《主編e5話》

 | | | 轉寄

信望愛資訊，終於有名有實了！

作者 陳鳳翔 2006.01.15

信望愛資訊中心成立到taⁿ已經十guā年loh，tsit幾年內，tī眾義工ê努力下，累積了真tsē寶貴ê基督教資產，但卻一直無名分， 真是「有實無名」。想beh成立社團法人，但會員散佈各地，beh定期聚集開會實在有所困難；想beh成立財團法人，又無夠額ê錢。

就tī舊年2005年ê暑假，有人奉獻一百萬，指定奉獻hō͘信望愛成立財團法人用，koh加上「信望愛」原有ê一百多萬，湊成兩百萬。就án-ne咱終於ē-tàng成立一個最便宜ê小小基金會「財團法人信望愛資訊文化藝術基金會」。

有人問，lín為何無beh成立宗教性ê基金會neh？一方面是宗教性基金會tio̍h ài三千萬neh！遠遠超過咱ê負擔。另外一方面就是咱看見基督教圈目前iáu無任何一個機構，是透過「文化藝術」hō͘人認識基督教，基督信仰透過「文化藝術」來關懷、建基本土。因此，咱就歡歡喜喜成立所謂ê「文化藝術基金會」來服務眾人。

這ná親像馬偕醫院，雖是基督教組織，但是卻無屬於宗教組織，而屬tī醫療體系。信望愛資訊m̄是宗教組織，卻是文化藝術、生活藝術ê匯集地。咱希望kap無仝信仰ê眾朋友，ē-tàng透過「藝術文化生活」來交流一下。

所以，目前《台語信望愛》http://taigi.fhl.net lín ē-tàng看見，有台語文學、藝術、生活類專欄。《信望愛全球資訊網》 http://wwwfhl.net mā是án-ne，內底有豐富ê 文學、藝術、生活類專欄。講到《信望愛kap仰與聖經資源中心》 http://bible.fhl.net最近koh-khah有「珍本聖經數位典藏」計畫 http://bible.fhl.net/new/ob.html。「余倘以天之情言，爾汝豈信乎？」從來m̄-bat看過tsiah-nih美麗ê話語pah！

Tsia謹代表信望愛資訊，多謝愛用者kap義工ê支持。希望各位繼續或當義工、或奉獻、或祈禱來支持咱ê事工。另外，因為信望愛資訊已經成立法人，有名有實loh，所以捐款者tuì 2005/11/18 了後捐款奉獻者，lóng ē-tàng收tio̍h抵稅ê奉獻收據。也就是，以2005/11/18成立法人hit工為界線，2005/11/18了後奉獻ê tsiah ē-tàng開立收據，若是tī 2005/11/18 tsìn前奉獻ê，就無法度開立收據，真抱歉。目前，2005/11/18至2005/12/31，為信望愛資訊網路事工奉獻ê收據，lóng已寄出，如果您tī 2005/11/18了後有奉獻，卻一直無收tio̍h收據，請您趕快kap我聯絡。Tsia向大家報告一下。

日後，只要您奉獻hō͘信望愛資訊中心，阮lóng ē-tàng開立奉獻收據，多謝您ê支持。

願 上帝kap您同在！

執行長 陳鳳翔 敬上