《Kah陳小小做伙讀台語》

 | | | 轉寄

福州話舊約聖經誦讀完工

作者 陳小小，台譯：Lîm TsùnIo̍k 2023.06.18



福州話舊約聖經誦讀完工
陳鳳翔

香港陳德明兄弟tī最近完成舊約聖經ê福州話誦讀。上主賞賜夠用ê恩典kah智慧，八年ê時間，伊一字一句朗讀、錄音kah剪接，lóng有上主ê同在。伊表示，用這當做伊所疼ê香港福州話福音佈道會荃灣堂五十周年金禧ê感恩獻祭。

福州話聖經誦讀，我聽起來koh khah感覺親切，因為我tsitmá iáu有一點á聽有福州話ê能力。

阮a公a媽、外公外媽lóng是福州人。阮老父五、六歲ê時，a公tshōa全家遷sóa來台灣，阮老母就ánne tī台灣出世。所以我細漢ê時tsūn ē曉聽福州話，m̄ koh我bē曉講福州話。

In beh講一kóa秘密ê時，無想beh hō͘我知影，tiāⁿtiāⁿ to̍h用福州話講，認為我聽m̄ bat。國小三年á hit年，阮老父是大kiáⁿ，為tio̍h beh hō͘小弟小妹有錢讀冊，去沙烏地阿拉伯工作，因為薪水是原來ê三倍。伊寄錄音帶tńg來台灣，內面是對老母ê綿綿情話，全部lóng用福州話。有一pái我to̍h kā內面ê內容講出來，kā阮老母heⁿh tio̍h驚。

Hitê年代，國民黨、共產黨為tio̍h beh促進多元族群融合，推行禁止方言ê政策，為tio̍h beh tī短時間內收tio̍h溝通ê效果。台灣推行ê華語、Tsiná推行ê北京官話，兩个語言仝款，lóng是Mandarin。Tsitê政策to̍h親像雙面劍，副作用to̍h是台灣kah Tsiná幾nā千種ê地方語言lóng受tio̍h摧殘，漸漸消失。To̍h親像我細漢ê時tsūn ē曉聽福州話，m̄ koh我bē曉講福州話。

我感覺當年ê語言政策形成三个語言kho͘’á。Tī厝裡使用華語á是福州話；到街á to̍h使用華語á是台語；到學校kantaⁿ使用華語。

我tòa tī高雄ê右昌，厝邊lóng是講台語ê。為tio̍h kah in做伙sńg，我tio̍h講台語。若是當年無推動禁方言政策，tī班裡應該ē照語言分黨結派，台語、客語、福州話、原住民語、廣東語......各有小kho͘’á。

Á我ê a媽m̄ kantaⁿ ē曉講福州話，mā真gâu講台語。她kā我講，去街á買菜辦tāitsì，用台語ē比較khah sio̍k，所以阮老父hit pêng ê親tsiâⁿ（a公、a媽、a叔、a姑）lóng ē曉講台語。

阮老母tsit pêng ê親tsiâⁿ to̍h無啥ē曉講台語，因為tòa tī中興新村，厝邊隔壁lóng是各種語言，有一點á ná親像眷村。我細漢ê時to̍h聽tio̍h take in來tshōe外媽開講ê時，使用各種腔口，上海腔、四川腔、北京腔、福州腔......ê華語Mandarin。

現代人就ánne tio̍h ài ē曉講英語。Tī台灣ê幼稚園，無一个bē推動雙語ê，因為英語是國際語言；英語帶來ê文化衝擊bē輸當年ê國語政策。我感覺語言kho͘’á kahná反tńg來à；tī厝裡有kóa家長會kah gín'á講英文，為tio̍h beh hō͘ gín'á有國際能力。Á我ê 會籍是tī台灣基督長老教會，tī教會內面ê語言當然是台語。查經班甚至規定聖經誦讀ê時tio̍h使用台語聖經，發言ê時m̄講華語，ài講台語（後者m̄是嚴格規定），是為tio̍h beh保存kiōngbeh變kah lîlîlaklak ê台語。

我tī無仝ê語言kho͘’á，使用無仝ê語言，非常ē tàng感受tio̍h語言是teh承載文化。尤其我是聖經老師，閱讀聖經經文一定帶領學生tńg來希臘文kah希伯來文，為tio̍h beh得tio̍h koh khah深刻ê意涵，kah hit kóa譯文無法度表達ê意義；另外也ē tàng捕掠字縫內ê情感。

語言承載情感；我tsitmá聽tio̍h福州話ê聖經誦讀，想起過往êa公a媽、外公外媽kah父母。香港陳德明兄弟表示，伊beh繼續錄製新約聖經，咱來為伊祈禱，因為耶穌ê故事，新約聖經siōng tsē。信望愛聖經網站頂面有各種語言，hō͘無仝ê族群ē tàng用各自感情siōng深ê語言，注意聽上主ê故事。