《Kah陳小小做伙讀台語》

 | | | 轉寄

保惠師紹介ê保惠師

作者 陳小小，台譯：Lîm TsùnIo̍k 2023.05.14




保惠師，to̍h是聖靈上主。講tio̍h祂ê工作，咱tiāⁿtiāⁿ想tio̍h ê to̍h是祂hō͘人有講方言、翻譯方言、唱靈歌，講預言、看異象、醫病趕鬼等等ê能力。M̄ koh，iáu有一个保惠師，知影ê人to̍h比較khah少，hit个保惠師to̍h是主耶穌。保惠師主耶穌án怎向祂ê門徒學生紹介保惠師聖靈ê工作，自然koh khah重要，koh khah bē tàng hō͘你kah我來落勾。

「保惠師」，新約希臘文為παράκλητος，出現tī約翰福音kah約翰一書。M̄ koh約翰一書2:1 hia，另外翻譯做「中保」：

我ê細kiáⁿ，我寫tsiahê hō͘ lín，是beh hō͘ lín無犯罪；若有人犯罪，tī天父ê面前，咱有義人耶穌基督做咱ê「中保」。

保惠師、中保原來是互動ê意思，指「被求助ê人」。M̄ koh到新約，有主動ê意思，為「幫贊者」、「調解者」。

用現代人容易理解ê譬喻，保惠師、中保有一點á ná親像健身房ê教練，你thang向伊諮詢各種體能健康ê智識，伊mā ē主動觀察你ê狀況，kā你講tó位ê筋肉khah強化、lim食ài án怎控制。基督徒siōng大ê福分之一，to̍h是有兩个身心靈ê保惠師教練—主耶穌kah聖靈上主。咱隨時ē tàng ǹg主耶穌祈禱，kā生活一切lóng陳述tī祂ê面前，向祂求助。聖靈上主mā內住tī ta̍k个基督徒內面，隨時提醒咱tó位tio̍h注意、tó位ài改進。

約翰福音kui卷冊，thang看做是兩位保惠師同工ê記錄。約翰福音前半部teh講頭一位保惠師聖Kiáⁿ—主耶穌，祂道成肉身來到咱中間；後半部透過主耶穌ê嘴，hō͘咱來明白第二位保惠師—聖靈beh做ê工作。

我mā ē對天父求，祂ē賞賜一位保惠師hō͘ lín，thang kah lín永遠同在。（約 14:16）

M̄ koh，保惠師，to̍h是天父用我ê名beh差派來ê聖神，ē kā一切ê tāitsì教示lín，koh hō͘ lín ē記得我kā lín講ê一切ê話。（約 14:26）

Hit位保惠師，to̍h是真理ê聖神，ē tùi天父hia來lín tsia。我tùi天父hia差聖神來lín tsia，是beh為我做見證。（約 15:26）

M̄ koh，我tio̍h kā實情kā lín講；我去是對lín有利益；我若無去，hit位保惠師to̍h bē來lín tsia；我若去，to̍h ē差祂來lín tsia。（約 16:7）

主耶穌對聖靈ê紹介，thang歸納出以下重點：

1.聖靈為耶穌做見證；

2.聖靈kah門徒同在；

3.聖靈kā一切ê tāitsì指教跟tòe耶穌ê人，引tshōa門徒明白（進入）一切ê真理；

4.聖靈叫世間人為罪、為義、為審判，kakī責備kakī。

一个人ē tàng信耶穌，to̍h是聖靈第一个工作項目「為耶穌做見證」。咱傳福音，對方聽了ē對「耶穌是主」有感動、有感覺，這to̍h是聖靈teh做工。Siōng尾，tsitê人受洗成做耶穌ê門徒，mā是聖靈為耶穌做見證ê工作成果。

有kóa基督徒用民間信仰ê經驗kah思考，掠做「聖靈同在」一定tio̍h ài有超自然ê能力á是感受。M̄ koh約翰福音中，主耶穌對聖靈ê紹介，完全無提起tsiahê。只要是跟tòe耶穌ê門徒，to̍h有聖靈同在！聖靈kā一切ê tāitsì指教跟tòe耶穌ê人，引tshōa門徒明白（進入）一切ê真理，to̍h是基督徒渴慕真理，mā是聖靈同在ê證據。基督徒歡喜聽講道、讀聖經，以及想beh祈禱走tshōe真理ê答案，tsiahê lóng是聖靈同在ê表現。

另外，基督徒ē tàng有「罪」ê認bat，mā是聖靈同在ê證據。這是第四个聖靈ê工作項目—叫世間人為罪、為義、為審判，kakī責備kakī。我tī信主以前，對一kóa tāitsì並無「罪」ê認bat。舉一个實例，阮tsabó͘人去市場加減lóng ē thâi價，來證明kakī精明真gâu。信主以前，買菜tú tio̍h頭家、頭家娘結算錯誤，找錢加hō͘我，我ē恬恬無出聲kā錢收落來，偷偷á心花開，kakī thàn tio̍h à。信主了後，聖靈內住帶來「罪」ê認bat，聖靈ē hō͘我想tio̍h in ê辛苦，ē算m̄ tio̍h是因為工作疲勞，聖靈催逼我當場主動退錢。

起初，ta̍k pái我lóng m̄心花開來主動退錢，m̄ koh ta̍k pái lóng ē hō͘對方真tio̍h驚、心花開kah笑容。Tsiahê頭家、頭家娘難得tú tio̍h人客ē主動退錢，總是kā我記tiâu，iáu tiāⁿtiāⁿ算我khah sio̍k á是hō͘我蔥á、蒜á，hō͘我真pháiⁿ勢，koh khah tsē hō͘對方錢，阮錢sak來sak去，to̍h親像老朋友。Tī市場裡，實際經歷tio̍h聖靈ê大能，祂hō͘我kah路邊擔á彼此相疼。
講方言、翻譯方言、唱靈歌、講預言、看異象、有能力醫病趕鬼，絕對是聖靈ê工作。M̄ koh約翰福音書中，保惠師主耶穌紹介ê保惠師—聖靈ê事工，koh khah需要了解。Tī這四項事工頂面，我kakī tiāⁿtiāⁿ深深受惠。