《歷史上ê主耶穌》

 | | | 轉寄

第三章_3 以色列簡明史（含舊約對耶穌基督ê預言）

作者 杜英助, 台譯：Lîm Tsùn-io̍k 2020.02.16

希律王雖然娶偤太人米利暗做bó͘，m̄-koh，偤太人iáu認為希律是一个假扮偤太人ê以東人（以土買人），無資格做偤太人ê王；因為án-ne希律為tio̍h進一步扶tháⁿ偤太人，伊深知偤太人ê宗教無拜偶像，所以，凡若tī伊任內偤太人所使用ê銀角á，lóng另外發行，無照慣例，無印羅馬皇帝凱撒ê肖像（tī羅馬帝國統治下，有凱撒皇帝肖像ê銀角á當做通用貨幣）。

希律王為向羅馬皇帝凱撒奧古斯都（屋大維）表示忠誠、效忠，ta̍k年向偤太人徵收重稅來向凱撒進貢；koh為tio̍h beh向皇帝扶tháⁿ，所以tī偤太地建設凱撒利亞港口kah真tsē豪華ê行宮（有耶路撒冷ê希律宮殿、耶利哥ê王宮、馬撒大ê行宮、伯利恆南郊ê希律堡kah死海東pêng ê馬卡努斯堡）。

所以，為tio̍h籌募龐大ê建設資金，希律王不得不koh向偤太人課徵重稅；á地方抽稅ê人為tio̍h beh飽攬地方收稅ê大權，往往koh tio̍h向人民抽取比稅金加出數倍ê中人禮，因為án-ne，suah hō͘ 農民kah sing-lí人受逼敢怒m̄敢言，m̄-nā怨嘆連續，而且心生仇恨、看輕，而且kā伊看做是敵人。當時偤太人所繳ê稅金種類thang分做三大類︰

1）什一稅︰農民ta̍k年收成按照傳統慣例一定tio̍h kā十分之一納hō͘ 利未人做生活費用，m̄-koh tī第七年土地休耕ê時，to̍h m̄免繳十分之一ê收成稅（五穀kah新酒）。

2）聖殿稅︰每个偤太tsa-po͘人（含tī國外tòa ê僑民）ta̍k年一定tio̍h繳半舍克勒；婦女m̄免繳，來提供維持聖殿ê費用。

3）政府稅kah地方稅（世俗稅）︰Tsit項稅賦ê負擔siōng沉重，偤太人受逼tio̍h向羅馬政府繳納巨額ê進貢稅，koh ài向地方統治階級—希律王納稅；á向希律王納稅ê項目包羅萬象，有：農民稅、製造業稅、魚鹽稅kah關稅。

聽講：當時tī羅馬帝國ê殖民地，人民ê賦稅約佔收入ê 9～12％；m̄-koh tī偤太地，人民一定tio̍h繳納28～33％，甚至kôan到40％。總是，人民除了有義務納稅以外，從來to無福利thang講。 當農民耕地欠收á是漁民收入減少ê時，有時一定tio̍h用耕地á是tsa-bó͘ kiáⁿ向財主抵押借款；親像抵押款無法度坐額ê時，耕地ē hō͘ 財主沒收，tsa-bó͘ kiáⁿ ē受迫賣淫來還債。因為貧民生活被壓迫á是被輕視，in就án-ne tī社會上無地位。財主無公義，對弱勢人民koh khah無憐憫之心，所以，貧富生活tsing差真大。