《主編e5話》

 | | | 轉寄

把握好機會來報揚教會羅馬字福音

作者 Tsuniok 2006.10.22

九月二十九日，教育部國推會通過台灣羅馬字拼音方案，爭議多年致使台灣母語教育一直無法度進展ê Hō-ló台語拼音問題，有一個完滿ê結局。這是值得咱歡喜慶祝ê tāi-tsì,但台語文運動m̄是到tsia為止，應該是一個契機ê開始。

第2849期(10月2~8)ê台灣教會公報頭條新聞：「歷經五年教育部台語拼音定案─確定台灣羅馬字拼音 教會表歡迎」。可惜到taⁿ iáu未看tio̍h任何呼籲，咱長老教會tio̍h如何把握tsit-ê好機會來報揚教會羅馬字ê福音。

台羅拼音方案是由教會羅馬字(通稱白話字)、台灣語言拼音方案(TLPA)kap TLPA改良式整合而成。其實眾人lóng知，TLPA有約90%是採用教會羅馬字系統，所以台羅拼音方案ē-sái講是修訂教會羅馬字，hō͘伊koh-khah接近國際音標(IPA)，ē-tàng kap國際接軌。

通稱白話字ê教會羅馬字是咱信仰祖先留hō͘咱ê寶貝資產，長老教會無teh致意來保存，顛倒是教會外ê人phah拚teh推廣。目前台灣羅馬字協會會員約有95% m̄是基督徒，in是為tio̍h讀寫台語文，去hit當時由鄭兒玉牧師開ê白話字班上課。

五年前，我參加台灣羅馬字協會主辦ê「世界台語文化營」，tú-tio̍h人就展講我是長老教會ê會友。結果被人責備講：「Lín長老教會siōng無效，kan-ta一個鄭兒玉牧師，其他lóng無效！」我無受氣，我家己檢討反省了後，發見hit句話是千真萬確ê事實，我就發奮圖強來認真學白話字，將白話字文獻數位化並上網。Tsiah-ê工作需要電腦工具，我就不辭勞苦四界向電腦專家請教，hō͘我ê工作進度神速，尤其是頂年四月kap信望愛網站( http://fhl.net )合作開設台語信望愛( http://taigi.fhl.net )了後，有開發真tsē台語文電腦工具tī網路頂面，hō͘人免費使用。

現今是電腦ê時代，有電腦工具ê語言tsiah有可能活落去。我有tsit-ê理念，就kā開發好勢ê電腦工具掛起lih台語信望愛，hō͘人免費下載來使用，並四界去報揚hō͘大家知，kah-ná teh傳「台語福音」，我也感覺jú來jú有使命感。

感謝主，經過我詳細說明了後，有kuá教會機構馬上採取行動來把握tsit-ê好機會。台灣神學院有安排我tī 11月初一去kap全校師生分享「台語文ê電腦使用kap資源」；11月初四bueh去總會kap白話字種子教師基礎班及台灣母語教師協會辦ê台語對外教學師資培訓班分享；koh-bueh tī 11月12日去東門教會kap會友及社區民眾分享。Ǹg望透過tsiah-ê分享，將咱長老教會白話字ê福音傳hō͘社會大眾。

台灣長老教會總會助理總幹事也是教育部國語推行委員會委員ê星．歐拉姆牧師，tī台灣教會公報第2849期發表「教會永續展開羅馬拼音之優勢」，伊呼籲講：「教會kap社會之語言發展策略及長遠目標，須從長計議。」

咱長老教會tio̍h把握tsit-ê好機會，積極向社會宣講「教會羅馬字→台灣羅馬字」ê福音，hō͘社會人士明白台灣長老教會tī台語文運動歷史上ê角色地位。