《Tui3台語開始》

 | | | 轉寄

駱維仁博士kap《新使者雜誌》--(一）

作者 張德麟 2008.12.28

筆者bat參與部份現代中文譯本研讀本kap 1995年修訂版ê工作，tsiah小khuá了解駱博士工作ê艱苦。伊工作態度之認真，對阮tsiah-ê晚輩ê提拔，甚至tuè伊工作ê時，伊如何善待阮tsiah-ê卑微ê肢體，kap伊同工過ê人一定會提起。Tī-tsia，我無beh koh提起。下面我beh提大家可能忽略êㄧ項事，he就是伊對《新使者雜誌》ê關心，以及bat為tsit ê雜誌受過苦ê點點滴滴。

我若無記m̄著，1990年年底，筆者接《新使者雜誌》總編輯職務ê時，當時ti̍h UBS kap南州、伯和、仰恩、重光諸兄tī駱博士ê指導下作Study Bible ê工作，雜誌一出來駱博士就看tio̍h loh。Tuì hit時到taⁿ，伊ê關懷不斷。下面我就記落伊kap《新使者雜誌》中間ê三件代誌。

第一件是雜誌tú出來時，因為我kap當時ê執行編輯英文khah bái，所以若有文章附ê英文拼m̄著，咱tiāⁿ-tiāⁿ bē-tàng即時改正。駱博士是一ê真認真ê人，看tio̍h tsiah-ê ting-tâⁿ 第一個反應是：「我來做lín ê校對。」我心內想：「『開玩笑』，hō͘駱博士做《新使者雜誌》ê校對？」所以我一直無答應伊。過了一段時tsūn，我印象真深，伊問我：「我真正beh做lín ê校對，你thài lóng無答覆我？」tsit項事到沈紡緞牧師tsit位外文系畢業ê同工來接任執編ê工作，改善了頂面講ê情況，伊tsiah無koh提起。

第二項是，UBS tī 1997年1月出版了《書中之書的新貌－現代中文譯本聖經修訂版出版紀念》，tsit本冊駱博士kap許牧世教授tī「前言」ê所在講：「現代中文譯本聖經新舊約全書tī 1980年出版，1995年阮koh完成了修訂工作，並tī仝年出版修訂版。為tio̍h紀念修訂本ê出版，阮編印了tsit本冊─《書中之書的新貌》，分做兩部分：第一部分ê七篇文章lóng是作者tī 1996年前後寫ê，（刊登tī《新使者雜誌》35、36、37期）。內容除了說明修訂版修訂ê重點，mā tuì無仝方向重新解釋中文聖經為什麼需要有新ê譯本……。」tsit本單行本之設計、印刷，駱博士全部交hō͘《新使者雜誌》ê同工處理。甚至tī冊ê尾頁mā印：「策畫：新使者雜誌」。