《歷史上ê主耶穌》

 | | | 轉寄

第二章_2 以色列簡明史（含舊約對耶穌基督ê預言）

作者 杜英助, 台譯：Lîm Tsùn-io̍k 2020.01.19

1）羅馬起源ê傳奇故事
根據傳說︰tī台伯河邊有一位拉丁公主生一對雙生á，號名叫做羅慕路斯（Romulus)kah雷慕斯（Remus)。老母hō͘ 她ê阿叔殺害了後，tsit對細漢ê雙生á hō͘ 人tàn入去台伯河；當時有一匹母狼救in,而且用母奶養飼in長大，而且教in防衛ka-kī ê武術，而且ē kah狼仝款ê團結忠誠。M̄-koh tī in大漢了後，為tio̍h起造一座城市，因為意見bē合suah起口角、紛爭，甚至自相殘殺。結果一傷一死，活落來ê羅慕路斯tī公元前756年，tī台伯河兩岸起造一座城，以伊ê名為名叫做羅馬。

2）羅馬帝國ê興起
a）公元前510年，羅馬人驅逐伊特拉斯坎王ê統治開創羅馬共和（共和ê拉丁文 “res publica”,意思是公眾ê事務），由一陣羅馬ê貴族、長老、護民官共300gōa人組成類似民主ê元老院（Senate)來共同統治，而且做決策；元老院就án-ne推出一位以貴族利益至上ê首長來掌理政務。

b）公元前64年，有一位少年偉大ê青年將軍龐貝（Gnaecus Pompeius/Pompey the Great)征服現今ê土耳其kah迦南地／以色列，伊ê勝利ê光輝帶hō͘ 伊對民意代議制感覺討厭，suah切望強人領導政治ê傾向。

c）公元前60年，羅馬政體形成三巨頭政治，由龐貝代表軍方，克拉蘇（Marcus Licinius)代表貴族，kah凱撒／該撒（Gaius Julins Caesar)代表人民，三人ê巨頭政治取代傳統ê共和政治體制。

d）公元前55年，凱撒征服高盧（法國）、德國萊茵河kah英國等等ê富庶地區，mā為羅馬帶來極大ê財富。了後凱撒率兵進入埃及，協助埃及豔后克莉奧佩特拉（Cleopatra)擊敗伊ê小弟ê勢力，就án-ne成為埃及帝國ê統治者；伊kah豔后發生關係後生一个tsa-po͘嬰á，象徵羅馬帝國kah埃及法老王國結親、結盟，而且預告tsit位tsa-po͘嬰á王子將來beh繼承埃及kah羅馬ê王位成做埃羅國王。

當凱撒將軍帶兵tńg來羅馬半年後，埃及豔后tshōa新生王子做伙去拜訪羅馬ê時，受tio̍h羅馬市民盛大ê歡迎，卻mā激起另外兩名巨頭ê懷疑kah仇視。到公元前45年，凱撒平定內亂，ka-kī宣布獨裁政治，成做羅馬政府唯一ê獨裁者；隔年三月15日，to̍h是被兩位兇手布魯特斯kah卡西斯做頭ê一陣共和擁護者tī元老院刺殺，被刺23刀，流血siuⁿ過tsē，就án-ne倒tī土kha來死；凱撒死後，埃及豔后帶她ê王子坐船tńg去埃及，美夢成空。

3）羅馬帝國ê第一位皇帝屋大維（Octavian)
維koh名奧古斯都（Augustus)，伊是凱撒ê姪á兼養子（所以tī路加福音書中稱呼伊ê名叫做凱撒奧古斯都）；tī凱撒被鑿死了後，伊ê獨裁政治思想而且無tòe伊消失，羅馬帝國分裂為東西兩股敵對勢力，東半部由凱撒軍隊ê左正手安東尼將軍（Marcus Antonius)主導，有埃及豔后克麗奧佩特拉支持；西半部就án-ne由屋大維統治。

屋大維為向安東尼示好，kā伊ê小妹嫁hō͘ 安東尼，m̄-koh tsìn前安東尼卻迷戀埃及豔后克麗奧佩特拉，後來koh kah她政治結婚，引起屋大維率兵kah安東尼、埃及軍隊發生劇烈ê海戰。結果安東尼kah埃及豔后ê軍隊潰敗逃走tńg來埃及，安東尼tī公元前3年拔刀自盡；埃及豔后痛聞安東尼自殺，她tī屋大維追到亞歷山大ê宮殿ê時，mā用毒蛇自盡，遺言中請求屋大維准她kah安東尼埋葬做伙，thang講是「tī天願做比翼鳥，tī地願為連理枝」ê一對恩愛國王kah王后。

公元前31年，克麗奧佩特拉kah安東尼所生ê王子，被封立做埃及省（成做羅馬帝國ê殖民地）ê省長，向凱撒稱臣。

4）羅馬帝國統治下耶穌時代ê偤太地 凱撒奧古斯都（屋大維ê帝名）為tio̍h用軍隊ê力量來維持羅馬帝國kah伊ê殖民地ê治安，凡若有羅馬公民權ê男青年ta̍k个一定tio̍h當羅馬兵，tī羅馬帝國ê版圖內服三年兵役；因為án-ne，為tio̍h養兵來維持強盛ê國力，軍需費用真koân，koh為tio̍h建設羅馬城成做帝國ê榮耀，mā需要龐（pâng）大ê經費，就án-ne向全國人民實施抽取人口稅（俗稱丁稅），tī公元前7年起，正式叫全國人民lóng登記戶籍，前後費時10年tsiah完成。

路加醫生記述耶穌降生ê年代講︰「Hit時，羅馬皇帝Au-gú-su-toh有頒布詔令，叫全國ê人民lóng tio̍h登記戶口。 Tsit-ê頭一pái ê戶口普查，是Ku-lé-niú做敘利亞總督ê時實施ê。所以，ta̍k人lóng tio̍h去家己ê故鄉登記戶口。約瑟tùi加利利省ê拿撒勒城，tńg去猶太省ê伯利恆城，to̍h是大衛出世ê城，因為約瑟屬大衛ê家，是大衛ê世系。約瑟beh kah伊所聘定ê馬利亞做伙登記戶口；hit時，馬利亞已經有娠孕ā。In tī hia ê時，馬利亞生產ê期到。就生頭胎ê tsa-po͘ kiáⁿ；她用布kā祂包teh，hō͘祂睏tòa馬槽裡，因為客館無所在thang hō͘ in tòa。」（《全民台語聖經》路加福音2︰1～7）

根據歷史學家考證，耶穌係tī公元前5年三月降生，而且tī公元30年春天Poâⁿ過節期安息日tsìn前一工被釘十字架，三工後（to̍h是禮拜日，七日之頭一工，通稱主日）koh活；耶穌是上帝ê kiáⁿ，道成肉身（人子）tī世上生活ê tsit段日子（公元前5年～公元30年），叫做歷史上ê主耶穌。

聖經神國歷史概覽 1. 聖父、聖Kiáⁿ、聖神三一真神，無始無終

2. 歷史上ê主耶穌概覽：人子耶穌有始有終（tī人類ê歷史是起頭ê，mā是路尾ê）ê年代表