《Kah陳小小做伙讀台語》

 | | | 轉寄

愛是永遠bē停止ê行動

作者 陳小小，台譯：Lîm TsùnIo̍k 2026.06.28




愛是永遠bē停止ê行動

陳鳳翔



圖片提供／123RF


「有緣無份」「緣盡情滅」「我對你已經無感覺à，咱來分手好lah。」愛情劇裡常tiāⁿtiāⁿ看tio̍h tsit kóa經典話句，描述男女tú做伙ná親像蘭花仝款燦爛美好，結局卻tsē kah ná棉花hō͘風吹散，講是緣盡情滅，其實to̍h是深厚ê感覺，tòe leh時間一點一滴teh消退。目前咱人認為愛是感覺，無愛了後，ná tio̍h勉強？M̄koh新約聖經描述ê疼，其實kah感覺無關係，卻是一種決定，以及相連續永遠bē停止ê行動。

愛是動詞

哥林多前書13章4-8節所述「愛ê真理」乃是：「愛是久長忍耐，koh有恩慈；愛是不嫉妒；愛是無自誇，無膨風痟狂，m̄做驚見笑ê tāitsì，無求kakī ê好處，bē隨便受氣，無計算人ê惡，無ài不義，kantaⁿ kah意真理；凡事包容，凡事相信，凡事ǹg望，凡事忍耐。愛是永遠bē停止。」

若閱讀希臘原文，ē驚疑發見，保羅詮釋「疼」，竟然全用動詞！直譯出來是忍耐、恩慈、無嫉妒、無自誇、無驕傲、m̄做àu步見笑ê tāitsì、無追求kakī ê好處、無hō͘人激怒、無計算á是思念pháiⁿ事、bē因為不義來意愛、只有意愛真理……這一个一个全部lóng是動詞，有正面ê形容，有反面ê形容。愛lóng bē停落來，愛是實踐、愛是行動！

「愛ê真理」第一个動詞是「久長忍耐」，倒頭算第二个動詞是「凡事忍耐」。Tang時需要忍耐？kám是對方真可愛ê時？當然m̄是！忍耐是用tī對方看起來真欠phah、真討厭、真可恨ê時，hit時tsūn to̍h是咱the̍h出忍耐來愛對方ê時。

Tī厝裡，你生活上有一kóa pháiⁿ習慣，幾nā年beh改mā改bē來，我忍耐你。

你日時頭工作bē順、有真tsē挫折，下班tńg去厝裡面臭臭，我用恩慈對待你，雖然我工作mā bē少。

Gín'á破病，lóng是我請假照顧，m̄koh我bē嫉妒你tī職場上比我khah有成就。

Bē自誇、bē驕傲，bē tī人面前比你khah強。

我bē違背你做一kóa àu步見笑ê tāitsì。

我做任何決定，m̀ kantaⁿ追求滿足kakī ê喜愛，mā kā你ê喜愛算做是我ê喜愛。

你ê一kóa路徑惹我受氣，m̄koh我tī主ê內面走tshōe安靜，設法無kā你激受氣。

我bē翻舊帳，bē計算、bē列舉你對我做過ê pháiⁿ事。

兩人做伙喜愛真理，bē因為不義ê tāitsì來意愛，卻是做伙因為kah意真理來意愛。

咱無停來疼彼此ê行動，激情ê感覺一、兩年真緊to̍h散去，m̄koh疼永遠bē消退，一世人有夠用。


多方面實踐

Tī教會kah兄弟姊妹做伙，用ê mā是疼。因為耶穌教導門徒ê記號to̍h是疼！「我賜hō͘ lín一條新命令，乃是叫lín彼此相疼；我án怎疼lín，lín mā ài怎樣相疼。Lín若有彼此相疼ê心，眾人因為ánne to̍h ē認出lín是我ê門徒à。」（約翰福音13章34-35節）

前幾年COVID-19疫情氾濫成災ê時，連續幾nā禮拜基督徒bē tàng實體聚會，kantaⁿ ētàng線頂敬拜。網路興起一个討論，jú來jú tsē基督徒選擇去聽大教會ê名牧、名師講道，是m̄是ē造成教會大洗牌？小教會hō͘大教會併吞？

事實上，基督徒本來to̍h ētàng tsiūⁿ網聽講道、去神學院修課，m̄koh tsit kóa只是增加信仰智識。教會生活siōng大ê功能是tī肢體之間實踐彼此相疼，只有固定tī教會聚會，tsiah ētàng實踐tsit門疼ê功課，學習用上主ê疼去疼hit kóa kakī無ài ê人。咱tsiah ē明白kakī mā是不配ê人，他人mā ē對咱tsih載bē tiâu，m̄koh上主kah兄弟姊妹iáu疼咱到底。因為有疼，咱bē kah討厭ê人無好tàu陣，無來to̍h換教會。另外，講員講kah koh khah好，伊mā無法度了解、關心會友ê生活kah信仰需要。疼，m̄是tùi多媒體聽ē tio̍h，卻是tī生活中實踐來得tio̍h。

到教會若只是聽講道，增加海量ê信仰智識，卻無真正去實踐，kám m̄是tú親像保羅責備ê：「我若有先知講道ê能力，mā明白各種ê奧祕，各種ê智識，而且有全備ê信，叫我ē tàng移山，卻無疼，我to̍h bētàng算是啥物。」（哥林多前書13章2節）

信徒記號

疼ētàng用來判斷一個人是m̄是tùi上主來生。「親愛ê兄弟ah，咱應當彼此相疼，因為疼是tùi上主來ê。凡若有疼心ê，lóng是tùi上主來生，而且認bat上主。無疼心ê，就m̄bat上主，因為上主就是疼。」（約翰一書4章7-8節）

疼mā ē tàng用來判斷一个人是m̄是有聖靈內住。「聖靈所結ê果tsí，to̍h是仁愛、喜樂、和平、忍耐、恩慈、良善、信實、溫柔、撙節。Tsit種ê tāitsì無律法禁止。」（加拉太書5章22-23節）華語聖經ē hō͘人掠做聖靈ê果tsí有九粒，m̄koh希臘文聖靈ê果tsí（καρπὸς）是單數，kantaⁿ有一粒，he to̍h是「仁愛」！這是希臘文ê「重言法」（hendiadys），後面八个詞lóng teh形容啥物是疼，喜樂、和平、忍耐、恩慈、良善、信實、溫柔、撙節是疼ê實際表現。

人ê疼真有限，m̄koh基督徒內面有聖靈，nāī疼bē落去、無想beh忍耐、無想beh恩慈、想起對方所有ê pháiⁿ、軟tsiáⁿ無力ê時，聖靈幫贊咱，親身用講bē出來ê吐大氣替咱祈禱。Hō͘ 咱銘記聖經描述ê疼kah感覺無關係，是決定kah相連續永遠bē停止ê行動。聖靈ê果tsí是疼，tī咱bē爽快、痛苦ê時恬恬á發芽、不斷勇壯。