《主編e5話》

 | | | 轉寄

真正重要ê tāi-tsì

作者 陳小小 2008.12.28

舊ê一年teh-beh結束，新ê一年tú-beh開始。

The̍h-tio̍h舊週曆手冊，回顧teh-beh過去ê舊年度，看見上帝所賜ê滿滿恩典；並the̍h出新週曆手冊，計畫tio̍h新ê年度，為teh-beh完成什麼過去無做過、或做無到ê事，雀躍無停。Teh擬訂計畫ê時，就kah-ná未來ê自己已經實現。

當寫落來「減重3公斤」，就已經看見家己ê腹肚少了一kho͘-á，小腹平坦。
寫落來「每工聽空中英語教室」，就已經看見家己kap外國人聊天，雖然無法度對答如流，但mā句句聽bat。
寫落來「練國術」，就已經看見家己體魄強健、身手矯健。
寫落來「禁食祈禱、讀聖經、服事」，就已經看見家己靈命進深。
寫落來「每週kap老公、gín-á約會一pái，每週探望爸媽，每工khà電話關心」，就已經看見「家似天堂」，三代親子間ê感情濃郁無停。

M̄-koh，今年度teh訂定計畫ê時，我卻想tio̍h兩個gín-á以及所帶ê團契大學生ê問題。我發現in想beh做ê事siuⁿ-tsē，但是無時間去執行。所以，真tsē lóng只ē-tàng田嬰點水「有做、做完」，á無法度達到「做對、做好」ê層次，非常可惜。

Tsa-bó͘-kiáⁿ今年ê國樂比賽，老師幫伊報名三項「個人」、「絲竹」、「大團」，每一項lóng各有自選曲kap指定曲，mā就是總共伊tio̍h預備六首作曲。Tuì暑假到十二月初，tsiah短短五個月，加上伊音樂資質平平，準講每工lóng練2-3點鐘，iáu是來不及練到純熟。這就是因為報名siuⁿ-tsē項，致使成做砲灰。

團契大學生問題mā是仝款。In tsit學期組樂團，除了原本ê聚會內容，iáu-beh額外練習樂器（個人kap團體），並得籌辦兩個大型活動：迎新晚會、聖誕晚會。當然週六、禮拜日iáu有教會活動、主日崇拜mā是一定聚會ê。

但當學期開始，中間有什麼好康活動，如天韻聖誕晚會、烏門山劇團、某一個台北或國外來ê名講員來台南演講，in捨bē-tàng放過；iáu有，好看ê電影，mā bē làu-kau去；學校裡同班同學in社團辦ê活動，mā tio̍h去參加捧場，因為家己團契辦ê活動，in mā tsiah會過來參加仝款。結果tāi-tsì一大堆，連續kuí-nā工無睏，但tāi-tsì做好ê卻無tsē。

現代社會，hō͘ hiah-ê人困擾ê m̄是機會siuⁿ少，卻是機會tsē kah hō͘人暈頭轉向。咱計畫tio̍h多方面發展家己，體驗人生各種層面，但是beh試探ê物件siuⁿ-tsē，hō͘咱走tsông tio̍h磨。

我bē比gín-á、大學生khah好。Tuì in身上，我mā反省看見家己ê問題。最近，有一位舞蹈老師真賞識我，beh邀請我去演舞台歌舞劇。真是難得ê機會，hō͘我躍躍beh試。但，我想tio̍h信望愛舊約原文字彙分析 parsing ê負責人梁望惠老師，便婉拒tsit-ê邀請。因為承諾tsit-ê，一定tio̍h-ài附上排練ê時間，其他計畫項目就tio̍h犧牲。

梁望惠老師ê心志單純，年度項目清楚簡單，一pái只做幾件事。舊約39卷，逐字分析。八年guā，伊集中火力，深入簡出，甘願為上帝做一個沈默ê戰士，浩大ê舊約原文字彙分析工程終其尾今年度全部輸入完工。

伊寫落來感恩ê話：
「2001到2003年，開了約三年半ê工夫，為和合本修訂稿起稿ê時，我個人獨力完成了tuì詩篇到瑪拉基書ê原文逐字字彙分析。這mā是我負責和合本修訂稿起稿ê部分，iáu有創世記到約伯記需要去做。續落來，因為tī工作之餘koh修習博士班ê課程，parsing ê速度慢落來。

了後有一kuá學生加入，阮幾個人同步進行：江立立（創世記、民數記、撒母耳記頂下、列王紀上、歷代志下、尼希米）、潘蘭馨（申命記31-34章）、劉蘊芝 （約冊亞記、列王紀下）陳鳳翔（士師記）、張永龍（以斯拉）、王乙珊（約伯記）、林雅敏（雅歌冊）梁望惠（其他冊卷）。無想tio̍h tsit-ê工作一做就費了八年。」

感謝上帝hō͘我有機會參與tsit項聖工，藉tio̍h邊做邊學習，kā舊約原文詳細閱讀一遍。Mā多謝信望愛全體同工，特別是技術組同工ê辛勞。阮同齊tī聖經查考事工上所擺上ê心力，相信主必記念kap祝福。」

明年度（2009）伊開始進行審閱舊約原文字彙分析，或tī 2010年thang完成審閱工作。其實除了伊之外，信望愛站頂面iáu有kuí-nā位義工mā是仝款，一生只為上帝做幾件事。Ná親像台語聖詩ê李瑞雄、台語聖經朗讀ê何姊妹、華語聖經朗讀ê丁同蔚、台日大辭典ê林俊育……。看tio̍h tsiah-ê榜樣，如雲彩環繞tī身旁，我思考tio̍h家己 ē-tàng為上帝做什麼「真正重要ê tāi-tsì」？

咱應該tio̍h認清「人生ê取捨」，koh再怎樣多方試探，mā無法度試探全世界所有ê項目。Ná親像食滿漢全席，每項菜lóng是經典，每樣lóng想tam一嘴，但是一項一嘴ê食法，顛倒無好食，而且往往擋bē-tiâu蛇吞象ê貪心，lóng是拚命塞到食道逆流想吐。Iáu不如一pái只有兩三項佳餚，慢慢tam每項ê深度美味。

因此，以往個人計畫，我是án-ne訂定ê：（以運動為例）「土風舞30分鐘」。但今年度我bueh án-ne訂「跳個人舞，不跳雙人，運動m̄是表演，無超過40分鐘。」畢竟，有其他「一生真正重要ê tāi-tsì」，bē-sai22錯過，koh-khah需要我花夠額ê體力kap時間來全力以赴。

就kah-ná，客語聖經朗讀一直有人email來信詢問，但是阮tshuē-tio̍h ê會曉客語ê義工lóng真無閒，致使lóng無進度。但上帝就tī今年聖誕節，送信望愛壹份大禮。一位tī教育廣播電台主持客語節目的Rita，自願負起客語聖經朗讀大計，真是超感動ê。

歲末年初，hō͘阮想清楚什麼是家己真正重要ê tāi-tsì neh？「選擇比努力koh-khah重要」。昨hng ê選擇決定今á日ê結果，今á日ê選擇決定明á載ê結果。選擇m̄-tio̍h，努力白費。