《Kah陳小小做伙讀台語》

 | | | 轉寄

教會成做烏克蘭難民ê驛站

作者 Elliot Clark，台譯：Lîm Tsùn Io̍k 2022.03.20

陳小小踏話頭：

Tsit站á，全世界tī電視前á是網路頂，親目看tio̍h國家級ê貪婪野心之惡，是何等ê驚人。而且，無一个國家ē-tàng無受害，油、小麥、錫... 價siàu直直giâ，普羅人民mā全lóng tio̍h付出代價。

教會是一陣kakī知影kakī是自私ê、是ē犯tio̍h驚人罪惡ê人ê集合，知影只有耶穌ē tàng改變。信望愛主打文【教會成做烏克蘭難民ê驛站】講述教會án怎成做難民ê幫贊。Siōng特別ê是文中講tio̍h「Hit kóa來到tsia ê人當teh受tio̍h傷害。In明顯相信露西亞是邪惡ê一pêng。」「上主ê形像」（Imago Dei Tsurts）ê Mihai Tsisari牧師講：「M̄ koh，咱想beh展示另外一件事，是用一種微妙ê方式—咱lóng有邪惡ê問題，he to̍h是咱lóng有罪。」

因為ánne tsiah是事實ê真相。Tio̍h算逃離戰區，iáu活tī罪惡ê中間，別人á是kakī ê惡iáu hō͘咱彼此傷害。只有耶穌ê十字架，ē tàng帯領咱行出烏暗，入去光明。

【教會成做烏克蘭難民ê驛站】文/ Elliot Clark

Tī羅馬尼亞城市Sighetu Marmației ê郊外、烏色ê Tisza河對面，一台大貨車停留tī烏暗ê暗時。車燈ê光照出路裡霧霧ê身影：婦女、兒童kah老人……tsiahê是逃離烏克蘭戰爭ê家庭。In ê逃走真慢koh堅定，汽車隊伍綿延15公里；有kóa人已經tī tsia度過一个寒冷ê暗時，希望ē tàng趕緊去到Sighetu kah安全地帶。

當in最後去到十字路口ê時，in ē發現基督徒已經tī hia準備好勢爲大家提供援助。羅馬尼亞北部ê浸信會kah五旬宗教會當teh共同努力，歡迎hit kóa逃離家園ê人。Tī烏克蘭西部kah南部邊界ê國家檢查站，ánne ê畫面mā teh重複上演。

根據聯合國統計，tī露西亞侵入烏克蘭後無到二禮拜ê時間內，至少有200萬烏克蘭人kah其他人逃離tsitê被戰爭thún踏ê國家。一半以上ê人進入波蘭，m̄ koh mā有數十萬人溢入來四kho͘ 圍其他小國。

Tsit个趨勢kiámtshái ē加速。Tòeleh烏克蘭南部城市Odesa面對露西ê亞攻擊，隔壁國Moldova當teh爲in共同邊界可能出現jú來jú tsē烏克蘭難民做準備。

Tòeleh戰爭連續，kui个東歐ê教會已經動員起來，爲hit kóa teh逃離烏克蘭路裡ê人服務。Tsiahê教會成做倦tahtah出外人ê驛站，爲in提供食物、住所、交通kah救贖ê ǹg望。以下是Moldovakah羅馬尼亞ê難民事工看出。

Moldova ê Tsișinău

當烏克蘭戰爭爆發ê時，位置是tī Moldova Tsișinău ê「上主ê形像」教會牧師前往烏克蘭ê Odesa，幫贊一位宣教士朋友撤離。M̄ koh，當in去到Palanca ê邊界ê時，伊真緊意識tio̍h有大ê危險。Tī hia汽車排kah lòlò長，tsiâⁿ千萬ê人當teh撤離，Moldova政府已經bē堪得負擔。

Tsisari隨時tńg去厝裡，租一台麵包車。伊費時兩點鐘tńg來到Palanca提供幫贊。伊講：「頭一批通過ê人是來自Turkmenistan、Azerbaijankah伊朗ê人，in tī Odesa求學á是phah工。」Tsisari因為ánne，kā in送到Tsișinău，使用教會建築物爲in提供tòa ê所在，而且kah in分享上主ê疼。Tsisari講：「我tsit世人lóng無想tio̍h我ê教會內底會睏hiahni̍h tsē人，其中iáu有一半是回教徒。」

Tú開始，來到教會走tshōe幫贊ê難民中無真tsē烏克蘭人。顛倒是，「上主ê形像」教會收容了真tsē來自尼日利亞、喀麥隆、埃塞俄比亞（Ethiopia）、尼泊爾kah印度ê國際學生。In ē tī hia停留一兩晚，了後前往下一站。

M̄ koh tsitmá，來過暝ê主要是tùi烏克蘭南部過來ê婦女kah兒童。當in去到位ê時，「上主ê形像」教會爲in提供三頓、衫褲kah個人護理用品。因為建築物中無tsâng浴設備，教會成員開放in ê厝。（Tsisari指出，若是你tī車裡等待30點鐘，你真明顯非常需要洗一个身軀。）

Tio̍h講是大多數難民kantaⁿ tī教會等待真短ê時間，而且koh有語言障礙，m̄ koh，「上主ê形像」教會猶原盡力滿足in ê情感kah精神上主要ê需求。信主ê老母kā gíná tshōa.leh來探訪hit kóa受tio̍h heⁿh驚ê家庭。當gíná tī聖殿內做伙tshitthô ê時，老母to̍h聚集做伙祈禱。

教會iáu幫贊難民繼續in ê旅程。通過kah kui个地區ê教會合作，in ē tàng幫贊tsiahê旅途中ê tsheⁿhūn人，kā in kah附近城市á是國家ê基督徒連結起來。各教會共同組織成做難民之路—差不多ná親像美國南北戰爭期間ê「地下鐵路」—爲難民提供後勤支持kah旅行文件等等方面ê協助。

M̄ koh並m̄是每个人lóng teh流動，有kóa人選擇留落來。Tī過去ê兩个主日內，「上主ê形像」教會个禮拜已經坐kah滿滿。In tsitmá開始tī崇拜ê時提供翻譯；in mā編寫一本多語言ê福音手冊，tsit本手冊親像寫hō͘朋友ê phue，非常小心講tio̍h戰爭ê邪惡。「Hit kóa來到tsia ê人當teh受tio̍h傷害，in明顯相信露西亞邪惡ê一pêng，」Tsisari講：「m̄ koh，阮想beh展示另外一个件事，m̄ koh是用一種微妙ê方式—咱lóng有邪惡ê問題，he to̍h是咱lóng有罪。」

羅馬尼亞ê Sighetu Marmației

Tī戰爭爆發後ê禮拜日早起，Gabriel Mitsnea kantaⁿ睏兩點鐘，á後站是tī伊羅馬尼亞那間小教會ê會眾面前。伊大部分是kui暝無睏，祈求上主幫贊伊ê教會成員應對pôaⁿ過邊界ê烏克蘭人潮。Tsit位牧師呼籲伊ê會眾做出應允：「Tsitmá是咱爲人做一kóa tāitsì ê時à—爲教會外ê人。」

Hit工下晡，Sighetu ê Bethany浸信會隨時行動起來；一kóa人去拜訪會友ê厝，收集嬰á床、床tsū、毛毯kah面布。In kā教會ê地下室，甚至大禮拜堂，改造成做一个庇護所。

Tī in頭一週安置ê 120名難民中，第一个去到位ê是一位名叫沃斯亞·波蒂亞克tsabó͘ gíná，in翁是一位烏克蘭个牧師。沃斯亞已經有娠6個月，當戰爭tī她所在ê克里喬沃市爆發ê時，她不得不逃離hia。In翁決定繼續留tī烏克蘭服事。Kah這同時，沃斯亞tī伯大尼浸信會m̄知厭倦teh工作，幫贊她ê難民同胞翻譯，而且提供服務。

Kah其他東歐國家ê真tsē信徒反應仝款，Sighetu ê教會而且bē滿足tī kantaⁿ接收kah養飼hit kóa來tsia ê人。In iáu爲難民提供汽油費，幫贊in tī附近ê城市tshōe公寓，甚至安排in前往koh khah遠ê所在，親像布達佩斯á是布拉格。

最近，米赫內亞開始kah一陣基督徒車隊做伙進入烏克蘭。羅馬尼亞北部ê教會當teh努力協調，kā一車一車ê寄付/樂捐物資，親像油、麵粉，用水運送來到邊界。In已經確定一个烏克蘭牧師網絡，in ē tàng接收tsiahê物件（地點不詳），了後倒tńg去外喀爾巴阡地區ê各城市，分發tsiahê物件—這是一項人道主義kah傳福音ê努力。

Hō͘米赫內亞興奮ê是，伊ê會眾án怎應對tsit場危機。伊講：「阮教會ê人是真正是活石，in熱心提供協助，聚會祈禱，爲基督kah祂ê福音做見證。Tī過去ê兩禮拜中，我一直teh kā in講：Tsitmá是kā咱所宣揚ê一切付諸行動ê時à。Tsitmá是活出咱ê信仰，做咱蒙召服事ê siōng好時機。』」

世界之光

無論是爲難民提供溫暖ê燒湯á是庇護所，臨時診所á是祈禱ê所在，á是kantaⁿ暫時tháu放路裡ê疲勞欠缺，教會lóng是倦tahtah難民ê重要驛站。這並m̄是因爲tsiahê建築物提供siōng好tòa ê條件，á是siōng安全ê空間，卻是因爲其中有上主安置ê活石—教會ê成員。

基督ê救贖kah新造ê人ê súi，在tī祂拯救ê人身tsiūⁿ顯現，mā tī祂使用ê人身tsiūⁿ顯現，in因為祂ê疼來拯救別人。當教會履行使命，成做烏暗中ê一道光，上主mā teh實現祂救贖ê目的。Tńg來到羅馬尼亞，米海·Tsisari已經tī tsiahê烏暗日子中看tio̍h一絲á ǹg望：「我已經有見證真tsē人ê 心門phah開kah好奇。我thang看tio̍h上主已經teh工作à，阮teh beh看tio̍h豐收。」

譯：DeepL；校：JFX。原文刊載tī福音聯盟英文網站：Tsurtses as Waystations on the Refugee Ruad from Ukraine.

作者Elliot Clark是美南浸信會ê神學碩士畢業，tòa tī中亞，kah牽手、kiáⁿ兒做伙開拓hua̍h文化ê教會。目前爲國際領袖培訓（Training Leaders International）tī海外培訓在地教會領袖。伊ê著作有《流亡ê福音：tī家己ê土地親像生份人ê宣教生活》（Evangelism as Exiles: Life on Mission as Strangers in OOr Own Land，TGC，2019）kah《宣教使命：回復保羅宣教ê初衷》（Mission Affirmed: Recovering the Missionary Motivation of Paul，Crossway，2022）。