《Kah陳小小做伙讀台語》

 | | | 轉寄

啥物是活出見證？

作者 Virginia Yip，台譯：Lîm Tsùn Io̍k 2022.07.03

陳小小踏話頭：


信望愛本期主打文討論「活出見證」Tsit句話ê意義，進一步hō͘人反省究竟tio̍h活出啥物？

Tú好前幾工我歇睏ê時，聽tio̍h阿姊kah小弟兩人teh開講，講tio̍h某某人tī伊ê阿爸栽培下，明明是複製人，一个模á印出來。In teh討論這是好事á是pháiⁿ事。

是beh活出我？Á是活出父母ê ǹg望？活kah kah父母一模一樣？

做一个父母，我bē ǹg望姊弟兩人kah我kah tjm一模一樣。因為我無感覺阮夫婦有啥物好。我koh khah無希望姊弟兩人活出我，因為受罪惡污染ê「自我」，可惡至極。事實上，無論tīkhangkhòe場á是日常生活做伙，人人lóng討厭hit kóa凡事真「自我」ê人。真想beh對hit kóa自我中心ê人吐槽「tshòng啥，你認為你是上主hioh？地球teh se̍h你轉hioh？」

Ánne，我tsit幾年究竟是án怎活？活出啥物？

回顧tsit幾年，to̍h是óa靠耶穌來脫離罪惡，活出上主創造我tsitê人ê原貌。

講起來，活出上主創造我tsitê人ê原貌，有一點á ná親像活出我，m̄ koh，m̄是以罪惡ê「自我」做中心，卻是以基督做中心。因為若以基督做中心，ta̍k个「自我」無kā kakī當做上主，卻是盡力貢獻「自我」，互相起造。

Tsabó͘ kiáⁿ成做公務員，tī疫情真ântáu ê時，連續加班，我真意愛。我感覺她jú來jú活出上主創造她tsitê人ê原貌。她有機會tīkhangkhòe場頂面貢獻「自我」，起造社會國家。

Kiáⁿ兒á是大學生，暑假可能有機會去圖書館phah工。我祈禱，ǹg望伊mā ē tàng tī工作中tshōe tio̍h上主創造伊tsitê人ê原貌。

脾氣、個性、工作能力、娛樂，咱lóng無仝款，mā無需要仝款。

【啥物是活出見證？】文/Virginia Yip

今á日社群平台ê發達，已經致使真tsē基督徒差不多失去tùi傳統媒介增長智識、培育靈命ê能力，親像真正teh讀一本全面論述真理ê冊，á是tùi頭到尾完完整整上一系列系統性教導聖經ê課程，顛倒tiāⁿtiāⁿ tùi網路hit kóa kā聖經真理變成口號、標語等等，一下看起來to̍h真映目、真ē tàng引起人心ê半句話語，來吸收有關屬靈ê教導。

我bat看tio̍h面冊頂面有人轉發一張製作精美ê屬靈語錄海報，是啥物語錄？它講：

撒旦m̄驚啥物？M̄驚會友讀經、祈禱！M̄驚信徒敬拜讚美！M̄驚牧師有博士ê頭銜！M̄驚教會熱心宣教！

撒旦siōng驚啥物？基督徒活出見證！

[虛假ê命題]

頂面所講tsit種被華人信徒當做金科玉律ê格言，你kám bat聽過？你kám有認同？kiámtshái你m̄ nā聽過，m̄ nā認同，koh khah可能對人傳講過，因為這to̍h是華人教會講台頂tiāⁿtiāⁿ聽tio̍h ê教導。

M̄ koh，為啥物beh kā「活出見證」kah讀經祈禱、敬拜讚美、熱心宣教對立起來？Tùi tsit段話ê鋪排，咱ē tàng看出，講tsit句話ê人掠準，讀經祈禱、敬拜讚美、熱心宣教，tsiahê lóng是虛假ê、表面ê，是等於tī「博士頭銜」hit kóa無真實屬靈性命ê表現。

Ánne我beh問，到底啥物tsiah算是「活出見證」？讀經祈禱、敬拜讚美、熱心宣教kám m̄是to̍h是「活出來」ê見證？Kám講活出見證to̍h kiámtshái bē包括為tio̍h追求tī聖經kah神學上koh khah精準認bat上主á進修，kám to̍h就ánne來取得koh khah koân ê學位？

我koh問，kám有可能一个自稱基督徒ê人，kui工kantaⁿ關心注意kakī是m̄是有tī人ê面前活出美好ê見證，結果顛倒變kah內外無一致
究竟啥物是「活出見證」？一个真正基督徒ê見證，kám有可能ē tàng無需要藉tio̍h讀經祈禱、敬拜讚美、熱心宣教á體現出來？Koh kám有可能，一个真正基督徒ê見證ē tàng m̄免建立tī對聖經kah神學有正確、全面、深入ê認bat頂面？Tsit種聽起來真屬靈，m̄ koh實際上bē堪得一擊ê敬虔主義ê虛假命題，撒旦tsiah m̄驚leh！

[換湯無換藥ê文字遊戲]

到底tsit位hō͘人beh「活出見證」ê人，想beh講啥物？Kiámtshái kantaⁿ去問發明tsit種屬靈術語ê人tsiah知影。

有kóa屬靈術語，大家聽慣勢了後to̍h認為lóng了解是啥物意思à。有人講，「活出見證」to̍h是ài過聖潔生活。Ánne我beh koh再問，「過聖潔生活」koh是teh指啥物？華人信徒對「聖潔」一詞ê理解，往往kantaⁿ限tī道德行為ê層次，親像tio̍h誠實lah、謙卑lah、有疼心lah、歡喜來幫助人lah；koh á是講聖潔to̍h是根據基要派定出來ê一kóa律法主義ê行為規範，mài lim酒、mài pok薰、mài phah牌、mài pua̍hkiáu、mài跳舞、m̄看電影等等；koh再kám m̄是to̍h是teh指宗教行為：ta̍k日靈修、讀經、祈禱、聚會、什一奉獻、傳福音。

總ê來講，無論「活出見證」Tsit句話做án怎解說，本質lóng是仝款ê：tio̍h「活出」，就是ài「做」kóa tāitsì。敬虔主義反對ê to̍h是kantaⁿ有頭腦上ê智識，bē tàng kantaⁿ空談，「行動」tsiah是真實ê。

Tsitê講法，一下看起來無啥物問題。M̄ koh請大家詳細想看māi，án怎tsiah ē tàng產生行動？Siōng起初，敬虔主義ê口號kám m̄是類似ánne？撒旦m̄驚你ē tàng答出正確ê教義，siōng驚你讀經祈禱、敬拜讚美！結果發見，有kóa人祈禱到一个地步，甚至教會ē tàng hō͘ 伊「祈禱勇士」ê好名聲；koh有kóa人聖經ē tàng背kah ē tàng倒頭唸，一開嘴to̍h是經文一句接一句；koh再有kóa人，敬拜比啥人lóng khah投入，kui工「感謝主」、「oló主」、「哈利路亞」、「阿們」！M̄ koh，tsit種人kantaⁿ追求kakī ê屬靈經驗，而且無關心別人ê靈魂需要。

就ánne，in koh改口講：撒旦m̄驚你讀經祈禱、敬拜讚美，siōng驚你熱心傳福音！就ánne一間一間以傳福音、宣教為信徒siōng重要kah唯一使命ê教會紛紛興起，結果發見精通各式各種佈道法ê人，可能kakī ê道德生活都有問題，是所謂無「活出見證」ê。就ánne，in又ài koh改口à！

Tsit種一工到暗kantaⁿ知影替換名詞、定義，換湯無換藥ê「屬靈智慧」，siōng tsē kantaⁿ ē tàng收tio̍h一時ê效果。久久了後，m̄ nā ē kā人舞kah thiám kah倦tahtah，m̄知tio̍h án怎tsiah好；koh khah嚴重ê 是，信徒連一kóa基本ê屬靈詞彙mā tshòng bē清楚究竟是啥物意思。

[你一定tio̍h「是」啥物，tsiah ē tàng「行出」啥物]

Tī聖經中，「聖潔」是用來指上主ê屬性，á一个自出世to̍h lâsâm無清氣ê罪人，被聖靈重頭生了後，內面to̍h開始有一个新ê kah上主ê性情仝款ê性命，tsitê新ê性命是意愛真理，無ài犯罪，渴慕聖潔。

Á tsitê新ê性命，是栽種tī本來ê舊性命中。所以，一个基督徒ê性命一定ē有兩股相衝相爭ê勢力，一个是意愛聖潔ê，另外一个是ài犯罪ê。一个人做基督徒，伊siōng大ê驚喜，m̄是就ánne to̍h無koh犯罪，卻是tio̍h算猶原不時teh犯罪pua̍h倒，伊竟然ē呈現出另外一个種完全無仝ê性命素質。

舉一个例，她á是伊kiámtshái猶原ē發脾氣，kah翁婿á是牽手冤家，m̄ koh tsitmá ē意識tio̍h kakī ê罪性，koh khah ē看tio̍h kakī ê m̄ tio̍h，koh khah知影mā koh khah有能力主動向對方承認m̄ tio̍h。In做基督徒ê日子久了後，m̄ nā jú來jú bē吵，而且koh khah知影欣賞、肯定對方ê優點，體諒、忽略對方ê缺點。換句話來講，基督徒ê成長to̍h是hō͘ tsitê新ê、來自上主ê聖潔性命不斷壯大，hō͘舊ê tùi kakī私慾ê罪性性命不斷被醫治。所以，過聖潔个生活，重點無在tī「做」（do）聖潔ê tāitsì，乃是tio̍h「做」（be）聖潔ê人。人一生ê效果是tùi心發出ê（箴言4章23節），kantaⁿ當一个人「是」啥物，伊tsiah ē tàng「行出」啥物。

[律法kah恩典ê無仝進路]

所以，若是有非基督徒看tio̍h基督徒mā ē犯罪to̍h指責咱，咱應當án怎回應？你若是一个律法主義者，你ê回應一定是ài大家tī人个面前努力做出美好ê見證，免得hō͘耶穌無面子。（Oh！失禮，應該講免得「kā主卸面子」，屬靈ê話是ánne講ê。）

M̄ koh，若是你是明白恩典ê人，你聽tio̍h世間人指責基督徒án怎lóng teh犯tsit種ê罪，你ê反應ē是：Tú是因為咱lóng是ē犯罪ê罪人，所以咱tsiah需要基督ê救贖，tsiah beh成做基督徒ah！

活tī今生ê基督徒，是無可能完全bē犯罪ê。問題是，當咱看tio̍h kakī kah其他信徒犯罪ê時，beh án怎辦？你kiámtshái ē行法利賽人ê律法主義道路，強調行為上ê改變，結果to̍h一定bē tàng逃脫頂面所講hit大堆對聖潔生活ê行為規範，你ē列出一大堆應當守ê律法，企圖tùi改變人ê外在行為來改變人ê本質。這是所有宗教teh行ê道路。

若無，你tio̍h接受基督恩典ê福音，mā to̍h是承認tī你內面一屑á都無行善ê本質kah能力，你kantaⁿ ē tàng接納tī你以外tùi基督所賞賜ê義。Kantaⁿ有當一个人真正認bat tsit點，伊tsiah ē棄sak一切，建立kakī ê義，用kakī ê氣力做中心（kiámtshái koh加上一kóa上主賞賜ê扶助力！）來活出聖潔生活ê企圖。

Á一个認bat koh體會tio̍h kakī是領受不配恩典ê人，伊定tio̍h ē kā目tsiu金金看tī拯救伊ê上主身tsiūⁿ，因為ánne ē用謙卑ê心kah感恩ê心來回應上主。而且伊關心注意ê焦點，m̄是一大堆ê道德行為á是宗教行為ê聖潔，卻是上主祂hitê聖潔ê屬性án怎ē tàng tī伊kakī身tsiūⁿ反射出來。

[活出見證kám kantaⁿ hit kóa？]

Ánne，tsit時tsitê「聖潔生活」ê定義to̍h真廣闊à。親像：上主是聖潔ê，祂恨無公義ê tāitsì，所以基督徒對社會無公義ê tāitsì一定mā bē ka信táu，所以歷世歷代真tsē基督徒對孤兒寡婦、老弱殘疾、受壓迫、受欺壓ê邊緣人、kē階層，總ē無惜氣力去幫贊；對無公平ê法制kah政權，mā ē m̄驚強權、無惜犧牲去糾正。

Koh親像：上主是聖潔ê，祂既然無kā祂ê榮光歸hō͘假神，mā無容允人看輕照祂形像所造ê人類，所以，愛慕聖潔ê基督徒，對一切有形無形ê偶像崇拜lóng ē非常敏感，mā ē極力抵制一切侵犯人ê尊嚴ê tāitsì，包括男女性別上ê無平等對待、種族上ê歧視；ē反對一切kā人ê地位kah價值建立tī生產力、出世背景、財富tsē少、地位高kē、學歷深淺等等ê制度、文化、觀念á是作風上；koh á是，伊ē極力反對墜胎行為，á特別支持領養無依無靠ê兒童。

對「聖潔性命」tsit種幅度ê理解，m̄知華人教會有幾个？Koh有gōa tsē部分是用本文一開始hit種列舉規例huah口號ê方式來涵蓋？「撒旦m̄驚......？Siōng驚......？」大家kakī來來填寫！