《歷史上ê主耶穌》

 | | | 轉寄

第三章_4 羅馬統治下ê希律王朝

作者 杜英助, 台譯：Lîm Tsùn-io̍k 2020.02.23

希律王承續以東人先祖無情ê血統，tī公元前37年，tī羅馬被屋大維kah安東尼tī元老院封立為「偤太人ê王」，繼承in老父統治偤太地。伊ê王位恐驚hō͘ 人奪取，伊生sêng殘忍，實施對偤太人ê監視制度，殺害真tsē無辜ê人。為tio̍h beh得tio̍h羅馬皇帝凱撒奧古斯都ê歡喜kah信任，伊向偤太人課徵重稅用tī大型ê建設。Tī tsia來kā伊tī任期內所起造設ê王宮、港都、堡壘（行宮）kah為tio̍h beh扶tháⁿ偤太人所擴建壯麗ê第二聖殿等等，簡介如下：

1）耶路撒冷ê王宮︰位置是tī耶路撒冷約帕門ê東pêng。城門外ê道路，西通約帕港口，南到伯利恆、希伯崙kah別示巴，東到耶利哥，佔地廣大。位置tī耶路撒冷北面ê城牆所在有希坡樓、法撒勒樓kah馬利安尼樓／米利暗樓。為tio̍h安全起見，宮殿連接tī堅固ê城牆內面，它ê豪華程度，偤太人ê歷史家約瑟夫講：巧匠ê精工、壯麗，它ê妝thāⁿê光彩hiáⁿ目，金銀製造ê器皿（béng)、傢俱lóng hō͘人驚嘆o-ló。睏房ê單人床排100 gōa張。Tī王宮外面ê環形道，設置華麗ê廊柱。露天ê門口埕種滿四季長青ê植物。中央koh有一个khiā立銅像ê水池kah花園…。此情此景真正是無法度用筆墨描述。公元70年被羅馬兵焚毀，tsit-má經過整修了後，成做以色列tī耶路撒冷歷史博物館。

2）安東尼亞堡︰位置是tī聖殿ê西北角頭，有四座koân過聖殿ê軍事堡壘，而且當做羅馬總督來耶路撒冷巡視ê行政辦公室；羅馬官兵tī tsia駐紮，暝日tùi kôan ê所在監視偤太人tī聖殿ê宗教活動是m̄是有背叛羅馬帝國ê舉動。耶穌to̍h是tī tsia接受彼拉多總督審判無罪，m̄-koh却hō͘ 伊交hō͘ 偤太人去kā祂釘十字架。

3）開闢凱撒利亞新港都：耶路撒冷對外通航ê港口是約帕；希律王認為siuⁿ細，koh無夠軍事使用，就án-ne tī地中海東岸開闢一个符合羅馬帝國軍商使用ê新港。Tī tsit-ê海港，希律王用白色ê大理石做建材，以記念（phô͘）凱撒大帝父kiáⁿ；新港港口面臨地中海，直通希臘、羅馬kah埃及ê亞歷山大，方便羅馬官兵kah商旅進出地中海各地港口。當代tī tsia約tòa 6萬人，大部分ê人口是羅馬人，mā有少數（數千名）ê偤太人。Óa近海邊有羅馬總督ê行宮／官邸，總督官邸北pêng有賽馬場（兼作競技場）；東pêng是城區，有大浴間；南pêng有露天大劇場，thang坐二萬人。當代每五年lóng ē tī tsit-ê競技場舉辦一pái大規模ê人kah人、人kah獸以及戰車競賽，表演hō͘ 羅馬人做娛樂觀賞，而且hō͘ 外邦ê sing-lí人觀看；偤太人認為tī競技場ê相ián是殘忍ê殺人行動，是違背摩西十誡中「M̄-thang殺人」ê誡命，所以，虔誠ê偤太人是bē來觀看tsiah-ni̍h殘酷ê表演。偤太人若是犯tio̍h羅馬帝國ê法律，ē被送到tsia來kah鬥劍士戰鬥，in mā bē出手kah hiah-ê鬥士相ián。保羅被關，是tùi tsia坐船往羅馬上訴。

為tio̍h beh解決凱撒利亞港都ê lim水，希律王koh tùi迦密山山kha ê湧泉池起造一條10 gōa公里長ê高架引水道，伊ê工程ê浩大並無比起造一座城khah容易。M̄-koh án-ne一座堅固、精美ê港都，tsit-má lóng被戰爭kah地動破壞成做拋荒ê古蹟，kan-taⁿ留落來一座露天大劇場，iáu thang當做舉辦露天音樂會使用。Τī耶穌koh活了後，彼得bat tùi約帕來到tsia向羅馬ê百夫長哥尼流傳福音（使徒行傳第10章）。Tsit-ê大劇場tsit-má iáu thang使用。Ta̍k年夏季暗時，以色列人經常tī tsia舉辦音樂晚會。

4）耶利哥ê離宮、伯利恆南郊ê希律堡、馬撒大行宮kah死海東pêng ê馬卡努斯堡︰希律王天性多疑，對人殘忍，ài聽人kā伊講「好聽ê細聲話」，所以tī伊統治下ê偤太地，伊養飼真tsē監視人民言行ê「秘密警探」，為tio̍h án-ne，真tsē善良ê偤太人民經常hō͘ 人陷害；因為伊心內非常驚hō͘ 人謀害，所以為tio̍h保護ka-kī ê安全而且防衛偤太人ê叛變報復，希律王tī耶路撒冷以外ê荒野、獨立山頂，開真tsē人民ê稅金，另外起造真tsē所在豪華ê行宮堡壘，有：耶利哥行宮、馬撒大堡壘、希律堡（tī伯利恆南郊）kah約旦河東岸ê馬卡努斯。行洗禮約翰hō͘ 大希律ê kiáⁿ安提帕監禁tī tsia。有一pái生日宴會hō͘ 伊叫人斬首。

Tsiah-ê行宮kah堡壘lóng非常豪華。Tī kôan ê所在有三溫暖大浴間，宮庭中mā有水池、花園；tī耶利哥ê夏宮有起造露天劇場；tī馬撒大高地ê堡壘mā有儲存供養1000人享用10年ê糧食大倉庫。Tsiah-ê地方lóng是希律王準備萬一伊ê王位被叛軍奪取ê時逃難生活ê路用，平時當做伊度假ê路用。

5）擴建耶路撒冷第二聖殿︰偤太人第一聖殿是由所羅門王登基ê時起造ê（公元前957年），主要建材是tī耶路撒冷開採挖出ê石材kah tùi黎巴嫩運來珍貴ê香柏木。殿內ê妝thāⁿ是用黃金包裝，金碧輝煌。M̄-koh，tī公元前538年tòe偤大國被巴比倫王消滅，聖殿mā被摧毀；到公元前520年，偤太人tńg來到耶路撒冷重建聖殿，tsit座聖殿歷史上稱做第二聖殿；m̄-koh規模無大。

因為án-ne希律王為tio̍h koh再扶tháⁿ偤太人，平衡in對伊ê大建設所開銷ê大金額稅金ê怨嘆，tī公元前22年開始動用一萬名工匠，一千輛車運搬大石頭kah木材來改造第二聖殿，總長50公尺，koân 10公尺（加高）；使用ta̍k塊ê大石長12.5公尺，koân 4公尺，闊6公尺ê大石當做聖殿堅固ê壁堵，聖殿內是用金銀妝thāⁿ。

偤太人講︰第二聖殿ê重修工程總共46年tsiah完成；其實聖殿kah它ê周圍ê柱廊kah細部工程，到公元64年tsiah全部完工。可惜，tsit座非常壯麗ê聖殿全部完工6年了後，to̍h是因偤太人革命，hō͘ 羅馬兵tī公元70年全部拆毀，用火火燒。聖殿ê黃金tùi石頭空隙流出來，hō͘ 羅馬人挖走，mā因為án-ne，大石東倒西歪，無kah兩塊石頭相疊，tú應驗主耶穌ê預言（馬太24︰2）。