19

聖經是什麼？

聖經是什麼？有一kuá人ê聖經封面寫tio̍h「新舊約全書」，tsit-ê名稱真好，表示聖經是一本冊。

聖經是一本真特別ê冊。tāi先，伊是一本編輯ê冊，伊內面總共有六十六本冊。此外，伊ê作者mā相當tsē，包括君王、祭司、先知、經學教師、詩人、牧人、討海人、醫生……等等。伊ê文學形式mā真豐富，包括故事、戲劇、年代誌、傳說、詩歌、信函、傳記、論文……等等。伊內面ê冊mā m̄是仝一時間寫好ê。根據一kuá神學家ê看法，舊約siōng早ê部份是主前十二世紀寫ê，新約siōng uàⁿ完成ê經卷是到主後十二世紀tsiah完成。因為頂面ê因素，致使咱今á日teh讀聖經ê時有kuá所在感覺無容易明白。

聖經原來ê語文，舊約是希伯來文，新約是希臘文。但因為一kuá神學家ê努力，伊已經有真tsē種語言ê翻譯本。Tī翻譯ê過程中，有真tsē ê故事。譬如中文聖經有一種翻譯本受稱做「指版聖經」。伊ê翻譯者是一位美國聖公會ê主教施約瑟牧師。伊原本是一個猶太人，後來成做基督徒。伊bat tio̍h病身軀癱瘓，左正手各tshun一支指頭thang使用，伊就用tshun落來ê指頭仔tio̍h用phah字機翻譯聖經，時間總共用二十五年，kā聖經翻做淺文言，tsit種熱誠實在感心。

in tsiah-ni̍h努力翻譯聖經，是因為in知影聖經是ㄧ本活ê冊，in家己讀ê時有經驗了內面ê活命，in mā願意hō͘ koh-khah tsē ê人領受tio̍h tsit種ê活命。

歐洲第一位基督徒

歐洲第一位基督徒是一個女人，伊是一個賣布ê生理人。

保羅第二pái傳道旅行時有到歐洲大陸。有一工伊到了腓立比。依照伊以前ê習慣，伊會代先去會堂(會堂是信猶太教人ê禮拜堂)。因為tsiah-ê人已經相信創造天地ê主，beh kap in講起福音有一個共同ê基礎，誹立比ê時伊tú-tio̍h困難，因為hia無會堂。

Tī無會堂ê所在信猶太教ê人通常lóng聚集tī當地ê河邊祈禱。保羅tuì án-ne就tī安息日去河邊，tī-hia伊tú-tio̍h一kuá婦女就講道hō͘ in聽，婦女中有一個賣kiô-á色布ê婦人名叫呂底亞，伊聽保羅ê講道了心中真受感動，就對保羅講：「保羅先生，我聽了你ê講道心中真感動，我ǹg望你來阮tau，為阮厝內ê人洗禮，也接受阮ê款待。」

這就是歐洲ê第一位基督徒，伊有單純愛主ê心。這以外，伊值得咱學習êㄧ點是，伊愛上帝mā愛人。伊好款待傳道者，當伊tuì保羅hia得tio̍h福音了後，伊就殷勤招待保羅。