《歷史上ê主耶穌》

 | | | 轉寄

第二章_3 暢遊羅馬

作者 杜英助 台譯：Lîm Tsùn-io̍k 2020.01.26

古早時代ta̍k个城邦á是國家ê起源，lóng有一套非常神話式ê傳奇故事；而且形容in ê創設者是天神ê kiáⁿ，所以，埃及ê法老是日頭神瑞（Re)ê kiáⁿ；希臘ê國王是宙斯（Zeus)á是眾神ê kiáⁿ；中國ê皇帝是天子；日本ê皇帝koh khah偉大，叫做天皇…。

羅馬城ê創設者羅慕路斯兄弟ê祖先，相傳是特洛伊（聖經地名叫做特羅亞）ê保護神維納斯（Venus)女神ê kiáⁿ阿涅阿斯（Aeneas)王子，伊tī公元前1184年左右，特洛伊城被希臘人攻陷了後，帶領餘民逃到意大利ê拉丁姆上岸定居；了後，當地土著居民ê國王拉丁烏斯（Latinus)kā伊ê tsa-bó͘ kiáⁿ嫁hō͘ 阿涅阿斯做bó͘，此後雙方ê人民lóng叫做拉丁人（Latins)。聽講：拉丁人tī意大利北部共建了30座堅固ê城。

當咱行入去羅馬城to̍h ē-tàng看tio̍h一隻母狼哺育一對雙生á兄弟ê雕刻銅像；久長以來，羅馬人tī歷史上lóng深信tsit尊母狼育嬰ê故事是羅馬城ê起源kah標誌。

相傳維納斯女神ê kiáⁿ特洛伊ê英雄阿涅阿斯，傳到10幾代以後ê kiáⁿ孫普羅卡王破病過身tsìn前，kā伊ê王位傳hō͘ 伊ê大kiáⁿ努米托爾。伊做人溫和，治國有方，卻hō͘ 伊生sêng殘暴、野心勃勃ê小弟阿穆留斯殺害；koh壓迫努米托爾ê女公主西爾維亞當女祭司（tsit-ê職務無法度結婚），想beh斷絕她ê後代。

當時有一位傳說中希臘ê戰神馬爾斯（Mars)同情西爾維亞女祭司ê遭遇，kah她生一對雙生á。因為án-ne，阿穆留斯聽tio̍h tsit-ê消息以後，心內非常大tio̍h驚，to̍h是派女僕kā tsit對雙生á用籃á貯-.leh，tàn去河水大湧ê台伯河水裡去。M̄-koh， tsit位女僕同情tsit對tú出世無gōa久ê雙生á，to̍h偷偷á kā籃á藏tī樹枝ê中間，m̄ hō͘ tsit對嬰á被大水沖走。

無gōa久，河水消退，tsit對嬰á iau kah uah-uah大哭，hō͘ 一隻來河邊lim水ê母狼聽tio̍h，牠以原本ê母愛，to̍h是用牠ê奶水kā in飼飽;此情此景hō͘ 一个顧羊人看tio̍h，心受感動，tī母狼飼飽嬰á離開以後，to̍h kā tsit對嬰á抱tńg去厝裡撫養，而且kā in兩人分別號名為羅慕路斯（Romulus)kah雷穆斯（Remus)。

羅慕路斯兄弟長大了後知影in ê身世，為tio̍h beh報父仇，to̍h是動員kā阿穆留斯國王鑿死，而且決定tī in被母狼飼奶ê所在起造一座新城。M̄-koh為新城號名ê時，兄弟之間發生爭執、口角，後來kik起兄弟互相殘害（kiám-tshái是狼性爆發）ê人間悲劇；結果小弟hō͘ 阿兄殺害，城名to̍h以阿兄ê字號叫做羅馬（Roma)，時間是公元前753年四月21日。因為án-ne，羅馬人就kā tsit工定tio̍h做建城開國記念日。

二、羅馬城kah羅馬帝國興亡ê歷史遺跡
羅馬人ê血統是混合拉丁民族kah希臘人ê血統，所以，in ê智慧有拉丁人ê法律kah政治思想，koh有希臘人ê哲學、政治理念、建築天才kah藝術素養；m̄-koh，因為傳說中被母狼哺育，所以tī軍事kah娛樂方面to̍h有極強烈ê野狼殘暴ê野性，實為美中不足，mā是伊ê敗亡ê原因。

Tī tsia咱來kā羅馬帝國強盛時期（公元前27年～公元419年）ê繁榮市容到羅馬帝國被日耳曼人毀滅ê時留落來ê殘景做一个對照，hō͘ 大家回顧古羅馬thang歡喜mā thang啼哭ê歷史。Tùi一kóa紹介羅馬帝國ê影片中，咱to̍h是thang koh再tńg去競技場觀看人kah人、人kah獸惡鬥ê殘忍場面，來追念受逼參加競技ê鬥士kah在場視死如歸、殉道ê基督徒。

2-1 元老院︰早tī羅慕路斯建立羅馬城了後，伊並無獨攬大權。Tāi先設立元老院，挑選100名家族ê族長，薩賓人ê代表100名，後來koh增加到支持者100名，共300名成員做「王」室ê顧問。伊ê職權掌有：收稅、徵兵、作戰、媾kah…等等權力，因為án-ne，元老院koh稱做長老議事會。

會議ê決議，選出一个執政首長去執行實施國王ê責任，而且負責建設城市ê工作；á一切公共建設ê藍圖，lóng仿照希臘雅典衛城ê保護神雅典娜ê巴特農神廟ê外觀設計，而且依它ê黃金比例、大細比率定型。凱撒大帝為tio̍h獨攬大權，tsiah tī元老院門口hō͘ 伊ê一位養子布魯特斯kah卡西斯刺殺，koh hō͘ 其他元老院成員用刀共刺23刀，流血siuⁿ過tsē、倒tī 土kha來死。

2-2 神廟：歷代帝王、皇帝kah羅馬人lóng相傳in ê祖先是tùi希臘奧林帕斯山頂ê眾神kah人間美女發生性交關係生落來成做英雄á是國王；所以tī羅馬城內，國王lóng ē起造眾神ê神廟hō͘人民崇拜，主要ê神廟如下：

A）維納斯神殿：崇拜特洛依保護神維納斯。聽講特洛依王子阿涅阿斯to̍h是維納斯kah特洛依國王生落來ê一个kiáⁿ。伊tī特洛依王國被希臘聯軍phah敗ê時，帶領部分部下kah人民逃走來到意大利。

B）火神殿宇：神殿內供奉雅典娜女神。相傳雅典娜女神mā是羅馬起造者羅慕路斯ê祖先特洛依人所崇拜ê保護神。火之女神，名叫維斯塔；神殿中ê聖火經常點to̍h，來祈求多產kah繁榮。

C）農神殿宇：獻hō͘ 掖種kah農耕ê神明薩圖努斯。神殿內設有收藏國家財寶資金ê總庫。

D）和諧女神殿宇：記念貴族kah平民和解ê女神殿。

E）維納斯kah羅馬神殿：為記念維納斯kah兩位羅馬女神來起造ê。

F）帝王廟：羅馬歷代國王kah皇帝lóng認為in是神明ê後代，所以in mā是神，應受人民ê跪拜；因為án-ne tī in死後，歷任帝王lóng ē為in建廟，其中有：羅慕路斯廟、凱撒廟、安東尼廟。

G）萬神殿：羅馬帝國統治歐洲、亞洲kah非洲，kā地中海變成內海ê時，kā埃及、希臘kah中東各國人民所敬拜ê神明lóng總請來羅馬hō͘人民崇拜，所以名叫萬神殿，是羅馬帝國時代唯一留存到tsit-má siōng完整ê一座神殿。

2-3 凱旋門：歷代偉大ê皇帝kah英雄出征勝利回國，lóng ē起造凱旋門來風神伊ê功績。主要ê凱旋門有：

A）奧古斯都拱門：這是奧古斯都為tio̍h tī海戰中phah敗安東尼kah埃及海軍凱旋tńg來ê時所起造ê勝利門，tī公元前31年起造。

B）提多凱旋門：公元70年，羅馬提多將軍平定偤太人ê革命，拆毀耶路撒冷城kah聖殿，帶tńg來聖殿內ê大金燈台（雕刻tī門內）ê時所起造ê勝利凱旋tńg來到羅馬ê功績大門。

C）賽佛留凱旋門：公元203年，賽佛留大帝父kiáⁿ koh一pái遠征安息人（波斯人）勝利回國，kā phah贏ê經過雕刻tī tsit三道門頂面，而且用長篇ê碑文刻tī頂面，永垂青史。

D）君士坦丁凱旋門：公元324年，君士坦丁擊敗對手，成做羅馬帝國ê皇帝所起造ê凱旋門，到taⁿ siōng完美。

2-4 公共活動ê廣場如下：
A）帝國議事廣場：涵蓋古羅馬廣場等等五个廣場在內。廣場四kho͘ 圍ê環境lóng用雙重柱廊teh se̍h，中央是凱撒大帝騎馬ê塑像kah守護神維納斯ê雕像，象徵皇帝ê權威來自維納斯女神；目前kan-taⁿ殘存迴廊kah維納斯神廟ê部分遺跡。廣場是160公尺×75公尺，tī公元前54年起造。

B）奧古斯都廣場：廣場ê面積是125公尺×118公尺。中央是火神廟，崇拜大力士赫克力士。神廟邊á khiā立奧古斯都ê雕像，koân 14公尺；tī神廟內koh供奉凱撒ê劍，tī公元2年完成。

C）圖拉真廣場：羅馬siōng大ê廣場，面積為300公尺×180公尺。廣場周圍有兩座圖書館kah神廟；m̄-koh目前kan-taⁿ有留存一條圖拉真皇帝ê勝利記念柱，高約30公尺。柱頂本來khǹg圖拉真皇帝 khiā像，m̄-koh tī 16世紀卻改khǹg耶穌ê門徒彼得ê雕像。

2-5 羅馬競技場：tī羅馬帝國內ê大城市中lóng有起造競技場。希臘ê歌劇場是半圓形ê，á羅馬ê競技場就án-ne改做圓形ê á是雞卵形ê。Tsit種圓形ê競技場，今á日台灣另名叫做「大巨蛋」。

羅馬巨型ê競技場是雞卵形ê，khah長ê hit pêng有188公尺，khah短ê一pêng是156公尺，á外牆ê koân度是50公尺；tsit座羅馬siōng大ê競技場內面ê座位thang容納5萬人。為避風、遮日頭、遮雨，所以，牆ê頂面有240支科林斯（哥林多）式圓形ê壁柱接載（tsih-tsài)蓋tī競技場頂面ê帆布篷。M̄-koh， siōng中央ê圓頂就án-ne留有一个大洞口thang hō͘日頭光照射入來。為tio̍h方便出入，koh設有80个拱形門，hō͘ 觀眾thang緊入場á是疏散。

競技場ê土kha用大形ê柴板鋪設，柴板頂面koh hē一層海沙，來預防鬥劍士摔（siak)倒，而且thang吸收鬥劍士受傷á是被鑿死所流出來ê tsheⁿ血；競技場內面ê地板非常厚，鋪細沙了後to̍h無空隙，因為án-ne mā thang放水進場á是放戰艦入內進行海爭鬥戰。

Tī地板頂面，另外koh有活板門通往關tī地下室內面等待出場來kah鬥士（有時不帶劍）相ián ê野牛á是獅；tī地下室mā設有鬥士ê歇睏室（候鬥室）。

競技場ê相ián表演分做早起kah下晡無仝ê節目，早起ê競技稱做「鬥獸大會」，是人kah野獸互鬥，m̄是人贏to̍h是hō͘ 野獸咬死；下晡ê節目是戰俘（罪犯）互相殘殺，á siōng尾一名勝利者beh koh再kah另外一名全副武裝老練ê鬥士koh再相ián；若是戰犯勝利，就án-ne由觀眾kah皇帝決定：釋放á是自由；輸者mā由觀眾kah皇帝決定是m̄是留落來性命？M̄-koh大多數ê敗者，lóng由皇帝命令勝者kā伊一刀鑿死，血染現場。Tsit時tsūn坐在台上ê觀眾lóng ē為勝者大聲喝采叫好。這是羅馬人siōng殘酷、極無人道ê野性娛樂。

競技場ê觀眾席總共分做四層，下kha一層是皇帝、元老院ê元老、騎士kah高級市民ê座位；第二層是一般市民ê座位；第三層是自由奴隸kah kē層市民ê座位；第四層（siōng頂面一層）留hō͘ 婦女做觀看ê座位。

現今殘留ê羅馬競技場是tī尼祿皇帝自殺了後，由一陣戰俘kah奴隸tī公元69年開始動工興建。公元70年，提多將軍平定偤太人tī耶路撒冷ê動亂了後，koh掠4萬名偤太人ê壯丁加入起造ê工作；經過10年，tī提多稱帝ê時完工，真tsē偤太人kah初代教會ê基督徒因為相信耶穌是「主」，lóng tī tsit座競技場內續接喪失性命殉道。

2-6 地下陵墓：羅馬ê貴族死後lóng khǹg tī用大理石製造ê藝術石棺，á是tī古阿匹亞大道（Via Appia Antica)兩pêng起造陵墓埋葬；m̄-koh，基督徒殉道了後to̍h kā伊ê遺體khǹg tī地下四通八達ê立體洞穴陵墓，tsiah-ê陵墓是鑿軟石灰岩來做成ê，tī長300公里ê pōng空兩pêng koh再鑿出多層矩形ê壁洞，聖徒ê遺體經過藥物處理，to̍h是用簡單ê白布包起來，隨時khǹg入去壁洞內，了後用陶版á是大理石片kā它封閉起來，thèng候，thèng候，koh再thèng候主耶穌ê koh活再臨。

三）結語
基督教二位大傳道者彼得kah保羅lóng tī公元後64年尼羅（尼祿）皇帝放火燒羅馬ê貧民區ê時，koh延燒到豪宅區ê厝宅，深驚羅馬公民問罪，整暝無法度睏落眠，皇后向伊建議：kā放火燒羅馬ê罪名移嫁hō͘ 基督徒承擔to̍h好勢；因為án-ne，tī尼祿皇帝殺害基督徒ê時，彼得kah保羅mā做伙為主殉道。M̄-koh，過去羅馬帝國ê暴君苛政消失à，今á日基督教ê福音卻傳遍羅馬，真tsē大教堂lóng取代古早時代ê神廟、皇宮等等壯麗ê建築物，因為上帝是歷史之主。

本人tī公元1981年五月，頭一pái為tio̍h beh探討彼得、保羅kah初代基督徒tī羅馬被尼祿暴君迫害ê歷史遺蹟，帶一部價值三個月薪水ê中型專業hip相機去ta̍k所在hip基督徒受難ê歷史現場。有一工暗時歇睏ê時，tsit部hip相機竟然hō͘ 歹徒剪斷phāiⁿ帶，搶去，心內真沉痛。隔工向警察局報遺失，意大利ê警察無tshioh皮，kan-taⁿ開一張遺失證明hō͘ 我。Tī我ê面前kah後面lóng排一列長長ê隊伍，lóng是物件hông搶tsiah來報警ê外國人（大概lóng是自助旅行ê人）。警察全部lóng開一張遺失證明單hō͘ ta̍k个受害者收起來，而且講：「回國去向保險公司請求理賠!」就án-ne to̍h結案à。Oh!離開警察局，心內非常gāi-gio̍h，m̄-koh koh想看初代基督徒tī羅馬生活ê遭遇，財產被政府沒收，性命被害來殉道…回頭koh再想看ka-kī，單獨來羅馬朝聖旅遊，雖然kan-taⁿ有喪失一部心疼貴重ê hip相機，m̄-koh無喪掉性命，iáu是tio̍h凡事感謝上帝。阿們！