《Kah陳小小做伙讀台語》

 | | | 轉寄

Tī基督裡互相順服

作者 彭彥華 ，台譯：Lîm Tsùn Io̍k 2021.10.17

陳小小踏話頭：聖經ê分段，是後來加起lih ê。其中siōng有意思ê to̍h是以弗所書5:21 「Lín tio̍h用敬畏基督ê心來互相順服。」

Tsìn前tsit節分段到頭前ê教會生活，用tī主內兄弟姊妹互動頂面。M̄ koh新版本ê聖經，kā tsit句分段到後面，用tī丈夫kah牽手互動頂面。Á我個人看做是雙用，用tī教會，mā用tī家庭。Tī厝裡總有不斷ê大細事，hō͘翁ábó͘之間thang實際操練tsit句話。若tī厝裡無法度做到，ánne tī教會就koh khah oh做到à。

本期信望愛電子報主打文談翁ábó͘ tī基督裡彼此順服。三十gōa年ê婚姻生活，我得tio̍h彼此順服ê秘訣，he to̍h是以弗所書5:21頭前ê半節「用敬畏基督ê心」。翁ábó͘兩人lóng敬畏基督，to̍h bē發生「翁婿亂使用權柄、牽手當女王」ê奴隸牽手亂象。厝內有基督，是何等ê幸福！


【Tī基督裡互相順服】文/彭彥華

聖經中tsit種翁婿做頭kah牽手順服ê觀點beh án怎落實在tī生活中？因為翁婿tī實際生活中真容易亂使用權柄，suah致使牽手真oh去順服翁婿，所以，tsit部分ê討論to̍h變kah真重要à。

Tāi先，翁婿做頭，並無代表牽手是翁婿ê奴隸。John Downame講：「上帝賞賜牽手hō͘翁婿，m̄是beh做tsapo͘人ê奴僕，卻是做伊ê幫手、顧問kah安慰者。」清教徒tiāⁿtiāⁿ kā牽手稱做助理，牽手m̄ nā是牽手á是同伴，卻是翁婿ê幫手kah助理。

這以外，牽手ê順服mā m̄是意思是講bētàng kah翁婿爭論。Samuel Willard指出，kantaⁿ tī做丈夫ê觀點有符合聖經ê時，牽手tsiah tio̍h應順服伊，伊講翁婿：「應該提供hō͘牽手信服ê理由，tsiah ē tàng hō͘牽手順服伊；若無，伊無任何強制牽手順服ê權利。」翁ábó͘之間甚至有責任互相苦勸，為tio̍h疼心kah責任ê緣故，應該選擇siōng適當ê時機彼此勸誡。

Ánne，牽手tī厝裡是m̄是完全無權柄？ In是m̄是無權利決定任何tāitsì？清教徒講m̄是，in認做bó͘ · ê tī厝裡某一kóa範圍是有權柄ê。親像，牽手對gín'á kah tshiàⁿ工有權柄。有一位清教徒講伊kā家庭ê財務交hō͘牽手管理，因為牽手tī處理金錢ê tāitsì比伊真gâu。

有趣味ê是，John Milton講：「若是牽手比翁婿koh khah謹慎聰明，á翁婿mā家己知影是ánne，」翁婿ê權威to̍h有「特殊例外，因為tsit時有一條koh khah自然、koh khah koân ê法則，to̍h是khah有智慧ê人應該管理khah無智慧ê人。」

換話句來講，當清教徒強調翁婿做頭、牽手順服ê時，無代表翁婿bētàng hō͘牽手做一kóa決定，mā無代表翁婿無法度tī某一kóa tāitsì頂面聽牽手ê話。有一位清教徒講：「Beh kā一个家管理好勢，tī一kóa tāitsì頂面kiámtshái是翁婿比較khah gâu，á tī另一kóa tāitsì頂面kiámtshái是牽手比較khah gâu。」

另外，tsit種觀點mā m̄是講牽手bētàng對翁婿進行屬靈方面ê教導á是勸勉。有一位清教徒講：「牽手thang、mā一定tio̍h tī私下靠tio̍h疼心提出忠告，勸誡in ê翁婿。」「做丈夫ê意思違背上帝ê旨意ê時，牽手tī屬靈kah信仰ê tāitsì頂面to̍h m̄免聽從伊。牽手m̄免無條件來順服翁婿，若她確定kakī開嘴反對ê是有罪ê tāitsì，她to̍h ē tàng謹慎責備kah勸誡她ê翁婿。」

總講一句，雖然翁婿是厝裡ê頭，m̄ koh翁ábó͘之間應該分享治理家庭ê權柄，因為治理家庭是雙方ê職責。咱應該tùi「主要家長」kah「副家長」ê角度，來看待翁ábó͘雙方tī厝裡ê權柄，翁ábó͘應該彼此同心、同工，mā應該彼此扶持kah勸誡，卻m̄是tùi主人kah奴隸ê角度來看待翁婿ê權柄kah牽手ê順服。