《Kah陳小小做伙讀台語》

 | | | 轉寄

了解聖經背景kah合一性

作者 彭彥華，台譯：Lîm Tsùn Io̍k 2022.02.20


陳小小踏話頭

「看ah，我khiā tī門外khok門，若有聽tio̍h我ê聲音to̍h開門，我beh入來去伊hia，我kah伊，伊kah我做伙坐桌。」Tsit句話tiāⁿtiāⁿ hông誤會是hō͘慕道友用，事實上是hō͘基督徒ê警告。

Kakī感覺富足、發大財、福氣滿滿ê老底嘉教會信徒，tī上帝眼中卻是困苦、可憐、sàntshiah、tsheⁿmê、赤身。耶穌講：「對我所疼ê人，我lóng kā in責備kah管教。所以，lín tio̍h熱心，tio̍h悔改。我khiā tī門口teh phah門，聽tio̍h我ê聲來開門ê人，我beh入去in tau kah伊做伙食飯，伊mā ēkah我做伙食。」（啟示錄3:19-20）

Tsit幕情境應該ē hō͘咱tsiahê主日上教會、平常時讀經祈禱ê基督徒感覺tio̍h驚！因為真相是主耶穌被擋tī門外。Khiā tī門外ê祂iáu tio̍h khok門，khok khok khok。

信望愛本期電子報主打文kantaⁿ談兩招—「頂下文解經法」kah「聖經ê合一性」，幫贊咱避免烏白解釋ê讀經錯誤，無koh抽取單一節經文，來掠做是無m̄ tio̍h teh使用。

【了解聖經背景kah合一性】文/彭彥華

清教徒詮釋聖經ê原則，除了經文ê字面意義、聖經ê清楚性kah聖靈ê光照，另外兩項原則是「頂下文解經法」kah「聖經ê合一性」，tsit兩項原則ê重點是，聖經背景ê重要性。

「頂下文解經法」是講tio̍h一段經文á是冊卷本身ê寫作背景，「聖經ê合一性」tsiah是有關kui本聖經ê真正背景kah框殼。

1）頂下文解經法

清教徒kah今á日正統ê釋經者仝款想講，任何一段經文lóng一定tio̍h tī頂下文ê背景裡做詮釋。

有一位清教徒講：「若是beh理解聖經內面某句話ê意思，siōng好ê方法to̍h是去查考tsit句話tī當時、當地ê意思。」珀金斯（William Perkins）tiāⁿtiāⁿ用ê解經模式，mā是咱今á日常用ê解經模式，to̍h是問一段經文是啥人寫ê？寫hō͘啥人ê？啥物場合寫ê？Tang時寫ê？寫作目的是啥物？寫作tsìn前發生啥物tāitsì？Tsit種頂下文解經是非常重要ê，若m̄管一節經文ê頂下文teh講啥物，to̍h真容易產生烏白解釋ê危險。

親像：「看ah，我khiā tī門口teh phah門，聽tio̍h我ê聲來開門ê人，我beh入去in tau kah伊做伙食飯，伊mā ēkah我做伙食。」（啟示錄3:20），有kóa人teh傳福音ê時，不時講tio̍h tsit節經文，講只要非基督徒願意phah開心門，耶穌to̍h ē tàng進入伊ê心內，做伊性命ê救主。M̄ koh，tsit節經文ê頂下文其實是針對老底嘉教會ê基督徒講ê，tsit節經文主要m̄是teh向非信徒傳福音，卻是講當信徒受tio̍h上主ê管教來悔改ê時，主耶穌to̍h應允beh kah伊做伙坐桌，信徒ē tàng koh一pái kah耶穌有美好ê團契。

2）聖經ê合一性

對清教徒來講，siōng重要ê解經原則to̍h是聖經ê合一性。Tsitê原則ê意思是講，雖然聖經是由六十六卷冊組成，而且kui个成冊過程長到千gōa年，m̄ koh，聖經猶原是一个整體，bē kakī互相矛盾。

改教家想講，聖經本身構成一个連貫ê教義系統，因為ánne，咱teh詮釋任何段落ê經文ê時，一定tio̍h kah已經知影而且清楚ê基督教教義hō͘ 它和諧一致。約翰．歐文（John Owen）講：「Tī咱所信ê一切真理中，有一種和諧ê秩序，咱teh詮釋特定經文ê時，無應該違背á是干涉攪擾tsit个秩序。」

Tsitê原則mā to̍h是所謂ê「以經解經」，to̍h是聖經ê某段經文應該tī kui本聖經ê大框架之下kā它詮釋，á是講是用比較khah清楚ê經文來解說無hiahni̍h清楚ê經文。清教徒想講：「一定tio̍h用聖經來詮釋聖經，若無，to̍h bē tàng可靠來釋經。」「以經解經永遠是正確ê。」約翰．歐文koh khah指出：「對一段意思霧霧無明á是oh bat ê經文，咱無應該訴諸（sò͘tsu）kakī ê理性，卻是應該設法kah其他意義khah清楚ê經文來和諧一致。」

咱tī tsia thang探討一个以經解經ê例，m̄知大家tī民數記，讀tio̍h巴蘭ê故事ê時有啥物感想？到底巴蘭是一位好先知á是pháiⁿ先知？民數記22章記載，當摩押王巴勒請巴蘭去咒詛以色列人ê時，巴蘭bat拒絕巴勒，講耶和華無容允伊去（民數記22章13節）。後來做耶和華ê使者擋tī巴蘭ê驢á面前ê時，巴蘭mā講若是上主無ài伊去，伊to̍h beh tńg來m̄去（22章34節）。然後上主ê使者對巴蘭講：「你kah tsiahê人去，你只要講我對你講ê話。」巴蘭tsiah kah巴勒ê臣僕去。M̄ nā ánne，當巴蘭去到巴勒hia ê時，伊無咒詛以色列人，顛倒一直祝福以色列人，而且三pái對巴勒講：「凡若上主所講ê，我一定tio̍h遵行。」（23章12、26節，24章13節）

當咱看tio̍h tsiahê經文ê時，ē感覺巴蘭kahná無hiahni̍h pháiⁿ，甚至感覺伊iáu真聽上帝ê話，tio̍h m̄ tio̍h？我kakī tsìn前讀tsit段記事經文ê時，感覺有一點á gāigio̍h，tshòng bē清楚巴蘭是好先知á是pháiⁿ先知，至少民數記22章24節tsia無講kah真清楚。M̄ koh，當咱看tio̍h續落來ê經文，以及kui本聖經對巴蘭ê描述了後，tsitê答案to̍h真清楚à。

Tī民數記31章8節，咱看tio̍h以色列人thâi死巴蘭，因為巴蘭設計謀，叫以色列人tī毘珥ê tāitsì頂面得罪上主，害以色列人陷落去淫亂kah拜偶像ê罪（民數記31:16, 25章）；tī申命記23章5節，摩西講上主m̄肯聽從巴蘭，顛倒hō͘咒詛ê言語變成祝福ê話語（約書亞記24章10節、尼希米記13章2節）。到新約聖經，講了koh khah清楚，彼得後書講巴蘭to̍h是「hitê貪戀不義工錢ê先知」（彼得後書2:15）；偤大書講有kóa人「koh為tio̍h利益做前往巴蘭ê錯謬」（偤大書1:11）；啟示錄就ánne對別迦摩教會講：「M̄-koh，我有幾nā項tāitsì beh kā你責備，因為tī你hia有人持守巴蘭 ê教示。Tsitê巴蘭 bat教示巴力，去迷惑以色列ê kiáⁿ孫，hō͘ in食祭過偶像ê物，koh行姦淫。」（啟示錄2 :14）Tsiahê經文hō͘咱來清楚看tio̍h巴蘭是án怎ê人，雖然伊tī民數記講無信táu巴勒beh hō͘伊gōa tsē錢，m̄ koh事實上，伊是一个貪財ê先知，tī無法度咒詛以色列人了後，教導巴勒án怎陷害以色列人。Tsiahê經文幫贊咱tńg去詮釋民數記ê經文，看出巴蘭kantaⁿ是虛情假意來teh聽從。

To̍h用頂面所述，bē oh看出聖經背景對詮釋聖經ê重要性。若咱tī解經ê時忽略tsiahê背景，m̄ nā ē錯誤理解經文ê意思，同時mā ē產生錯誤ê應用。清教徒深知tsitê道理，因為ánne，in tī解經ê時非常強調tsiahê原則，但願咱也ē tàng謹記在心。