《主編e5話》

 | | | 轉寄

台語影音製片

作者 Tsuniok 2006.06.04

科技快速發展，影音數位化了後，用電腦處理影音製片就jú來jú簡單，連電腦文盲ê我to學會曉製作影音短片去上網，hō͘我續接Audacity製作布袋戲錄音了後，koh進入我ê第二春，享受我ê快樂人生。

參與《馬偕在台灣》布袋戲DVD製作，hō͘我有真tsē學習ê機會，尤其是最後霹靂電視台錄影kap剪接，我lóng有現場參與，我感覺真趣味。而且我製作布袋戲DVD ê目的，是講bueh用漢羅字幕來推廣台語kap宣揚福音，若ē-tàng透過網路一定有事半功倍ê效果，因為影音媒體是新ê趨勢。

今年二月，由蔡明峰創辦了koh發展tsiok成功ê台灣海外網(www.taiwanus.net)，有來波士頓巡迴演講辦說明會。我抱真大ê ǹg望去參加，現場無達成滿意ê合作結論，但認識(bat)台灣來ê曹濟平先生。我三月底tńg到台灣就敲電話kap伊連絡，伊隨時安排時間教我用PowerDirector`剪接製片，koh教我我上網去台灣海外網。

我開始將《馬偕在台灣》布袋戲DVD剪輯廣告短片，台語字幕kap英語字幕各約五分鐘，續落去koh將傳播中心錄影ê《馬偕在台灣》布袋戲DVD發行感恩禮拜影片剪做三節上網。上網了後看tio̍h參觀ê人數快速增加，《馬偕在台灣》剪輯到taⁿ已經有2,500人次。Tsit-ê數字對我來講是真大ê鼓勵，刺激我繼續製作《台灣白話字歷史見證人－卓緞阿媽》、《Basic Taiwanese－Lâi O̍h Tâi-gí》、《來唱咱ê國歌：《台灣翠青》→國歌》等等。

做好ê影音短片mā上網tī台語信望愛，也經過大家ê努力來開闢「台語影音區」。請大家觀賞了後並且多多指教，若huah好，mā-tio̍h提供資料來製片上網，hō͘咱ê台語福音緊緊出頭天！