《Kah陳小小做伙讀台語》

 | | | 轉寄

健保永續之量早部署

作者 王榮德、王富美、劉立凡若、楊思雋、賴吾為、黃景祥，台譯：Lîm Tsùn Io̍k 2022.01.23

陳小小踏話頭：

當國家利益kah政黨利益衝突ê時，大多數ê人選擇政黨利益優先考量。

當政黨利益kah個人利益衝突ê時，大多數ê人選擇個人利益優先考量。

個人利益 > 政黨利益 > 國家利益

所以人民永遠對政治無滿意。

仝款，一kóa人民kakī對健保ê使用態度

是個人利益 > 團體利益 > 國家利益

健保自然ē破產倒台。

耶穌基督ê精神是tú好tòpéng，祂棄sak kakī上帝ê權力，卑微來服事，為眾人受苦上十架。

真oh違反人性，tio̍h學習基督êtòpéng精神。

M̄ koh，上帝賞賜聰明智慧hō͘王榮德醫師，hō͘伊是台灣頭一批提出「預防醫療政策」ê專家學者，伊而且幾nā年盡力tī兩个利益(個人、國家)考量並列:

健保推行人民愛護、照顧kakī ê身軀ê政策，咱mài破病，延tshiân老年病，健康活leh絕對是個人siōng大ê利益。同時，to̍h ē替政府省下真tsē錢，hō͘健保永續。

感謝王榮德醫師授權信望愛刊登本文

【健保永續之量早部署】文/王榮德、王富美、劉立凡若、楊思雋、賴吾為、黃景祥

全民健保ê實施hō͘台灣人民有平等就醫ê機會，人民bē因為病來散赤，是台灣人民ê大福氣之一。M̄ koh，面對人口老化ê高齡社會、新醫療科技改善重大傷病者活leh，lóng hō͘個案ta̍k工增加；健保財務挑戰mā jú來jú大。放眼國際，美國國民醫療保健支出已經達國內生產毛額（GDP）18%；álán國衛福部健保署公布ê數據，健保ta̍k年給付tùi 1996年ê 2,200億元，到2022年teh beh突破8,000億元；mā大大超過咱國家國內生產毛額ê年成長率。

醫療支付傳統上是算件（pay-by-volume）。以重大傷病ta̍k年給付做例：1999-2019年間，健保hō͘癌症ê給付點數tùi 162億增加到883億點；末期腰子病tùi 182億增加到588億點；慢性精神病tùi 48億增加到148億點；自體免疫病tùi 10億增加到79億點。健保署使用各種財務kiāu’á（華語ê「槓桿」）措施，包括：規劃增加保費收取、總額支付制度、tòa院診斷關聯群支付(DRG）、利用資訊科技hō͘重複檢查、用藥減少……等等，hō͘健保ē tàng活leh到taⁿ，功勞bē tàng無算，hō͘人敬佩。

M̄ koh siōng根本ê做法，iáu需要hō͘全民各種病症ê發生率下降，健保tsiah ē tàng永續。Tsit pái COVID-19 ê全球流行，台灣tī衛福部領導下量早部署，全民掛嘴om、洗手、隔離檢疫防治極成功，成做國際典範。其實仝款精神mā thang用tī所有重大傷病ê預防。Á醫療照護改革mā應該tùi傳統ê算件（pay-by-volume），漸漸轉向「依療效價值給付」（pay-by-value）ê方向進前。

世界先進各國，針對新進ê醫療技術（親像癌症免疫療法、細胞療法）lóng tī計量成本效果，評估hō͘病人加活一年而且生活品質真好，tio̍h開gōa tsē錢；最近幾nā年，mā開始kā各種社會衝擊算入去，親像生產力、長期照護等等ê成本，來tshōe出siōng kē成本koh高效果ê臨床引tshōa kah衛生政策。本國健保法42條mā有類似ê規定，beh做醫療科技評估。M̄ koh，以健保署ta̍k年kantaⁿ有五千萬ê研究預算，應付緊急問題to無夠，khah oh做長期ê評估kah規劃。

咱ê研究團隊得tio̍h科技部支持，運用衛福部資科中心ê大數據，以及成大病院癌症中心收集到ê病人生活品質，ē tàng非常精準來推估各種重大傷病ê平均餘命（LE，life expectancy）；kā生活品質算入去，thang得出該病人ê健康餘命（QALE, quality-adjusted life expectancy）；親像kā得病後ta̍k個月份ê健保平均開銷乘以活leh ê機率，而且按年打現金了，加起來，就ē thang算出hitê病kui世人ê健保開銷。Koh再kā kui世人健保開銷除以病人ê健康餘命，to̍h thang算出患tio̍h hitê病症ê病人，ta̍k个健康人每年開銷健保gōa tsē錢。

若是koh再利用國家性命表做出ta̍k个病人仝款性別、年齡匹配ê對照組ê平均餘命kah預期健康餘命，kā in kah特定傷病者相減，thang得出預防hitê病thang避免gōa tsē平均餘命ê損失（loss-of-LE），á是健康餘命損失（loss-of-QALE）。Tsiahê計量thang照無仝病症kah無仝預防、診療、復健科技做普遍性ê比較。咱已算出成功預防一个癌症á是重大傷病thang為健保省gōa tsē錢，thang為個人thàn得gōa tsē健康量。親像附表。


因為ánne，咱提出健保永續超前部署之兩大策略：Τāi先，全面推廣預防，努力減少新病人ê發生，ánne，m̄nā國人健康快樂，健保mā無需要支付醫療開銷；其次，普遍進行健康ê科技評估；公開比較ta̍k項健康科技ê成本效果，計算每加活一个健康人，ta̍k年需要開銷gōa tsē錢，來不斷提升各種病症診療ê價值。舉幾个阮ê研究團隊實際評估ê例：

(1) óa靠長期呼吸器ê無意識病人，台灣ê法律本來規定是bē tàng拔管。阮ê研究團隊推估，病人ta̍k健康人每年至少ài開銷三百萬元，其中家屬自付病人翻身、成人尿tsū’á等等費用約佔三分之一；tsitê數據間接促成修法，hō͘「兩位專科醫師認定tio̍h末期加一位家屬ê書面同意to̍h是thang拔管」。Tsit類病人ê健保開銷ta̍k年點數tùi 2014年約169億，到2019年降到122億，ta̍k年省ê數十億元thang用tī其它病症ê診療。

(2) 針對洗腎ê兩種方式，血液透析kah腹膜透析成本效果ê比較，阮發見仝款條件ê病人，使用血液透析比腹膜透析每健康人ta̍k年約貴9萬元，kui世人開銷約加開一百萬元，用tsitê數據提供hō͘決策單位參考。

(3) 機車騎士因為交通事故造成頭部外傷，無戴安全帽ê人kui世人ē加損失五个健康人年；á戴全罩式安全帽thang降kē頭傷風險到無戴ê人ê三分之一以下，半罩ê人kantaⁿ ē tàng降到約73%。強制戴安全帽ê法規因為ánne ē tàng koh khah順利推動。

(4) 心肌梗塞病人ná親像kah量早進行心導管手術phah通栓塞ê血管，每人平均kui世人約kantaⁿ加開24萬，to̍h是thang加活1.4年；其中50~59歲ê病人是加thàn健康以外koh加節省健保資源。

(5) 阮mā評估本國四癌篩檢成效，發見早期診斷治療子宮頸癌、大腸癌kah乳癌thang thàn到患者ê平均餘命kah生活品質，同時節省健保資源。舉乳癌篩檢做例：當ta̍k年篩檢人數超過50萬ê時，約thang診出3,000個案，ta̍k位kui世人加活2年，工作7.8個月，thang加thàn到約達7億ê薪資。

全面推廣預防kah進行健康科技評估，tsit兩項工作目前分別由國民健康署kah食品藥物管理署負責；in其實是需要kah健保署ê工作整合ê。衛福部thang委託學術單位做研究，評估ê結果提供健保署做參考，hō͘貴ê、價值kē ê健康科技，tī資訊透明ê狀況下，健保無beh給付iáu ē tàng杜絕厚厚唸á是不平之鳴。Á國民健康署全力推廣預防，建立全民健康ê生活方式，早期發見病症而且kā伊診療，thang節省健保資源，而且為病人thàn tio̍h健康餘命，mā應該得tio̍h應該有ê重視。

今年六月英國科技委員會（Cooncil of Science & Tetsnology）針對英國全民健保永續經營，bat對首相公開建議：應該透過真實世界ê資料計量做出證據，說服全民kah各社群全面推廣有效ê預防；suah真gâu用資訊科技整合預防、診療、照顧，tshōe出kē成本koân效果ê健康路徑。Tsitê高見kah咱ê主張仝款；台灣若ē tàng推動，相信健保khah ē tàng永續經營，是國人ê福氣。

（王榮德是成大公衛所名譽講座教授、王富美是成大經濟系教授、劉立凡若是成大老年所教授、楊思雋是成大病院內科助理教授、賴吾為是成大病院外科教授、黃景祥是中研院統計所特聘研究員）

本文tī 2021年12月26日自由時報A15版「自由共和國」專欄刊出。

1. Lai WW, Tsung CH, Lin CN, Yang SC, Hwang JS, Wang JD*. QALYs and medical costs saved from prevention of a cancer: Analysis of nation-wide real-world data of Taiwan with lifetime horizon. J Formos Med Assoc 2021. (DOI:10.1016/j.jfma.2021.04.023) [Epub ahead of print]
2. Wu TY, Tsung CH, Lin CN, Hwang JS, Wang JD. Lifetime risks, loss of life expectancy, and health care expenditures for 19 types of cancer in Taiwan. Clin Epidemiol 2018； 10:581-591.
3. Lien WC, Wang WM, Wang FM, Wang JD. Savings of loss-of-life expectancy and lifetime medical costs from prevention of spinal cord injuries: analysis of nationwide data followed for 17 years. Injury Prevention 2021. injuryprev-2020-043943. (DOI: 10.1136/injuryprev-2020-043943)
4. Lee IY, Shih CY, Wei YT, Wing TC, Shieh SJ, Wang JD. Increasing burden of major trauma in elderly adults during 2003-2015: analysis of real-world data from Taiwan. Joornal of the Formosan Medical Association 2021 (online: https://doi.org/10.1016/j.jfma.2021.02.008)
5. Tsiu YM, Lu YP, Lan JL, Tsen DY, Wang JD. Lifetime risks, life expectancy and health care expenditures for rheumatoid arthritis: A nationwide cohort followed up from 2003 to 2016. Arthritis & Rheumatology 2020； 14(11): e0008843.
6. Lêng CH, Tso͘ MH, Lin SH, Yang YK, Wang JD*. Estimation of life expectancy, loss-of-life expectancy, and lifetime healthcare expenditures for stsizophrenia in Taiwan. Stsizophr Res 2016； 171:97-102. (DOI: 10.1016/j.stsres.2016.01.033)
7. Hung MC, Lu HM, Tsen L, Lin MS, Tsen CR, Yu CJ, Wang JD. Cost per QALY (quality-adjusted life year) and lifetime cost of prolonged metsanical ventilation in Taiwan. PloS One 2012； 7:1-10. (DOI:10.1371/joomal.pone.0044043) (已經綜合數篇寫完成華語如下；王榮德：長期使用呼吸器維持生活之選擇。台灣醫界 2016年三月(59卷第3期) 40-43。)
8. Lee HY, Hwang JS, Jing JS, Wang JD. Quality-adjusted life expectancy (QALE) and loss of QALE for patients with istsemic stroke and intracerebral hemorrhage: A 13-year follow-up. Stroke 2010； 41:739-744.
9. Hwang JS, Hu TH, Lee LJH, Wang JD. Estimating lifetime medical costs from censored claims data. Health Economics 2017； 26:e332-e344.
10. Yeh TS, Wang JD, Ku LJ. Estimating life expectancy and lifetime healthcare costs for Alzheimer’s disease in Taiwan: dues the age of disease onset matter？ J Alzheimers Dis 2020； 73(1):307-315.
11. Liao CT, Hsieh TH, Shih CY, Liu PY, Wang JD. Cost-effectiveness of percutaneoos coronary intervention versus medical therapy in patients with acute myocardial infarction: real-world and lifetime-horizon data from Taiwan. Scientific report 2021； 11:5608 [https://doi.org/10.1038/s41598-021-84853-y]
12. Tsang YT, Hwang JS, Hung SY, Tsai MS, Wu JL, Sung JM, Wang JD. Cost-effectiveness of hemodialysis and peritoneal dialysis: a national cohort study with 14 years follow-up and mattsed for comorbidities and propensity score. Sci Rep 2016； 6:30266. (DOI: 10.1038/srep30266) and Kao TW, , Huang JW, Hung KY, et al. Life expectancy, expected years of life lost and survival of hemodialysis and peritoneal dialysis patients. J Nephrol 2010； 23(06):677-682.

13. Huang JW, Hung KY, Tsang YY, Tsen PC, Yen CJ, Tsen YM, Tsu TS, Wu MS, Tsai TJ, Wu KD, Wang JD*. Life expectancy, expected years of life lost and survival of hemodialysis and peritoneal dialysis patients. J Nephrol 2010； 23(06):677-682.